انت مصيري

البارت 2

صباح يوم جديد
كانت الدنيا مغيمه والجو كلش حلو الصبح كان يوم الاثنين الخط تأخر عليه وطلعت وكفت برا اباوع شلون جو حلو ..كلت انتضر الخط هنا 10 دقايق اذا تاخر أخذ تكسي واروح
رفعت راسي للسما وأخذت نفس عميق واني أفكر انو اليوم ممكن ابلش حياة جديده راح اسمح لنفسي اني أحب وانحب راح أكون سعيده ..كلت كلمات ايجابيه لنفسي حتى تصير عندي طاقه ايجابيه...واني على وضعيتي ورافعه راسي ومغمضه عيوني ما احس الا صوت خشن صاح
:منو انتي شتسوين هنا

فتحت عيني متفاجئه ابيتي ويسئلوني شتسوين هنا
فتحت عيني وياريتني ما فتحتها
هذا بشر على هيئة وحش
شكله يخوف مو قبيح بس مرعب. طويل وصاحب بنيه ضخمه كتاف عريضه حنطاوي عيونه كبار ..
مو من طبعي أركز بوجه أحد بس هذا الشخص لا اراديا صفنت بوجها ..وجهه عابس. ..طابك حواجبه وكانو جنت اتعارك ويا
:كتله انت شعليك
رفع حاجبه بتفاجئ. ..كانو اول مره واحد يتجرأ يجاوبه هيج جواب ..ضل يخزر بيه ما رفع عينه ابد
بس رجع عاد السؤال
:ليش هنا جاوبي عدل
:ه هذا بيتنا ...اني اللي لازم اسئلك انت منو وشتسوي هنا
:باوعلي بنضرة تفحص من فوك ليجوه جنت لابسه تنوره بف واسعه جوا الركبه شويه بس طالعه شويه رجليناتي
سوه حركه بركبته طكطكها حرك راسه يمين ويسار للخلف وراح من يمي
ضليت فاكه حلكي شنو هذا منين وشنو هالطبع كبر
ضليت اباوع وراه شفته دخل لمكان الحرس
الظاهر هذا حارس جديد للسيد أحمد المحترم
جايبلي مجرم مدري مدمن مخدرات مدري مخبل

طلعت من البيت ورحت ع الشارع وأخذت تكسي. .وطبعا اموت من التكسيات بسبب بعض السواق وزحفهم
اني مو محجبه لذلك البعض نضرتهم للمو محجبه غير شكل ويعتبروها غير محترمه ويحاولون يستغلوها ع هالاساس
أبو التكسي تلوك هواي بالكلام وطلعت روحي منه. .شيوصلني واخلص. .خابرت عليه سجى
رديت عليها
:الو
:هلو وتين دكيت عليج اخبرج انو الخط اليوم عطلانه سيارته وما راح يجي. .خلي الحراس يوصلونج لا تتأخرين
:لا حبي اني بالطريق جايه بتكسي شفته تأخر واجيت راح اوصل
:ها زين تسوين لعد منتظرتج
:ماشي باي
سديته وشفته قرب ع الكليه طلعت فلوس
وصلنا انطيته 5 آلاف ونزلت دخلت الكليه وكبل للقسم عندي محاضره

_______________
حازم (الحارس الجديد)
حارس جديد بس عامل قديم عند أحمد هذا الرجال الي اشتغل عنده
اني خريج سجون بس بعدني ما متعين. .لان مثل متعرفون ماكو تعيينات
بالحقيقه اني خريج ..مهندس نفط. .بس الدنيا لعبت بيه طوبه وشمرتني بالسجن 3 سنوات بس شنو من 3 سنوات أكلت بيها تعذيب وكتل ما صاير
انسجنت ظلم ..خابرني صديقي مسوي حادث هذا مو بس صاحبي لا هذا اخوي الما جابته امي. .خابرني
:ها أبو الشباب
:حازم خويه تعالي محتاجك ..سويت حادث
:شنووو صارلك شي حسن حاجيني خو ما تاذيت.
:هسه دتعال صايره هوسه السياره راحت
:انطيني العنوان بسرعه

بيومها سيارتي بالتصليح. ..كلت لعمي صلاح ينطيني سيارته محتاجها ضروري ...انطاني السويج...ركضت صعدت ..شغلت السياره ورحت طاير
وصلت للسيطرة وتفتيش وصايره هوسه واني محترك حرك اريد بس اوصل
وصل سراي بالتفتيش طفيت السياره ونزلت ...كلت للولد الي يفتش بجهاز السونار مال تفتيش
رحمه لوالديك خويه استعجل عندي مشكله.
اصبرلي خويه. .ما بيدي شي الكل يخضع للتفتيش
شويه ونسمع صوت الجهاز بمعنى وجود شي بداخل السياره
كال
:شايل سلاح شي
:لا والله ما شايل
: طلعلي أوراق السياره
لا يا الله رحت بيها.
:خويه رحمه لوالديك والله مستعجل وما شايل شي وداعت امي. .خليني اروح رحمه لاهلك
الولد صاح لصاحبه ...سالم. .كاله ها
كال جيب الكلب يفتش السياره. ..والتفت عليه وكال
وين أوراق السياره وهويتك
كتله السياره مالت عمي ...
باوع عليه...وكال راح أخذ سيارتك ع قسم التفتيش
خرب حظي ..اي والله جنت بوحده صرت بثنين
اتصلت على صاحبي حسن كلتله خويه صارتلي سالفه وما اكدر اجيك أو يمكن اتاخر دك على صالح خلي يجيك
كال ..اخوي أجه وانحلت السالفه. .شنو انت شصار وياك
:سالفه طويله بعدين احاجيك
اخذو السياره بحاضن التفتيش الخاص وصعدو كلب (K9 )يفتش وفجأة الكلب كام يعوي قوي راح المدرب مال الكلب يباوع ويدور ويا وجان يطلع مسدس كاتم!!!!!
راستا بدون سابق إنذار جتفو ايديه ونزلوني ع الأرض وصار المصايح وجابو كلبجه وكلبجو ايديه وصعدوني سياره الشرطه الاتحاديه وخذوني ع المركز اول ما فتت بوجهي لقسم التحقيق...اخذوني لمحقق اسمه رائد هذا داهيه بالتحقيق يستخدم كل أنواع التعذيب النفسي والجسدي ..حتى المجرم يعترف
اول ما دخلوني للغرفة كالوله سيدي هذا لكينه عنده مسدس كاتم....كالهم لحظه وطلع وياهم وسدو الباب ما اعرف شنو حجو برى يمكن أخذ منهم باقي التفاصيل
ضليت اني وحدي أفكر شجاب المسدس بسيارة عمي. .خليت ايديه على وجهي يا رب دخيلك خلصني من هالورطه
تنهدت وضليت أفكر شراح يصير

_________________________

نرجع للواقع

خلصت محاضرتي وطلعت للسنتر وجان اشوف الولد
الي اعترفلي البارحه. ..شفته واكف يم شلة شباب وملتهي يسولف باوعت ردت أركز بشكله من بعيد ما دام هو مكاعد يشوفني
هو ابيض عيونه ما مركزه بلونهن صراحه لأن استحيت اباوع بوجهه البارحه. هو مو كلش طويل يعني اطول مني بشويه وجسمه عادي
شكله عادي بس اني ما يهمني الشكل بشريك حياتي عندي المهم جوهر الانسان
رحت اشتريت شربت وكعدت اشرب ما احس الا واحد كعد كبالي. .طبعا جنت متوقعه منه انو اول ما يشوفني راح يجي وفعلا أجه. ..ارتبكت من كعد وكال مرحبا يا قمر
:مراحب
:شلونج
:زينه .انت شلونك
:بخيراذا أنتي بخير. .اي بشريني فكرتي بكلامي البارحه
:ااا.اي ودنكت راسي استحيت
:اي شنو قرارج استحق فرصه لو لا؟
:أي تستحق
:هههههه اروحلج فدوه فرحتيني والله. .اكيد امي داعيتلي حتى الكمر يكعد كبالي ويبتسملي ويمكن عن قريب يصير ملكي
:عفيه لتحجي هيج استحي
:ههههه راح تخبليني جمال وأخلاق وخجل شتطلع النتيجه الله يعيني بسسس
:ضحكت ودرت وجهي اباوع ع باقي الطلاب وانتبهت انو الشله مالته الجان واكف وياهم كلهم جانو يباوعون علينا
كال يلا حبيبي كومي عازمج على غدا بمناسبة قبولج بيه
:لا اني اعتذر بعدنا بدايه علاقه ميصير
:شنو قصدج. .يعني ما تثقين بيه
:لا مو هيج قصدي بس اني بصراحه ما اعرف شلون اتصرف بهيج وضع. .تريد الصراحه انت اول شاب بحياتي واني اخجل هوايه يعني انطيني مجال مو من أول يوم نطلع برا الكليه
:ماشي حبي باليرضيج
:خو ما زعلت
:لا عادي. .انتي على راحتج
:ماشي شكرا ...واني اكوم كلتله يلا اترخص عندي محاضره
:انطيني رقمج حتى اكدر اتواصل وياج
:هاا
:شبيج عادي اي اثنين يحبون بعض يتخابرون كلش عادي
:ماشي انطيني موبايلك ادخلك رقمي
:تفضلي
سجلت رقمي وانطيته تلفونه
كتله اكولك انت حتى اسمي متعرفه
ضحك وكال انتي الما تعرفين اسمي. ..اني اعرف كلشي عنج يا وتين وغمز
ابتسمت. .كال ليش ما تسئليني عن اسمي
كتله شنو اسمك
كال عمار
كتله عاشت الاسامي يلا اتاخرت
كال اشوفج بخير
:باي

_________________
عمار
من بعد ما راحت لمحاضرتها رحت لشلتي
ها ضلوعي شو فهيتو
واحد من الشله
_لك خرب عشيرتك ما توقعتك تحصلها لا انوب بكل سهوله
_ابن المحظوظه
ههههههههاي يلا حياتي ورقو
أحمد جيب الورقه مال الرهان
ساجد كارت الاشتراك مال نادي الصيد
منذر اريد الايفون

منذر __عمار هسه احنا شفتهمنا ..ترى ما شفنا شي مجرد شفناكم كاعدين وتسولفون يجوز مثلا جنتو تسولفون عن الدراسه شي
عمار:لك ابن الك..... يا دراسه اني رابع هي أول
وبعدين مو خذت رقمها كدامكم
منذر:لا حبيبي انت لوتي الله اعلم شحجيتو اريد دليل قوي ..تره الايفون الجديد بمليون حبي مو شويه
ماشي ..تراهن اكدر أخذها ع شقه!!!!!!!