مهاب وقف وهو يهتف بغضب: فيها إنهم ضيعوا سلوم العرب يوم خلو بنتهم تدرس وتشتغل ذا الشغلة
ثم أردف بسخرية: وبعدين وش فيه زود على اللي رفضتهم الشيخة كاسرة؟؟
كاسرة بسخرية مشابهة له: فيه إنه ولد زايد آل كسّاب.. يكفيه ذا الشيء ميزة
ثم أردفت بحزم: إذا اتصلوا فيك يبون ردنا..
قل لهم إنه حن موافقين.. ومتى ما بغوا الملكة.. يجيبون شيخهم..
مهاب بغضب: يامسودة الوجه ما تستحين أنتي.. ذا كلام تقولينه لأخيش
كاسرة بهدوء عميق واثق: بصراحة ما أشوف شيء غلط في اللي أنا قلته.. وما ينقال بغير ذا الطريقة..
وين الشيء اللي خلاني ما أستحي في نظر جنابكم؟؟
رجّال تقدم لي وأنا موافقة عليه..وانتهت السالفة
مهاب بذات الغضب: بس أنا ماني بموافق..
كاسرة وقفت وهي تهز كتفيها بثقة: ليه أنت اللي بتزوجه..؟!!
أنهت كلمتها ثم خرجت متوجهه لغرفة جدها..
بينما مهاب كان ينتفض من الغضب: أبي أعرف هذي وش اللي اقنعها فيه..
أكيد إنه جدي اللي اقنعها.. زين ياكاسرة دواش عندي
مزنة بهدوء حازم: اقعد يأمك الله يهداك.. اقعد..
مهاب جلس.. بينهما أكملت مزنة حديثها بذات الهدوء:
الحين يأمك ولد زايد أنت ترد شيء في صلاته؟؟.. في أخلاقه؟؟ في شغله؟؟ يعني هل هو بطالي ومعتمد على أبيه؟؟
مهاب يتنهد بعمق: لا والله ماني بباهت الرجّال.. رجّال مصلي وثقيل وكلمته موزونة.. ومعه ماجستير وعنده شركة له بروحه..
صحيح إنه أحيانا تحسين إنه شايف حاله.. بس ذا ظاهر.. والله أعلم بالباطن.. انا ما أعرفه زين أحكم عليه..
حينها ابتسمت مزنة: شايف حاله.. أختك شايفة حالها أكثر منه
يأمك ما صدقت إن كاسرة توافق على حد
تكفى يأمك لا ترده عشان شيء ماله معنى... والله لا ترده إنه كاسرة ماعاد توافق على حد
لا توقف في وجه أختك يأمك وتردي نصيبها عشان شيء في رأسك...
آل كسّاب عرب أجواد... ونعرفهم من سنين... ساسهم طيب.. وعرب فيهم وصل وخير..
تنهد مهاب ثم زفر بحرارة: خير يمه خير....
************************************
" وش فيها أختش ترّقّص كنه شاب تحتها ضو؟؟"
همس عالية الخافت في أذن سميرة..
وهي تنظر لنجلاء التي تدعك أناملها بتوتر وهي تطوق خصر شقيقها صالح الجالس على رجليها
بينما أم غانم وأم صالح مشغولتان بتبادل الحديث معا..
سميرة تبتسم وتهمس في أذن عالية: يأختي خايفة صالح يجي وهي هنا..
