[Hindi] Malaya
©Chesz Dylan
Sa karimarimarim na nakaraan,
Ay nakabusal ang bibig at sapilitan--
Na tinatakpan ang mga mata.
Upang huwag makawala--
Ang kahit isang tinig ng mamamayan.
Tinig ng pag-asa, patungo sa kasarinlan.
Iginapos sa huwad na rebulto--
Idelohiya, kolonya at katekismo.
Niyurakan ang mga puntod ng mga ninuno,
At dumanak ang maraming dugo.
Dugo ng mga dukha, at mga yagit na taumbayan--
Na nagaklas dahil ang tanging hangad ay kapayapaan.
Hindi pasisiil sa mga dayuhang manlulupig,
Sa lupang hinirang, kasarinlan ang bukambibig.
Sa nabubukod-tanging perlas ng Silangan--
Nagbunyi at iwinagayway ang watawat ng abang bayan.
Malaya na tayo sa mga pangil ng dayuhan--
Sakim, nangkamkam at ganid sa kapangyarihan.
Ngunit malaya na ba tayo pagkatapos noon?
Malaya na ba ang maraming Pilipinong kahit saan pumaroon--
Ay tangan pa rin ang tanikala ng kahapon?
Sa bulok na sistema ng mga akala mo'y poon;
Mga elitista, mga taksil at nagbabalat-kayong alagad ng rebolusyon--
Na ang tanging layunin ay pagkahati-hati, baluktot na kalayaan at huwad na solusyon.
#ArawngKalayaan2018
YOU ARE READING
Poemstagram
PoetryThese are actually the poems I wrote way back. Internet was kind enough not to delete my account in a particular website where I kept these poems for years. In case, I had a sudden change of mind and write poems again, I will update this. By the way...
