ثمن أخطائي

بارت 9

بارت مفاجئ لعيون السهرانين 😘

///البارت التاسع ///
#ثمن_أخطائي ❌
#بقلمي_الكاتبة_شمس

بدات العطله ..
وتفاجأنه بعماتي جايات ..يخطبن نهله ..
بابا گال النهله ..
ونهله ضاجت بس خافت تحجي ..
لان سبق وگاللها بابا مو يجي يوم وتروحين تجيبيلي واحد من المعهد مااقبل وابطلج .
ساعات الوم بنفسي واگول اني السبب اختي هيج صار
بيها ..
ومرات هي تلومني هم .
بس الحقيقه هو بابا من قبل متصير شغلتي ناطيهم حجايه وگال نهله الكم ..

بقت بس مهند الي مايقبل يقنع ويگول .
اني مو بنيه وتخاذون قراركم عني ..

سكت بابا وگال بلكي يخلص جامعه ويعقل ..

حددوا خطبه نهله . وطلعت هي وماما وعمتي اشتروا الذهب وفستان .
ومقررين ع العطله الصيفيه يتزوجون .

كلها اتجمعت عدنا بيوم المهر . الا عمتي سعاد زعلانه بعدهي وهي اصلا حتى بالعيد مااجت سلمت ع بابا تگول طردني عمود  هال…..

اجت نهله من الصالون تخبل طالعه .
وشويه شويه كامت تبتسم وتغيرت ملامحها الفرح ..
عازمه صديقاتها كلهم ..

دخل فيصل بعد ماعقد السيد الهم .
لبسها الحلقه والذهب .
هي طالعه لعابه يمه . وهو مكشر وجهه حتى ابتسامه بالگوه يبتسم ..
مواصفاته طويل وضعيف حنطاوي وعنده شوارب .
لاحظت اسيل عينها ع مهند وين يروح وين يجي .
قهرتني ..
يمكن من حجوا بيها حبته وهو هنودي يخبل ينحب ..
بس الي كاسر گلبي عليها ماتدري مهند مايريدها ..

كملت الحفله وكلها راحت البيتها ..
بعد كم يوم اجه فيصل اخذ نهله وراحوا عقدوا محكمه .
بس اجت ضايجه ماادري شبيها ..

دخلت اني وزهره نهلهل بسكته ونهوس الها .
ابتسمت شويه .
وگالت .. من اولها صخام .

گعدت يمها .. شكو .
نهله .. وج فيصل يگلي اذا كملتي ماتتعينين .
ولبسني جبه . ويگلي لو بيدي ابوشج يس امي ماقبلت گالتله جبه مستوره ومابيها شي .
ويگلي مااريد لامكياج ولا كحله ..

نجمه .. عادي حبيبتي انتظريه بلكي شويه شويه يتعود وتگدرين تعلميه ع طبعج .

نهله . خاف هو الي يعلمني ع طبعه .
دگومي بدلي .
نجمه . ليش
نهله . عمتي گالتله جيب البنات وتعالو هنا غداهم ..

بدلنا ورحنا كلنا البيت عمتي ..
واسيل حايره شمسويه وشطابخه .
وخطيه امها تمدح بيها . وهي من جوه لجوه تاكل تستحي من مهند ..

ومهند حاس بس يغلس .. ويسوي نفسه مو ويانا .
عمتي گامت تحجي بشغله الفلوس وشگد يكفي للملابس واحتياجاتها ..

غمزتلنا اسيل وگمنا للغرفه .. گعدنا نسولف وفتحت سالفه مهند .
گالت مهند ليش هيج معبس . كان احسن قبل ع الاقل يسلم ..
زهره . اي هو صار هيج من يوم بابا حجه بيج ضاج .