اهات من محطات حياتي

بارت1

#حنين_حاتم
#اهات_من_محطات_حياتي...
#غير_محلل_نشر_القصة_بدون_ذكر_اسمي

علي
علي

ها
علكيفك لتوكع شبيك تركض هيج

وصلت يم علي الي جان ماخذلة صفنة ومنتجي علة حايط حديقتهم
مكانة الي دائما نلتقي بي اني ويا وفيان

دكت علية ولك دكت

لا بربك صدك

والله

اي وشكلتلك

ماكالت شي

شلون يعني

بس دكت وماحجت ضلت ساكتة اني كلت الو اكثر من مرة بس ماحجت شي

لا بلله وانتة جاي خابصني عبالك محرر لاندلس
يجوز غلطانة البنية
يجوز اخوهة لزغير داك

😕 يجوز بس اني سمعت صوت نفسهة

خرب روحك شلون سمعتة بلله
ولو هية خشمهة شكبرهة تتنفس اكثر من عدنة

نجب ولك مليون مرة كتلك لتعيب عليهة

دروح هسة هية معبرتك وكاعد تدافعلهة

ركض علي وركضت ورا

اذا بيك حض اوكف

مابية حض والله بس عوفني كرشي كام يوجعني من لركض

وكفت واني ثاني جسمي وخال ادية علة ركبي واضحك

ليش تحجي عليهة حقير ياما جنت تبوك لفتهة وتشرد حتة ماجانت تحجي لاهلهة عليك

وانتة يلنذل جنت تركض وتكل لأبوهة

طبعا غير سلوتي شلون اعوفهة تبجي
وبصراحة جنت اخاف اندك  بيك جنك حولي شضخمك

دروح شفايتلك عدك مثل جسمي وعضلاتي

اوووف

ها تجر حصرة لان ماعدك مثل عضلاتي مووو

يحجي وياي ويدني ايدة يم وجهة يبوس بعضلة ايدة البارزة حييل من كثر الحديد

شبية مخبل اتحسر علة جسمك كرشك حضن

ضلينة نتداهر اني وعلي صديق طفولتي وعضيدي وتوئم روحي
الى ان كلي راح اجيب عصاير من لسوبر ماركت واجي
عيني علي وهوة يمشي اباوع علة طولة وضخامتة
وتذكرت
بيوم اجو اهل سلوى وهمة محملين غراضهم
وكعدو بلبيت الي بصف بيتنة جان وكتهة عمري 12سنة اعاين علة السيارة الي محملة غراضهم جانت جبيرة حييل
نزل ابوهة ولسايق واخوهة امير وبعد رجال وياهم وراحو لضهر لسيارة وبلشو ينزلون بلغراض
نزلت مرية لابسة كوستم تنورة وسترة لون بصلي وشال نفس الون وحذاء اسود عالي وجنطة جتف
وكتهة ستغربت من لبسهة حييل لان ماشايف هيج شي ابد
مدت اديهة للسيارة لان عالية
جلبت بركبتهة بنية وهية شبكتهة ونزلتهة للكاع
عاينت عليهة لابسة تنورة قصيرة فوك الركبة لونهة وردي طوخ وبدي نص ردن وردي فاتح ومسوية كرون
بنيت جسمهة حييل ضعيفة من شفتهة للوهلة لاولى تبادر لذهني تكون بيهة مرض لان ضعفهة جان فد شي غريب
كادتهة امهة من ايدهة ومشت فتحت قفل لباب ودخلت ضليت صافن علة ابوهة وهوة ينقل غراض بيتهم الي جان شكلهن كلش حلو وفخم واني منبهر بلمنضر لأن اول مرة احد يشيل يمنة واشوف لغراض وهية مفصخة وكواني الملابس والجنط الكبار
شوية ووكفت سيارة ثانية نزل منهة رجال تلاثيني العمر ونزلو ويا بنية وثنين ولد شكلهم بعمري ولبنية ازغر منهم
دخلو للبيت وهمة يتدافعون وواحد يريد يسبق الثاني بلدخول واني بداخلي ودي اطب وياهم واشوف لبيت وغراضهم الحلوة
شوية وصاحتني امي حتة اتغدة
طبيت تغديت وتانيت لعصر يجي حتة اطلع العب طوبة وية علي وفيان
صارت لساعة بل4 سبحت بدلت وطلعت رحت على علي وتوجهنة للساحة الي تصير مقابيل بيتنة دقايق واجة فيان ويا 3 ولد اصدقائنة وبدينة نلعب 3 ضد 3
واحنة نلعب لاحضتهة جانت كاعدة بباب بيتهم علصبة فاتحة شعرهة ومخلية قراصات علة شكل فراشات ولابسة ثوب وردي قصير وبيدهة لفة تاكل بيهة
شوية وطلعو خوانهة الي بعمرنة ضلو كاعدين بصفهة لحد ماراح فيان وصاحهم حتة يلعبون ويانة اجو وصرنة 4 ضد 4
نلعب واني عيني عليهة كعدتهة حسستني ان هية خايفة من شي ماعرف هية هادئة هيج
طول فترة لعبنة ماتحركت ابد والفة بيدهة تاكل بيهة شوية شوية عبالك عصفور
تعبنة من العب وختمنة العبة الي تبدي وتنتهي شوكت منحب
كعدنة بلكاع وعلي ضل يسأل بيهم عن اسمائهم
سعد وسرمد  هاذي جانت اسمائهم
لهجتهم جانت غريبة نوعا ما
سكنهم السابق محافضة الفلوجة ونتقلو منهة بسبب لأوضاغ الأمنية الي سائت حييل بذيج الفترة
ضلينة نسولف وعلي يسأل بيهم لفضول كتلة هوة بطبيعتة اجتماعي ويخلق حديث من لاشيء
الى ان خلصت اسألت علي وعم السكوت
اخوهة سرمد كال خل نلعب لعبة الغميضة
الي هية نفسهة ختيلان عدنة
كمنة وعلي تبرع هوة الي يحسب ويدور علينة جان خال وجهة علحايط وجاي يحسب واحنة نتلاطم ندور اماكن نختل بيهة
طلعت من بيتهم اختهم الثانية شافتنة جان تصيح اييي غميضة خل العب وياكم عفية
اخوهة سعد عاط عليهة وكلهة
رنا  روحي لعبي انتي وسلوى
بس هية لحت الة تلعب ويانة وضلت تتوسل بي وراحت سحلت سلوى الي بدورهة جانت تحاول تفلت ايدهة منهة حتة متلعب
سحلتهة رغم هية ازغر منهة بس تبين اكبر جابتهة واجت وصلت يمنة علي جان واصل لل40 ختلنة كلنة واختهة هم ختلت وهية ضلت صافنة متعرف وين تختل  علي كال 45 46 ركضت عليهة جريتهة من ايدهة وختلتهة
يمي ليش هيج سويت ماادري
جنت خاتل ورة مجمدة قديمة مشمورة بلشارع الهة سنين
جانت مدنكة وخايفة مدري مني مدري من علي خاف يلكانة ونحترك
باوعت عليهة مااعرف شنو حسيت وكتهة شعور كلش حلو ماحاس بي قبل ابد يمكن لان وكتهة جانت بداية مراهقتي
بس عمري ماانسا شكد جنت فرحان وهية كاعدة يمي
رفعت وجهة وباوعت علية
هنا بدة حبي الهة
حب طفولة
جان حب طاهر ويخلو  من لغايات ولشهوات
حب نقي مثل نقاء المي
وكتهة ماجنت اعرف افسر هاذي المشاعر كل الي جنت اعرفة
اني احب قربهة مني احب العب وياهة واحبهة كلش من تحجي
جانت موفاهية ولا مايعة وانما نازكة الى ابعد الحدود بحيث لكلمة من تطلع من حلكهة تستغرق وقت اكثر من وقتهة
جانت من تمشي وتركض عبالك فراشة حركات اديهة مثل راقصات لبالي عبالك جاي تركص علة لحن
رقيقة نازكة وترفة الى حد مااكدر اوصفة