#ثار الدم
#ليوثي المياحي
_7_
اخذني من كدامهم وخلاهم يدردمون وراي.. والنسوان تضحك ..وتكول الله يهنيهم..مشينه بالحوش وهوة يسرع بخطواته.. وهمه كاعدين وعيونهم تخزر بينه..دخلنه للغرفه..وسد الباب وراه..وكالي..اسمعي يابنت الناس.. جدام اهلي وناسي لازم تبينين انج راضيه وفرحانه بعد..ما احب ازيد هم فوك همومهم..سكت...حسيته تعبان ..وعيونه مليانه الم.. خليته ومشيت..والوضع ماعاجبني.. بس الحب ميصير هيج.. تعبت من ليله البارحه.واخذتني النومة ونمت.. خلص النهار وماحسيت الا وكت العشى.. كعدت ورحت ساعدتهم بتحضير العشى..وتعشينا وسهرنا ..بالحوش وياهم.. اتونست شويه.. البنات جانن مصبراتني.. على اللي اني بيه.. خلصت السهرة.. واني ما منعسه..جنت اخاف من يجي الليل..لان ما اعرف شيجيبلي وياه..اخاف من نكعد وحدنه اني وياه ..لان هوة كاعد على نار ما يصدك يلكاله اي فرصه... كامو الربع يتثاوبون.. امه كالتله وليدي روح انته ومرتك كافي سهر ترا هيه تعبانه ..هوة ما صدك.. كام ولزمني من ايدي.. ورحنه دخلنه للغرفه اني كتله راح اروح للحمام اسبح .. سبحت وبدلت ملابسي.. ورجعت للغرفه ..ما لكيته موجود.. تذكرت امه من كالتلي رخي الحبل شويه..كلت اي ليش لا.. خل نستعمل شويه اسلحه فتاكه.. خل نبدة وبالاقل خطورة.. فتحت الكنتور..لكيت ثوب كصير فوك الركبه..ولكيت هدوم الخ...بس فضيحه..الله يهدينا..
بس ما لكيت شي جوة الركبه .. كل الملابس كصيرة ..اخذت واحد لونه احمر ولبسته.. بس استحيت.. اضطريت البس فوكاه صايه بس المشكله هم خفيفه وتراري.. لبسته ولا جني ادري...قلست..هههه ..وحمرت شفايفي بلون احمر طوخ.. كحلت عيوني وخليت ريحه.. باوعت بالمرايه ما عرفت روحي.. عجبتني روحي ..كلت خل اجيه اضربه ع الوتر الحساس.. واحركه حرك..وعليه وعلى اعدائي.. غير هوة يحب مرته..هههه خلي يشوف بعينه ويموت بكلبه.. شتميت ريحته.. جاي ..كلبي كام يدك.. دخل جان تجي عيني بعينه.. فتح حلكه.. ولزم دكم دشداشته وكام يفك بيهن.. اجاني وعيونه تبرج.. وتلمع ..فرحان ومتعجب.. ابتسم...اني انقهرت عليه..سنونه مصفوفه عدل وبيضه.. من يضحك ياخذ الكلب..اتقرب مني وحط ايدة على جتفي.. ومشاهه على ذراعي لنهايه جفي.. شبك اديه باديه..وكام يلهث..اني عرفت سهمي ماخطه كلبه..انطيتهه اله بالكصه..كالي شطالعه زينتي.. شناويه..تردين تكتليني.. كلبي شراح يطيبه ..اني ضحكت بسخريه..كتله لا لا..الدنيه حر كلت شويه ابرد.. وانته مو غريب انته مثل اخوي..ضحك ههه كتله ضحكني وياك..كال..لاه خيتي.. كلمه اخويا بعد لا تعيدينهه ..تقربلي ولزم خصله من شعري وكام يلعب بيهه.. وشاورني..باذني ..اني رجلج.. اريد اخذ حقي منج...انتي سلبتيه مني
ادري بيج لبستي وتعطرتي وازينتي ... اليه.. يحجي واصبعه. يجي ويروح على خدي.. كتله اكيد كلت هاي عقلت وكامت تحبني..اني لويت اصبعه كتله..مسكين انته تحلم ..عقل ما اعقل.. وما اخليك اتقربلي ..ابد.. لزمني من شعري وانفاسه ادغدغ..بيه..حط كصته على كصتي..رجليه خارن وركبي وكعن..كالي انتي ماناويه تعقلين.. وليش تستفزين بيه..ترة اني رجال وصبري اله حدود..ما اغصبج..بس من اوعدج..اكون عند وعدي..اريدج كل ليله هيج ماشي..اني لساني مدري اشسكته.. انبلع بحلكي..وحلكي يبس..وكام ما يطلع حجي..شاحجي وكلامه مثل العسل.. كمت اتفنن حتى اعذبه وبنفس الوكت اتعذب من اشوفه يتعذب .. بس جنت احس بشي غريب من اصير بقربه..شكد قريت روايات حب..بس عمري ما جربته..ولا حسيته..اصلا ما تقربت من اي رجال..جانت اكو لذه من يتقرب مني.. لذة برجولته..بغرورة..عجبني لان البنات يحسدني عليه.. جنت اكيف لان اني الوحيدة اللي مليت عينه..احس بمتعه وياه..نوبات اباوع ع شفايفه..وهي ترعش ..بشهوة.. اغمض عيوني..حتى احلم بيه...
بلال يحجي..تمنيت احضنهه وافرغ بيهه حب سنين.اتمنه اتذوق شهد شفايفها.. اتمنه المسهه باديه..واشبك ايدهه بايدي للابد...
كلبي يحترك بنارهه بس فضلت احترك على ان اخسرهه..
كلتله بلال احس بالبرد..وكمت ارجف..مديت ايدي ع جتافي حتى ادفيهم ..غريبه حسيت بالبرد بعز الصيف.. من شافني اكز بسنوني.. اجاني وضمني.. بكل قوته..الله شكد حلو حضنه..وشكد حلوة من شالني بحضنه..اوووف الدنيه لعبت بيه لعب.. كلبي كام يرجف .. ضم راسي ع صدرة ..ويلعب بخصلات شعري بايدة.. ويشاورني.. زينه...زينتي..الله يبنات..شسوة بيه..ثاري حضنته دمار.. عيونه تكطر عذاب.. حلوة ضمته..الي..حلوة حضنته...واني بعز الدفو والحضن.. والحلم..دك الباب..مو دك تكسر.. سمعت عياط برة.. عافني بساع..وكالي زينة..لا طلعين ..اسمعي..كلامي..لان اني اخاف عليج...واستري روحج ..خليني اشوف شصاير برة...خلاني وطلع يركض..رحت للحوش شفت امه تعيط وتندب واخواته يعيطن.. ابوه كاله بلال وليدي اركض..الحصاد احترك.. النار تشتعل ..اركض وليدي.. رجالك راحو كبلك... استعجل ابني... اني حطيت ايدي ع حلكي.. يبووووو بدأت المعركه..وبدة ثار الدم..
انصدمت ...اووف هوة بدة وهمه راح يكملون...اني اللي احترك بنار الثار والفصليه..ركضت لبست اللي اجه كدامي..وطلعت ما ادري شخليت على جسمي..اباوع ع بلال يركض صعد الفرس مالته.. وطار خله بس العجه وراه..ويه كل ضربه حافر من حوافر الفرس مالته كلبي يضرب وينشلع من مكانه..شفت امه تبجي رحت اركض عليهه ..كتلهه يله خاله خل نلحكة ياله نلحكه..خالتي تبجي.. قهرتني ..مرة جبيرة ..ودموعهه ع خدودهه...كالتلي شلون بنتي زينه..وهوة وصانه وكال ما اتطلعون.لا خلينه..هنا همه رجال وي بعضهم...سكتت..كبر بعيني كل شي الا اني ...دكات كلبي شبعت خوف..عليه اخاف يتأذة ..اخذت رجال وسيد الرجال..عرض عشيرته.وروحه للمصايب والمشاكل.. علمودي.. اللي الله يريدة يصير.. احنه بدينه بالغلط.. كعدت وياهم ونندب بحضنه.. تعبت من كعدت الحوش.. ويه نسوان الديرة.. كتلهم خل نروح حتى لو نعاونهم بسطوله المي.. كمنه وهمينه رواحنه حتى انروح عليهم.. كلبي جان لابزني ويكلي اكو امر مو زين... طلعنه نركض.. وصلنه بعيد عن الديرة.. الدنيه ضلمه.. جنه شايلين فوانيس ويانه..ونضوي بالطريق شفنه الدخان نار عاليه لسانهه طالع بعلو السمه...الرياجيل ..جانو سرة وبكل مكان اللي يرش المي ..واللي شايله سعفه خضرة ويضرب بالنار...شفت خياله يجول ويصول بين الرجال..اعرفه من بين الف رجال..حاولنه..انعاونه باللي نكدر عليه ..الوجوه ازركت.. ودخنت..شويه من شدة النار وشويه من القهر ..الكلوب حيرانه..وموجوعه..الدموع تجري ما وكفت ابد.. اني ما فتهمت احساسي..ولا افتهمت روحي... اني حزينه مدري عليهم مدري خايفه.. جنت ملتمه ع روحي.. واتابع بعيوني..شافني بلال واجاني يركض..كالي اني شكتلج زينه.. مو كلتلج..ابقي بالدار ..والتفت الامه وكاللهه اني مو نبهت عليكم تبقون بالدار ..جذبت عليه..كتله..خطيه خالتي..اني لحيت عليهه حتى نلحكك..انت واكع بمصيبه..وتريدني اكعد اتفرج..رغم تعبه وحزنه.. ابتسملي..ورمالي بوسه..طايرة على غفله..من بعيد..طيرت عقلي وياهه..جان تحجي بنت عمه الحسودة.. كالت..هاي وجهه وجه نحس.. وبين من اوله..عمرنه ما احتركنه..باي موسم..الله يجازي اللي جان السبب..اني اتمالكت نفسي وما حبيت اردهه.. بس بيني وبينكم ردت اكوم الطخهه بتك نعال..بس بلال سحبني.. وجاوبهه ..كاللهه احترمي مرتي.. احسلج..لو تكرمينه بسكوتج...اني عندي حجي ويه ابوج واني اعرف شلون اخليه يربيج...اني لبدت.. هوة التفتلي وبصوت مسموع..كالي ديري بالج ع روحج زينتي..كلشي يتعوض الا انتي..والتفت الامه..وكاللهه يمه زينه امانه يمج..ما تخلينهه تتحرك من يمج..ضغط على ايدي ومشه..
سمعتهه لبنت عمه تحجي من جوة ليجوة..تكول الناس حايرة بمصيبتهه وهوة حاير يتغزل..لبستهه والتهيت وياهم..الحريق جبير وصعب..انطفيهه..النار اكلت سنابل الحنطه والشعير كله.. الناس اللي بالديرة كلهه اتطوعت حتى اطفي النار..تعاونه بيناتنه.. وكل واحد اخذ سطل مي وراح يرشه ع النار..بيهم من يعبي من البير وبيهم من يشيل سطلين ع جتافه..ريحة الدخان.. تكتل.. النسوان لفن شالاتهن ع خشمهن وحلوكهن والرجال حلو الشماغ لو الغتره ولفووهه ع حلوكهم وخشمهم حتى مايختنكون من دخان النار..جانت العيون تلمع..بالفاجعه..والالم..ما كمنه نعرف احد الا بلال..مثل الفارس يفتر ويصيح ويوجه..وينطي الاوامر..والكل ينفذون ..الرجال كلمته ماشيه.. وسلطته طاغيه.. جنت اعاون واركض وياهم وعيني ابد مانزلت..من عليه..حسيت بخيال مشه من ورايه..من حاولت اشوفه منو حسبت واحد من رجاله.. حتى سمعت صوته..صوت اعرفه كلش زين..اخويه احمد.. كالي زينه امشي وراي بسكوت..لان كلهه ملتهيه..اذا تردين ترجعين تعالي ..اني كلبي رجف..وعيني اتابع بلال..وتعاين عليه..من غير ما احجي او اكول كلمه..تبعت احمد ..وكلبي خليته يم بلال..انداريت وبعدني اشوفه....بلكي يلحكني..ويردني...نار كامت تحركني واكيد راح اتحركه.. وما ادري شضاملي القدر من مصايب .....وللحكايه بقيه..
