#ثار الدم
#ليوثي المياحي
_5_
اووووه تنفست ..حمل ثكيل وانزاح..انجطلت على الفراش الناعم ..الحواف مالته جانت مزركشه.. جان مخلي سلاح للعركه بالغرفه..وياه مخازن وطلق.. تنهدت.. واخذت نفس.. جان اسمع صوت اطلاقات نار.. فزيت وطلعت اركض للحوش فتحت الشباك وكمت اباوع...
الجفيه المدمايه ..مالت الشرف..تتشامر بين الادين وصوت اطلاقات النار ماسكت... والهلاهل تصدح وريحة البخور ماليه الديرة ..والحفله مستمرة وما وكفت ابد..جنت اتفرج واتذكر من جان يمسح بدمي ودمه بالجفيه.. ثاري جان يريد يستغل الفرصه.. حتى يوهمهم انو اخذني..ولله ابد مو سهل هل رجال... باوعت جان اشوف عجاجه كايمه.. وحصونه اطربك بحوافرهه وتتقرب شويه شويه.. كلبي رف ...ابويه..واخوتي..وعريسي ابن عمي بجاكيته الجوزي.. واخويه محمد هم جاي وياهم.. كلبي صاير نار عليهم... وخصوصا من شفت محمد وجرحه مخيطينه.. اوووف النار راح تشتعل بيناتهم.. مثل ما مشتعله بكلبي... ابوية ضرب طلقه بالجو.. الحفله سكتت ومحد كام يغني او يهلهل ..صارت صنطه.. النسوان وخرو..والرياجيل صارو صف واحد جدام النسوان.. بلال بدون خوف ولا رمشه عين..مجتف اديه على صدرة...اني ستوني افتهمت المسرحيه..عرفت ليش نفش شعرة ..والجفيه ليش دماهه..يبووو ضربت راسي بايدي ..اني عرست بدون مياخذني..
بلال كال الابويه.. مرحبه بولد عمي ونسيبي ..يامرحبه ...يامرحبه..رد ابويه وتاج راسي.. اني دموعي نزلت ..كاله..لاهله ولا مرحبه.. اني جاي ع بنتي..بلال رفع ايدة وكال حمايه بيش جاي يحجي.. بنتك صارت مرتي..وعلى ذمتي.. اني عقدت عليهه ..واخذتهه..وهاي جفيتهه وعذريتهه.. مدهه اله..ابويه وجهه اسود..والعريس ابن عمي.. ضرب راسه باديه..واخواني رفعو السلاح ..اني حطيت ايدي على كلبي..ورحت اركض حتى افتح الباب.. طلعت اركض واصيح.. بابا..بابا..
كلهم انتبهو عليه.. والعيون مبحلكة بيه.. شعري جان منفوش..والزينه ماكو الشال واكع .. واللي يشوفني يعرف ع طول اجنت اسوي.. بلال جان صدرة طالع وجان يصب عرك يلمع..ابويه شاورلهم ع السلاح كللهم نزلوه..
بلال.. كام يصيح ..اني شنبهتج.. مو كلتلج ما طلعين الا باذني..او اني اصيحج..وخر الناس من طريقه واجاني..ابويه كال بصوت كله حسرة وقهر ..انتي مو بنتي ..مادامج قبلتي توقعين العقد.. وسلمتي شرفنا ..ثارنه ما ينفك الا بالدم.. ومثل ما خطفوج نخطف بنتهم ..صوبتو واحد..نصوب ثنين.. والايام بيناتنه...
ردت احجي ..استوني كلت بابا..بلال حط ايدة ع حلكي.. وكالي اسكتي.. تردين تفضحينه.. والله العظيم واللي خلقج.. وصورج..اردهه الج..حتى تعضين اصابيعج من الندم..لان كسرتي كلامي.. والايام بيناتنه..اني ارجف من الصدمه..من ابويه اللي صار رخيص بعد ما جان غالي..ومحد يدوسله ع طرف.. اني رخصته ..وذليت روحي وياه..بكل وجع الدنيا.. بدموعي..وبنبض كلبي.. عضيت ايدة ..راد يلزمني من ذراعي مكدر ..لو ما جسمه قوي ..جان وكعته بالكاع وركضت وره ابويه.. واخواني..
هوة صرخ صرخه.. جان رجاله وكفو فرد وكفه تكول حايط النسوان جدام الرجال..واني اعيط واصيح وابويه ميجاوب.. دار وجهه وصعد الفرس.. كال كلمه وحدة سمعتهه منه.. نتكابل..والدم يسيل وديان لو احنه لو انتم ومشه..
اني صيحت وعيطت.. اخذوني وياكم..ماخلوني اتحرك ..حتى اوصل يم ابويه..جان بيدة سوط لفحني بيه وشالني وداني للغرفه واني اضرب بصدرة واعيط واصرخ وهوة ولا يمه.....
ومنا تبدة قصتنه.."ثار الدم"
&&&&&&&&
كمت اضرب بصدرة باديه...وهوة ولا يحس ولا عبالك دا اضرب بيه...كام يمشي بسرعه وراسه مرفوع يمشي بطوله .. امه كامت تهلهل وتصيح هلهلن ينسوان اليوم اخذنا بثارنا... تمشي وتصيح وتهلهل وتصفك... اني كمت اصيح ..ثاركم طلعتوه بيه.. الله لا يوفقكم.. اجه عليه وهفني براشدي وسكتني ونص الحجي بلعته بحلكي...دفر الباب برجله ودخل وسدة برجله ...دخلني لغرفه النوم دفعني دفع ع الفراش. وطلع.. خلاني ويه همي ...ابد مجنت متوقعه .. ليله عرسي راح هيج اتصير ..لا بالحلم ولا بالحقيقه.. تربعت بوسط السرير ..امسح بدموعي ..دموع فراق عائلتي ...دموع ذلي دموع بنت مو بيدهه القرار ولا الحق بالاختيار... حرامات دراستي وتعبي.. وحرامات عمري.. احس بحسرة بكلبي ..بعد ما اكدر افرح بشوفه ابويه... ولا اكدر ابوسه... ولا امشي ويه اخويه..بتوقيع زغير على ورقه بدلتهم.. وبيش بدلتهم برجال لا اعرفه ولا عمري شفته.. ولا اخترته.. وحتى لو حبيته..يبقه الهم راكبني...عقلي خرف ..سرح..لبعيد وحتى لو احتمال اني كمت احبه.. بس راح يصير واقع وهوة واني بفراش واحد ..اني والاسمر ..بالاحضان..على فراش الستان.. هههه ضربت وجهي بايدي.. وكلت لروحي هوة هذا وكتهه... هوة اني عبدة عدهم.. رجعت للنكد والهم اللي صرت بيه.. جان احس بيه يريد يدخل ...سمعت صوت المفتاح وهوة يدور بالسركي مال الباب.. كمزت وكفت اللي تكول عضني زنبور.. مسحت دموعي..ستوني جنت اتخيل شلون اني وياه بغرفه وحدة وفراش واحد ..دخل وبيدة ماعون دولمه كالي متعشيه..حطه على طبله زغيرة جان شايلهه ويه الماعون بايدة... باوعلي وكالي يله اتعشي ..وبعدين ازعلي..براحتج.. بس ضوكيه الا توكعين جفي عليه.. وتمسحين الماعون مسح...كتله واني مليانه قهر.. ما اشتهي من فرحتي بطني شبعانه...كالي تحبين اجي اهنيج.. كتله شنو قصدك... ضحك هههه
كتله لا لا اخي يسلم راسك ...هوة ما اهتم اتربع ع السرير وكام يتعشى ...وبيني وبينكم ريحه الدولمه اتدوخ...رهوالتي وكعت ولساني كام يمطك..الجوع اكل كلبي...شافني ما اكل بس اباوع عليه.. اديه اللي ياكل بينه شكد قويه ويه كل حركه يسويهه عضلاته ودماراته تبين..صدرة عريض ومليان شعر.. جان يشهي امد ايدي والعب بشعر صدرة.. نطاني لكمه كالي اكليهه..كتله ما اريد.. الله اخبلك.. وما اخليك تتهنه.. سكتت وضليت مبحلكه عيوني واتامله.. جانت بشرته سمرة وشعرة اسود كحلي.. خفيف.. حواجبه ثخينه.. وجواهه عيون تكول عيون الصكر.. جتي عينه بعيني ..دنجت مكدرت اقاوم حدة عيونه..كالي..يا بنتي تعاي اتعشي ..الليل طويل.. كتله.. ما احب اكلكم.. اشبع انته بيه..كالي بكيفج انتي اللي تخسرين.. كتله ماطول اني عندك اكيد خسرانه.. كام ياكل ومسح الماعون مسح..كالي لا تستهترين زايد ترة اربيج من اول وجديد. اتقربلي وشاورلي باديه..كالي كومي لمي المواعين يا عروسه... باوعت عليه وعوجت حلكي.. جان يزيد بالصياح عليه.. اتحركي ترة اجي....من غير ميكمل كلامه كمت لميت المواعين والنعمه اللي اطشرت بالكاع.. واني ادعي عليه بكلبي.. واحجي ويه روحي..ليله عرسي الم المواعين وانضف مثل الخدم... اخذت المواعين واللي لميته من بقيه الاكل..وحطيتهن ع الطبله.. غسلت ايدي ..ردت اطلع جان الكاه جدامي واكف بالباب..نزع الفانيله الداخليه..وكعد بهل شكل.. اني كمت اندب بروحي.. شناوي يسوي..ما اعرف..ضميت راسي جنت ما احب اشوفه..
كالي بدلي ملابسج.. الدم عليهه..شتريتلج كلشي تحتاجيه موجود يمج.. راح اطلع علما تبدلين ملابسج ..كتله كثر الله خيرك.. عفته وكلبي اشتعل نار...فتحت الكنتور ابو البابين لكيت دشداشه كدامي.. لبستهه..وقفلت الدكم.. وكفت جدام المرايه واتمتع بزينتي وجمالي...امسح بالكحله اللي سايل على خدودي..واشبع من نقشة الحنه بجفي... والكلادة اللي بصدري..جانت اديه ورجليه محنايه.. جان يدك الباب وكالي اكدر ادخل... فتح الباب وعلى طول اتمدد بالفراش.. اوووف كتله باينك تريد اتنام وياي.. كام يضحك ويكركر من الضحك..
كالي لعد وين ترديني ابات ..برة مثلا كتله داركم جبيرة هواي وين ميعجبك اتبات بات..لو تريدني اني اطلع وابات برة..كام ركض عليه ولزمني من معصمي..وكالي اني مو اخذتج حتى ابات بالبرد..وحدي.. ومو لان استخطيتج.. وماغصبتج.. معناهه اني مو رجال.. بس ردت شويه شويه واحد يتعود ع الثاني..فأهدئي ونامي احسن الج.. ياله امشي جدامي للفراش..يرادنه سرير ابو النفرين حتى انام سوة عليه.. جرني للفراش ..وخله حجيي معلك..خسران فلوس وجايب فراش كامل للعروسه.. واهلي معرضين للثار وتكلي ابات بغير غرفه.. امشي خلي اتعدي ليلتج ع خير..
كلبي يريد يطلع من مكانه.. ورجليني يرجفن ووووه شلون ابات وياه ع فراش واحد.. شراح اسوي.. شراح اكله.. تلفلفت بالجرجف وكعدت على طارف السرير.. كلبي حسيته يريد يوكف من الخجل.. اني يبست بمكاني.. سحبني باديه حتى انام يمه.. وغطانه بجرجف واحد اني وياه...وللحكايه بقيه
