لحضات تفصلني عن مغادرة هذا العالم لحضات تبعدني ع الموت ...واصلا اني حسيت بروحي متت..من عفته يم اهله واجيت..كلبي بقه يمه وعيني كاعدة يمه..ما عاد اهتم..اعيش او لا.. اني حياتي انكلبت..من ساعه. ما خطفني..انكتبت باسمه..وراح اموت باسمه..اخويه كلبه شايل حقد..وبقيه اخواني وابويه يباوعون علي امي اجتي تركض..وكفت كدامي وتعيط وتصرخ..لا لا وليدي اني مو امك اذا كتلتهه اكتلني بمكانهه جتي تركض عليه وغطتني باديهه..انطت صدرهه للبندقيه..وكالتله اضرب ...احمد نزل سلاحه..بعد ما جان موجهه بصدري..كاللهه يمه وخري من كدامهه ما عدنه بنت توكف ضدنه..وتوطي راسنه..ابتعدي خلي نصفي دمهه ونبرد نارنه..امي كالتله ..ابد والله..اتريد تكتل اكتلني قبلها..
ابويه كام يحجي..اني نزلت راسي ابويه عزيزي وفخري اني كسرته وكسرت جنحانه..كاله احنه مانهدر دمنه وليدي..احنه نهدر دم عدونا..اضربهه عذبهه اريدك تنسيهه وكفتهه بوجوهنه..اريدهه تتربى من اول وجديد..لحد ما تعرف غلطهه..كالي...بنتي..وباوعلي بعيونه..من اليوم لا سلام ولا كلام..بيني وبينج..خليتي خشمي بالطين....ومشى وخلاني الهم..لا رمش ولا زاد كلمه..اخذوني من يم امي..ودخلوني للدار جان احمد اخويه جاب قمجي مال حصونه دخلني بغرفه وكام يضرب بيه بلا رحمه بالرغم من صياحي وعياطي...جان يضرب القمجي ويصيحلي موتي..موتي..اللي مثلج ملازم يعيش..موتني من كثرة الضرب..امي كامت ادك بالباب تريد اتكسرة وتبجي وتعيط ..شكد قاسيه كلوبهم..جلدي صار ازرك ..الدم كام يسيل مابقه بيه حيل..حتى ادافع على روحي..ولا بيه حيل اغطي روحي ..سلمته روحي..اني بنت دلال..وبنت عز..واول كتله اكلهه بحياتي على ايد اخويه..جان اسلمه روحي ..وغبت عن الوعي..كام يضرب بيه واني ما احرك لا ايد ولا رجل..عافني..ورمه القمجي..وطلع..امي دخلت تركض حضنتني تبوس بيه وتبجي.. وتكول..اوووف بنيتي ياضوة عيوني ...ليش هيج سويتي بنفسج وبينا..واخوج الله يكسر ايدة ..حرك كلبي..يا امي..
امي تبجي عليه..جابت مي وغسلت وجهي.. الدموع جانت نار من تنزل ع خدودي..اجروحي تجري دم.. شسويت بدنيتي..حتى يصير كل هذا بيه..راحت واعيتي..اخذتني امي للفراش..وهيه اللي نضفت الجروح وبدلتلي ملابسي..وكضيت ليله مايعلم بيهه بس الله..
بلال بعد ما طردتني امه..ورجعت لديرتي..هيه رجعت لرجلهه وولدهه..اطمنت على بلال كاللهم الطبيب لحمد لله لطف وقدر.. عمي حمادي سحب مرته بصفحة وكاللهه هاا شسويتي..كالتله ..عيب عليك..يا رجال..عندك شك ..بيه..دزيتها وارتاحينه منهه وكلتلهه الحقيقه وجذبت شويه ...بحجايه ابنك..خلي تكطع منه الامل..لازم نبعدهه عنه.من تروحلهم لو يكتلوهه لو بعد مانشوفهه اصلا..ومانعرفلهه طريق جرة..احسن من مايكعد.. ويلكاهه يمه..وضل تشكيله..الله لا ردهه ..ابني بالدنيه كلهه..حتى اني ما اقتنعت انو يحبهه وهايم بيهه..وميريد يعوفهه..ان شاء الله نرتاح منههاذا كام انكله اجتك..وراحت الاهلهه خلتك بين الحياة والموت..وكالت اللي بيناتنه انتهى كولوله يدزلي ورقه طلاكي..وكل واحد يروح لحاى سبيله..
عمي حمادي كاللهه..خله يكوم بخير وسلامه..والله يعافيه..اني طا عتج..بس ابنج مو سهل..الديرة كلهه تسمع كلمته...ربي يستر..
بلال يئن.. سمع الحجي بين امه وابوه..وماسمع..لان جان دايخ..ايتاني شوكت يصحى على روحه حتى يفهم ويتحدى الدنيه..ويرجع مرته..يصدكهم لو يصدك كلبه..
ضل بلال يئن على مرته.. نار الدم..تعله وماتخمد..
مرن عليه ايام..مايعلم بيهه الا ربي..امي اداويني وتوكلني وتشربني..وتغطيني.. والولد اللي يدخل يسبني ياخذ مرادة مني ويطلع يسبني..ابويه من يومهه لا مر عليه ولا شافني ولا سال حتى..كرهت روحي فد نوب..ضليت اسب بالعشيرة وبالكاع..اللي جانت السبب بهذا الثار الوسخ..اللي اني وكعت ضحيه بيه..تعبت ..تعب عقلي وتعب جسدي.. بالليل جانو سهرانين..وملتمين اهلي كلهم ..اني كمت من فراشي ومشيت واني اتوجه ع الحايط فتحت الباب مال الغرفه السهرانين بيهه.. ودخلت..باوعولي..كلهم..ابويه راساً دار وجهه بصفحه واما باوع عليه..محمد اخويه كام يحجي كالي..اشجابج ؟؟هم الج عين وجايه..تسهرين ويانه...اني رديت بغضب..كتله اني ماجايه اسهر وياكم..اني جيت اريد اكوللكم اللي ماخليتوني احجيه..اني رجعت وياه من ضربتوه لان وعدته..كتله وصلني اشوف امي..من بعيد ..وبالرغم انو يعرف شراح يصير بيه..جابني حتى اشوف امي..وكبلهه طلب مني اوعدة..لو صارله شي ..ارجعه الاهله..واني تربيت ..ابيتكم تربيه رجال..واللي انطه كلمه انطه ركبته..رديته وماعندي فضل عليه..
سكت كل من جان يحجي عليه..كتلهم..لا غصبني ولا ضربني ..رديته وما ندمانه ..ولو ترجع مرة الخ هم اسويهه ...هو كبر بعيني لان تصرفاته مال رجال وانتو ذليتوني..لا احد منكم سمعني.. ولا كلف روحه يسأل..
ذبيت هل كلمتين وطلعت ..جان لازم اكولهن..حتى ابرد نار كلبي واريح ضميري.. واني طالعه..كتلهم..ترة اني راجعتله لو شسوون ..امي سدت حلكي ..وطلعتني برة الغرفه..كتلهه اي راجعتله..حتى ربي يسهل عليه..لازم اشوفه واعرف اخبارة..رجعت لغرفتي ولا كانه صاير شي..ما غير كلامي بيهم اي شي..
مشت الايام واني مجلبه بامي..هيه اللي جانت تواسيني ..وهيه الوحيدة اللي مهتمه بيه.. حتى وكفت على حيلي.وطابت كل جروحي..مسكينخ امي ما خلت شغله ماسوتهه الي..اتكلي اهم شي اشوف ضحتج اللي فاركتج من يوم عرسج.. ترجع مثل الاول... شيرجع الضحكه واني الكلب والعقل عفتهن يمه..لحد الان ريحته اشمهه بكل مكان..عيونه ونضراته احسهن بكل ركن..ملابسه..اللي جنت لابستهه ورحت واجيت بيهه ..ما غسلتهن..بقيت اشتم بيهن..وهنه مصبوغات بدمه..اتمنى اسمع خبر ..اريد اعرف هوة حي ..لو ما... وارجع واكول اسم الله عليه..اريد اسمع خبر حتى ابرد نار كلبي..وارتاح
جانو مراقبيني لا يخلوني اطلع..ولا اروح ولا اجي..حارميني..حتى من هوة ربي..وكالعادة محد يحجي وياي..ولا يمر عليه اي واحد..
وبليله جنت سهرانه بغرفتي ..تمشيت شويه حتى اسمع اي خبر على بلال..لان تفكيري جان شاغلني عليه هواي..سمعت اخويه محمد يعيط ويصرخ..طلع منههابن ال...والله ونجا منهه بزون بسبع رواح..بس ميخالف نلكفه بغيرهه..اني ما عاد هامني الكلام اللي بعدة ..كلامه جان برد وسلام على كلبيابتسمت واجت ورة الابتسامه ضحكه..والضحكه جرت ضحكات ..الله ..كلبي برد..لا..لا..مو برد بس..كام يهلهل كام يفرفح..رجعت للغرفه ذبيت شالي..وتخبلت كمت اركص واكمز..كلبي يريد يطلع من مكانه..من كثر الفرحه..اتمنى هسه اني يمه احط ايدي ع جرحه..وابوسه..واكله اني وياك بصفك..ومحد يبعدني عنك..بس هوة وين واني وين..لازم..الكه طريقه حتى اشوفه واسمع منه الحقيقه..امي جتي عليه وجابتلي العشه..طرت بيهه.. جنت احس هيه الحل الوحيد..ضليت افكر بطريقه اطلع بيهه..لحد ما اجت على بالي نفس الطريقه اللي جيت بيهه..كلت ماكو غير اروح كنتورهه والبس ملابسهه وجرغدهه..واطلع بليله..وابيهه ضوة كمر..اخلي ملابس على بطني حتى ابين مليانه مثل امي وما اخلي واحد يشك بيه..احجي ويه روحي واتكتك.. شلون اكدر احصل ملابسهه اللي بكنتورهه..الصبح كلهم طلعو للمزارع..واني استغليت الفرصه تدهدهت وتقربت من يم بقجة ملابسهه..واخذت الملابس اللي احتاجهه.. وضميتهن جوة الفراش..كمت وراهه افكر شلون راح انهزم..واني كلهه مراقبتني..ما كمت اكدر ..احس الدنيه ماتسوة بدونه..اني شكد جنت هبله من ردت اضيعه من بين اديه..رجال وكف بوجه الكل..علمودي..والله حبيته وما عرفت شلوون..سكن كلبي وروحي..وعيونه ساكنتني..وين اروح وين اجي عيونه تحرسني..وانفاسه تلفلفني..روحي تريد اتشوفه ..وبعدهه خل اموت..الحب حرب..انخوضهه لاخر نفس..بيه..ولو اربحهه لو امووووت...وللحكايه بقيه
