انت مصيري

البارت 6

وصلنا للمستشفى صحت عليهم يجيبون سديه ينقلون بيها أم وتين. ..شلتها نزلتها من السياره خليتها ع السديه ركضوا بيها دخلوها
واني رحت صفيت السياره

__________________
دخل أحمد للبيت صاح ع امي

:سهير. ......وينج سهير.

بدلت وطلعت ...نزلت جوا شفت أحمد يدور ع امي ...
:ها عمو ماما تخربطت واخذها الحارس للمستشفى قبل شويه

:شنووو شدتحجين انتي شبيها ليش تخربطت

:عمو امشي نروح للمستشفى بسرعه

رحنا اني وأحمد للمستشفى ....قبل لا ندخل شفنا الحارس طلع من المستشفى

:ها حازم شبيها سهير وينها تعال دليني

:عفيه شلونها امي زينه؟

حجينا بنفس الوقت

اي زينه الحمد لله تعالوا شوفوها ...رحنا سوا دخلنا لكيناها بغرفة هي وثنين نسوان مريضات نايمات بنفس الغرفة ..

صاحيه بس بيدها المغذي وشكلها كلش تعبان

راح أحمد كعد بصفها يحجي وياها ويسئلها
واني ضليت برا اباوع عليها ما تجرأت افوت حاسه بالذنب لو ما ضامه عليها جان نصحتني جان وعتني وحذرتني. ..

الحارس كعد ع الكرسي البرا الغرفه

من يحجي وياها أحمد ترد بصوت ناصي وتعبان ما بيها حيل

صاح أحمد على حازم ...أجه حازم

:سوولها تحاليل ؟

:أي ..بس ما طالعات بعدهن

_____________________

الساعه 12 بالليل أخذنا امي وطلعنا من المستشفى
بس شنو روحي شنو إحساسي كله سواد اسود من هذا الليل
امي ضلت ساكته وما حجت وياي ولا كلمه ...خفت من سكوتها اكيد هذا الهدوء ما قبل العاصفة
تعب ووجع جسمي وحطام روحي وكسرة كلبي وغضب امي وخذلاني وخداعي هذا كله صار بيوم واحد. ..زين ليش بعدني عايشه ترى هالشي أكثر من طاقتي بهواااي. ...اني انسانه ضعيفه انتكاليه مدلله !!وعشت كل هذا وبعدني امشي على رجليه

______________________

وصلنا للبيت نزلت امي وأحمد واني بقيت بالسياره أحس بوجع فضييع ....ما أتحمل
قبل لا ينزل الحارس كتله

:عفيه تكدر تاخذني للصيدليه!

:باوعلي بعيونه التخوف ....مو تونا اشترينا علاج امج من الصيدليه. ..شتسوين بيها