ثمن أخطائي

بارت 16

///البارت السادس عشر ///
#ثمن_أخطائي ❌
#بقلمي_الكاتبة_شمس

برأس السنه احتفلنا سويه وكانت سنه 2007 اول سنه احتفل بيها .. ومو وحدي وي حبيبي وزوجي ..

بعدها بدينا نجهز للزواج ..
كل يوم نطلع اني ماما وويانا زهره لو نبراس بعد الكليه للسوگ تعبت حيل بهذي الفترة
گمنا نروح مولات بالليل ياخذنا مهند .
واشتري احتياجاتي الباقيه ..
ماخليت شي مااشتريته ..
گلبيات خليجيه وتراكات طويله للبيت .
ملابس طلعه انواع حتى اذا طلعت اني وحبيبي .
وخاصه بعد ماعرفت طبع سيف واناقته
صرت اختار ملابسي بحذر وكله من الراقي
واهم شي النزاكه والالوان الي يحبها ..
ملابس النوم اختاريت انواع مختلفه .
وحتى ملابس رقص اشتريت ..
(مو تضحكون . بس ردت اسوي كلشي حتى اسعده وبما انه بارعه بالرقص . گلت بس اتعود عليه ارگص اله . مع انه بحياتي مارقصه گدام احد بس گدام المرايه ههههه)

فرشات انواع مختلفه اخذت ..
وبعدين اشتريتله ملابس .
عدنا عاده نشتري نيشان للولد ..
اخذتله قاط وبناطير واحذيه وقمصان .
وساعدني بهذا الشي فراس اخوه لان يعرف ذوقه وتقريبا هم نفس القياس ..
بعد مااشتريت كلشي احتاجه من ملابس ومكياج واحذيه وجنط وشالات وفساتين حفلات .
زاد من الفلوس .
گمت اشتريت گلاده حلوه ونطيتها الماما . گلتلها ماما هذي جيبيها الي هديه زواجي ..
بابا ماقبل وگال اني حجزت سوارات .
گتله بابا مايمنع انه تجيبولي هذي الگلاده وي السوارات هم ترفعون راسي گدامهم .
وهم هي اول وتالي راجعتلي ..
بالگوه اقتنع بابا .
وهذا الشي مايعرف بي بس ماما وبابا واني والله فوگنا
لان من طلعنا اني وسيف نشتري الغرفه ..
حجز ثلاجة وتلفزيون وقنفات جدد وطاوله .
مخله شي مااشتراه .
الغرفه كان لونها ابيض وذهبي حيل حلوه ونازكه .
والقنفات ملكيه بيج والزغرفه ذهبي ..

بعد ماكملوا صور الغرفه .
وشوفنياها من اجانا .
كانت روووعه بشكل .
وحتى اهلي تخبلوا عليها .
كنت اتمنى اخلص امتحانات بسرعه .
واعيش اني وحبيبي بعشنا الحلو .

قربت امتحاناتي واني حيل تعبت من شغله السوگ .
وسيف يسهرني بالليل .
فعلا تعبت حيل ..
بس كان مايروح من خيالي شنو راح اسوي وشنو البس .
بس بقت شغله التعويد .
اتمنى ربي ينطيني الجرأه ومااطلع جامده
لو بارده مثل ميگول سيف ..

بفترة الامتحانات تركني .ادرس
ورغم دراستي . بس اشتاقله واروح اتصل ..
وماما ام هيثم تطردني تگلي روحي ادرسي .
لاحگين كلها اسبوع وتصيرون بغرفه وحده ..

كنت كلما اصلي ادعي ربي يوفقني وياه واعيش بسعاده
احس ربي عوصني عن طفولتي ومراهقتي وحياتي الماضيه ..

ماصدگت كملت امتحانات ..
عزمت صديقاتي كلهم ..
واقاربنا وخالاتي وعماتي ..
مخلينا احد ماعزمناه .
الا سڤانه وعمتي ..
اتصلت عليهم ماما .
ماقابلات يجن .
وتگول واخيرا الزرگه نفگت ..
مااهتميت وماردت شي يعكر صفوي .