قصة :هالعار شكون نتا للكاتبة :ليلى سعيد

البارت 3

البارت 3 الناس كيلقاو التشجيع فهاذ المواقف و أنا فاطرة بأتاي و كنسمع معيور طارق عائلة لا تحترم الحالة النفسية لأولادها فالباب لقيت واحد المرأة مضاربة مع الباب تحلو والو الساروت تعكس : السلام ياك لاباس ياخالتي ؟ ـ و عليكم السلام هانتي كتشوفي يابنتي حلف يتحل الباب ـ بلاتي ياخالتي نجيب ليك شوية ديال الزيت فشي طبسيل ندهن بيه الساروت باش يتحل هاذ الزيت كناكلوها كنطيبو بيها تعتبر مرطب للشعر أو كندهنو بيها حتى السوارت طلعت للدار هزيت الزيت ونزلت ثاني دهنت الساروت غير خشيتو فالقفل تحل السيدة دخلات لدارها مور ماتحليها الباب و شكراتني و أنا حوايجي كاملين طبعو بالزيت رجعت للدار محبطة نشوف مانلبس مور هاذ الحالة غير دخلت مع الباب حتى كنشوف فطارق كيشوف طبايع صفرين على حوايجي و كيتشتت بالضحك : دخلي بدلي ياحنينتي ترجعي للتكرفيس التفركيس ماجاش معك ـ وبعد مني تفو عينيك شحال خايبيبن و مازكلتينيش المحساد ـ مالي أش درت ليك نتي اللي منحوسة بقينا كنتاكرو حتى فكاتنا ماما كيف العادة : سكات مانسمع حس حتى حد فيكم و نتي حتارمي خوك الكبير شوية و نتي باغا تنقزي عليه ـ نتي ديما كتجي منو كتبغيه كثر مني واش أنا ماشي بنتك سمم ليا طارق أذناي كيف العادة : حشومة عليك ياماما خبيتي عليها الحقيقة الصراحة حنا لقيناك غير فطارو ديال الزبل و ربيناك ماعمرك عقتي شوفي تبارك الله أنا كي بوكوص و نتي كي الكرموسة راك ماشي بنتنا ـ و ماما شدي ولدك واش مامقدراش حالتي راه عندي entretien ياعباد الله ماما كأي أم مغربية غير كتسمع حس القرايا حتى كتقول الأقوال المأثورة للأمهات : مالك أبنتي غدوزي ليا الدكتوراه خويا دار مع ماما التحالف : entretien دايرة فيه هاذ الحالة سيري راك باينة مامطفراهش أشكركم أشكركم يا عائلتي الحبيبة على تشجيعاتكم اللتي لم تبخلو عليا بيها مشيت بدلت حوايجي و كنتسنى طاكسي والو كتعكس بمرة الله يستر الصراحة لافوت ديالي البارح واحد دري حط statut و قال ان لم ترسلها ل5 أشخاص ستسمع خبر حزين واشي يحل الفايسبوك يلقو حبيبة توحشتك و شي يلقى إرسلها و إلا ستحرق بنار جهنم تحرق فيها نتى نيت لامفر منك ياطوبيس طلعت و أنا ماحاملاهش هاذ الطوبيس كيبقى يهز فالناس حتى كيدكس ماعرفتش أشنو كيستافد و هو الأغلبية غير سالت وصلت للشركة بحال شي دجاجة مريشة وقفت حدا واحد السيارة زاجها كحل قاديت شعري و حالتي أنقذ ما يمكنني إنقاذه حتى خرجات منها واحد السيدة جمدت فبلاصتي طلعاتني و هبطاتني و ضحكات و زادت هاذي مالها شافت كلون الله يستر ماكيقدروش الجمال الطبيعي دخلت للشركة حليت فمي واااو هادشي زوين شركة كيدايرة ياسلام ياسلام قدي إيه حلو الغرام لقد وقعت في حب هذه الشركة جالسة مع Les candidats فواحد الصالون كنتسناو نوبتنا و كيبانوليا اللي قبل منا كلها كيخارج هاللي فرحان هاللي كيبكي هاللي كيسب فاللجنة و أسئلتها اللي لاعلاقة واش هو قاري l’informatique و la jury كتسولو على الطقس كيداير اليوم مزوق كيداير مافهمتش علاش ف gاع les entretiens كيسولوك أسئلة مغايرة لداكشي اللي قريتي جالسة في هذا المكان حاسة براسي مشاركة ف Arab Idol بعدا على الأقل ف Arab Idol حتى كاع ايلا ماطفرتيهش كتشوف الزين وائل كفوري وذاك البوكوص ديال حسن الشافعي أما هنا غندخل عند رباعة ديال الشراف كل واحد حاط كرشو حداه بحال شي امرأة فشهرها بديت كنتفكر كاع الفيديوات ديال برنامج كنقلب على خدمة و كنحاول نتفكر الحوار اللي كندير مع المرايا و مع المخاد باش نتدرب مزيان صافي ياسارة مالك كتقفقي فين زعامتك غيدوز كلشي بخير و غتعطيهوم أجوبة مناسبة مع كلورتس الثقة في النفس تهدنت و تكالميت و كيبانوليا الموظفات كيدوز من حدايا فقرة ديال ليلى حديوي فصباحيات 2M بدات ماتفرجتش فيها فالدار و أنا دابا كنتفرج فعرض أزياء حي و مباشر طال الإنتظار دابا غير منشورة حتى ندخل عند اللجنة و نكمل يتبع