امير و سارة ( باللهجة الجزائرية)

السفر

حبطت الطيارة على ارض الجزائر سارة ( طفلة شابة بزاف زين تاعها وحدو عينها ما جيين خضورا و لا صفورا شعرها شتان طويل طويلة و لطاي تاعها تهبل المهم لي يشوفها يهبل على زينها ) قاعدة عند التاقة تاع الطيارة تراقب في حبوطها تنهدت تنهيدا كبيرة و قالت في قلبها : يا درا واش رآهوا يسنا فيا
قاطع تفكيرها صوت جدها : لحقنا يا بنتي انا عندي خدمة نروح في السيارة و انت راني وصيتهم يجبولك الموطو تاعك كيما حبيتي و كاين واحد يدلك على طريق باش تروحي لدار عمك
سارة : نعم جدي ما يكون لاخاطرك🙂
جد : مليح روحي ريحي و كي نجي راح نتفاهمو على كلش
حبوطوا من الطيارة الخاصة و صابوا رجال ستقبلوهم في المطار (كيما معروف جد سارة شخصية كبيرة بزاف مرفه و عند رزق في كل بلاصة في الدزاير و برا الدزاير و يدوا واصلة بزاف كامل يحترموه و يخافوا منو )
جد : سارة بنتي ارواحي هذا هو لي يوريلك الطريق روحي معاه ،
سارة : حاضر جدي
و مشات مور هذاك الراجل خرجو من المطار و لاقت الموطو تاعها كيما قالها جدها عند الباب
الرجل : هذي هي السيارة تاعي تبعيني و نوريلك طريق
ركبت سارة في الموطو تاعها و بدات تبع في هذيك السيارة و تشوف السيارات لي يجوز يرميلها كلمة ماشي مولفين مرا تسوڤ موطو المهم و صلوا لقصر كبيرة ميقلش على قصر لي عايش فيها سارة مع جدها في الترك
الراجل : تفضلي هذي هي الدار
دخلت سارة للقصر و و تكتشف فيه بعينيها محستش حتى تحس كيشغول دربت في حيط رفدت راسها بالعقل تلقا واحد الزين قدامها طول و عرض سمر و عينيه عسليين مكحلين و شوية لحية بقات غايسا فيه و هو ماشافش فيها كامل
- اسمعي شوفي قدامك😠😠
سارة تكاكات مع روحها : مشفتكش سمحلي
- المرا الجاية تشوفي 😠( يحكي معاها و هو يخزر في التليفون مخزرش ڤاع فيها )
سارة : هكا يصرا كي تمشي و انت حاط راسك في التليفون علاش راك تعيط 😑😠
- رفد راسوا و شاف فيها وميلو مقابلها : رببببك نمشي كيما نحب في دارنا ( بالعياط ) فهمتي 😡😡
و راح و خلاها واقفة هي مفهمتش علاش لسانها تعقد و مقدرت تقولوا والوا ماشي من عوايدها تسكت ياخي جاياااااح ، المهم هي واقفا حتى سمعت واحد يعيطلها تلفتت تشوف : اه رحاب ( بنت عم سارة )
رحاب : مرحبا بيك حبيبتي وقتاش وصلتي 😁( عنقتها )
سارة :هدا وين لحقت 😊
رحاب : جوزي دخلي لدار ڤاع راهم يسناو فيك
دخلت سارة لدار لقات عمها و مرتو و راجل رحاب وليد و بنت عمها صغيرة لميا سلمت عليهم رحبو بيها كامل يحبوها
وليد : سمحولي انا لازم نوض نروح لامير لشركة عندنا خدمة بزاف
ياسمين ( مرت عم سارة ) : مطولوش على لعشا جيب معاك امير راك تعرفوا 😉
وليد : متقلقيش روحك انا نفريها
احمد ( عم سارة ) : اقعدي خلي راجل يروح يخدم و اذا على امير راهوا فاهم مليح بلي مكاش هدرة مور هدرة بابا
سارة قاعدة غير تبع في عينها ماشي فاهمة وين راه المشكل
ياسمين : سارة بنتي طلعي دوشي و ريحي في بيتك حتى يلحق جدك اذاحبيتِ
سارة : مادبيا حتى انا عييت بزاف
ياسمين : مايا مايا ( الخادمة ) وريلها بيتها و ستكلفي بيها
مايا : حاضر : متموزال سارة تفضلي معايا
مشات معاها سارة ورتلها بيتها دخلت دوشت لبست حويجها و رمات روحها فوق السرير تشوف في البلافو و تفكر هذاك لي خبطت فيه كي جات و تحكي مع روحها : كيفاش خليتو يهدر معايا هكاك و علاش مقدرتش نرجعلوا اووووووف (قاعد تفكر كيفاش هدر معها مبعد سوطات من السرير ) اخاااااااااااه 😦😦قالي دارنا سما هذا هو امير وليد عمي😵😵😵 ااااه يا ربي 😵😵😵 اوووووووووووووف

من الجيهة الاخرى داخل شريكة كبيرة
وليد : كالمي روحك واشبيك هكا يا خو
امير : تتعقد بيا كيفاش هذي نكالمي روحي و انا يديا راهم مربوطين ماني قادر ندير والوا 😡
وليد : جات طفلة شفتها ؟
امير : مشفتهاش ، تلقيت مع وحدة عند الباب معلباليش اذا هي و لا ، ان شاء الله متكونش هي باسك هذيك متتحملش
وليد : ربي يعونها بنت الناس عليك 😜
امير : ( بالعياط) هي شكون قالها تقبل كانت قادرة تقول لا لجدي و يخلص ڤاع هذا الشيئ مي هي لالا خليها تشوف 😡😡
وليد : خلاص دوك نشوفو كيفاش نديروا متبقاش مقلق هكا قدام جدك يرحم باباك
امير : صح خلينا نهدروا في الخدمة كي نتفكر هذا السوجي لحمي نحسو يغلي
وليد : تفاهمنا مع الشركاء بقا واحد الورق وقع فيهم و تفرا، دوك نبعتهملك مع سكريتيرة
وليد جا خارج : اه نسيت نقلك : تسوڤ موطو 😜
امير : كيفاش 🤔... وليد نسبك دوكا و لا كيفاش 😡😡
وليد : هههه خلاص دوك نبعتلك لورق😂😜

لحق وقت العشا و الجد وصل
جات رحاب دقدق في باب سارة
سارة : تفضل
رحاب : مسحقيتي والوا سارة العشا وجد و جدي راهو هنا اذا راكي واجدا احبطي
سارة : لالا ختي تعيشي ، راني جاية 😊
رحاب : أوكي رنا نسناو
حبطت سارة لقاتهم كامل مجموعين على الطابلة ما عدا امير و وليد
جد : سارة بنتي ريحتي ! تهلاو فيك
سارة : نعم جدي ههه الحمد لله ❤😊
احمد : كيفاش هذي نعرفو بلي سارة عينيك يا بابا و منتهلاوش فيها
جد : متهدرش هكا نحب ڤاع أحفادي بصح سارة تربات عندي عندها بلاصة و حدها
باست سارة جدها من خدو : يعيشك جدو و قعدت في بلاصتها
جد : وين راهوا هذا امير علاش بطا هكا
سارة كي سمعت اسمو حست كرشها توجع فيها مفهمتش علاش
ياسمين : دوك يجي
رحاب : آيه حكيت مع وليد و قالي رانا في الطريق
سمعو الباب تفتح
ياسمين : ما يكونو غير هوما جاو🙂
سارة تحس في السطر تاع كرشها غير يزيد و هي تسنى فيه يدخل لصال لي كانوا قاعدين فيها
دخل و ليد و بعدو امير كي شافتو سارة حست الدم نشف فيها و تمتمت : و الله غير هو😨
وليد : السلام عليكم
و سلموا في زوج على الجد
جد : هذي هي بنتي سارة ، لوكان جيت تجي عندي لوكان راك عرفتها
سارة و قفت باش تخمس معاه حاس رجليها فشلو
هو دار باش يشوفها : نتيا !😳😒
-----------------------------------------------------------
Stop nchalleh ta3djabkom