#ثار الدم
#ليوثي المياحي
_2_
مابين غفوة ودوخه.. الهودج احسه يتمايل يمنه ويسرة... واحس بحوافر الحصن..من يضربن بالكاع وهنه يركضن من جدامي ومن وراي.. وبصفي..جانن مطوقاتني وداير مدايري ..اني جنت بعدني بغفوة الحنه والعرس والهوسه..والغنه...والركص...وتذكرت امي من لازمه المبخرة وتبخر بيه وتكلي.. يبنيتي...ربي يتمم عرسج على خير.. ويهنيج ويفرحني بيج... يمه يوم المنى من اشوفج ترحين لبيت رجلج وجهالج داير مدايرج...كلتلهه يمه جنج تردين تخلصين مني ...ليش اني بيش مضوجتج...ميخالف راح اروح اريد اشوف منو بعد يغسل الهدوم والمواعين ويرتب البيت..امي ضحكت جانت اتحس بان كلامي شقه مو من كل كلبي...
هزيت راسي وكمت افرك بركبتي..من الوجع مال الضربه اللي حصلتها... صحصحت ومديت راسي من هودجي لكيت فرسان تحرسني من كل جانب..كلهم ملثمين وما اعرف ولا واحد بيهم.. الرئيس مالهم هوة جان راكب فرس يمشي كدامي..ولازم حبل البعير اللي عليه الهودج مالتي ...من دون ما احس صيحت عليه.. الله لا يوفقك.. انته مو رجال..الرجال مايخطف بنات الناس ...اني وراي رجال تهد جبال..وراح اتشوف شراح يسوون بيك.. اذا ماكطعوك وصل...تاني...التفت على الفرسان اللي وياه وكاللهم ابتعدو..كلهم بلحظه مشو سريع وخلو عجه التراب وراهم...هوة رجعلي ...وعيونه تجدح وبيهه تهديد.. كالي..اني ماعندي مرة تعلي صوتهه عليه.. انتي هسه مرتي..اذا قبلتي او ماقبلتي..انتي هسه عار على اهلج وعشيرتج...اسكتين وسدين حلكج.. حتى لا تشوفين مني وجه ثاني ماتحبيه.. جربي وعلي صوتج واغلطي مرة ثانيه..
جدام الرجال وشوفي شاسوي بيج...كلمتين نطانياهن بالعظم..سكتت واني كلبي يشتعل نار..صفنت كلامه صحيح..اني توني مخطوفه..لغير ديرة.. ما اعرف شراح يصير..بيه ..وانوب راح اصير عار على اهلي وعشيرتي..حتى ولو ما تعدى على شرفي..ومن ادخل ابيته وديرته معناه خسرت كلشي.. اوووف على روحي شراح اسوي وشمكتوبلي..كمت اباوع يمنه ويسرة بلكت اكدر انهزم.. بس شلون واني مخليني ع هودج بعلو الجبل... اوووف اني متاكدة..انو ابويه وخواني مراح يسكتون ..والدم راح يصير للركب.. جنت خايفه بس لا يعتقدون انو اني متفقه وياه ع الهزيمه..اوووف ربي...
رميت همي وخليتهه على ربي..وحسبت ربي وفوضت امري اليه..الدنيه اضلمت واحنه بعدنه دانمشي.. اووويلي وين ذبنج الاقدار يازينه... زينه ماشيه..للهم والغم...شلون ياربي اخلص من هاي الورطه..؟؟عطشت وريجي يبس... جان احجي ويه هذا المعنطز روحه...كتله انته شسمك عطشانه واريد اشرب مي..مثل العادة رجاله ابتعدو..بحصونتهم باشارة من عندة.. الظاهر عندة سلطه عليهم.. شلون ابويه عندة سلطه ع عشيرته..انطاني مي بدبه ..فتح الغطه مالتهه وناولنياهه مديت ايدي مزخرفه بالحنه..ومعطرة بمي الورد... كام يباوع ولمعه بعيونه كلهه مكر ..وبلحضه لزم ايدي ودنج عليهه وباسهه.. كلبي كام يرجف ويدك ع السريع.. عمري ما احد بايس اديه او حتى لازمهه..حتى الحجي ما حاجية ويه اي واحد غريب بس ويه اخوتي وابويه..حتى من اروح للمدرسه اخوتي جانو يودوني ويجيبوني.. جان ممنوع اتقرب من اي ولد بالقريه..حتى اذا حجيت ويه صبي بعدة طفل معناهه موتي وجبت العار الاهلي.. شحال غريب لزم ايدي وباسهه يااااااودعي..
جمدت ايدي وكعت الدبه من ايدي وانكبت عليه وبللته.. هوة ضحك سمعت ضحكته.. يا يمه كلبي طاح من صدري.. صوته طلع شويه بيه بحه..كالي...زينتي.. الحنه وهل جمال كله..اليه مستحيل اخليج ترحين لرجال غيري..هلا ومرحبا بيج بالديرة والحوش مالتي...كلتله..تحلم تمسني او توصلني.. هاي بعيدة عليك بعد السمه ع الكاع .. اني نجمه اهلي.. وابقه بالسمه وما انزل ابد للكاع... اني اجيب واحجي واهوبز عليه وما اعرف شني مكانته بين عشيرته...كتله انته حرامي.. جان يسحب السيف وخلاه بوجهي جنت مغطيه وجهي.. وهوة ما شايفني ابد... كالي انتي ع ذمتي.. وهذا مو حلم هاي حقيقه.. واذا انتي نجمه بعشيرتج..اني هلال عشيرتي.. كافي تحجين حجي انتي مو كدة.. وحسابج بعدين بداري ..وعافني وكام يمشي.. كأنو مصار شي.. رجعت راسي بالهودج ياربي شنو هذا..ليش يحبني.. هوة لا شايفني ولا شايفته.. عندة ثار ويه عشيرتنه..بس حتى لو اني شنو ذنبي.. ونوب يكلي اوديج لداري ..يعني راح ياخذني وياه لداره واهله..اووووووف عليج زينه..
البعير يمشي ويتمايل بيه..اذكرت اغنيه لسميرة توفيق ..وكمت ادندن بيهه....
حول يا غنام حول بات الليلة هين
قلي يا غنام بالله شايف حبي وين
عاهدني المحبوب يجي يلاقيني
ماله يا غنــــــــام ماله ما بيوافيني
يا زينة العربان بقســــــم بديني
عغدير المي غادي غاد شفت الزين
يطول عمرك ياغنام ردّت روحي ليّ
قلي بالله بأيّ عـين شفته بأيّ ميّ
كان قلبي قبل وصولك مشوي بناره شيّ
لا عم باكل و لا عم بشرب بقالي يومين...
الله يصبر قلب العاشق يا أخت العربان
و يجمعك بحبيب قلبك بجاه الرحمـــــن
اغني وي روحي واصبر بروحي... نزلت دموعي.. وخليت ايدي ع حلكي.. وتنهدت..ومن الخوف غمضت وغفيت.. حلمت بالطبول ادك وابويه واخواني كدام الهودج يمشون..وابن عمي واكف بطوله الحلو.. ولابس الدشداشه البيضه والسترة الجوزيه..يتاني انزل من الهودج ويتلكاني..بحضنه ينزلني منهه ..
واني غافيه ويه حلمي حسيت بدك الطبول والهلاهل... والغنا..امتزجت الاحلام ويه الواقع..كعدت باوعت من فتحه بالهودج .. شفت هواي ناس ملتمه رياجيل ونسوان ..وجهال وكلهه اتصفك وتهلهل..وتضرب طلق ... الفرسان الملثمين دخلو بنصهم...التمو على هذا الرئيس الفارس مالتهم واخذوه بالاحضان والبوس والهلاهل ...وهوة شامخ وثكيل..يمكن فارس ومغوار بعشيرتهم...وديرتهم..اني تبسمرت بمكاني فوك البعير.. وضليت مبهوته ياربي شنو هذا العرس ...عرس...والحفله حفله..والغنا والركص والهلاهل من كل مكان عدهم حفله عرس بس كلش جبيرة.. منو معرس عدهم..يجوز شيخ العشيرة مالتهم..اني بس مطلعه راسي من بابوعه زغيرة واتفرج على اللي ديصير..اتفرج ورجليه يرجفن من الخوف...
باوعت لمحت فارس جاي يمشي عليه.. تمعنت بيه.. جان طويل وجتافاته عريضه.. واسمر ملامحه منحوته.. وعيونه حادة وتجدح من بعيد..بوسط تجاويف وجهه..وضحكه خبيثه بوجهه ما ميزتهه زين.. فرحه لو نصر..يعني سوة عملته الخايبه.. واهله مسانديه ...ومشجعيه وفرحانين مسويله عرس ويتانونه جايب عروسه خاطفهه من غير ديره... وهوة يمشي بيناتهم.. وهوة رافع راسه.. ويمشي بفخر...وصل يمي ونخه البعير ..اني خفت وفزيت.. كلبي احسه. يريد يطلع من بين الضلوع كام يدك بسرعه
وارتبكت.. لزم اللجام وبرك البعير..بوسط الهلاهل ودك الطبول.. اللي الصوت مالهن كام يضرب براسي..دكات طبل تعلن نهايه حفله ...تنتهي بيه اني... مد ايدة حتى ينزلني من الهودج...مديت ايدي.. وتلاكت ادينا اني كل جسمي يرجف.. شالني بين ذرعانه ..راسي صار على صدرة.. دكات كلبه جانت تضرب باذني...دكات غريبه ..اول مرة اسمعهه.. عمري ما شالني رجال بس ابويه واخواني من جنت زغيرة.. لان عيب عدنه .. عزةةةةة شلون واني رجال لا اعرفه شايلني وراسي ع صدرة...ابتسم وشاورني وكالي ...ديري بالج تتمردين عليه ولا طولين لسانج.. حلكج ماتفتحينه حتى ندخل الدار..سكتت واني لابدة بحضنه..
جنت مخليه الخمار ع وجهي وما اشوف الناس بس خيالاتهم غمضت عيوني.. لحد ما دخلني للدار..وكعدني بنص الحوش.. فتحت عيوني سمعت الباب انقفل.. رفعت الخمار جان الكه رجال جبير ومرة مفوطه ومسويه عمامه فوك راسهه ولافتهه بجراغد خضرة وسودة ومخليهه بيهه جف العباس وام سبع عيون..مدليات منهه..وبصفهه كاعدات بنات ثنين..متوسطات بالعمر..
وهوة وكف وراهم.. يم الباب...الرجال الجبير كام يحجي.. كالي ..بالسلامه بنيتي.. اني اكون عمج حمادي.. اصير ابن عم ابوج... وانتي متعرفيني لان متعاركين من زمان صار سنين حتى من كبل متجين للدنيه .. وخلافنه وكطيعتنه بسبب الكاع... وانتي تعرفين قيمه الكاع عدنه... وانتي من حقنه ابنيتي ..انتي النه ..واحنه اولى بيج من غيرنه... تقرب عليه وباسني من راسي.. وكالي مبروكة علينا يازينه...وطلع..جتي مرته وباستني واخذتني بحضنهه..وكالتلي اني خالتج فرحه..وهاي علياء وهاي رجاء .. خوات رجلج... باسوني كلهم ودوني لغرفتي.. طلعو همه وخلوني اني وياه راس براس... عيونه جانت تلمع وابتسامه حلوة جانت ع شفافه..كالي اني حليلج..زينه...وللحكايه بقيه...
