قصة :هالعار شكون نتا للكاتبة :ليلى سعيد

البارت 1

هالعار شكون نتى ؟؟؟ #ليلى_سعيد
البارت 1
يقول أحد علماء النفس لا أعرف إسمه أن الإنسان يرى نفسه في المرآة أجمل 6 مرات مما هو عليه في الواقع ميمتي أنا هاكا دايرة و غير بإضافة 6 معدلات على جمالي الحقيقي أما فالواقع علم الله كيدايرة يلاه بلا مانتقلق أهم حاجة جمال الروح كيقولو و الله أعلم أن هاذ النوع من الجمال أو كما يطلق عليه البعض الجمال الباطني مصطلح إخترعته القبيحات أو الكوفرات للتبردة على أنفسهن الصراحة كوكا كتصلاح فهاذ المواقف لا حالتي ماعجبانيش غنلتاجئ لملاذ الفتيات الأشهر "مواد التجميل " الميك أب و هانا غندخل لعالم الجميلات لا محال يقدي شي حاجة غنمشي للبنان نديرليا شي عملية تجميل هادشي خاصو الفلوس تفو على زهر الخيوبية و الزلط : وراك ماشي جوع أصاحبتي مابيكش مقبولة غير نتي ماكتهلايش فراسك قادي الحالة شوية و تولي عاطية ـ أسماء الله يعطيك الستر خليني عليك راني في حالة يرثى لها ـ اللي سمعك غيقول البنت هرب عليها العريس نهار العرس عادي ياصاحبتي راه غير entretien هذا طلبي زهرك تقبلتي هو هذاك ماتقبلتيش فيها خير ـ ناري ياختي فيا الخلعة عرفتي راني محتاجة للخدمة ـ وحبيبة عارفة وجدي داكشي اللي عليك وربي يكمل ـ ياسيدي ربي الحبيب سهل ليا فهاذ الخدمة ـ إن شاء الله مهم نتي غير مادهشريش كوني واثقة من نفسك ـ كيقولو باللي ف les entretiens كيركزو على العامل النفسي ديال المرشح ـ و فهادشي مانخافش عليك الساطا لسانك طويل ـ هانتي درت الحساب لكلشي دابا ايلا سولني كيفاش حتى وصلت للشركة ما نقولش ليهوم جيت سالتة فالطوبيس و فلت من Contrôle نقوليهوم ركبت الطاكسي ولا نفوح و نقول جيت فالتراااامواي ـ لا الحبيبة قولي ليهوم جيت فالليموزين ولا عرفتي قوليهوم وصلاتني هيلاكوبتير حتى السطح و نتي سيري حتى فكروسة ولا راكبة حمار شكون داها فهادشي المهم توصلي فالوقت ركبتي الترامواي كيسحاب ليك هذا هما بنات الدوار اللي فحتي عليهوم نهار ركبتي فيه منين مشيت لعروبيتكم فالصيف ـ صافي خلينا من transport شفتي اللبسة اللي شريت نعجب المدير ياك ـ أويلي نتي باغا دبري على خدمة و لا دبري على راجل ـ و عصفورين بحجر واحد ماكتفكروش فالمستقبل ـ ناري و يسمعك عمي إسماعيل ينوض من القبر ياحبية و يقوليك واش نتي غتدخدمي و تعاوني ماماك ولا غتحضي ليا الرجال ـ أسماء ماغنمشيش غدا مانقدرش أصاحبتي لا درت بناقص ـ شفتي نتي ايلا بقيت حداك هاد شوية العقل اللي بقى ليا غتديه خليني نمشي لخربتنا ـ أسماء عفاك بقاي معايا و كيما العادة ماداتهاش فيا و مشات لدارهوم و بقيت أنا فوسط أفكاري غدا l'entretien غدا l'entretien قلبي كنحس بيه غيخرج من بلاصتو لقد دبرت عليها انا مابغيتش نخدم أنا غنتزوج حسن ليا و نقابل داري وولادي دابا العرسان غير شادين الصف فباب دارنا سمحوليا دخلتكم دخلة ديال العرايش أنا سميتي سارة فعمري 23 عام قريت l'informatique و غدا عندي entretien فوحدة من أهم شركات فهاد Domaine كيما سمعتوني منذ قليل فأنا بنت و بكل نواضع أملك قدر كبير من الجمال و الحسن ماعرفت واش نضحك و لا نبكي على حالتي أنا من صغري و حلمي نكون بوليسية عرفتو علاش حينت كتعجبني شي حاجة سميتها الغموض كيعجبني بنادم مامفهومش يمرضني فراسي تمنيت تجيني شي جريمة قتل و نبقى نبحث فيها و نفك الألغاز ديالها و نربط الأحداث واااو سعداتهم كنت نتمنى نخدم بحالهم ساعة الطول لايسمح للعمل في مجال الشرطة لماذا يا أمي لماذا لم توكيليني دانينو في الصغر راه كيدير غير درهم ياعباد الله منين مقدينش على الولاد لاش كتولدوهوم لا و الزوينة والدة 5 بنادم كتلقاه شابع لعاقة ووالد بنيتة ووليد أنا مافهمتش علاش هاذ الناس اللي لاباس عليهوم ديما هاذ القضية ديال بنت وولد و حنا الشعب المكحط تلقاه ماقادش حتى براسو ووالد فرقة ديال الكرة كيقوليك الولاد كيجيو برزقهم يكبرو و يخدمو علينا مشروع حنايا ووالدينا غير باش تستثمرو فينا أح ياقلبي على زهري تفكرت ديسك ديال " أراسي مداز عليك و باقي " خليوني نركد غدا إن شاء الله أنا أمام مصير حياتي دعيو معايا أنا مزاوكة يتبع