ثمن أخطائي

بارت 8

مساء الفل لعيون الكل .. اجمل متابعين واحلى قرآء

///البارت الثامن ///
#ثمن_أخطائي ❌
#بقلمي_الكاتبة_شمس

من گالت هديل هيج .. ضجت حيل ..
گمت منها ورحت ادور ع سڤانه..
اريد اسوف ليش تتبلى عليه ..

لگيتها گاعده وتسولف وتضحك وي بنات عماتي ..
گلتلها سڤانه ..
التفتت ..
وج ليش تتبلين عليه وتگولين ورطتج ..
مو بابا لزمج نازله من سيارة ولد وضربج .
يعني انتي الي بليتيني وياج ..

سڤانه . ههههه اي هو غير نفسه اسامه صاحبج
نجمه .. شنو اسامه .وشعندج وياه ..
سڤانة .. هههه وانتي مصدگة اسامه يحب وحده مثلج سوده وجلحة ملحه ..
شافج مضحك وضحك عليج .
اصلا وهو كان رايدني من البدايه وخلاج حلقه وصل حتى يوصلني ..
دروحي باعي الروحج بالمرايه وشوفي منو الاحلى اني لو انتي ..
هزت اديها وتگول تردين اسامه الاشگر يباوع الج يالملحة هههههه ..

اني اسمع كلامها وممصدگه .. نسيت اهاناتها الي وعايرتني وماانكر هي احلى مني .
بس من عرفت هي ضحكت عليه وغدرتني .
وعرفت شلون استغلتني حتى توصل الاسامه .
هنا مااتحملت . وطفرت عليها .
وسحلتها من شعرها .
وصرنا وحدة فوگ اللخ .
وهي تسحل بشعري .
واني اسحلها ..
وصار عياط .
واجن امهاتنا يحجن ويغلطن .
بس شما اسوي مااگدر ابرد گلبي .
وبابا الي زعل عليه ومايحجي وياي بسببها ..
كرهتها . ولاعبالك هي نفسها الي ربيت وياها واعتبرها اختي وصديقه طفولتي ..
وكرهت اسامه وكرهت كل ولد ع وجه الارض ..

سحبتني امي وضربتني راشدي .
وگالت . وج انتي ماتبطلين شنسويلج بعد انموتج ونخلص
نزلت دموعي واني اسمع امي هبج تحجي عليه بدل ماتدافعلي ..

وعمتي گامت تعيط عليه وبودها تكتلني ..
شوف الفرق بين امي وامها .
امها تدافعلها وتخاف عليه وتمسح بوجها وتگلها شو خلي اشوف خاف جرحتج .. هالصلفه ..

طلعت برة بالحديقه وابجي . بس احس روحي احسن من كتلتها وطلعت قهري ..

رجعنا للبيت . وماما شكت البابا عليه ..
بس بابا گالها ذيج هم ماقاصره تلگيها استفزتها .
ارتاحيت من ماانطه بيه .
بس الي قاهرني بعده مايحجي وياي وداير وجهه عني .
وحتى من سلمت عليه بالعيد سلم عادي مو مثل كل مره يحظني حيل ويبوسني ..

بعد ماطلع قبول نهله .. ماما حارت شنو اشترت الها من ملابس وجنط واحذيه ..

واني قدمت اعداديه ورحنا مناك اشتريت صدريه وقميص وبابا جان مشتريلنا حجابات لبنانيه حلوه من الاردن واحذيه فمااشتريت شي بعد ..

بدينا نحظر للدوام ..
وبابا گال .. اني اتعمدت قدمتلج اعداديه بعيده حتى ابتعدين عن سڤانه مااريدج وياها بعد .
وراح اخليلج خط ..
اذا اسمع حركه منا او منا اذبجج وماتلومين الا نفسج .
صداقات وبنات مااريد .
ماتختلطين وي اي احد .
ترحين بطريقج وتجين بطريقج .
والسايق الي اجرته الج من المنطقه وحباب مااريد تفشليني ..
وانتي مو وحدج اكو بنات من المنطقه وياج ..
فااااهمه نجمه بعد مااعيد ..