#ثار الدم
#ليوثي المياحي
شديت حيلي وكمت احضر بروحي..وأمي وياي..اسولف شلون تلاكو وشلون تصالحو ..بعد سنين..وشلون واحد اخذ اللاخ بالحضن..فرحت من كل كلبي..همزين محنتي..وحدت كلوبهم..ولمتهم..بعز الازمة..الدم لمهم ونسو الثار وحطو الايد بالايد..الحمد لله ع الاقل شي يفرح بوسط كل هاي الاحزان..ابتسمت..ومديت ايدي على بطني..حتى الزغيروني ماتي ..الفرحه الوحيدة من بلال..ربي وياي يجوز لخاطر اللي ابطني..صاني وصانه...
امه جانت تضاهر بانهه تحبني وفرحانة برجعتي..لا اجتي ولا بالجذب شافتني..كاعدين اني وامي..جان تجي تدخل..كالت ..الحمد لله..بنيتي..الله يكسر اديه..ورجليه..هل كلب..حاسبينه رجال طلع..انذل منه ماكو..كتلهه اشكرج خالتي..ربي يسلمج..
كالتلي..بنيتي هوة خما تدنه تعليج..تعرفين..انتي مرت رجال اله هيبته وسيد الديرة..امي ما صبرت وجاوبتهه..لاتخافين يخية بنتي واني مربيتهه زين..ماكدر يمس شعرة منهه..قاومته وضربته ونهزمت منه..
خالتي..ردتلهه..كالت لا..ترة موقصدي..بس ردت اطمن عليهه وبس..بنيتي هوة يستاهل ..بس ماجنه انريدج تتورطين بدمه..
اني دمي فار...بله هسه لو اضربهه ضربه بين عيونهه..واخليهه تلحك حمّيد..واريح الناس من شرهه..واكسب اجرهه..
صكيت..على سنوني..اريد املخهه..كتلهه ..شبيج خالتي..ليوين تردين توصلين...مرة تردين ما يمسني ومرة تردين ما اكتله..شلون ترهم هل سالفه..
كالتلي..ما كلت هيج بنيتي..انتي تردين اذبين براسي حجي اني ماحاجيته..جان يدخل عمي ابو بلال..وصاح عليهه..كاللهه عوفي المرية وانتي شدخلج اذا جان مات او لا..خل يموت انذبه ع الزباله عود..
اجه عليه يبوس بيه كالي الحمد لله ع السلامه..بنيتي..عفية ع تربيتج..بنت رجال واللي جاب ماخاب..ويرحم البطن اللي شالتج..والايد اللي ربتج..
العكربة لسانهه ماسكت..ماخلتني اجاوبة..كالت..غير ما اريد هه تتورط بدمه..حتى من يسألوهه الشرطة تعرف شجاوبهم..
اني انشدهت ..وامي سكتت..وابوية جان واكف بحلك الباب ..كمز سوة المسافة خطوتين بيني وبينه..وحضني..عبالك جاي يخميني منهه..ويكلي لاتخافين بنيتي اني موجود..
عمي حمادي ابو بلال ..اجه عليهه .. وصفكهه براشدي ..(بيناتنه الحجي بردلي كلبي ..ههههههه تستاهل وجه القنفه) وكعهه بالكاع..كاللهه الله لا يوفقج يا مرة..بكيفج تهذرين بالحجي..انتي شعليج..الا ارجع اربيج من جديد..
كامت تبجي وتمخط..وتكلة..تضربني بهل عمر..وعلمودهه..كاللهه..اضربج واطلكج هم اذا لزم الامر..حتى تتربين..افتهمتي؟؟؟
ابويه كاله..صلي على النبي..حمادي..يمعود هذا حجي نساوين..واحنة شوكت ناخذ بحجي النسوان..
يله امشي خل نطلع..شوية نغير جو..وانشوف الولد حتى نعرف شصار ما صار..
مشة ولزمه من ايدة.. وطلع وياه وعمي ينفخ..من حلكة.
وكال..فورتلي دمي..متعرف تحجي..حتى برغم كبر سنهه..بس كلامهه سم..ابوية كاله..صلي على النبي..يرجال..عيب عليك تضربهه وهية بهل عمر..
طلعو..وامي كامت تساعدهه وتهدي بيهه حتى تسكت..وهية تبجي وتنوح..وتمسح بدموعهه..بطرف فوطتهه..تعصر بالدموع عصر..
والله لو تبجي منا لباجر..لا احن عليهه ولا احبهه..والله تستاهل يرادلهه صوندة مالت زمايل حتى ترد عقلهه..ههههه امي عافتني وتلهت تسكت..بيهه
وخايفة عليهه..بس هية البومة على ولدهه..سمعنة صوت سيارة يطرطر يم البيت..طلعنة نركض..لكينة..سيارة الشرطة ..كلبي خاف..لنوب يطلع حجي البومة صح..ابوية وعمي حمادي..تفاجئوا..امي وخالتي ام بلال باوعولي..راساً..
عمي كاللهم..مرحباً بالشرطة..نخدمكم بشي ..
كالو..عدنة واحد اسمة حمّيد مضروب واللي ضاربته مرت ابنكم..واولادكم شفناهم يردون يكتلون محمود ابن عم زينة..واخذناهم للمخفر..وهسة جينه حتى ناخذ زينة للتحقيق..امي عيطتوضربت صدرهه بأيدهه..غطيت راسي بالشال..وكتله حاضرة سيدي..تفضل..ومديت ايدي حتى اخلي الكلبجه بيهه..
ابوية كالي..لتخافين زينة ..راح تلكينه هناك..واحنة وراج..
طلعوني من البيت والكلبجة بأيدي وكل الناس والنساوين التمو على سيارة الشرطة..اللي يشفه..والي يلوم..واللي تمصمص بشفايفهه..واللي تكول متستاهل..صعدت بسيارة الشرطة الجيب..صفنت على روحي..وجريت حسرة طويله..ايييييييييييه..يازينة..هاي اخرتهه..ماشيه لمركز الشرطة بتهمة الكتل..هاي اخرة الثار ..شصار بيج زينة..
هاي اخرتهه بمركز الشرطة ..السيارة تمشي واني احضر روحي للي جايني..ضربته واني ما نادمة..اكول الحك حتى لو على روحي..هوة خطفني..وحب يتعدى على عرض رجال غيرة..والمرة الحرة تموت وماتنطي شرفهه..اكتلة كبل مايكتلني بالحياة..المرة اللي يتعدة عليهه رجال..يمنه معناهه ميته بالحياة..ويكون موتها احسن من عيشتهه..واني ما ارضاهه لروحي..ولا لغيري..ولو ينعاد بيه الزمن ويصير بيه نفس الصار..ارجع واكتله..تربيت حرة والدم حار..بس اللي حيرني..محمود..عريس الغفلة..شدخله بالموظوع..الولد لكوه بنفس المكان..يعني اله ايد بالموضوع..يمكن هوة ..اي والله هوة اللي سمعت صوته..وما عرفته بوكتهه..صوته مجان غريب من جان يحجي وية حمّيد..وجه الصبح..الله لا يوفقه..ابن الحرام..هوة طلع وره هاي السالفة..حرامات ما جتي الكزيزة بيه..
وصلنه..للمركز دخلت..جان الكة اخوتي وبلال ومحمود..كلهم واكفين.. اخذو اقوالنة..واحد واحد..محمود اعترف على روحة..انو هوة دز حمّيد حتى يخطفني..واني اللي ضربته دفاع عن نفسي وشرفي..خاطفني متفق وية محمود..انطينة اقوالنة..ورحنة ننتضر حالة حمّيد..وشيصير وياه..او وية محمود..ماخلونة نرجع للدار كالونة لازم ننتضر بغرفة الحجز..لحد ماتكمل القضية ...ودخلنه بمعمعة الخ..تحول غريب من عرس..لضارب ومضروب..دم ..طلق..نار..غدر..خطف..(والله اني عشت الرواية..الابطال ضيعو رواحهم وضيعوني وياهم...هههه) حلونه..بكفالة..بعد ما اخذو اقوالنة.. وكل واحد هوة وضميره بالحجي اللي كاله..لكيت ابوية وعمي حمادي واكفين برا المركز..اني ركبت وية ابوية..على فرسه..وخليتهم يلحكونه ..ما حجيت وية احد منهم..احس بروحي دايخة ..ونفسي تلعب..بلال كال الابوية
عمي لا تعب روحك اني راح اخذهه واروح بيهه..جاوبتهه من ورة خشمي..كتله لا..لا..اني بضمانه ابوية درت وجهي ومشينه..روحي لعبانه منه..وكرهت دارهم وكرهت امه..ما اريد اروحلهم..احس روحي..تعبانه.. وعلية ضغط هوااي..من كثر الهم ..خليت راسي على جتف ابوية وكمت ابجي..
ابوية كالي ..شبيج بنيتي..؟؟شبيهه زينتي؟؟لا تبجين..لا تخافين اني يمج وما اخلي واحد يوصلج..واذا تخافين من هذا الجلب..يموت..خل يموت..ادفع اللي جدامي واللي وراي..وماخليج ترحين للسجن ولا يوم..
كتله ..ربي يخليك اليه يابه..اعرفك تخاف علية.. وتسوي كلشي لراحتي..بس احب نروح لدارنه..مليت من تصرفاته وتصرفات امه..
كالي..بنيتي..مالج شغل بيهه..خالتج نجاة مرة جبيرة ..لا تعتبين عليهه..ترة هية مثل امج..
كتلة يابة تعبت..اريد ارتاح..ابدارنه..وماريد غير شي..
كالي..ابنيتي انتي مرته..واني ما اكدر ادخل..واخذج بدون رضاته..نوب ازيد المشكله
كتله يابة..من يريدني اني اجيه..من دارنه..يابة عفيه اخذوني وياكم..ما احب ابقة يمهم..
كالي استغفر الله..بنيتي..ليش تخليني..بحيرة عليج..اذا سوالج شي..كولي حتى اتصرف..
كتلة ماسوالي شي ..بس ما احب ابقة بدارة..
كالي كافي بنيتي بلا دلال..المرة ما الهه غير رجلهه ودارهه..هسة نروح وتانمين وترتاحين وعود امج تكعدج اتوديج لدار رجلج...سكتت وبكلبي غصه..دموعي صارت وديان..وجعي..جبير اريد ابتعد عنه..ما اكرهه..بس اريد اعوفه..وية روحه..اني صحيح احبه وكلبي..معلك بكلبه..ونبضي بنضرات عيونه..بس لوعتي منه كلش جبيرة.. راحو كلهم.. هوة اللي جنت اتاني اشوفه ابعز ازمتي..اتانيه يحط ايدة على كلبي..وارضى ..هواي وجعني..ولازم اوجعه..اكثر ما وجعني...
رجعنه..وامه تسأل..وتمتمت..بنص النسوان..لاجتي علية..ولا اهتمتلي..رميت روحي بحضن امي..وكمت ابجي ضاكت الدنيه بيه..والضربات اللي اكلتهن اثرن بيه..احس بروحي..حزنانه..ومضايقه...ورافضه فكرة اني اشوفه..او احجي وياه..من داخلي من نص كلبي ما احب يجي على بالي ..
كلت لامي..يمه اني مو بنيتج..وتحبيني..اخذيني وياج..يمه عفيه افهميني..يمه كلبي يوجعني..هنايه..اريد ارجع لدارنه....اخذيني..لاتخليني يمهم..
امي تكلي بنيتي تحملي واصبري..واني اكللهه ما اكدر اتحمل..ابجي..واتوسل بيهه..
يمه والله اذا بقيت يمهم اموت..اخذيني..منا..لنوب اروح اسوي بروحي مصيبه...
كالتلي..اسكتي...اسكتي..لا تبجين..مو زين عليج وعلى الطفل اللي ابطنج..خل نشوف شراح انسوي بنيتي الله يرضيج..كلتلهه يمه هسه..ما احب ابقه ولا دقيقه..
كالتلي.. ورجلج شلون بنتي..ما يستغنى عنج..شلون يعوفج..
كتلهه يمه الرجال اللي يشك بشرفه..ما اكعد وياه..اخذوني ترة انهزم وما اخلي واحد يدري بيه وين..
كالتلي..هذا دلال مال محبة مو كره..اني اعرف ..هدي روحج..وميصير كل اللي ترديه تسويه حتى لو ايضرج..خليني اني اتصرف..
كعدت تقرة ايات من القرآن..وتهدي بيه..لحد ما اخذني النعاس ونمت..شي اقوة مني ..كل اللي صار بيه..حتى بالحلم..هم خرابيط..ضرب وخطف ودم..فزيت وكعدت اعيط ..والعرك يجري بوجهي وبجسمي..فتحت عيوني ..لكيت عيون بلال جدامي..انفاسي تسارعت ..حتى كمت الهث..اجة وكعد يمي..ولزم ايدي..اني سحبتهه..كتله كوم من يمي.. لا تلمسني..ولا تجي علية..
كالي شبيج زينة..ليش اني شسويتلج..
كتله..لا كلشي ما مسوي..وكت جنت اريد الكاك يمي..وتاخذ بايدي..مالكيتك..وكت جنت اريدك ..تكلي شبيج شنو اليوجعج..ما لكيتك..عيونك اللي تباوعلي بيهن..هسه..كبل فترة ما كدرت اتحطهه بعيني ..من الشك اللي عندك..راسا تخيلت اني انطيت بعرضك وشرفك..ليش ما كتلي.. ليش ما سالتني..كلي اتعدة عليج ..كلي اشصار بطفل اللي ابطني..هفت حبك الي وما بقه مثل الاول..جنت بس افكر بيك..من جنت اكطع بالحبل..حتى جرح الكزيز اتملته لخاطرك..ف اعوفك كبل متعوفني..وكلتلكياهه من قبل اذا انته هلال ديرتك..اني نجمة عالية اتلالي..اذا جان عندك مروة ونخوة وكرامه..تخليني اروح من داركم ..كافي اللي شفته..وكافي اهانات امك..المكتوب اللي بيناتنه وفيناه..
عيونة صارت حمرة ..ودمراته طلعن من ركبته..وجهه كام ينطي الوان احمر..وازرك..وكف واجه..كالي وشنو اللي مكتوب..او وفيناه..تخبلتي انتي..هذا حجي ما تعيدينه مرة الخ.. بعد كل اللي صار تردين اخليج ترحين..؟؟؟بارادتي..ومع كل احترامي..برة من داري ماكو طلعه..سمعتي لو لا..هه والله يا الله..
كتله اسمعني يا ابن الناس..اني ما اطيقك..ولا اطيق داركم..لو تعوفني امشي برضاك..وتريحني..لو اكتل روحي..والله تجي تلكاني ..سابحة بدمي..
كمت ابجي..من كثر ما صابني من مصايب..عشت لحضات صعبة وتعذبت..كمت اضرب بادية على وجهي..واصيح تعبت...تعبت...جاني يركض من شافني بهل حال..شالني واني ادفع بيه..كالي اهدي...اهدي..طولي بالج..ادري اللي صار بيج مو قليل..اعذريني..مثل ما اني عاذرج..
كتله بمعزتك الي..واني عاذرتك..خليني اروح..ترةاني اذا بقيت..اموت..كالي..على كيفج..اهدي..شوية..انتي..ضايجة هسة..والضوجة ومو زينه عليج..واني شلون اكدر افاركج..شلون اعوفج..
كتله مو تفاركني..لازم نتشاوف.خليني اروح..
عيونه صارت بكصته..كالي ..صار ساعه واني مسايسج..وانتي راكبة راسج..شنو هوة..عمي علي..يا خالتي نجاة....وللحكاية بقية...
