طرف واحد
بارت11
امي منعتني احچي ويه فيصل واني اعرف امي گلبها رقيق للعصر قنعتها احچي ويه فراس
فراس هسه عنده بنيه اسمها طيبه اتصلت بيه واجانا للبيت
ابو طيبه شديصير ويه فيصل ادمان وديون ليش عفتوه
شتعرفين فيصل ياخذ حچايه ورط نفسه ابوي گله بيع البيت ورجع للبنگ فلوسه ميگدر يسويها لان هدى بعقد الزواج راح تطالب بنص البيت باعتبارها زوجه وميگدر يستخدم التأمين للعلاج لان شغله راح يعرفون هو مدمن ويطردوه
والحل شنو نعوفه يشرب ادويه إلى أن يموت عندي حل ساعدني بيه الله يخليك
بعدچ تحبيه خبله
مو قصة حب لو انت بمكانه هم اوگف وياك أن فتحت عيني للدنيا لگيتكم گبالي والله يدري بغلاكم عندي واعرف خالتي وخالي شگد تعبوا بتربيتكم حرام هذا كله يضيع فدوة خلي نساعده
ولچ والله منگدر نسوي شي علاج الادمان اليوم بالمصحة يكلف كذا الف وهو اصلا ميريد يتعالج
الفلوس موجوده اني عندي التعويض مال حادثتي واني زغيره موجود بالبنگ مامحتاجته انطي الك وعالجه واذا ميقبل يروح نجبره مو بكيفه
والبيت وشغله وهدى كل هذا وضعه معقد
البيت من يدخل مصحه نبيعه وهدى بس تعرف البيت راح وفيصل يتعالج تركه اني اعرفها زين فدوه فراس ساعدني مااگدر اشوفه هيچ والله عبالك اني المدمنه مو هو بس مااريد يعرف بالفلوس گله من عندك
وافق فراس وحلفلي ميگول ابد مهما صار وگلي لترجعين للكليه هسه لحد ميدخل المصحه وهو هذا الجزء الاصعب إقناع فيصل بالعلاج
ثاني يوم فيصل طلع للشغل رادتني خاله احلام رحت گالت تعاي ندور غرفته وين الادويه دخلت الغرفه هاي الغرفه شگد حلمت بيها ادخلها عروس لفيصل مو ادور ادويه حتى طباعه متغيره كان يرتب ملابسه ابد متبقى برا الخزانه لگيت الادويه بجيوبه وجوا المخده هواي الظاهر كان يشرب اكثر من مرة باليوم اخذناها وذبيناها العصر فراس عرف ذبينا الادويه اخذ مفاتيح الغرف وگال اليوم نجبره فهمنا نشيل شكو شي جارح او زجاج لان فيصل اصلا عصبي ردت اروح لبيتنا لان ماتحمل اشوفه بلحظة ضعف فراس گال ابقي حتى تعرفين احنا معايفيه هوعنيد رجع من الدوام گعدنا كلنا نتغدى فيصل ويانا اني لحد الان محاچيه وياه كلمه ولاهو حسيت يريد يستفزني مقهور مني اندار على فراس وگله طيبه راح تتخبل من وجه هاي صاير شوارع تستاهلين ماخذة راحتها هناك تصعد حصان ولد والي يخابرها تحضره
گمت اروح فراس گال اگعدي ماسكت فيصل
شنو نسقت وياك هالمرة لچ ليلى رجلچ راح هسه تگله احبك ودز صورها اله سوتها وياي
رد فراس الشارب اليوم غير الادويه الي تاخذها
عرفت راح تكبر المساله طلعت اركض گام وراي فيصل لزمني من ايديه أصابعي مكسورة وضربني شتسوين هنا ليش نهزمتي وعفتيني وجهي كان بعده مورم وضربني عليه حيل گاموا أهله كمشوا مبقى حچايه مگالها عليه ابو وفراس كمشوا اديه مگدرت اطلع لان وجهي صار كله دم يجري مااشوف تركوه وجوي عليه حتى هو صحى على نفسه اخذتني خاله احلام على البيت واسمع صوت العراك بينه وابوه وفراس امي شافت وجهي هي متعرف تتعارك
بس بذيچ الساعه عرفت راحت على فيصل ورجعت گوة تتنفس سألتها گالت أخذوه للمصحه باچر تسافرين ومترجعين هنا إلى أن تسمعين فيصل ميت لو متزوج هدى
مسافرت لان اريد اطمئن اجى فراس گال دخل المصحه ماكو زيارة ولاتلفون يمكن مرة كل أسبوعين وأخذت إجازة من شغله وام فيصل خابرت هدى گالتلها فيصل يتعالج من الادمان
گالت هدى
حظي اسود شورطني ويه واحد مدمن
هي الي وصلته لهاي الحاله بت الكلب
اعتذر فراس وفهمته لازم اسافر بس ارجع مشوار بدينا لازم نكمله
فراس گالي جملة اريدكم تقروها
ترى تصرف فيصل البارحه معناه مقهور منچ وليش ينقهر منچ لو مايحبچ تدرين لمن صارت عندي بنيه گلي سميها سوزي بس امچ مقبلت گالت بنتي ماماتت هو الي مارادها فكري بيها سوزي فيصل يحبچ
هسه هذاالحچي مو مهم بس خلي يصير زين
رحت وياه للبنك خليت اسمه وياي بالحساب گتله تصرف بكيفك وحتى البيت مال فيصل ادفع للبنك بين مينباع
مچنت اتصرف من دافع الشفقه ولا عندي امل بفيصل لان هو موصل لهاي المرحله لو مايحب هدى تصرفت لان فيصل حب عمري كله صورته حلو بخيالي شاب وسيم قوي مااريد هاي الصورة تتغير والفلوس اني ممحتاجتها سنين صار بالبنك دراستي متكفله بيها الحكومه وراتب عندي من الدوله رجعت للكليه تاخرت بعض الدروس بسسب الحادث وافكر بفيصل اتصل بفراس يوميه احلفه ميضم عليه شي يگول اروح للمصحه اسالهم بس مااشوفه والأطباء يگولون عنيد...يتبع
