انا مصيبة بس معايا حق

أنواع الجيران

بمناسبه جاري يا جاري يا حته سكره ديه عايزه اعرف ايه السكر ف جار قاعد يشوي فراخ ولحمه وكفته وطرب تحت شباك بيتنا واحنا صايمين ها حتي ما طلعوا لينا طبق وحشين
المهم نبدأ بقا في انواع الجيران
اول نوع النوع الحشري اللي ان بكره وده بيتمثل في *ام مرزوق *اللي بابه مفتوح اربعه وعشرين ساعه مستني اي حد يطلع او ينزل عشان يتكلمه عليه وخلاص وممكن واحده تطلع تقولك ان جوزك ماله حق يتخانق معاكي بالشكل واما تسأليها عرفت منين تقولك ان ام مرزوق قالت للعمارة كلها والموضوع اصلا ممكن يكون صوته عالي بس عشان ينادي علي بياع الخضار مثلا ولو طالعه متأخر علي السلم وسيله شنطه الكتب علي ظهرك اد كده واصلا جايه الساعه ٩ مثلا وتلاقيها طلعت من الا مكان وتحقق معاكي وكنتي فين واتأخرتي ليه وعيب كده يا بنتي والبنات لازم تيجي بدري وما ينفع تتأخر والمفروض اصلا ماليها تعليم وان نهايتها في بيت جوزها وتلاقي فجأه الحوار بقي انها بترسم عليكي لابنها مرزوق ساقط الاعداديه اللي نص سكان العمارة مش طايقينه ولا مثلا اللي تعايركم عشان كلكم بنات واصلا ابنها لو لقتيه واقف لوحده بتوقفيلوا تاكسي وتستنيه عشان يركب الست اللي تقعد كل نص ساعه اللي تفتحيلها الباب تقول لك عايزه سكر تروحي تجيبي ترجعي تلاقيها في اوضتك مثلا وغير كده كتيييير

النوع التاني النوع المتفاخر يوووه
اللي تقعد تسألك هنفرح بيكي امتي وفجأة الحوار يتحول ان بنتها جالها دكتور
اللي عيالها في ابتدائي واعدادي بيطلعوا للاوائل علي المدرسه وفي الاخر يدخلوا ثانوي صنايع سبحان الله
اللي الرووووووج بتاعها brand من أوربا جاي ليها مخصوص ب ٧٠ دولار هووووف
وغيره وغيره

النوع الثالث النوع الدبلوماسي ضابط بقا وزير لواء كده يعني وده طبعا مش هنتكلم فيه عشان انتوا عارفين لساني طويل ومش مستعده ابيت في التخشيبه وطبعا دول حماه البلد وعلي راسنا من فوق

النوع الرابع اللي مالهوش دعوه بأي حاجه في اي حاجه مش عايش مع حد وبتفاجأ اصلا اما اشوفهم نازلين من العماره ايه ده دول ساكنين معانا

النوع الخامس رئيس مجلس العمارة اللي بيفتكر نفسه رئيس مجلس الوزراء وكل شويه بكره يا جماعه اجتماع مع سكان العمارة اه هنلم ٣٠٠٠ من كل واحد عشان نعمل جرس للباب الحديد اللي دفعنا فيه ٥٠٠٠ ومش بيتقفل اصلا يعني بجد really

النوع السادس اللي بحبوا الحيوانات وده مش زي اللي قال عليه ظافر خالص يعني ممكن تصحي علي شامبنزي فوق سريرك وبعد اما تصوتي وتقطعي الخلف من الخضه تلاقي واحده طالعه بكل برود عشان تاخد الشمبانزي بتاعها يعني واحد نازله طالعه تقولك لو سمحتي يا بنتي القطه بتاعتي خرجت هتيهالي وتطلعي انتي زي الهبله تجري وراها
 
النوع السابع النوع المزعج اللي لحد الساعه ٣ بالليل تصحي علي واحده بتقول يا الووووووووووووو حد يدلع ابنه الو  طب ما علينا ليه تصحينا من النوم دلوقتي او اللي تسيب عيالها يلعبوا في الشارع لحد ١ باليل وهووووب الكورة كسرت الزجاج عيييييب كده يا بابا

النوع الثامن النوع الشحات هي حاجه بتجري في دمه كده لازم يطلب كل حاجه من الجيران مش بقول مش نطلب لكن مش نخبط علي حد الساعه ١٢ باليل عشان عايزين كاكاو عشان نفسها راحت له احنا مالنا حضرتك حتي بتطلب حاجه مش ضروريه عيب يا ماما

وفي كمان جيران طيبين ومحترمين والله وبيبقوا اكتر من الاخوات ربنا يبارك لهم وما تنسوا ان النبي صلي الله عليه وسلم وصانا علي سابع جار