انا مصيبة بس معايا حق

أنواع الطلاب

هتكلم الأول عن نوعي أو اللي كان 😭 الناس مسمياه الدحيحه
فيها ايه يا جماعه اني اعيط علي نص درجه مضايقاطوا في ايه هاه فهموني انا اما اذاكر وانقص لازم اعيط ديه حاجه طبيعيه جدا علي فكره وعلي فكره طبيعي جدا اني اقول اني حليت وحش جدا لمجرد اني غلط في سؤال واحد ديه مش جريمه انا في نظري لو غلطت في سؤال أو اتنين  انا كده لغبطت  الدنيا مش خايفه من الحسد ولا بضحك عليكوا وعلي فكره يا جماعه انا مش بقعد قدام الكتاب ٧٠ ساعه في ٢٤ ساعه بالعكس انا باكل والعب وامسك موبايلي واتفرج علي التليفزيون عادي جدا بس مش لازم اقعد ٣ شهور اعمل ده بس واخر اسبوع اذاكر عشان ابقي عاديه لازم نوازن بين الترفيه والمذاكرة مش لازم علي طول ده بيتعب الدماغ وبيوصل لفتره ان الدماغ رافض المذاكرة بشكل قاطع وده حصل معايا لولا اني الحمد لله بقدر احفظ بسرعه كنت ضيعت

تاني نوع الطلاب اللي مش فارق معاهم أي حاجه وتيجي في الامتحانات اعيط وهسقط يا ________ انتي مقضياها خروج وصحاب ولعب وتليفون واتس فيس وفي للاخر هتسقطي يا اختي تستاهلي تسقطي *مش شماته*عشان انتي  فرستيني وجبتيلي اكتآب بجد كرهت الحياه بسببك ليه كل خروجه تقعدي تنشري صورها اسبوع ليه فهميني 😣 نسيبنا من النوع ده وندخل في اللي بعده

النوع الثالث المنشكح *بيضحك ديما*
اللي حابب الحياه تلاقيه علي طول كده مبتسم ومش فارق معاه أي حاجه في أي حاجه تلاقي كده ضحكته تسمع آخر الشارع يا حبيبتي عيب يا حبيبتي ما ينفعش كده ما فيش فايده هي كده علي طول هي حاجه حلوه بس مش لازم علي طول علي طول عشان اوقات بتبقي مش ليها لازمه خالص والضحك من غير سبب قله ادب 😒

النوع الرابع المكتأب ديما
ده انتشر بشكل وحش
مش هقوله غير حسبي الله  ونعم الوكيل  ليه كده يا بابا ليه تقرف كل الناس حواليك انت مضايق احتفظ بيها لنفسك لكن ابقا داخله الواتس زهقانه اصلا الاقي كل  حالات صحابي اكتآب اقوم اقفل الواتس واقفل الكتاب واعيط أو انام بتقفلوا اليوم صدقوني والمشكله انك اما تلاقي صاحبتك مضايقه ومش عارفه تفرحيها بتكتأبي اكتر منها وفي الاخر اصلا تطلع صاحبتك مضايقه عشان مش لاقيه مانكير مناسب للبسها مثلا أو مثلا الكراش وده موال هتكلم فيه في بارت لوحده الكراش بتعها عمل لايك لبنت ايه علاقه ده بان الموت ما بيفرقش أو أن بكره هتموتي أو انك حاسه انك هتموتي فهمينييييييي

النوع الخامس ده البلطجي وده مشاء الله    منتشر طبعا في مدارس الأولاد بس في عندنا كمان كتييير منه يعني مثلا عندنا حوالي ٤ أو ٥ كل حصه يا اما المستر يطردهم يا اما يهربوا يناموا يسمعوا اغاني يهربوا من الدروس وياخدوا الفلوس وبنات ولو حد كلمهم يبقي جني علي نفسه تحس انهم عايشين في بلد لوحدهم دول هقولهم اتقوا ربنا عشان اهلكوا اللي بيتعبوا عشان يعلمكوا حرام عليكوا تعبهم يروح هدر

النوع السادس التافهين وده مختلف جدا عن الطفولين يعني مثلا انا لسه بتفرج علي كرتون وانا قناه بقلب عليها كارتون نتورك بالعربيه ولسه بسمع طيور الجنه وبحب المصاصات والدباديب والعرايس وديه عشقي وممكن اتنطط عشان خبر سمعته فرحني ولو اي حد اكبر مني زعقلي بعيط وهفضل كده ده طبعي مع انه مش حاجه كويسه بس مش مشكله لكن الناس التافهه اللي تعيط عشان  المانكير عشان الكراش بتاعها اللي لازم لو الشووووووز يليق مع لون الطرحه ما ينفع انزل بنفس الطقم مرتين بمكانين مختلفين بتهزري صح يومين في مكانين ايه اللي يمنع اللي صاحبتها ما ينفعش تكلم حد غيرها ويقعدوا بقا يعملوا جو العشق الممنوع ببقي قاعده كده عايزه اقوم الطشهم حته قلم وبغير عليكي يا بيبي وما تكلمي مش عارفه مين تاني يا ماما ديه بنت زيك يا حبيبتي بلاش قرف  يخليكي  مش عارفه ايه تاني في النوع ده عشان معظم البنات تافهين  اصلا الا من رحم ربي

النوع السابع  ولاد المدرسين
تحسوا ان المدرسه بتاعت ابوهم ويالهوي لو امهم أو ابوهم معاهم في المدرسه يبقي الدنيا بتاعتهموالامتحانات واعمال السنه والغياب متقفلين وتلاقيهم طالعين من الاوائل وهما ولا حاجه بكره تشوفوا  الاحترام في ٣ ثانوي علي فكره مش بعمم انا كمان بابا وماما الاتنين مدرسين بس عمرهم ما عبروني ولا راحوا ليا المدرسه ولا مره 😭 بيقولو لي انتي تحجزي مكانتك عند المدرسين بادبك واجتهادك مش عشان انتي بنت زميله  وفي حبه صغيرين من المدرسين بيعملوا كده لكن الاكتر بيتمنظروا وخلاص

النوع الثامن النوع الغيور

تيسير انتي بتحفظي ازاي بترتبي وقتك ازاي بتحفظي اد ايه وصلتي لفين انا مش فاهمه انتي شاطره ولو سألتها عن سؤال انا مش عارفاه انا لسه ما بدأت مذاكره وقبل الامتحانات انا هسقط  والنتيجه تطلع هي من الاوائل really  يعني انتي مقتنعه باللي انتي بتعمليه ده ده نفاق يا حبيبتي والحسد مش حلو

النوع التاسع النوع الصريح وده نوع حلو مش ليه صحاب كتير عشان ما بيجمل الكلام صاحبيه لانه النوع الوحيد اللي مش هيتكلم عليكي من ورا ضهرك  

النوع العاشر النوع اللي ما بيتبل في فمه فوله المنافق
  اللي من قدامك حبيبتي ٥ حبيبتي ومن ورا ضهرك ديه كدابه بارده دحيحه مش عارفه ايه حرام كده اوي علي فكره احذري جدا من النوع ده واختبري اصحابك 

النوع الحادي عشر  الغشاش
اللي هو عارفين انا ذكي بس مش هذاكر  انا هغش هغش ما بيتكسف وبارد كده في نفسه علي فكره انا عادي بغشش رغم ان فيه حرمانيه في الكلام ده بس ما بعرف احرج حد بقول ممكن مثلا كان تعبان أو مع حد في المستشفي وحرام لكن بس سيبولي فرصه احل ربنا يخليكوا مش كل ٧ ثواني تيسير تيسير تيسير مش بعرف اركز وحصلت معايا مره في الامتحان ما عرفت اخلصه عشان اغشش زميلتي وكمان ما تخلوا مدرس يغشش حد يا اما يغشش اللجان كلها يا اما يطلع بره وما تتكسفوا  

النوع الثاني عشر الخجول بزياده
اللي ما يقدر يجاوب علي الاسئله الشافوي لكن في الامتحان الكتابه يقفلوا ما تضيعوا مجهودكم علي حاجه تافهه ممكن يكونوا متميزين لكن ما يجيبوا درجات حلوه عشان أعمال السنه عشان المستر فاكر انها ما بتذاكر ف ممكن تقولي له من اول السنه وهو مثلا يعملك الاختبار كتابه

النوع الأخير الجرئ جدا اللي ممكن تقف تتخانق مع المستر نص ساعه عشان هي اللي غلطانه اصلا اوف منكوا ومن جبروتكم انا المستر لو كلمني وصوته كان عالي بس من غير تهزيق بنهار ساعات بيكون الجرئه حلوه لكن لازم تكون بأدب وما تجادلي الا لو معك حق

انا خلصت لو حد عنده أنواع تاني شافها يكتبها في كومنت وانهي نوع انت بصراحه