عيوني رغرغت بالدموع..مسحتهه ..مو وكت دموع هسه..الرجال راح يموت بين اديه..عيونه ذبلت والدم ينزف ..اخويه وابن عمي يتانوني حتى انزل من الحصان واكللهم هاكم اخذوه هنيئاً الكم..اكتلوه وارموه..بلال ما حجه ولا كلمه..بس اسمعه جان يتمتم..
..كبل شويه وعدت.. وعدته..تخربطت وما عرفت شاسوي..لو ارجع الدارنا بيه..وانسى نهائي اهلي وديرتي..وما ارجع بعد الهم.. ابد..وراح يكونون اعداء وياي العمر كله.. حرت واحتار كلبي..
ما جانت المسافه هواي جبيرة اللي تفصلني عنهم..وهمزين جانو يمشون مو ع الحصونه.. اني جنت راحبه الحصان وبلال وراي متجي ع جتفي..
عقلي كالي يمعودة عوفيه..شديه ع الحصان..وحليه هوة الحصان يوصله الاهله..وروحي انتي لاهلج وناسج وديرتج..ويا دار ما دخلج شر.. انتي تردين عزيزة يم امج..وابوج..وهوة يردلهم ..يضمدون جرحه..
كلبي كالي لا..لا..هوة وفه بكلمته..انطه ركبته ..انتي ما تربيتي ع الخيانه والانانيه..بس هوة خطفني واغتصب ارادتي باختيار عريسي..اي بس هوة يحبني ويموت بيه...اووووف عركه بين عقلي وكلبي..بالاخير..اذكرت كلامه كبل منجي..كل كلمة حب..كالهه الي.. كل عركة سواهه ويه امه علمودي..رجلي..رجال ابن شيوخ..واني هم بعد بنت شيوخ..باوعت صارو مسافه من يمنه..ورجالهم بدت تلحك بينه..
حجيت ويه بلال كتله..بلال جلب بيه زين..مد اديه وحضني من خصري ..فتح عيونه بالكوة..لمحت لمعه عيونه ..بالرغم من اصابته..
اشرلي براسه..ودور اديه عليه وضغط على جسمي قوي..عسيت الحصان وطرت..الحصان يركض واني ما التفتت وراي ابد..اسمع حس حوافر الاحصنه لاحكتني ..من بعيد..بلال اديه ارتخت..اني خفت..نزعت الشماغ..وحطيته ع الجرح ..فوك صدرة..بمكان الجرح..الدم صبغ دشداشته ودشداشتي..اني خفت وكلبي راد يوكف من الخوف..وكفت الحصان وقدمته خليته كدامي..وحضنته باديه حتى مايوكع...استوني اريد امشي جان الكه رياجيل..محوطينه..خفت كلت انتهيت..واحد منهم حجه وكالي لاتخافين..احنه رجال بلال..اركضي بالحصان واحنه وراج..نحميكم..اني اطمنت..رعسيت رجلي بالحصان وطرت..اسابق الريح ..خفت ع الوكت مايسعفني.. لو ما الحك اوصله.. هوة اغمه عليه وارتخت اديه ورجليه..وصار ثكيل عليه..احجي وياه حتى يضل صاحي..بس مايجاوب..اني خفت...كلت اويلي عليج زينه .. الهم وراج وراج..اذا مات.. تطلعين خسرانه والله بالحالتين.. لا رجال يحميج..ولا اكدر ارجعلهم لديرتنه اللي عفتهم برغبتي ...
اوووف زينه .. نحس على روحج..من يومج..
كمت اركض اسرع..اسابق الوكت ..ادعي من كل كلبي اوصله بخير وسلامه..بس الحكه..اركض والدمع يجري من عيوني..وكلبي يوجعني..نار فراك اهلي...نهائي ..ونار ضربته هوة..عائلتي ما بعد يشوفوني ولا يعرفوني.. اني ضعت وضيعت روحي حكمت على روحي..اعيش منفيه...الصبر منك ياربي..وصلنا ورجاله كامو يعيطونواني اعيط وياهم..طلعو يركضون ..عمي حمادي..اللي هوة ابوه.يسأل..شبيه وليدي..شصار..وامه تضرب على وجهه..وتلطم على صدرهه..حبيبي وليدي..كتلوووه..حبيبي بدمه جابووه..آااه يابه وليدي..اوكعت تلطم وتندب ...كامو لزموهه ويسكتون بيهه...كاللهه عمي حمادي اسكتي يامرة..موتيه وهو عايش..مصوب نعالجه ونداويه..حسج تعيطين ..ما اريد اسمعلج صوت...
سدت حلكهه وكامت تونون..دخلوه للدار..وخلوه ع الفراش ..واحد من رجاله ..راح يركض صاح واحد عدهم حكيم..يداوي ويعالج بعلاج مال عرب..شافه كاللهم نازف هواي دم..والوكت ما يسعفنه حته نوديه للمستوصف..نزعو ملابسه..شككوهه من على جسمه ضغط على مكان الرصاصه حتى يوكف الدم.بلال وجهه اصفر..مثل الليمونه..ذابل ..دكات كلبه ضعيفه ...كال الرجال اطلعو كلكم برة..اني انهزمت بمكان بعيد حتى ما اسمعة من يصيح ويعيط..المضمد سوة اللازم واني اتختل بعيد عليه..طول عندة واني علىاعصابي...امه تدردم وتولول .والبنات وياهه..والحوش امتلى بالنسوان والرياجيل ..المضمد طلع واني انتضرة ادز بالناس حتى يطمنوني عليه..سمعته يكول سويت اللي عليه ..طلعت الرصاصه..ونظفت الجرح.وكويته وعقمته..وخيطته..الضربه جانت حساسه شويه..بين جتفه..وركبته..لازم تاخذوه للمستوصف حتى تاخذوله اشاعه اخاف اكو كسور..الجرح مو خطير..سهل..بس برأيي ودوه للطبيب يشوفه ..
ابوه كال..وليش نوديه..الشرطه راح تاخذنه سين وجيم..وتعالو منو ضربه ومشاكل ماريد ندخل بيهه..الثار ثارنه واحنه ناخذه بادينه..الطبيب انجيبه اللي هنا ..وننطيه كروته... امه..كامت تحجي وتباوعلي كالت كله من هل بومه..من اجتنه ما شفنه خير..كالتلي وليدي بيني وبينج زينه اذا يموت اكتلج..باديه هذني ..اني سكتت ما حجيت ولا كلمه..الناس عدهم حق..اني وديته للموت بيدي..
كمل الحجي ابوه..كال خلي يطيب وبعدهه عندي كلام ثاني..اني صوجي طاوعته...اني كلت ياويلج يزينه...جنتي زينه..وهسه مهينه ..رهينه..انتي استاهل مو بس الملامه اني استاهل طلقه براسي واخلص..الحوش مالتهم امتله ناس رايحه وناس جايه..واني بالي مو يمهم..بالي يم مصيبتي..كعدت بصف باب غرفه النوم والناس ملتمه يم هل غرفه ناس تواسي وناس شامته..واني كلبي ما يعلم بيه بس اللي خلقني..
وهاي الحسودة بت عمه اللي متسمه..مفيدة..جايه وشمتانه كل قوتهه بيه وبيه..فزيت كمت من مكاني..ومشيت حتى اشوف بلال.. واكعد يمه..جان تحجي هاي العكربه.. مفيدة كالتلي وين رايحه..يا بومه..اجي ابطط عيونج..كتلهه رايحه لرجلي اللي فضلني عليج..هيه خطيه كامت عين تضحك وعين تبجي..كتلهه ايبااااه شكد عيارة..صدمتهه بجوابي..وجان الزمهه من شعراتهه وسحلتهه سحل بنص النساوين... وخليت المايشتري يتفرج عليهه ..افيششششش فشيت ضيج خلكي كله بيهه..عمتي ام بلال شافتني فزت على مفيدة.. خلت اصبعهه بوجهي وكالتلي بعي دخول لغرفه ابني ماكو مدخلين..لو شسوين ..تكتلين الكتيل وتمشين بجنازته..امشي منا ياوجه النحس...نزل عليه صبر ما اعرف منين.. واني لوحدي ..لا الي والي ولا تالي..بنصهم...نزلت اصبعهه بايدي وكتلهه داخله لرجلي ..واريد اشوف واحد يمنعني..ومايخليني..عمي حمادي..شافنه بالباب ..حجه عليهه ورزله وكاللهه عوفي المرة تدخل على رجلهه..عيب اللي تعملينه بيه..كالتله واللي سوته بيه مو عيب.. كاللهه اسكتي وسدي حلكج..ترة افركه الج فرك...انتي كلامج ويايه تاني خل تروح الناس واني اعلمج..لبدت بمكانهه ..عفتهه واني شمتانه بيهه ومنتصرة عليهه ودخلت..وكلبي ..حسيته طلع مني من شفته..امدد وصدرة طالع ملفوف بشاش وكطن ع الجرح..ونكطات من العرك على كصته..وجهه شاحب فدنوب تكول وجه ميت..حبيب كلبي اذا مات ..كلبي يتكطع..من الداخل ..صابته كتاله..الخوف لزمني وكمت ارجف من راسي لساسي.. ودمعاتي نار يطلعن وحركن خدودي..لزمته من ايدة .. ومشيت ايدي على وجهه..وجهه جان بارد.. وراسه نار تطلع منه..شعراته مبللات من العرك..كمت ابلل الكمادات واحطهه على كصته..ومرة على اديه ومرة ع رجليه..وادعي ربي من كل كلبي ..يكومه من محنته هاي.. اجه الليل..وجابو الطبيب من المدينه..دخل للغرفه واني طلعت..خليتهم والرجال صافنين ع الدكتور من كام يعالج بلال.. اني طلعت لزمتني حماتي ام بلال وجرجرتني لغرفتهه..تجر بيه بالكوة..دخلتني الغرفه وسدت الباب علينا..كالتلي اسمعي يابنت الناس..لحد هنا وكافي..ايزي اللي شفناه منج..كله ديوكع براس وليدي..واني ما عندي غيرة اباوع على الله وعليه.. لا صدكين ان بلال يحبج..لا..لا غلطانه.. وليدي كل اللي سواه ديفدي ثار سنين....عمته اخت ابوه..انهزم بيهه عمج..وخلو العار..والفضايح..جان يلحكون بيهم وكتلوهه.. وكتلوه وياهه..السالفه اكبر من سالفه الكاع..وابوه حلف يمين الا يخطف ولده..اللي هي انتي بنت اخوه..حتى يفدي ثارنه..خطفناج..وجانت غايتنه تحبلي..من ولدنه ونردج لاهلج انتي وابنج....ونكللهم خطفتو وحدة نردهم الكم اثنين..
بلال مثل عليج دور الحب..مثل الصدك..حتى انتي كايلتله ..اخذ حقك وعوفني وكالج لا..لا..اني رجال مو حيوان..نعرف كلشي ..
احمدي ربج اللي ماسوالج شي وما غصبج..كبل لا يطلع الصبح رجالنه يوصلونج لدياركم..كتلهه..لا..لا..هاي السالفه عوفيهه هسه لحد ميكوم بلال واسمع هذا الحجي منه..ويا ديرة اللي اروحلهه.. اىلي انهزمت منهه اني وابنج..تحبين تشوفينهم شلون يكتلوني..كالتلي..اني ميهمني اللي ردناه صار..كسرناهم ..وكسرنه شوكتهم..وراح انردج الهم..اني فتحت الباب وعيطت..جتي هاي العكربه مفيدة..وجايبه وياهه وحدة ثانيه..لزموني من اديه وربطوهه ورة ضهري.. وكممولي حلكي..وطلعوني من باب ثاني بره الحوش..ركبوني على الحصان..ويه واحد رجال ملثم..اخذني..وكام يكود بالحصان ..رجعنه ع الديرة مكسورة الجناح وذليله ومنهيه..تندمت واكلت اصابيعي من الندم لان اخذته وجبته الاهله ..(سمعت كلامجن انتن اللي دتقرن..وتندمت..اللي يسمع كلام النسوان..خسران)ههه
شنو اللي استفاديته..رجعت ذليله بدون كرامه..حجي حماتي ضل يرن باذني..وماراح من بالي..ومخي بس يفكر باللي يتانيني بالديرة مالتنه..شراح يسوون من راح يشوفوني..شنو اللي راح يجرالي..من اوصلهم..راح يستقبلوني لو يردوني..وهل حجي اللي حجته ع بلال صحيح لو لا..ومعقوله ..هاي افعاله وحبه كلهه جذب..لا..لا..مخي كام ياخذ ويجيب ..الدنيه ظلمه..لا حس ولا نفس..صنطه..اللي يجر حصاني.. لابد وساكت بس عيونه تتبارج..وصلنا وجه الصبح..تقربنه لديارنه.عاف الحصان وفك الحبل ومن اديه وراح..رجعت للديرة رجعه ماجانت على البال..صرخت يمممممممممه..خيالهه هف اجتي تركض ..وابويه وراهه..واخواني جوي ركض..امي جتي تركض وتريد تحضني بس ابويه صدهه اوكف كدامهه..رفع حاجبه وكالي ليش جايه..انتي مو رحتيله وخيرتيه علينه..اني دموعي سبقت الحجي مالتي..الكلوب مثل الحجر.. احمد اخويه رجع لبيته..وراح وبايدة بندقيته..وايدة ع الزناد..
انتي جبتيلنا العار ونكستي روسنا بالتراب..اليوم اكتلج..اكتلج جيتي برجليج لموتج..وجه البندقيه صوبي وحط اصبعه ع الزناد...وللحكايه بقيه
