امير و سارة ( باللهجة الجزائرية)

بداية الحب

ناضت سارة صباح و خرجت من بيتها تعطس و تسعل كي شافت امير جاي شدت السعلة
شافها امير بدا يضحك لتحت لتحت
دارتلوا برأسها واش 😡 مقدرتش تهدر
امير : عطسي و لا سعلي وجهك حمار راح تطرطقي 😜😂
بدات سارة تسعل و تهدر : الحساسية جاتني كي بدا يدخل الربيع ، مي راني مليحة
امير : ايه.. ايه 😏😏، راني رايح نخدم اذا حسيتي روحك ماشي مليحة عيطيلي
ضحكة سارة ضحكة صفرة و قالتلوا ؛: ايه

خرج امير مي بالوا بقى عند سارة كي شافها هكاك بدا يخبط في الڤلوو و يهدر وحدو : علاش راني نخمم فيها علااااش 😑😑
وصل لشركة و تخمامو مزال عندها قعد قعد مقدرش يخدم حكم التيليفون عيط لرحاب رفدت
امير : رحاب روحي لسارة و ديها لطبيب دوركا
رحاب : غير الخير واش بيها
امير : ضربها شوية الريح روحي ديها و رحا تقلك منروحش انت ديها بسيف و بلاكي تقوليلها بلي انا لي قتلك
رحاب : أوكي مي علاش..
قاطعها : ايه ولا لالا 😒
رحاب : ايه دوك نروح
امير : أيا صحا ، كي تكملوا عيطيلي
كوبا ..... راحت رحاب عند سارة كشما كاين جات تزورها لقاتها مريضة بزاف حكمتها داتها لطبيب شراو الدواء و رجعوا لدار، شرباتو و رقدت رحاب خرجت من عندها و عيطتلوا حكاتلوا كوبا و خبط البيرو يبدوا : متسمعش رأسها يابس😡😑 .... كمل خدماتو بكري و راح لدار دخل لبيتها بلعقل لقاها راقدا قعد عند راسها و حط يدوا على جبهتها لقى الحمة ماشي طالعتلها قاعد يشوف و غايس فيها ( المرة الاول لي يشوفها راقدة ) ( يحكي مع روحو ) : واش درتيلي باش مانيش قادر نحيك من تخمامي😶
هو هكاك حتى بدات تفتح عينيها بلعقل كي شافتو تقعدت تجري
امير : واش الحساسية هذي طيحاتك 😜
سارة : لالا نضت صباح بكري علابيها .... ااااه ... نحطلك تتعشا
امير : وجهك راهوا صفر
سارة : منها دايمن ديرلي هكا 😨(على الحساسية)
امير : كليتي كاش حاجة باش تشربي الدوا ، عيطتلي رحاب و قاتلي كلش
سارة : 😮😨😨😨😨
سارة : مزال ماكليتش
امير : خلاص ريحي نجيبلك واحد لاسوب وجدتهالك يما كي سمعت بيك ... متتحركيش حتى نجي
سارة مخلوعة فيه واش بيه هذا ضرباتوا حجرة في راسوا قاعد يعامل فيها مليح ، جابها و عونها كلات و مدلها دوا تاعها و سارة حالااا فمها كمل و خرج من الشومبرة خلاها تريح
جازت سمانة و هوما هكاك امير تبدل بزاف ولا مليح مع سارة مام هي بدات تتصرف براحة معاه بصح من جيهة كانت غير تزيد تتعلق بيه مام هو بدا يحس حاجة من جيهتها مي محبش يبين و لا يستعرف لروحوو
-------------------
ناضت سارة صباح وجدت القهوة كي العادة ممبعد ناض هو يشرب و قاعد يخمم كيفاش يشارشيلها تحلالو كي يقلقها ، كمل و ناض يروح
امير : الدار راهي موسخة 😑
سارة : عندي يومين سيقتها كامل
امير : الناس يسيقو دايمن
سارة خزرت فيه😡 محبتش جاوبو
امير : معليش كي نجي عشيا نلقى داري ڤاع مسيقا و منقيا ، متبقايش عايشا في باطل
خزرت فيه سارة و قاتلوا : ايه 😡
خرج من الباب و بدا يضحك عليها 😂
راحت نحات هذيك الجبة لي شرهالها و لبست شورت و تريكو ابغوتال و ربطت فولارا في راسها و شعلت لغنا و بدات تسيق و تشطح
هو في نص الطريق تفكر بلي نسى ورق يسحقهم في الدار رجع و دخل مافقتلوش الغنا كان زايد بزاف شافها وقف مشوكي كانت عطياتو بظهرها تشطح و تزعبل و تغني مع الغنية بزوووور قاعد حال فمو و يتبع فيها بعينيه دارت شافتو طيحت البيدون من يدها دفق ڤاع الما و عيطت : ااااااااااااااه 😮
مي هو بقى غايس معاها و يشوف فيها محبش ينحي عينيه
خزرت فيه : واش بيك امير !
حكمها من يدها و جبدها و زيرها مع الحيط وبدا يقرب ليها حتى بدات تحس بالنفس تاعو سخون ميل راسوا و قرب ليها باش يبوسها هي داقت فيها النفس و غمضت عينيها و زيرت عليهم ، ممبعد هو قبل ما يوصل تكاكا مع روحو جبد عليها و خرج ، خلاها مشوكية فيه قعدت شحال هكاك من بعد ناضت تجري تعيط لدارين و حكاتلها
دارين : وقيلا السيد بدا يحبك
سارة : لا يحب البكاية تاعو ، فاقلي بلي نحبو و رهوا يديرلي هكا بلعاني باش ينتقم مني
دارين : هو قالك ! مين راكي جيبي هذو لحسابات 😒 نتي خير منها واش
سارة : بصح عينيه يشوفوها غير هي 😢 حرام عليه علاش يديرلي هكا 😢😢
دارين : حبسي ما تبكي دوكا مزال ما بانش اصبري كي يجي فالليل و شوفي واش يدير
كملت الهدرة معاها و ناضت سيقت هذيك الدنيا و هي غير تخمم فلي صرا ما عرفت تبكي و لا تفرح
هو لحق لشركة مشوكي في روحو جا دخل موراه وليد
وليد : وين راهم الورق الناس راهم يسناو
امير : نحبها 😶
وليد : واش ! 😂😂😂
دار يديه في وجهو مسحو و قعد
وليد : قتلك محبيتش تأمن
امير :ايه مي ملازمش نحبها ، ماراكش فهمني انت
وليد : راني فاهمك بقاو في يديك شهرين كسبها فيهم ما راحش الحال
امير : راك تهدر هكا لخاطرش متعرفهاش
وليد : بلاك هي ثاني تعجبها
امير : اواه لالا ، لوكان نعرفها تحبني نموت و ما نخليهاش ، بصح لالا هكا سما راني نعوم في الناشف
وليد : حكمها و قلها
امير : جامي و انا معلباليش واش تحس من جيهتي
وليد : بقى هكا مالا ، انا راني رايح نخدم و انت حوس على حل
خرج و خلاه غارق في التخمام
لحق الليل امير راح لدار كي سمعت سارة الباب حست قلبها راح يخرج دخل و جا يهدر معاه نورمال كيشغول ما صرا والوا
قاتلوا : نحطلك لعشا
قالها : لالا
و راح دخل لبيتو و غلق الباب.