امير و سارة ( باللهجة الجزائرية)

تكشفت الكذابة

ناضت سارة صباح راحت دارت سبور ممبعد جات دوشت و بدلت و راحت توجد لقهوة قبل ما ينوض و تتلاقا بيه مي ناض قبل ما تكمل
امير : واش مزال😑 والفت منشوفش فيڤورتك صباح 😡
سارة مهدرتش معاه كملت واش كانت دير جبدها من يدها ضربت في صدرو و ولات : يا رب راني نهدر معاك 😡
خزرت فيه سارة 😡
امير : شحال من خطرة تقلك ما تخزريش فيا هكاك ، و حبسي تشناف هذا و لا نرمي في وجهك ورقة الطلاق😡
زيرت سارة على يدها : واش راك حاب دوكا 😡
امير : متشنفيش 😡😡
سارة : واش راك حاب نكون كيما صحبتك هذيك نتمسكن عليك لي تقولي ايه و كل دقيقة نبكي ! 😠
امير : متزديييش تجبديها لالاك هذيك ، خامجة و عريانة كيما انت متالحقهاش في صباعها صغير ، لوكان درتي واش قتلك قبل شهر من درك ما رناش في هذي الحالة ، خلصي واش درتي و بلعي 😡😡
طلقها و راح
حست هدراتو طاحت عليها كيشغول حجرة كبيرة مقدرتش حتى جاوبو طاحت في الارض تبكي تبكي...😢😢 حايرا واش دير قالت نزيد نصبر و خلاص ، ناضت خملت الدار و وجدت لعشا تعلمت طيب شويا و لبست راحت لدار رحاب تفاهمت تتعشى عندها راحت بدلت شويا و نحات على خطرها رحاب و رجلها وليد بزاف ملاح معاها
جا لدار مصابهاش تعشى و عيط لرانية يهدر معاها مور ساعة جات عيطلها : اسمعي راني مزوج بيك متدخليش في نص الليل و جيبيلي الهدرة كي نطلقك و ديري واش تحبي 😒
خلاص سارة مبقاتش فيها القوة خزرت فيه قالتلوا ايه و راحت لبيتها
جازوا اليمات سارة ولات تسمعلوا باش تيڤيتي لعياط و الهدرة تاعوا مي بدات تحس حاجة من جيهتو ماشي فاهمتها و لا هي محبتش تفهمها لروحها خاطرش كانت خايفة تواجه حقيقة بلي هي تحبوا ولات ديقلها كي تسمعو كل ليلى يحكي ويضحك مع رانية في التيليفون وهي جامي تبسملها دايمن مشنف حتى اسمها راهي شهرين معاه و جامي خرج من فمو خبات في قلبها و قاعدا تسيي تقنع في روحها بلي هي تكرهو تشوف فيه كاش يعامل الناس و يعاملها تقول ماهوش بنادم واحد راحت تكسلت في الجنان تحت النجوم و تخمم خائفة تزيد تتعلق بيه مزال بزاف على طلاقهم 😢

طلع الصباح امير كان في الشركة حتى جا ليه صاحبو حمزة عندو أوتال
حمزة : واش ساڤا صاحبي 😄
امير : دخل هذي غيبة ماراكش ڤاع تبان 😄
حمزة : الخدمة راك عارف
امير : ايييه واش من ريح رماك عندي و تفكرتني ؟
حمزة : جيت نحكي معاك في واحد سوجي و معرفتش كاش نبدا
امير : بدا مين تساعدك ، واش كاين
حمزة : رانية
قعد امير روحو مليح : واش بيها ؟
حمزة : راهي كل خميس جي لوتال تاعي تبات فيه
امير طلع حاجب و حبط حاجب : بالك شبهتها 😒
حمزة : هي راني متأكد ( جبد CD من جيبوا و رماه فوق البيرو ) هذو تسجيلات كاميرا اذا حبيت تتأكد فيهم تاع لاصال شوف
امير : اواااه راك غالط رانية معندهاش ڤاع دوك دراهم باش تبات ليلة في لوتال تاعك 😏
حمزة : كاين واحد راهو يبات معاها يخلصلها
امير ناض مبلاصتو مقلق و راح حكم حمزة من التريكو : سڤم هدرتك يا *** هذي ماشي هدرة 😡😡😡😡😤😤
حمزة : كالمي روحك امير تحب جي تكونفارمي أرواح غير غدوة لخميس و تشوف بعينك ، و ان شاء الله نكون غالط 😕
طبع امير حمزة جابو فالأرض : اخرج عليا قبل ما نقتلك 😡😡😡😡😡😡😡
حمزة خرج و امير قاعد في البيرو مقلق و يخمم ميقدرش حتى يشك في رانية دير حاجة كيما هذي شاد هذاك CD في يدو و يشوف فيه مقدرش même pas يسيه باش يشوف اذا هي ولا لالا قلبو معطاهش يخمم فيها في حاجة كيما هاذي قعد حتى لليل و هو في البيرو يخمم حتى رانية مقدرش يعيطلها

------------------
سارة قاعدة في الدار و مقلقا عليه علاش مجاش لفطور و راهي 12 تاع الليل و مزال مدخلش ماش عوايدو باين راهو معاها دارت فيلم تلهي روحها حتى سمعت الباب تخبط و زادت سمعت الباب تاع بيتو كي دخل خبطها سارة قفزت طلت تشوف مكاشو (تحكي مع روحها) : واش بيه هذا باينة داوس مع البكاية تاعو😒 قعدا في الصالون تتفرج حتى داتها عينها و رقدت ناضت الصباح راحت بلعقل طلت في بيتو مي ملقاتوش حارت واش راهو صاري 🤔

-------------------
هو ليل ڤاع مرقدش عيطتلو رانية طفا تيليفون اذن الفجر ناض صلى و حكم PC تاعو دخل فيه هذاك CD و قاعد يشوف هذي هي صح حمزة ماهوش غالط حس الدم نشف فيه ممبعد ستغفر اواااه لالا sur كاين سبة باش راحت هي ماراحش دير هكا سنا طلع النهار و راح عند حمزة و تفاهم معاه يعطي لو الكارطة تاع الشومبرة لي بقاو فيها و رجع لشركة يسنى في غدوة كيشغول قاعد على جمرة ممبعد ناض من بلاصتو ( يحكي مع روحو ) منقدرش نريح هكا خرج و طار بطونوبيل تاعو راح ركب في اليخت تاعو و هام في وسط لبحر بعد بزاف حبس و بقا يعوم وحدو حتى كمل النهار رجع كي العادة سارة ما فهما والوا ما عندهاش même pas لكوراج باش تسقسيه دخل لبيتو و غلق الباب زاد غدوة من ذاك هام في البحر و كي بدات الشمس تغرب رجع و راح directement لوتال