ثار الدمْ

8

اتبعه وامشي واتعثر وهوة يمشي كدامي بخطوات..اني مثل الحايرة اريد اروح واريد ارجع.. احمد يحجي بصوت ناصي لاهوة ديحجي وياي ولا يحجي ويه روحه اسمعه يدردم يكول.. ونوب جايه اطفي بالنار..انشاء الله لا طفت.. بعد..بعد الا نحرك كلبه.. اني لكيت روحي من غير ما احس.. اكول.. اللهم الطف ع كلبه..جان احمد اندار عليه ..وتفل بوجهي وكال ان شاء الله النار تاكله اكل...وج هذا واحد جان رايد يكتل اخوج...تدرين اكبر غلطة بحياتنه هيه انتي...ونوب كايمه تستلطفيه.واحتمال كايمه اتحبيه..تاني خل نوصل للديرة وحسابج بعدين..اني سكتت لان اعرف شنو اللي يتانيني.. بالديرة..ادري راح يلومون بيه وراح راسي يصير مثل الطبل الرايح والجاي يدك بيه.. من كثر الملامه على موافقتي وعلى توقيعي للعقد مال الزواج... اني امشي ورجليه...تطخطخ وحدة بالخ...من الخوف ومن رهبه من اشوف ابويه..ولكيت روحي..كل ساع اتلفت ..واني اودع بديرة بلال..بمعزه..واني ماعشت بيهه بس يومين.. ماجانت هامتني الديرة بس اهتميت للرجال اللي اتسميت باسمه.. بس هوة اللي جان هامني.. كمت الوم بروحي..عليش مهتمتله.. اني مو هواي اكرهه ..وجنت اصدة من يجيني..هياتني راجعه الاهلي..بعد شريد.. اذا جان ع الرزايل واللوم خلهم يلومون ويرزلون..حتى يملون..شسوي اني مرته..بعقد مال زواج..يريدون يطلكوني ..شنو يعني خل يطلكون...والله اني هاي حالتي وبكيفهم بعد.. اني ما جنت مزوجه اي واحد اني تزوجت سيد الرجال..؟؟؟.اوووف كلبي يتكطع ... يله خليهه على الله..واللي مكتوب ع الجبين لازم تشوفه العين...
بلال جان لساعه ملتهي بالحريق يطفي بيهه ..لحد ما طفو كل النار ...كال ..اوف كلبي وجعني على كل تعبنا وشكانا.. واكيد هذا شي قليل من اللي راح يصير بينه.. المهم زينه بخير ومحد مسهه ..الزرع والحصاد يروحلهه فدوة.. جنت مطمن عليهه..لان وصيت امي عليهه.. باوعت بعيني بكل الاتجاهات.. ما المحهه ولا اشوف خيالهه من بين الدخان...كلبي وجعني ..كمت اركض مثل المخبل ..يمه..يمه.. وينهه زينه..
كالت هااا وليدي..جانت بصفي..تنطيني سطوله الماي..اويلي وليدي كلبي وياك..انت حبيت تنحرك بالنار ..وهذي البدايه..كتلهه يمه مو وكت هل حجي..وصاح لم رجاله.. برمشه عين.. اتفرقو بكل مكان وكامو يدورون عليهه..بنت عم بلال الحسودة مفيدة..كالتله..اني شفت رجال اجه حجه وياهه ولحكته..وراحت وراه..انسحبو مثل الحراميه...يمكن عافتك وعافت بيتك ونهزمت..بكل غضب رفع سلاحه بوجهه ..كاللهه بالله لو جنتي رجال جان كتلتج..بس حضج انتي مرا..وجهج بعد ما اريد اشوفه.. حتى لو صدفه..ياله امشي ولي روحي من كدامي...ومن داركم  ديري بالج اشوفج طالعه.. وجربي حضج وخل اشوفج برة وتكسرين كلمتي...رمت السطل بغضب وراحت تبجي..وهوة طلع يركض ويه رجاله.. لحك زينه..اللي بعدهه ما ابتعدت هواي اخوهه جان مخلي الحصان بعيد..شويه ..جان رابطة جوة شجرة باطراف الديرة.. يمشي واني اجر برجليه جر..احمد كام يحل بالحبل.. مال الحصان واني واكفه..وجان لساني كام يلعلع..كتله ليش تحركون محصوله..؟؟حرام والله..رجعلها وعاف الحبل من اديه..ومناخيرة تنفض دخان ..ترس وجهي تفال..وهفني براشدي ع خدي دار خلقتي..لان جان شايل من عندي هواي..انوب يكلي ماتستحين..ولا عندج غيرة.. ما كدرتي تكولين لا.. وهمه ماكدرو يخطفوج الا ضربو اخوج..؟؟امج جاي تموت بحسرتهه ..كلبهه ضعيف ومريض..ابوج انكسر كام يمشي ومدنج راسه من الناس ..وكاضي كل وكته بالدار ومايطلع..همه ناس..واحنه شنو جلاب.. ؟؟بس مايفيد الكلام الزايد وياج..
بلال لمحهم من بعيد..غضب هواي والعرك يتصبصب منه..انطه اوامرة..وبلحضه الرجال حاوطوني اني واخويه ..بلال وجه سلاحه للسما..
وكلهم انتبهو عليه.. اني  نسيت ردت اركض ع بلال لزمني احمد وهفني راشدي.. بلال ضرب رصاصه بالسما ..اني  نسيت االراشدي..من سمعت صوت الرصاصه..بلال كاله..وصوته مثل الرعيدة..تبوك مرتي بدون ما تكول ولا تسأل ..وانوب تضربهه راشدي كدامي...ماعاش ولا صار اللي ايمد ايده ع مرتي..هذي رجولتك..؟؟اليوم اكتلك واذب جثتك للجلاب..جان يصوب سلاحه بوجه احمد..اني رحت اركض وكفت كدام احمد وخليت سبطانه السلاح بصدري..بقيت بنارين ..نار اخويه احمد ونار رجلي بلال..كتله كافي بلال كافي دم.. اذا تحبني واني عزيزة عليك ماتمسه..تريد موتني اني..صوبت واحد من اخوتي كبل.. كافي ..كمت ابجي واتوسل..جان احمد يصرخ من وراي كالي لا تبجين ولا تتوسلين خليه يضرب ..هوة ورجاله واني هم اضرب اي واحد يطيح باديه..
بلال كاله..هايهيه..زينه جيبي سلاحه..وتعاي..وانته اخذ حصانك ..وروح لديرتك..لان ما احب اتعارك وياك..وافيض دمك..يلا روح...احمد لزمني من ركبتي..وحط مسدسه بصفحتي..وكاله اكتلهه وما اخليهه تتزوجك..وتفرح بيهه..خليني اخذههوامشي بهدوء احسن ما افرغ المخزن بصفحتهه..
بلال كام يخاف..عليه..واندهش..اني ضليت حايرة وخايفه ارجف.. اخويه سلاحه بصفحتي..ورجلي سلاحه هوة ورجاله مصوب علينه..
نار انطفت...ونار اشتعلت..نار الحصاد ..ونار الكلب لهبت..مرت لحضات صنطه.. وعيون مليانه كره وحقد واني بين ثارين..ثار خمد بالكاع.. وثار اشتعل بيه..بلال رمه سلاحه بالكاع .. اخويه احمد ضحك باستهزاء..وكاله..الرجال يموت وما يعكط سلاحه..حتى لو من ورة مرة..جان يوخر مسدسه..من صفحتي طلعه وجان يوجهه ع بلال..وايدة ع الزناد..جان يضغط عليه..اني كمت اضرب وجهي باديه..واعيط..لا..لا..كافي دم.لا..جان تطلع الطلقه طلعت تهلهل تزف بلال للموت ..اني وكعت بالكاع..وبلال واكف..فارد صدرة ويضحك..واحمد الفرحه ماسايعته..وتبين بعيونه..لان اخذ بثارة...
وبلحضه..جان تنكلب كل الموازين..رجال بلال..واحد منهم التاف من ورة احمد.. وطلع البندقيه مالته وجهه للسما طلعت طلقه تايهه منهه ..رجال بلال الباقين حوطو احمد..وجتفوه سلاحه وكع منه...بلال يصيح ويعيط..جتفوه وانطوه حقه..ودزوه الاهله..على حصانه..
اوف جانت ليله غبرة..اولها نار وكملتهه سالفه اخويه..ما عرفت شاسوي..كلبي كام يوجعني.. شواني اخويه.. وجواني الرجال اللي اخذني..لان كللهم انطوه حقه..افتهمت انو يدموه ويدزوه..بلال كرهته كره اعمى..يضرب اخويه ويريد اسكتله.. مشيت ودخلت بنص الرجال..واصيح..اخويه احمد..عوفوه لا تكتلونه..باوعت عليه..لكيت الدمعه والحزن بعيونه..وبلال وجهه اسود..من الغضب..بحركه باديه كاللهم محد يتقرب عليهه..اجاني وسحبني من ذراعي وشالني وحطني ع جتفه..واني اضرب باديه..وافرفح برجليه..واسب واغلط بيه..وهوة ولا مهتم..كاللهم سوو اللي وصيتكم عليه..حصادنه ما يروح بلاش..واللي يتقرب على مرتي اكتله..مشه وكام يبتعد..واسمع الضرب باخويه..واحمد يصرخ ويعيط.. كالي لاتخافين..انجيبج وين مترحين  وراج رجال .لا تخافين..اني زاد كرهي اله وكمت اموت منه..وصلني للدار ..مصلوبه خلاني كدام امه..بوسط النسوان.. وكاللهه يمه هاي امانتج ردت لدارهه..اروح اكمل شغلي واجي..لاباوع عليه..ولا عبرني.. ولا واجهني..ودار وجهه ومشه.. امه لزمتني من ذراعي وسحلتني سحل وراهه وهيه اتدردم.. وتبجي..حصادنه وانحرك .. والدنيه واكفه..علمودج..وتنهزمين؟؟تردين تفضحينه..تردين لتخلينه علج بحلوك اليسوة واللي مايسوة..مو صحيح اللي سويتيه يابنت الاصول..والله حلال نحبسج ونسكتج..اني بنصهم شاسوي احجي ويه وحدة..يردوني عشرة..
ملصت روحي منهم.. ورحت للغرفه. غسلت..وتحضرت لسيد الرجال.. خل يجي ..ابد ماعوفه بحاله..لو يعوفني ارجع الاهلي لو يكتلني..كعدت ع السرير واني متوترة واتاني بيه..كبل ما تصبح الدنيه صوت المفتاح وهوة يفتر بالباب..انفتح الباب ودخل..شعلت الضوة.وجان يلكاني واكفه اتانيه.. والنار مشتعله..بيه..واحساس فضيع بالحقد عليه..كضيت الوكت واني اتكرضم ماشيه رايحه جايه..وصايرة جمر..باوعلي..ورمى المفتاح وبدة ينزع..بملابسه..ويحجي..كالي اني متاكد الكاج كاعدة وتانيني..ياله كولي شعندج.. اختصري لان ميت من التعب..
كتله اكيد تتعب من هلكد ماضربت اخويه.. نزل عيونه ولا هامه كلامي..كال مو اني اللي ضربته..رجالي كامو بالواجب..او وصلوه.. لديرته..مو بس هوة وياه رياجل لزمناهم وقمنا بالواجب وياهم ودزيناهم... الله لا يهنيكم اكيد عذبتوهم وكتلتوهم...ضحك وكال اكيييييييد..كتله بس اني اريد ارجع لاهلي والديرتي.. ولا جني عرفتك..ولا انته خطفتني ..كافي الثار نار ودم ..كافي اني باقيه بالنص بينك وبينهم.. حس بيه..عوفني..روحي طلعت..باوعلي بنضرات مال موت.. و الجذب اللي بكلبه طلعه كله ..دمارات ركبته كامت تبين من الغضب عيونه اشتعلت بنار...اني خفت منه..هوة يتقدم عليه واني ارجع ليوره..يضرب بجف ايدة على كلبه...ويكول ..وهذا شاسوي بيه... رجعيه اليه ..عوفيه وروحي..انتي شلعتي بيبانه..وتربعتي على عرشه.. نساوين الديرة كلهه تتمنه ..نضرة مني..احتقرت الكل..وتحديت عشيرتي..وكفت بوجه ابويه.. ما اكدر اعوفهه كتلهم.. مستعد لكل شي ..كلهم كالو..وياك ما دامك تريدهه ..حركو ..خل يحركون..مستعد لكل شي ..بس انتي لا ما اعوفج للموت..واذا رجعتيلهم اعرفي انو اني متت..افتهمتي لو لا.. هزني هز وزعزعني ورجفني بالحجي ماله..بس مال احن عليه ..لا..لا..كتله اني ما احب اكعد يمك..ولا احب اعيش وياك..كلبي ميريدك..بيني وبينك دم...وثار... عمرنه مراح نلتم..
كام يهز بايدة وكالي عمرج ماتكولينهه ...يبنت الاصول.. اخذتي رجال ..وفه بكلامه.. كلبج يريدني.. وعيونج..تكول انج تحبيني..انتي ما اختاريتي عريسج الاول..حتى تختاري غيرة..اني اخذتج الي..باوعت عليه وكتله..اذا انته اتحبني.. اخذ حقك.. وطلكني اخذ جسد بس بلايه روح..رجعت للفراش ابجي واعيط.. نزعت ثوبي وبقيت باليتك..كتله يله اخذ..اخذ..اخذ حقك..واني ابجي والدموع ع خدي كتله تعال اخذ حقك وخليني ارجع لامي ولابويه..واخوتي...عوفني ..ما اريد بعد عرس..بعد ما احب شي..
بعد روحه مني.. كالي..اني فاهمج..اني عمري ما اعوفج..ولا اسلمج.. وحاجتي بيج..كلج..اني اكدر اخذ اللي اريدة منج من اول ليله.. بس اني احب اكسب كلبج وحبج..اني انسان مو حيوان..
باوعتله بدمعه..مكسورة جنت..
كتله ..تحلم..من اليوم لا تقرب عليه.. ولا تجي يمي.. لحد ما ربي يشوفلنه صرفه ..
باوعلي.. وهوة متالم..كالي انتي اللي كلتي..وطلع وخلاني مصبحه بدموعي..
صبحت الدنيه..واني كلبي..يم ديرتنه ودارنه..لا تذكرت بلال ولا تذكرت الحريق..كل اللي جرة من جوة ايدة.. جنى عليه وعلى عائلتي..وعلى ديرتي.. عقلي احترك.. شلون اعيش وياه..شلون اعيش ويه رجال بالغصب..شلون اكضي ايامي ولياليي وياه..صحيح شفت منه وجه ..ويحبني..بس مانلتم سوة.. بيني وبينه مسافات..ما تنوصل بيناتنه..الا ما يسيل الدم..ونخسر اعز الناس.علينه ..حرت شاسوي..مخي ضرب.. لاغمضت ولا اجاني نوم ...هوة بايت برة.. نمت بعد اذان الفجر.. لا طلعت ولا من اجاني..تفقدني..ولا طل عليه..كعدت وعيوني مبقبقه..مشيت بالحوش..شويه..لكيت الريوك محطوط ع الطبليه..ومغطى.. نفسي ما رادت الريوك ..حسيت بدوخه..ورجعت تمددت ..بغرفتي سمعت حس الباب انفتح...دخلت علياء اخت بلال.. كالتلي كومي نطلع شويه.. كافي كعدة بالغرفه..كتلهه مالي واهس اطلع..اريد اروح لدارنه..مشتاقه لامي ولابويه..ولخواني...كالتلي..والله حاسه بيج..بس بلال..صعب يخليج..انتي متعرفين اشسوة حتى خله ابويه يوافق على خطفج..وعلى العرس..عشيرتنه..كلهه واكفه لاخر نفر..للعرس..حتى اللي جان معارض هم اجه وكفله وفرح..ادري اهلج عزيزين عليج..ولزمت ايدي..وحضنتني..اني كمت ابجي..كالتلي وراسج هسه يتصلح كلشي..تعاليله باسلوب لين. تكسبيه ..ياله يمعودة خل نطلع شويه..ونتمشى..كتلهه ..لا..لا..بالله خليني.. جرتني من ايدي وطلعنه للحديقه القريبه من الدار..ومشينه وكعدنه جوة شجر الزيتون..شويه نفهت عن روحي..وكمت كل يوم اطلع وياهه..كمت اشوفه مرات قليله..يجي يبدل ملابسه ويطلع..يفرش بالصاله وينام..اني عرفت خسارتهم بالحصاد جبيرة..وكايم يشتغل هوة والرجال ساعات اكثر حتى يعوض المحصول اللي احترك..كامو يحرسون الزرع وصارت الحراسه بالمناوبه.. هوة ورجاله..جان يتجنبني ويتجاهلني..واني هم اجنبه وبعد معاندة اكثر منه..بذاك الوكت عرفت روحاته وجياته..شوكت يطلع وشوكت يطب..جانت فكرة انهزم مسيطرة ع تفكيري..انهزم بليله من وكت شويه..
اجه وغسل وبدل ملابسه.. وتعشى وراح يسهر بالحوش.. وجان يرجع فرش واتمدد..اني جنت ما اطلع من غرفتي كدامهم.. البنات يجيبن الاكل..اليمي..امه جانت تتحاشاني.. واني هم جنت بعد اكثر اتحاشاهه..الليل غط..وعرفت بلال غط بسابع نومه..جلابهم كامت تعرفني وماتنبح علي من اتشوفني..لبست ملابسه..وسرواله السود..وتلثمت بالقترة مالته..جانت عيني تبرج..وطلعت متسللة مثل الحراميه رحت لمربط الاحصنه..امشي واتلفت اخاف واحد يلزمني..سرجت الحصان مالته ولجمته..واني بنت شيوخ ..وركبه الحصان من عاداتنه..اني حطيت رجلي بالركاب حتى اصعد فوك الحصان..واحمد ربي انو صعدت سلامات..جنت احلم اوصل لديرتي وارمي روحي بحضن امي..جان صوت اجه من وراي..وين على خير زينه.؟؟؟ضليت اتلفت والحصان جمح وانهزم.. واني رجل بالركاب ورجل سايبه بالهوة.. ضربني  وكعني وضهري انقسم نصين..كالي اتاسف عليج زينه..من يومج نحس عليج وعلى غيرج...وللحكايه بقيه...