#اهات_من_محطات_حياتي
#بارت...15
#غير_محلل_نشر_القصة_بدون_ذكر_اسمي
#بيج_قصص_عراقية_من_واقعنا
#حنين_حاتم
اول ماطبيت تلكتني مرت خالي بدون سلام كلتلي
نوار امك بلمستشفى فقدت النطق من يوم نسجنت انتة ونفسيتهة زززفت
لا يا الله جنت متوقع اكبر من هيج لان اعرفهة من غتالو ابوي صارت عدهة فوبية مجرد ان شخص تحبة يبعد عنهة لو ميتواصل وياهة فترة تنهار تماما
ركضت للشارع ودموعي علة وجهي
واني اتذكرهة من يوم مات ابوي لليوم صارتلي ام وابو صح اتمنة لو ابوي عايش بس بوجودهة عمري ماحسيت بفرق عن غيري من الجهال
بلعكس جنت الحاجة من تنزل بلسوك تشتريهة الي قبل علي وفيان حتة التلفون شتريتة قبلهم
صعدت تكسي وخابرت خالي محمد
كلي امك بلطب النفسي وحتة مشي ماجاي تكدر تمشي سديتة من عدة وخليت راسي علة رجلية وفرفحت ولج يمة شعدي غيرج انتي امي وابوي وعشيرتي كلهة يبعد عيوني يا يمة
لسايق عبالة امي ميتة ضل يكلي لاعمار بيد الله ومن هاذ الحجي
وصلت للمستشفى وبوجهي للغرفة الحاطيهة بيهة فتحت لباب وطبيت جانت مرتجية ليورة وتبجي بدون صوت وبصفهة خالتي رضية تمسح بديهة وتبوس بيهن
وخالي محمد كاعد علكرسي يسبح
شافني خالي محمد وصاح نوااار
امي بس سمعت اسمي بدون وعي شمرت روحهة من الجرباية وتصيح يضوة عيوني يمة وين رحت وخليتني
تقربت يمهة ابوس بديهة وراسهة
ولك نوير ليش هيج تسوي بية
يبعد روحي يمة اسف ماعوفج بعد والله ماعوفج
حضنتني وتبجي وتبوس بوجهي من كل مكان
ولك يمة اني من سمعت حجي خالك يكلي بلقليل ينسجنون سنة هاي اذا تنازلو الشرطة
حيلي نهد تدري مالي غيرك يبعد امك ابوك وخسرتة وانتة فتشة عيني وبيك اشم ريحة ثامر هوة راح وعافك الي اشوف روح ثامر بيك
جانت منهارة بلبجي وتحجي وتتلمس بوجهي عبالك الهة سنين ماشايفتني دموعهة حركن كلبي ردت اكومهة تكعد ماكدرت مرتين كومتهة توكع من ادية
خالي اشرلي كلي لا تتعبهة اهم شي رجعت تحجي شلتهة ونيمتهة علجرباية وهية عيونهة علية مامصدكة رجعت
خالي كعد يسألني شنو الصار وشلون طلعت
سولفتلهم علة صديق ابوي الي شفتنة وطلعنة
نداريت علة خالي محمد سألتة هسة شنو وضعهة امي شلون تبقة هنا
هية دكتورهة الخاص كتبلهة دخول وعلاج طبيعي وتحفيز نتلات بس هية معاندة وحلفة يمين اذا نجبرهة علعلاج الطبيعي تتبرة من عدنة
واحنة هاي شوفة عينك مكابليهة ومابليد حيلة
أنت تقرأ
اهات من محطات حياتي
Romance.حين ماتت احاسيسي امام عيني وماتت امانيي امام عيني ولفضت حياتي انفاسها الأخيرة امام عيني فأحتضن الصمت حينما ادرك ان مااحاول شرحه لن يفهم مطلقا فأقف حائرا بين الشعور والاشعور بين الشوق والأستغناءفلم اعرف قبلها الا قلبها ولم اعرف بعدها الا بعدها عني
