اهات من محطات حياتي

بارت2

#حنين_حاتم
#اهات_من_محطات_حياتي...#بارت2

كعدنة من لصبح اني وخوالي نحضر لمسواك لأن من زمن جدي متعودين اول يوم برمضان يسوون سلة رمضانية نخلي بيهة كيلو من كلشي تمن عدس حمص نشا كاستر معكرونا شعرية وجيس تمر وقوطية معجون
ونوزعهة علة كل بيوت المنطقة بمصباح اول يوم برمضان ونذبح طلي ونسوي عزيمة افطار نعزم لمنطقة كلهة لثواب روح جدي لأن توفا اول يوم برمضان قبل لفطول بنص ساعة وبيومهة جان صايم
بقت هاذي عادة عد خوالي كل رمضان هيج نسوي
طلعت من لصبح وية خالي محمد رحنة للسوك اخنة مسواك السلة الرمضانية ودور اخذنة مسواك الفطور ورحنة للجوبة اخذنة طلي زغيرون ذبحنا عد لكصاب ونضفة النة وكصصة جبنا لحم واجينة لساعة ب12 وثلث
طبينة للبيت وتلكتنا تمي من لباب تحجي علة خالي تكلة تاخرت شوكت نطبخ لعد
نطيناهن المسواك
وطلعت صينية لخالي وساطور حتة نكصص الحم قطع زغار
كصصة خالي ونطاني قسم من عدة كلي اخذة لكصاب بمنطقتنة ثرمة الي ناعم علمود الدولمة بعدني واكف يم لكصاب سمعت صوت مرة تكلة بلة زحمة بلكي تمشيني مستعجلة شوية
نداريت امهة ووياهة سلوى ورنا شايلات علاليك مسواك رنا تلوحلي بأديهة من ورة ضهر امهة وتسويلي هلاوو
من يومهة رعنة ومتبالي لأحد
اني بتسمت الهة وعيني علة سلوى
مدنكة راسهة وتبعد نضراتهة عني تحاول تباوع بكل مكان بلمحل حتة لا تجي عيونهة بعيني
دائما هيج تسوي
مايوم باوعت بعيني ابد علي يكلي متحبك عوفهة ليش تضحك على روحك واحنة بعدنة زغار نكبر وندخل جامعة ونحب وننحب
بس اني ماجنت اهتم لحجية
لحب ميعرف لا عمر ولا وقت
شعور كلش قوي منكدر نمنعة شكد منحاول
دائما اكول خلص بعد مااهتم بيهة ولا افكر بيهة
بس مامرة كدرت اسوي هاذ لشي
بس حجي لسان

الولد ترخص مني كلي راح امشيهن بس لف الحم مالتك بعلاكة اشرلي على مكان العلاليك وكلي حسابك الغين

تقربت يم لولد كتلة شكد حسابهم كلي 12 الف طلعت فلوس من جيبي ونطيتهن الة وطلعت بسرعة
فتت من يمهم رنا كفختني علة جتفي وتضحك
شخصيتهة تختلف تماما عن سلوى مرات احسهة مسترجلة بكد ماعدهة حركات تشبه حركاتنة
علي جان يسميهة حميد الوصخ
يكللهة بيج رجولة اكثر من صدام حسين
جنت احسهة تضوج من حجي علي بس تاخذ الموضوع بلضحك وتكلة يلله سلوى تعوض بيهة انوثة اكثر من الازم
ويرد عليهة علي وهوة يرفع تك حاجب
لاهاي مو انوثة هاي عيارة ومياعة
هواي جنة نتعارك اني وعلي بسبب سلوى بس ميطول عركنة دقايق ونتصالح والي جان يفاككنة ويصالحنة هية رنا ههههه
علي جان يضحك من تكللنة يلله ولكم كافي عرك موزغار انتو وتندار علة سلوى تكللهة
وانتي هيووو بطلي مياعة يومية متكاتلين من ورة عيارتج
علي يباوع علية ويكلي اخونة لجبير يكول بطلو عرك انتو موزغار وبنفس الحضة نتراضة ونتصالح وبكل مرة نتعارك بيهة علي جان يزيد وية سلوى ونكرتهم ومعاركهم يزيد
رغم اني جنت احاول شكد مااكدر اهدي بيناتهم واصالحهم بس ميفيد علي جان واكفلهة علكلمة وينتضرلهة لزلة
هية جانت تتجنبة هواي ومن يحاجيهة تكتفي بلسكوت ولو زاد بأذيتة الهة بلحجي تكوم تبجي
هنا جنت افقد تماما انجن واكوم مااشوف بعيوني اتخبل من اشوفهة تبجي ولمصيبة الي يبجيهة جانلي روح سند واخو ماجابتة امي بس جابتى الي لأيام جنت دائما اشكر ربي علي
ياما يتعارك وينضرب علمودي
محد جان يتجرء يحاجي نوار لان بضهرة علي الي جان لقبة بين الولد حايط الكونكريت
كبرنة وكبرت اخوتنة وصداقتنة بطلنة لعب لطوبة وكمنة نروح للجم نشيل حديد ونبني اجسامنة علي جان ضخم ومن بلش يشيل حديد جسمة ستقام وصار حلو بس شي مبالغ بي ضخامة وعضلات مرات اشوف لجهال يخافون من يشوفو بلشارع بكد ماضخم
اما اني جنت ضعيف ولحديد حلة جسمي وبين معالمة يعني ضافلي فد لمسة حلوة
اما فيان جان يضوج من لحديد حييل بس يجي ويانة يتفرج علي يضحك علي يكلة تعال شيلني هاذ لوزن وهوة مجرد ان يلزمة ينثني ضهرة ويدنك
جان يسمي شبيه سلوى
يكلة لمفروض احنة نخاوي رنا مونخاويك وانتة تلبسلك ربطة وتلعب وية سلوى توكية
هوة جان حيييل فطير ويضحك لسبب وبدون سبب بس جان جميل بشكل ابيض حييل علة شكار ولون عيونة شهل وشعرة لونة بني خشمة رفيع حلكة زغير ومرسوم طولة حلو اكصر مني شوية جان شكلة حييل ملفت ومرغوب من قبل البنات بحيث جنة من نمشي بلشارع علي بكلة انتة تمشي ورانة ياهي لتفوت عينهة عليك احنة شنو خراعة خضرة جاين وياك
شوية خليلنة ولو بنية باوعت علي جان يوم فكرة
يلزمة علي يشبعة كتل يكلة شدعوة هلكد حلو انتة حتة الي يشوفنة نمشي وياك واحنة ملحان جلحان وانتة اشكر يفكر غير فكرة
هوة جان بس يضحك ولو كلش ضاج يزعل ويروحلة علي يكفخ بي يكلة ولك عود شنو تزعل هوة بكيفك يعني
هههه وبهاي الطريقة جان علي يراضي ويجيبة سحل من ياختة
محد جان يزعل من علي لان يراضينة بلكفخ وغصبا ماعلينة نرضة
بكد ماعصبي بكد مابي حنية وطيبة
حنت احسة من لداخل طفل وجنت اعرف نقاط ضعفة واعرف شلون اقنعة بمنتها السهولة
لأن محد يعرفة بكدي
.....................................
رجعت للبيت نطيت الحم لامي وبدن هية وخالتي رضية يلفن بلدولمة ونسوان خوالي يسوون تشريب وتمن ولجهال طابيت طالعين وخالي امجد يلعلع وكلسا لازملة واحد من لجهال لاطخة بلحايط
وخالي محمد يتأفأف وكوة لازم روحة لأن يتخبل اذا يشوف خالي امجد يضرب الجهال