انا مصيبة بس معايا حق

لجنه الامتحان

دلوقتي احنا في لجنه الامتحان نفترض اننا مثلا في امتحان اللغه الاجنبيه English تمام الوصف بقا بتاع اللجنه ٢٤ مقعد للطلاب ٢ مراقبين نبدأ بالطلاب  بيقعدوا في ٤ صفوف كل صف ٦ مقاعد في منهم ١٢ مقعد جنب بعض يعني ١٢ طالبه قاعدين رسميا جنب بعض
وفي الاخر تشتكوا من الغش وتعملوا حفله علي البنت لو غشت وتضيعوا وقتنا ومراقب الدور بقا وايه ونص الوقت يضيع  طب ما تقسموا القعدة غير كده
ما علينا الطلاب بقا بيبقوا ضاربين اقراص غباء قبل ما يخشوا يعني مثلا اول واحده في اللجنه تلقيها بتغش من اخر واحده في الصف اللي جنبها يالهوي عليا انا مثلا ببقا قاعدة في نص اللجنه جنبي بنت في المقعد اللي جنبي وديه طبعا ورقتي بتنسخها عندها وفي نفس الوقت بتنسخها للجنه كلها
ولو ما غششت يبقي نهاري اسود ومش عارف احل ولا كلمه وطول اللجنه هتقعد تنادي عليا لا وايه هي مش سامعه فواجبي اني امليها الانجلش حرف حرف حسبي الله ونعم الوكيل بجد
كل ده والمراقبين بقا لو اتنين ستات تلاقيهم فتحوها وديه تشتكي لينا من جوزها والتانيه تشتكي من ابنها اللي في سننا ومش بيذاكر احنا مالنا يا امي انتي وهي الوقت بيضييييييع ولو راجل وست تلاقي الراجل بقا نافخ ريشه ويزعق ويشخط وفي الاخر يقعد يعاكس المدرسه ابو شكلك يا حيوان انت وانت شبه رجل المعزة كده اووووف لو راجلين بقا يبقي هيقعدوا نص ساعه من اللجنه يشرحوا لينا القيم والأخلاق وان الغشاش ده مكروه ووحش وبعدين يقعدوا يضربوا سندوتشات فول وطعميه(فلافل) والريحه بقا ايه مش عايزة اقولكم تحسوا كده ان كل المراقبين عندهم مبدأ واحد هنضيع وقتكم هنضيع وقتكم
ندخل بقا للحظه اللي اول ما ناخد ورقه الامتحان اللي جاي من كل حاجه حسيتي انها صعبه ومش هتيجي وعشان كده حليتيها بسرعه وما بصيتي عليها تاني وتدخل اللي مسئوله عن الامتحان تسألكم بكل برود حلو الامتحان يا بنات لاء يا ميس مش حلوه لاء يبنات انتوا بتدلعوا والامتحان حلو طب انتي بم******جايه تسألي ليه وانتي حاسه انه حلو بتحرقي دمنا ليه هاه فهميني  اجي احل اقسم بالله انا حليت كل ده امبارح قبل ما انام ومتأكده منه اجي اكتب بعد كل التوتر ده مش فاكره اي حاجه عارفين احساس انكم تبقوا عايزين ترموا نفسكم من الدور الأول أيوة هي ديه مش فاكرة ياللهوي بعد اما احل وطبعا اخرج اتصل انكد علي امي واعيط عشان غلطت في سؤال او سؤالين وصحابي يضربوني اروح عشان يتكرر كل ده تاني

كانت معكم تيسير مصطفي من داخل لجنه الامتحان وربنا معانا كلنا وان شاء الله نفرح اهلينا ديما ونحصل وعلي الدرجات ونحقق اللي بنتمناه وادعولي كتير عشان انا السنه الجايه سنويه عامه ٣ ثانوي علمي وهموت من الخوف من دلوقتي