#ثار الدم
#ليوثي المياحي
لمتابعة الروايه ع الواتباد
https://my.w.tt/LltxeavIRM
_10_
ماافتهمت..نضرته..عتب ..لوم..
غضب..سكت وطول بسكته..اني ما لحيت وياه..العين اجت بالعين..والنفس صار سريع..والجو تكهرب..
كتله واني ارجف..شكلت..؟؟؟اذا تعزني..وبكلبك تحبني مثل ماتكول..وديني خلني..اشوف امي من بعيد..كلبي صاير نار عليهه..هسه وكت حصاد واكيد هيه تطلع تحصد وياهم برغم من تعبهه ومرضهه..اشوفهه واملي عيني منهه..وارجع..اذا جنت عزيزة عليك..والله خايفه عليهه احمد اخويه كالي مريضه كلبهه يوجعهه..واني كلبي اكلني عليهه..اني مو مرتك..مثل متكول..حقي عليك..بس المح خيالهه من بعيد حتى اطمن عليهه..اني احجي وخنكتني العبرة وكمت ابجي..ودموعي تكول نهر ونفتح..كتله ليش اني من دون البنات..لا اهل ولا امل..تكول مكطوعه من شجرة..شسويت بدنيتي..هوة امه يمه ودارهم وخواته..واني وحدي بيناتهم..جاني وكعد بصفي..يمسح بدموعي..وهز راسي بيدة..كالي لاتبجين..ما احب اشوف دموعج..اخاف اوديج..وتنهزمين وماترجعين وياي..اخاف اغمض عيني..وافتحهه وما الكاج يمي..اني اللي يربطني بيج شي اقوة مني ومنج..وانتي ما رابطج شي بيه..شلون اوديج..واني مطمن..؟؟؟
كتله..كلمتي ضمان ..صحيح..اني مرة..بس تربيت على كلمه رجال..وديني اشوفهه وحتى ما انزل من على سرج الحصان..اشوفهه بعيني بالحصاد..ونرجع على الديرة..شكلت..
صفن ..وكام يلعب باصابيعه..حسيته متوتر اني افتهمه..لان ماضامني ..ولا مطمن من ناحيتي..
هز راسه وكالي حضري روحج..بس اطيب رجلج..واوديج انتي مريتي ..واني ماعندي غيرج..غالي والطلب رخيص بس انتي وعدتيني ..والوعد بركبتج الى يوم الدين..مثل ماراح اوديج اريدج ترجعين..اوعديني..
وعدته والفرحه ما مبينه بوجهه..كتله اوعدك والله...
كالي ..اسمعيني زينتي..تعرفين شراح يصير بينه اذا شافونه..اريدج تحسبين اني مكتول اذا واحد تقربلج..حتى ياخذج مني..اريد كلبج يكون مثل الحجارة..وماتحنين ع الرجعه ..اني دا اضحي بروحي ..لخاطرج..مايهمني دمي.. يسيل.. المهم دمعه ماتنزل من عيونج..اريد كلمه رجال زينه.. واريدج توفين بكلامج..
كبر بعيني وبدة يدخل لكلبي..رغما عني..يضحي بعمرة.. علمودي..رجولته..وطيبة كلبه..الجبير..سيطرو عليه..وعدت روحي كبل ما اوعدة..ارجع وياه مهما صار..
بدت رجلي تتحسن..ما ادري من فرحتي لان راح يوديني لديرتي..لو من حبه اللي ملكني..نسهر اني وياه بغرفتنه..تحسنت علاقتي بيه..بهل ايام من تفاهمنه ع الروحه لاهلي..ولحد ما نريد نمشي اكتشفت طبعه شكد حلوو ..جان طيب..ومدللني..عبالك طفله زغيرة..بالحوش مالته..وامه كلما تكوم تحجي عليه ..يسكتها..وحسيت روحي ..عايشة عيشه جديدة ..ومتباهيه..ابداري وبرجلي واخوته..شحلاتهم..
ابوه جان صعب ..لا يكعد ويحجي ويانه ولا يستلطفني..ما اعرف شلون اقنعه..بقت علاقتي بيه ما تعدت الحدود..وهوة هم ماتجاوز حدودة..واني هم ماجنت مهتمتله ..لا الي شغل بيه ولا اله شغل بيه.. خليت كل حاجة بوكتهه..
اني جنت اتخوف من نومة بلال بصفي..وجنت ما انام بالفراش لحد ما ينشف ريكي..من السوالف ونومه وانام وراه.. وبيوم من الايام سهرنا ..دخلنه للغرفه حتى انام.. بعد ماطفينه الضوة..كالي حضري روحج باجر الفجر حتى نمشي انروح اشوفج امج..اني من فرحتي .. رميت روحي بحضنه..من فرحتي نسيت روحي ولاول مرة احضنه بارادتي..مو غصبا عليه..
لف اديناته عليه وحضني حيل جنت فرحانه بدون خوف..وليش اخاف وهوة يحبني كل هل حب..وبلحضه استحيت حاولت املص روحي منه..هوة زاد وحضني اقوة..حط كصته على كصتي...وكالي..آه منج ..آه منج زينه..خليني اشبع منج..يجوز اموت وما شابع من حضنج.. انتفضت وملصت روحي منه كتله لا..لا..لا اذا تشوف بيهه هيج مخاطرة بلاش انسى السالفه..واسكت بعد ابد لا تحجي هل حجي..
عيونه مغمضه..وهوة يحجي ..انتي ماتعرفين..شنو معناتهه ان اروحلهم واصير بيناتهم..اني وبنتهم اللي خطفتهه منهم...انتي بعدج زغيرة وماتعرفين..
المهم اوصيج..اخاف اهلج يلزموني..حاولي بكل جهدج ترجعيني..لاهلي مثل ما وديتج..ولا تخليهم يذلوني..وديري بالج تتركيني وترجعيلهم ..وصيتي ..امانه بركبتج..اني عانقته من ركبته وكتله بلال كافي تخوفني ..هوة يمسد بضهري ويلعب بايدة بشعري..كالي ماعاش ولاكان اللي يخوف مرتي..واذا متت هاي ارادة الله..ولا اعتراض على ارادته..
يجوز اتصير مصيبه..بس لخاطرج انتي ولان اول مرة اطلبين مني طلب انفذة الج حتى لو ثمنه حياتي..
لاتخافين راح احميج برموش عيوني..واموت علمودج وما راح اندم..اني نطيتج كلبي..نطيتج روحي..جسمي ما يغله عليج..
اني خنكتني العبرة ..شاسوي ويه هل رجال..اي شي مرخصه ع مودي..وما يستخسر حتى روحه..حتى يرضيني..اني ما عارفه النعمه اللي انطانياهه ربي..بس بينه وبين اهلي ..معادله كلش صعبه..محتارة والنار مشتعله بيه..ضليت حايرة بين كلبي وبين عقلي..
ضمني بكل قوته..وشاورني كالي لاتبجين..زين..لاتبجين..ينور العين..انتي ساكنه الكلب والروح..ترخصلج الدنيه.. زينتي...
كضينه الليله بنعيم..حاضنته وحاضني..وعاهدت روحي ..ان اكون اله مهما صار..هوة ما يغلي شي علمودي.. واني اريد اردله شويه من افضاله عليه..
اني بيني وبين روحي نويت.. وما ادري اني رجعتله ..لان معاملته زينه وياي..لو لان اتحركت المشاعر بكلبي..ودا تكبر شويه شويه ..
قبل الفجر ..كعدني..غسلنه وفطرنا وحضرنه ارواحنه ..اني لبست ملابسه.. وتلثمت..بالشماغ بس عيوني طالعه ..مشينه ..لدار الحصونه..جنت عبالي اني اركب حصان وهوة يركب حصان..كالي ..لا لا..راح نصعد اثنيناتنه على حصان واحد.. ركبت وياه على حصانه ..مشه ..شويه..وعسه برجليه الحصان ركض بسرعه وطار طير.. يايمه احلى ركبه حصان بحياتي..ظهري بصدرة..حاميني ومحتويني كله..اديه محوطتني وشاد اللجام بقوة..رجليه سيطرت عليه..ريحته..ادمغت بيه..الحصان يركض.واني كلبي يرجف..الدنيه طايرة بيه..واني طايرة بخيالي وكلبي وياه..
بلال صفن عليه...كام يحجي ويه روحه..كال اني فرحان بيهه كلش هواي....بس كلبي مقبوص ..واحس اكو شي راح يصير ماهو خير ..بس الله اليستر.. اريد استمتع بلحضات يجوز الاخيرة وياهه..اعرف بروحي رايح للموت برجليه..لان اذا شافونه مستحيل نخلص منهم..نمشي واني اوصي بيهه وااكد عليهه ترجعني..اذا اي شي صارلي..
وصلنه الفجر..ستوهه كشفت الدنيه ..صارت حركه بالديرة..وكفت حصاني..جوة شجرة بعيدة شويه..وتختلنا شويه شويه..حتى تشوف امهه بلكي طالعه ويه النسوان..للحصاد..
جان لازمني من ايدي..بكل قوته..وكفنه..جان اشوفهه كبالي..جانت..لافهه الجرغد ع راسهه ..شكلهه وصورتهه وخيالهه يرد الروح..خلخالهه ودناديشهه ..ترن ويه كل جدم ادكه بالكاع..وشامتهه جوة حلكهه ماخذة حلاة منهه هواي..ابويه جدام الرياجيل..راكب ع الدابه.. ومتلثم بشماغه.. النسوان يمشون وحدهم ويكصخن بالحجي.. ويضحكن ع سوالف ماصخه..امي بينة حزينه هواي ..اني كلبي وجعني..ابويه ..مدنج راسه ومقهوور..اني اعرفه كل الزين..دموعي طفرت من عيوني.. فاتو كلهم من كدامنه..رجعنه على مكان الحصان وهوة يجرجر بيه..مليت عيوني بشوفتهم وهم ماشبعت..ركبنا على الحصان ..وبعدنه ما ماشين خطوتين..جان نسمع صوت طلقه..حسيت بشي حار اطشر عليه حرارة ونار بجسمي..كلبي وكع..ويه صيحة بلال..التافيت حتى اشوفه..لكيت مصوب والدم يجري منه..انفجعت..وكمت اضرب وجهي بديه...
بلال كالي..اجه دورج ترجعين الامانه لصحابهه ..وجان صوت عريسي الاول..يصدح بكل علوة ...جتفي زينه..جتفي..اخويه جان وراه يصيح ويعيط..هازينه وعيتي على روحج..ادري بيج بنت شيوخ .. عرفت راح اتقشمريه واجيبيه النه..يله خيتي..روحي لامج واهلج وناسج وديرتج..
اني الدنيه اضلمت بعيني..ما حسيت بشي بس بالي جان يم بلال وهوة يتوجع ويئن..واني لازم احسم الامر..والقرار بيدي...وللحكايه بقيه...
