تمر الغيوم و تمطر اوجاعاً وغُربه..
ليست غُربة وطن ولكن غُربة قلب!
غُربة روح لم تهنئ بيوم دافئ!
تثير رائحة الحزن العتيق،
تذكي مدامعاً و تحيي ألآماً..
.
،
.
،
.
مضت ايام العزاء ..بكل مواقفها ومراسمها..
كان لا ينفك يستقبل المعزين في منزل عمه..من الواضح ان العم راكان ذو صلات متميزه مع جيرانه واقاربه بل وحتى رجال الاعمال ومنافسيه..
انتهى ذلك اليوم المرهق وهو يهم بالجلوس و يأخذ نفساً عميقاً..رباه ماذا ينتطره من اعباء جديده،..
جلس قاسي بجانبه وهو يسأله/علامك
تنهد وهو يعتدل جالساً/مادري ياخوك احس بداخلي ضياع او صداع شي ماهو مخليني استوعب هاللي صارلي خلال هالفتره القصيره
حاول مساعدته لترتيب افكاره/انت قول لي وش ناوي تسوي؟
فرك جبينه وهو يسترخي/انا حاس بالذنب يا قاسي.. رفضت اتزوج بنته و مات بنفس الليله خايف اشيل ذنبه، قلبي ماهو مرتاح، انا قهرته انا ما قدّرت شيباته ولا كبر سنه..
استغربً حديثه، أراد التخفيف عنه/استغفر الله.. الرجل وقف يومه ومات.. لا تفكر بهالطريقه.. هاللحين ماهو وقت مناسب انك تجلس تلطم..صار عندك عايله اظن هاللحين مافي مجال لترك اهلك، وان بغيت تتقدم من جديد و تتزوج بنت عمك محد رافض، هذا حقك ورغبة عمك..
رد بغضب/انا مابي اتزوج وخصوص بنت عمي هذي. تفهم؟
استغرب ردوده الصبيانيه،فـ عزام معروف عنه ذكائه واتزانه/اظن انك اعقل من كذا، ترى عمرك وصل سته وثلاثين ماعدت صغير، ان ما بغيت بنت عمك تزوجها عاادي تراك تقدر تزوج عليها اللي تبي، او خذي اي وحده من خواتها، مدري ليش انت معقد القضيه؟
رد بغضب/لا ابي اتزوجها ولا اتزوج غيرها يا قاسي.. ارتحت؟
نظر إليه مستغرباً،كيف يقول ذلك، إذن هو رجل يكره النساء حقاً ولم تكن مزحه/عزام طلبتك تزوجها علشان تصير محرم ويصير لك كلمه بالبيت و خله يجيلك عايله وسند..
تنهد وهو يحاول إنهاء هذا الموضوع/يا قاسي قفل ع الموضوع هاللحين ماهو بوقته
يشاهد ذلك الرجل يدخل/من هذا؟!
التفتت عزام وهو يستغرب حضوره،تُرى ماذا يريد المحامي الآن؟!/هلا وسهلا تفضل
بشبح ابتسامه/السلام عليكم يا شباب،
رد الجميع باصوات متفواته/وعليكم السلام..
المحامي/لو سمحت يا عزام بغيتك بموضوع خاص
وقف قاسي وهو يهم بالخروج/انا استاذن.. اشوفك بعدين
جلس عزام وهو ينظر للفراغ.. مازال غير متقبل للوضع الجديد، مازال يشعر بأنه ليس عليه ان يضحي بنفسه للاشيء..!
جلس المحامي وهو يضع حقيبته على الطاوله الصغيره المتواجده امامه/صار اللي صار يا عزام .لازم تقبل الحاصل
وقف وهو غاضب يكاد ينفجر، ما بال الجميع يطالبه بالتضحيه/وش بلاكم الكل يززن على راسي لازم تقبل لازم تقبل.. شايفيني امشي وانتف شعر راسي ومعترض..!
احتفظ بهدوءه حتى هدأ عزام/اسمعني ..انا مقدر مشاعرك.. وادري انك انحطيت بموقف صعب.. وانفرض عليك واقع انت ماتبيه ويمكن حتى مافكرت فيه يوم من الايام.. بس عمك الله يرحمه كان يثق فيك.. لو تتذكر انت بيوم من الايام وصلته وجبت شنطته اللي كان فيها اغراض مهمه ومبلغ وقدره.. وبعد رفضت العوض..
ابتسم عزام بسخريه وتحدث بتهكم/وبعدها قال هذا الامين اللي بيكون بدال ولدي اللي فقدته.. وقرر من نفسه يخليني وصي ومنظم ورثه!! الله اكبر
رد بهدوءه المعتاد/لا.. ماخلاك وصي ولا حتى منظم ورثه على قولتك..
التفت اليه بسخريه/كفايه كان ناوي يزوجني بنته من راسه، يظن انه بهالشكل بيربطني و...
قاطعه صالح بغضب/انت الوريث الوحيد لاملاك راكان ال مناع.. والمتصرف فيها بيع وشراء..!
لم يصدق ما يسمعه.. ذُهل.. التزم الصمت لثواني!!
أردف صالح بعدما هدأ/عمك ما بغاك وصي ولا كلفك بشيء .. هو عطاك كل ثروته مقابل انك تعيش مع هالعايله ، كان شايل هم ذنب ابوك، خايف يكون ظلمه مع انه ماكان عنده علم بوجوده اصلاً..
.
،
.
،
الكل بجانبها وهي تبدو كالصنم الباكي.. دموعها لا تتوقف في غرفتها منذ توفي والدها..
جلست الشموس بجانبها وهي تربت على كتفها وتحتضن كفها/نيفا يا قلبي كلنا فاقدينه.. كلنا موجوعين بفراقه
اقتربت منها اميره وهي تعانقها/نيفا ردي علينا الله يخليك
جلست تلك على الاريكه وهي تندب حظها/نيفا حنا بناته مثلك وربك ترانا نبي حد يواسينا بعد ، يعنك مابعده فراق ولا حبيب يساويه.
التفتت اليها الشموس وهي تغمز لها لتسكت ثم اتجهت بالحديث لنيفا/نيفو حبيبتي تكلمي "طلبتك" لا تشغلين قلبي عليك
تنهدت وهي تبعد اميره عنها/ابي ماما.. نادوها لي ابيها
ابتسمت وهي تسمع صوتها اخيراً لتعانقها/اخيرا سمعت صوتك يا بنت.. خوفتيني عليك
بكت مره اخرى لتتحدث بالاسبانيه/ Quiero que mi madre [أريد أمي]
تنهدت/ابشري اوول ما تعطلين تروحين، وباذن الله يكون نايف بخير ويروح معك بعد زي قبل.
ألتفتت اليها باكيه/تظنين نايف يرجعلنا مثل قبل يا شموس؟
تحدثت تلك بتشاؤم/نايف صاير جماد معاد له صوت ولا يفتح عيونه! صرت اكره ازوره.. من كثر ما أمني نفسي انه يرد علي وبكل مره يخيب ظني ولا يرد علي.
التفتت اليها الشموس غاضبه/ليااال! فال الله ولا فالك.. نايف بيرد علينا.. وبيقوم قريب ان شاء الله.. انا متأكده..
وقفت وهي تهم بالخروج، ما يتحدثن عنه لا تتعدى احاديث مواساه لخاسر.. تشبعت يأساً فلم تعد تستسيغ المواساه/انا بروح اجهز نفسي عندي شغل
التفتت اليها الشموس لتلتحق بها وتوقفها خارج الغرفه/مُصرّه تداومين هناك يعني.. الظاهر ناسيه ان وراك التزامات اهم من تدريس بزارين بالروضه
ابتسمت لها ببرود/انا ما اغير من نفسي علشان احد فاهمه
تكتفت باعتراض/لا ماني فاهمه، ممكن تفهميني!
نظرت إليها بلا مبالاة/ماراح تفهمين.. انتي لو تفهمين ما كان ليومك هذا وانتي بدون زواج
استغربت ردها/ماتعلميني وش دخل زواجي بالموضوع يا ليال خانوم؟!!
ردت بملل/الحديث مع وحده معتده بنفسها مثلك ضاايع.. سلام وراي اشغال.
ستُجن من برود اختها التي تُلقي الكلمات والجمل الغامضه بدون ان تراعي شيئاً، لتلحق بها/ليااال فهميني وش فيني انا وش شايفه علي؟هاااه قوولي
اغلقت باب غرفتها في وجهها وهي ترفض الرد عليها.. لتنزل دموعها، لا تعرف لماذا ينفلت لسانها ويثرثر عن مكنونها في الاوقات الخاطئه، و يصادف ان تلك الشموس هي من تتلقى حمم كلماتها دائماً..
اتجهت لخزانة ملابسها وهي تخرج لبسها الذي ستخرج به لعملها التطوعي.. كونها اخصائيه اجتماعيه تعمل في مجال خدمة المجتمع..
.
،
.
خرجت من غرفتها وهي تتوشح السواد، لتشاهد الشموس تأتي من ناحية جناح اخواتها،فنادتها/شموس!
اتجهت اليها وهي مازالت تغلي من اثر كلمات اختها/هلا يام رواد
ام رواد بابتسامه باهته/وش فيك انتي واختك طلعت اصواتكم.. عسى ما شر..
اتجهت معها للسلم وهما ينزلا معاً/مثلك عارفه ليال.. تقول الكلام وماتثمنه..
ام رواد بهدوءها/ماعليه يا شموس انتي الكبيره، تحملي خواتك.. و تدرين ان ليال تحبك و اللي بقلبها على لسانها.. يعني طيبه وماتشيل بقلبها على احد.
تنهدت فهي الاعرف بأختها/ربك يعين..
جلست وهي تلتقط دلة القهوه وتسكب لزوجة أبيها ولنفسها وتحتفظ بصمتها...
ألتفتت لصالات القصر الخاليه من حولها/وين باقي اخوانك
اخذت رشفه من فنجانه وهي تجيبها/اميره تركتها بغرفة نيفا.. ورواد ..والله مادري وينه مختفي
صوت قادم من خلفهم/اخذه عزام معه.
التفتت لصاحبة الصوت/عمتي هند وين كنتي
جلست بضيق وهي تضع هاتفها المحمول على طرف الطاوله وتأخذ لها فنجاناً/كنت اكلم عيالي
لاحظت هدوئها على عكس العاده لطالما بكت بعد كل مكالمه/شلون تركي واخته شهد
ردت هند بتنهيده/يقولون بخير الحمدلله..
تحدثت الشموس بحقد/انا عمري ما شفت اخس من طليقك هذا ، شلون حارمك من عيالك لا وما جابهم لك في عزاء خالهم!!.. عمتي شلون اصبرتي عليه كل هالسنين؟! ماني قادره استوعب كمية صبرك
لمعت عينيها بضيق/ماكان بيدي يا شموس..اصبر لاني اخاف يحرمني من عيالي
الشموس/وهذا انتي ماستفدتي من صبرك ونفذ اللي براسه وحرمك منهم
ابتسمت بدمعه/انا ماتركته الا بعدما كبروا عيالي وصاروا يعتمدون على انفسهم وماهم بحاجة رعاية احد ويعرفون كيف يتأقلمون بدوني
تنهدت الشموس وهي تتذكر والدتها/يعنك اني للحين ما سليت عن فقد أمي.. وجاءت وفاة ابوي تكمل الناقص الله يرحمهم جميع ويصبرنا
مسحت طرفها من دمعتها وهي تتذكر اطفالها عند اهل زوجها السابق/في الغياب والفراق مضطرين نتأقلم ونسلى يا شموس.. الدنيا اختبار.. ماهي دايم سعه
ابتسمت لها الشموس، فهي تعرف ما مرت به و تحترمها/ربي يشرح صدرك يام رواد، ويعوض صبرك
ام رواد بابتسامة امتنان و لمعة حزن/ابشرك عوضني ربي بزوج ريحني من عذابي كله. وكان معي مثل النسمه البارده لين مات الله يرحمه،عزاي الوحيد ان لي منه عيال وانه سبب في معرفتكم..
هند بتنهيده/الله يرحمك يابونايف..
ترحم الجميع على الفقيد.. لتصمت الشموس وهي تفكر بحقد لماذا ذهب عزام تلك الليله ولماذا لم يتمم الملكه كما خطط لها والدها..، أيظن انها كانت من اقترحت الزواج وانها من الممكن ان ترضى ان ترتبط به لسبب كهذا؟!
هو حقاً غبي! هو حقاً لا يعرفها..
.
،
.
،
.
،
.
