فصليه وعشق

فصليه وعشق الجزء الثاني

💍الجزء الثاني 💍

عباس ،،،جنت مااحب اتدخل بأمور والدي الشيخ ولا الي بالمشيخة اصلا بالرغم ابوية دائما جان يكولي لازم من تتخرج تجي لقريتك وتخدم اهلك وناسك ولازم تحضر كعدات ومجالس الشيوخ وتتعرف ع عاداتنا وتقاليدنا اكثر لانك الشيخ مستقبلا بعدي جنت اضحك واكول ويني ووين المشيخة ياشيخ ربي ينطيك طولة العمر

امي ،،،انت شيخ ابن شيوخ والمشيخة متلوك الا لأمثالك رجال ابن رجال شيمة وغيرة وحكمة وعلم شناقصك والله ياوليدي ميلوكلك الا الغترة والدشداشة وماتكعد الا عليك يازينة الشباب مااحبك من تجينة من المدينة بهذا لبسك الهزل
تقصد ع الجينزات والقمصان والتيشرتات لان اهل قريتنا ميحبون هيج لبس وعدهم عيب تنلبس خاصة بالمناسبات والافراح والفواتح جنت البس الزي العربي المتعارف لاهل قريتنا لكن بالمدينة مستحيل يتقبلون هالزي حتى وان كان لشيوخ فلبس المدينة لاهل المدينة ولبس القرية لاهل القرية وماعندي مشكلة البس الاثنين
كنت من انزل للقرية يتعمد الشيخ يخليني احضر مجالس الشيوخ الي احيانا يحضرها ناس واصلين واحيانا حتى اعضاء بالبرلمان وكان والدي واصل والة مكانتة وكلمتة والكل يسمعلة وياخذ شورى كانوا دائما يكولون انت فخر لمنطقتك ولاهلك ولعشيرتك وبثقافتك وبشهادتك راح تخدمنا وتخدم اهلك وناسك
جانت قريتنة مابيها دكتور فقط مضمد فاتح من بيتة غرفة صغيرة وبجهة مخلي ادوية ويصيحوه دكتور ويوصف وينطيهم علاج يعني ماكان اكو دكاترة لان اصلا ميخلون اولادهم يدرسون ويخلصون دراسة

فاطمة ،،،كانت حالتنة حالة اني وامي من بعد ماطلع اخوي حسين وبأيدة سلاح وقريب المغرب صارت هوسة وناس اختبصت وماكنا نعرف شصاير اجة ابوية ومدنك راسة ومنزل عكالة وجان مهموم وايدة ع كلبة كال حسين تلاغة مع الشيخ وضربة طلقة وانهزم امي خربت واني ويلي ابوية وويلي امي الي بالارض
كمنا نسمع طلقات قريبة وتكسر جام بيتنا جنت كاعدة عند رجل ابوي وخايفة وامي نايمة ع رجلي وراسها بحظني وجانت خايفة مثلي ودمعتها مانشفت ابوية راد يطلع وماخليتة خفت عليه وبوست ايدة ورجلة بس ميطلع جنت خايفة ع امي وابوية حيل واعرف مارح يتركونة اهل الشيخ وعشيرتة اذا مات وجنة ندعي يارب يكون مو ميت

عباس،،، وصلني الخبر بالليل ونزلت اني وخوالي للقرية ومفتهمنا شنو السالفة وشنو صاير وصلنة ولكت هوسة بالديوان مالت الشيخ وناس طايشة وناس تصرخ واطلاقات نار والكل شايل سلاح دخلت اركض ولكتهم مغطي للأسف مالحكت بي ولا شفتة قبل ليتوفى ولا كدرت تفرح بية ياشيخ تمنيت لو اكدر ابجي جانت النار شابة بضلوعي والقهر عصر كلبي عصر تمنيت اشرب من دم هذا الطايش الي غدر بالشيخ جانو عمامي وولد عمامي محزمين وسلاحهم ع خصرهم ونار تجدح من عيونهم وكالو ميندفن الشيخ الا ينأخذ بثارة
جنت بوكتها كاعد يم والدي ومدنك واحس الدنيا كلها اظلمت بعيني وبعد حتى تفكير مااكدر افكر كتلهم هذا مو حجي الشيخ لازم يندفن واكرام الميت دفنة مو وكت الثارات هسة خلونا نستعد لمراسيم عزاء الشيخ
ولد عمامي تخبلوا وطاشوا وماعجبهم الكلام وكالوا المفروض انت الي تاخذ بثار ابوك
واحد من عمامي كال والله كلام عباس عين العقل المرحوم لازم يندفن ويصيرلة عزاء محترم يليق بمكانتة العالم راح تاكل وجهنة
تقدم علية ونطاني سلاح الشيخ وحزامة الي يمتد من الكتف وحزام ع الخصر مع خنجر ذهب مطرز وكلي تفضل ياشيخنا هذا حزام الشيخ وخنجرة ومن اليوم انت شيخ الشيوخ راح اتكلم معاك بصفتك شيخ وكلامي خلي واشر ع كصتي وظل يتكلم معاي جنت مدنك واحس الحمل صار ثكيل ع جتافي وبعدني صغير ع هالمسؤولية وجنت احس كل احلامي تحطمت ومستقبلي الي جنت ارسملة تبخر
رفع راسي دير بالك تحني راسك لغير خالقك انت رجال من ظهر رجال لازم تكون قوي وتصرف بحكمة وتحكم عقلك بكل تصرفاتك الجاي مو سهل لا عليك ولا علينة واحنا بظهرك ياشيخ وحط ايدة ع كتفي
لبست دشداشة سودة وغترة وتحزمت ولبسوني حزام الشيخ وخلالي خنجر الشيخ ع خصري طلعنة نشيع الشيخ وكان تشيع جبير حضروا ناس من برة وحتى سياسين وبرلمانين وشيوخ كبار وحتى قنوات تلفزيونية كانت موجودة وتصور
----------------------------------
لاتنسو التصويت حبايب😉
احداث روعه تنتظركم😍
وتابعو ملفي😙