ومن نلوذُ لسواه .💙

الجزء الخامس

لما صحيت الصبح كان يوم جمعة ودا اليوم الوحيد الي  بقدر اقعد مع بابا فيه براحتي بس مكنتش عارفه لان دماغي كانت مشغوله بزعل مريم والي زود الموضوع اني مبشوفهاش يوم جمعه يعني مش هعرف اقابلها ونتكلم بس بردوا مسكتش اتصلت بيها كتير علي موبيلها مردتش عرفت انها مش طايقه تكلمني فا اتصلت بمامتها مردتش ورجعت اتصلت بعد ساعه كدا لقيت مامتها بترد وصوتها زي ما يكون عياط كدا 
- ايوا ي خديجة ي بنتي ..
- ايوا ي طنط ازيك هي مريم مبتردش لي انا عايزة اتكلم معاها
- مريم في المستشفي ي خديجة من امبارح بالليل وانا معاها
طنط قالت الكلمة دي ونزلت عليا زي الصاعقه والموبيل وقع مني وماما كانت داخله الاوضه تاخد حاجات شافت الموبيل وهو بيقع وانا بعيط مسكت الموبيل وردت علي مامت مريم وفهمت منها وبعد كدا قعدت جنبي وقالتلي
- اهدي ي خديجة مريم كويسه ي حبيبتي هي راحت المستشفي عشان جالها هبوط وانتي عارفه مريم ضعيفة واي شوي زعل بياثروا فيها .
حاولت افهم من ماما هي في مستشفي اي عشان اروحلها وفعلا لبست وكنت نازلة خلاص لقيت بابا بيقول استني انا جاي معاكي
نزلنا وفي الطريق بابا قالي
- اي الي حصل ومريم لي في المستشفي .. ؟!
- مفيش ي بابا يوسف كلم مريم وقالها كل حاجه وانا مكنتش قولتلها فا مريم افتكرت اني مش بثق فيها .
- خلاص لما نروح انا هتكلم معاها وافهمها
وروحنا المستشفي لقينا مامت مريم سلمت عليها وانا بعيط وسالتها علي مريم شاورت علي الاوضه بتاعتها وانا جريت عليها واول ما شوفتها قعد اعيط وانا حاسه بالذنب ان انا السبب وقعد اقولها سامحيني بس هي كانت نايمه فضلت قاعده جنبها لحد ما فاقت واول ما فاقت كنت انا ساعتها ببص في الارض وبقول انا السبب انا اسفة سامحيني لقيتها بتقولي
- ما انتي لو محترمة كنتي جبتيلي حاجه وانتي جايه مش تدخلي عليا بايدك فاضيه كدا .
ساعتها محستش بنفسي غير وانا بضحك وبترمي ف حضنها وبقولها
- ما انتي لو محترمة مكنتيش قلقتيني عليكي كدا احنا متفقناش علي مستشفيات ي مريم احنا قولنا اخرنا شوية تعب في البيت وبس
- كمان مستخسره تيجي المستشفي عشاني يعني مزعلاني وخلتيني اروح مستشفي وكمان حضرتك زعلانه اني دخلتك مستشفي قومي روحي ي خديجة ومش عايزة اشوفك تاني قومي ..
قعدنا نهزر شوية انا وهي ومامتها وبابا واقفين يضحكوا علي توم وجيري الي احنا فيه وعلي تريقتي علي مريم وطبعا مكنش حد فينا عارف يتكلم علي الموضوع عشان مامتها فا اول ما ماتها راحت تجيب حاجات .
بابا بدا يتكلم مع مريم وانا قاعده ساكته زي ما قالي
- بصي ي مريم ي بنتي الموضوع اتقالك غلط ويوسف دا حسابه معايا بعدين , فعلا خديجة كانت بتكلمه بس في يوم خديجة تعبت وكلمت البيه قالها مش فاضي فا تعبت اكتر وبالعافيه لحد ما بدات تحكيلي ، الي عايزة افهمهولك ي بنتي ان خديجة اتغيرت علي ايدك وبقت بتضحك ودا كله بسببك انا مكنتش ببقا معاها دايما لكن انتي معاها دايما وهي معرفتش تحكيلك عشان هي خافت تبعدي خافت متفهميش انها اتغيرت ومعاكي انها غبيه في الحركة دي بس متزعليش منها ي مريم دلوقتي انتوا ملكوش غير بعض ..
- ماشي ي دكتور بس كانت ع الاقل فهمتني انا والله ما كنت هعمل حاجه بس كلام يوسف دا عصبني وتعبني جدا .. بس خلاص حصل خير وانا مش زعلانه منها دي اختي ي دكتور .
هي خلصت الكلمة دي وانا حضنتها بعدها وقعد اعيط عملت زي ما الحجة فاطمة قالتلي اترميت في حضنها وعيط وهي كمان عيطت .
بابا كان عايز يروح يتكلم مع يوسف ويزعقله بس قال لا كدا هيعمل مشاكل من مفيش وهو بالي عمله كدا بين انه جبان وعايز يعمل مشاكل وخلاص عشان يثبت انه لسه موجود في حياتنا .
عدت فترة ومريم خرجت من المستشفي ورجعنا انا وهي زي الاول واحسن وعرفتها علي الحجة فاطمة وعلي الي حصل يوم ما اتخانقنا قعدت تقولي
- هو ربنا بيحبنا اوي كدا ي خديجه يعني باباكي يصالحنا والحجة فاطمة تقابلك يوم ما زعلنا وتحكيلك عن جميلة  ربنا كريم اوي ي خديجة .
- ربنا اكرم من اي حاجه ي مريم ربنا كريم ورحيم ربنا عايزنا نفضل الصحبة الصالحة الي تساعد بعضها علي دخول الجنة عشان كدا مرضاش اننا نتخانق ونزعل انا اسفة ي مريم اسفة علي اي حاجه عملتها او هعملها وعايزاكي تفضلي معايا عشان انتي سندي انا من غيرك هقع .
- باذن الله مش هنبعد ابدا وربنا هيفضل معايا انا وانتي ..
الامتحانات بدات وانا بدات التعب تاني بس المرادي مريم كانت معاايا كانت بتطمني مكنتش بتسبني اخاف ابدا كانت بتحل محل بابا في حاجات كتير بس دا مش معناه اني استغنيت عن بابا دا هو الخير والبركة بردوا . مريم كانت بتخليني اصلي كل يوم قيام لليل وادعي بالي نفسي فيه كلية بقا صحة اي حاجه وكان دايما اكتر دعوتين نفسي فيهم هو ان مريم تفضل معايا وان ربنا يرزقني بهندسه . ايوا انا بنت ونفسي في هندسه وعارفه انه صعب  اقنع بابا وماما بحاجة زي دي عشان هما بيقولوا ان البنت ملهاش هندسه هتتخرج تشتغل اي بس انا مكنتش بركز وبحلم بهندسه بردوا . لما ربنا وقفني انا ومريم في الترم الاول وجبنا درجات كويسه رجعنا نروح دروس الدين تاني في الاجازة الصغيره وكانت المدرسة بتتكلم علي موضوع واحد كل مره هو النقاب هل ان النقاب فرض ولا سنة هل الحجاب الصحيح هو الي بستر الجسم وبيكون فضفاض مش محدد كانت الاسئلة دي المدرسة بتجاوب عليها فا في مرة كانت بتقول ان النقاب فرض انا استغربت جدا ومقدرتش اسكت وقولتلها
- فرض ازاي والي اتفرض هو اللبس الفضفاض بس .
طبعا انا كنت دبش وطريقتي غريبه بس هي ردت بكل ادب وقالت
- النقاب فرض وجمهور العلماء اجمعوا انه فرض في ايام الفتن وواحب الاعمال الي الله هي التي فرضها وخليني معاكي ي ستي انه مش فرض وسنه تكرهي انك تتشبهي بامهات المؤمنين والرسول قال في حديث رواه ابو داود " من تشبه بقوم حشر معهم " يعني تخيلي كدا انك بتتشبهي بامهات المؤمنين في لبسهم وصفاتهم هتحشري معاهم يوم القيامه يعني انتي كدا كدا لو لبستيه مش هتخسري حاجه بالعكس انتي كسبانه في الحالتين .
واحده من الي قاعدين في الدرس اصغر مني تقريبا قالتلها
- طب تعملي اي في الي نفسها تلبسه بس اهلها رافضين
- تصبر مش عليها غير الصبر والدعاء هي اه لو لبسته من وراهم مش غلط ولا يعتبر اعتراض علي اوامرهم ان حاجه تاخد عليها ذنب بالعكس هما الي هياخدوا ذنب انهم رفضوا بس لما يبقوا راضيين عنك وانتي لبساه برضاهم هتحسي ان الدنيا كلها معاكي انتي ادعي انهم يوافقوا اثبتلهم انك قده اعملي حاجات تثبت انك قده قدامهم اثبتلهم انك عايزه تلبسيه مش عشان موضه او عشان تستخبي من الحاجه لا تلبسيه عشان انتي عايزة الستر والرضا من الله تعالي .
خلص الدرس وانا ومريم ماشيين نتكلم في الموضوع دا هي كانت بتقول انها بتتعب منه وقلعته وهي في السعوديه عشان كان بيتعبها وانا كنت بقولها اني مش هعرف البسه غير وانا مقتنعه بيه تماما وان كلام المدرسة اقنعني نص نص بس واني لازم اثبت لنفسي الاول اني عايزة البسه عشان اقدر اثبت لاهلي .
روحنا وقعدت اذاكر لحد ما بابا يجي عشان كنت عايزة اساله اكتر عن الموضوع واعرف رايه . علي الساعه 10 كدا كان جه واستنيت بعد ما كل وقعد شوية وبعدها قولتله
- بابا انا عايزاك في موضوع
- اتفضلي ي خديجة في اي ..!!
- هو حضرتك اي رايك في النقاب
- قالي انهي نقاب النقاب ليه كذا نوع وكذا معني
- مش فاهمه ي بابا ؟!
- قالي بصي ي خديجة النقاب ليه انواع كتير غير الي احنا فاكرينها يمكن دا راي انا علي الاقل .. النقاب هو نقاب اللسان يعني تمنعي لسانك  انه يقول اي لفظ او اي نميمة وتتعلمي ازاي تتعاملي مع الناس تكوني عارفه تقولي الكلام الحلو وعارفه ازاي تخالي الناس تتقبل منك النصيحه من غير نفور , ونقاب العين تمنعي نفسك من انك تشوفي اي حاجه تغضب ربنا تمنعي نفسك من اي نظرة لولد العين تزني ي خديجة ونقاب الاذن تمنعي نفسك من انك تسمعي النميمة او اي حاجه تغضب ربنا , ونقاب العقل انك تقدري تحكمي بعقلك الشئ دا حرام ولا حلال تقدري تحكمي تصرفاتك بعقلك ومتسمحيش لاي موقف انه يخليكي تعملي حاجه غلط وتقدري تتعلمي عن الدين صح وتقدري تميزي صاحب السوء من الصاحب الصالح , واهم نقاب ي خديجة هو نقاب القلب انك تتحكمي في قلبك انه يحب اي شهوه من شهوات الدنيا ويتعلق بيها لدرجة انها تنسيه الآخرة الرسول قال ان القلب والمشاعر الحاجتين الي الانسان مبيقدرش يتحكم فيهم فا دعي ربنا انه يسامحه عن مشاعره . النقاب ليه مليون معني غير الي احنا شافينه وعارفينه ي خديجة ..
- يااه ي بابا كل دا .. طب انت اي رايك لو خلتني البسه
- لو انتي قده وحاسه انك قده البسيه وهساعدك علي دا بس بشرط تثبتيلي انك قده وانا هلبسهولك .
- اثبت ازاي ي بابا !!
- البسي انواع النقاب الي قولتلك عليها الاول وانتي هتكوني اثبتي لنفسك انك قده وانا معنديش مشكله انك تلبسي خمار لحد ما تقدري تلبسي نقاب ولو عايزة هجبهولك بكرا الصبح .
- بجد ي بابا ياريت وتبقا خطوة كويسة وتمهيد لطريق النقاب وكمان هات لمريم عشان هخليها تلبسه معايا المشوار بداناه سوا من الاول
- ماشي ي وردتي بكرا الصبح هنزل اجيبلك اخمرة اكتبي انتي بس الالوان الي محتجاها ليكي ولمريم وان شاء الله هجبهم بكرا وربنا يحميكي انتي وهي ويحفظك يارب
ضحكت ووانا فرحانه جدا بكلام بابا الي فهمني يعني اي نقاب بجد
- جزاك الله خيرا يا والدي يلا اتفضل رووح نام في صلاة فجر عايزين نصحي نصاليها نصبح ع خير .
بابا ضحك وباس راسي وخرج من الاوضه وطفي النور وانا قعد افكر هل انا فعلا لبست كل انواع النقاب الي بابا قال عليها طب لو انا لبست النقاب هقدر اقنع مريم تلبسه تاني بس هخاف يحصلها حاجه قعد افكر كتير لحد ما تعبت ونمت وصحيت علي اذان الفجر الي الحمدلله بقيت بصحي عليه لوحدي من غير ما بابا يصحيني بل دا انا الي بقيت بصحي بابا . صحيت وصليت الفجر وعملت فطار لماما وبابا وخلت كملت نوم لاني كنت مصدعه وبعيط من كتر الصداع فا مقدرتش اصحي واروح الدرس لاني نمت جامد لقيت مريم جايه تصحيني بالضرب طبعا وما ادراك ما ضرب مريم . وقاعده تزعق فيا انا حسيت ان في مصيبه طلع كل دا عشان مرحتش الدرس بصتلها بقرف وانا نايمه وقولتلها
- ارححميني ي مفتريه تعبانه ومش قادرة اتحرك
بس طبعا ولا هي هنا ولسه مكمله ضرب وشد بطنيه من عليا وقاعده تقولي
- اصحي ي مهزأة ما انا معرفتش اربي الهانم نايمه وسايبه الدرس قال اي تعبانه وهي بتتمرقع وعايزة الضرب
صحيت وقعد ع السرير وبصتلها بقرف
- انتي مستغليه اني تعبانه ومش قادرة اكلمك صح
وانا بكلم مريم لاحظت كيس كبير كدا علي المكتب وراها فا قولتلها
- هاتي الكيس دا كدا ..!
جابته وبفتحه لقيت الاخمرة الي بابا قالي عليها ومن كل لون اتنين واحد ليا وواحد لمريم زي ما قولتلها وعلي الكيس ورقة مكتوب فيها مبارك عليكي ي وردتي .
فرحت اوى وقولت لمريم الي واقفه مش فاهمه اي حاجه
- قوميني قوميني وشوفي الكيس في اي
- اي دا ي خديجة
- دي اخمرة هنلبسها انا وانتي لحد ما نقرر نلبس النقاب وتبقا اول خطوة في طريق الوصول للنقاب .
- انا مش فاهمه حاجه مين الي جابهم
قعد وفهمتها الي حصل بيني وبين بابا وانه اتفق معايا وفهمني وكل دا
وقولتلها اني قولتله يجيب من كل حاجه اتنين ليا وليها عشان نفضل سوا حتي في الطاعه . فرحت مريم لما قولتلها كانت اكتر مني وقعدت تتنطط في الاوضه ودا لان مريم اهبل مني بمراحل يعني ووافقت وقالت هتاخدهم توريهم لمامتها ومامتها عمرها ما تقول لا . خدتهم فعلا وانا صحيت عشان اصلي وهي مشيت عشان كانت اتاخرت وانا واقفه معاها علي الباب شوفت واحدة منتقبه خارجه من الشقه الي جنبنا الشقه دي اصلا كانت فاضيه هي سكنت امتي ودعت مريم ودخلت لماما هي اكيد عارفه حاجه قولتلها
- هي الشقه الي جنبنا سكنت ي ماما ؟!
- اه .. بنت و جدتها باباها ومامتها عملوا حادثة وهما بيعملوا عمرة فا الشقه الي كانوا قاعدين فيها البنت تعبت نفسيا منها وكانت بتقعد تعيط بالليل لوحدها فا جدتها نقلت للشقه الي جنبنا عشان تريصح حفيدتها وعلي فكرا البنت دي قدك ي خديجة بس هي ادبي تقريبا
ضحكت اوي الناس لسه مكملوش اسبوع وامي جابت الاخبار دي كلها منين لا وبتقولي ادبي تقريبا ما علينا
- الله يرحمهم ويصبرها ويخفف عنها تعبها دا
- عارفه ي خديجة لو انتي ومريم اتصاحبتوا عليهم هتخرجوها من الي هي فيه دا دي باين عليها في حالها خالص ولوحدها
- ما انا معرفش اسمها اي او في مدرسة اي او حتي دروسها فين ي مااما بس اوعدك هحاول وانتي عارفه مريم مبتتوصاش في حاجه زي دي
- بصي الي اعرفه انها هتنقل مدرستك واسمها زينب حاولي انتي بقا تتعرفي عليها بطريقتك او ممكن تعزميها هي وجدتها عندنا ..
- اهدي ي ست الكل مش كددا الناس لسه مكملوش اسبوع وبعدين اي جو جمعيه الاورمان دا وصحيح انتي عرفتي كل دا ازاي انتي لحقتي
- ي بنتي عم سيد البواب قالي كل حاجه وقال كمان انهم اشتروا الشقه مش اجروها يعني قاعدين معانا ع طول .
- طب بصي ي ست الكل خليكي في الاكل الي هيتحرق دا وانا هروح اوضتي اكلم مريم واقولها .
ضحكت لماما علي كمية الاخبار الي عرفتها والناس لسه مكملوش يومين حتي بس دخلت اوضتي واتصلت بمريم مردتش من اول مره قولت يبقا نامت فتحت النوتة بتاعتي وقعد اكتب فيها اي جمل غريبه لحد ما تعبت من صداع الي مبيسبنيش دا ونمت .