رفيدة ردت على عقيل قالت ليهو .. ماعندك قضية معاهو ده .. موضوعك معاي انا .. قال ليها لالا .. لازم اعرف ده منو؟. قالت ليهو ده دكتور مدثر . اخو رحاب زوجة محمود . كدا فهمت؟؟
قال ليها طيب مامشكلة تعالي برة اتكلم معاك ..
مدثر قال ليهو .. ياعقيل ممكن تسمعني .. قال ليهو ايوة يادكتور بسمعك داير تقول شنو؟
قال ليهو عمرها المشاكل مابتتحل بالانفعال .. انت خليك هادي .. . واي حاجة انت راغب فيها في حياتك بتجيبها باللين . والحب . ومابتقدر تنزعها بالقوة .. الحاجة البتنزعها بي قوة مابتنفعك . اسمع كلامي . وحاول اهدأ . واشعر بالرضاء من جواك . واقعد هنا في الكنبة دي ..واتكلم معاها بي الاسلوب البتحب انها تتكلم بيهو معاك .. انا بدخل جوة لي محمود .. طبعا محمود جوة ماسامع الدراما دي كلها .. ولاعارف عقيل جا .
عقيل قال ليهو حاضر يادكتور . والله كلامك منطقي .. بس انا والله ماعايز افقدها .. اها مدثر دخل جوة ..
وعقيل قال ليها تعالي معاي برة .. عشان نتكلم بي راحتنا .. مشو لي اخر الشارع .. في ست شاي تحت شجرة كدي.. قعدو جمبها ورفيدة صارة وشيها . وتعاين للواطة وتتلفت على جنياتها جاي وجاي ..
بقى يتكلم معاها .. قال ليها انا عارف انو المرة الفاتت.. انا شديت معاك في الكلام وفقدت اعصابي .. وجبت خارجية .. لكن والله ندمت بعد ما مشيتي .. قربت ادق راسي بالحيطة .
وما كنت متخيل انك ح تبيعيني بالسهولة دي .. انا سمعت بالبنات البياعات .. بس انتي ما منهن ..انتي اغلى انسانة في حياتي .. بعدين اي زول بغلط .. بدوهو فرصة اخيرة .. انا ما طالب منك حاجة .. غير فرصة ولو لقيتيني ما اتغيرت ..اعملي الفي راسك ..
قالت ليهو يا عقيل انا مابنكر اني بحبك اكتر من حياتي .. بس اسلوب حياتك ماعاجبني .. وانا ماعايزة كدا ..
قال ليها ياتو الماعاجبك ؟.. قولي الحاجة الماعاجباك . والله عشانك اتخلى عن حياتي ..
قالت ليهو الشلة الباريها . والسجارة الخدرا . وسب الدين . لالالا انت مابتنفع معاي ..
قال ليها والله من الليلة .. تاني الشلة اقاطعهم كلهم . والله .اكبرها منهم في اي حتة اشوفهم فيها .. والسجارة .. اقسم بالله تاني الا السجارة الحمراء ومن الليلة ..
وسب الدين .. والله بجيني في لحظة غضب .. من دون ما احس .. لكن والله تاني لو اتقلبت الدنيا مابسب الدين .. وعشانك ح اتغير كلو كلو . وبراك بتشوفي . بس انا بحبك ومابقدر اعيش من دونك .. لو خليتيني بضيع يارفيدة واحتمال اجن ..
يازول .. رفيدة استغربت في الكلام الاول مرة تسمعو من عقيل المفتري . والحنية الغريبة البتكلم بيها .. ويادوب حست بي حب عقيل .. والخمسة دقايق دي سببت ليها رجه عجيبة .. ونفضت الغبار عن الحب الجواها لي عقيل .. لانها اساسا . دكتور مدثر فكرت فيهو بي منطقية ومقارنات عقيلية .. وجواها حب عقيل كامن كالاسد النائم .. وكان مدفون بالانبهار بالشي الشافتو من مدثر .. لكن عقيل الان ظاهر ليها اتغير 180 درجة .. وكلامو ده وطريقتو بدل على كدا ..
