قصة :هالعار شكون نتا للكاتبة :ليلى سعيد

البارت 6

البارت 6 أنا لقيت خدمة لقيت خدمة و أخيرا غنستقل بذاتي و نحقق كاع داكشي اللي بغيت و حلمت نشريه و أجلتو نظرا لعدم توفر العملة الصعبة فقت نهار الاثنين ناشطة أنا وليت موظفة مابغيتش نفطر ماشي حينت مافياش الجوع راكوم عارفين علاش بلا مانعاود سلمت على ماما و بقات مسكينة كدعي معايا 9:00 واقفة وصلت للشركة مشيت عند أمال : سلام ختي أنا اللي تاصلتو بيا على ود الخدمة ـ وي حبيبة تسناي بلاتي يجي Mr. Yousef باش يهضر معاكم فالتفاصيل جلسي تسنايه مع الشباب راكم كلكم غتخدمو إن شاء الله هوما كانو طالبين 10 ديال الموظفين و كيبان ليا هنا 10 و أنا هي 11 مالي كنعقد الأمور يكون حتى 40 شحال عزيز عليا نزيد فيه بقينا منشورين كنتسناو هاذ السي يوسف مزال مابان جالسة حدا واحد البنت وهي تلفت ليا : جيتي على ود الخدمة ؟ لا جيت على ود شي سخرة بنادم ماعرفتش واش مكلخ ولا كيديرها بلعاني جاوبتها : وي ونتي ؟ ـ حتى أنا شرفيني بسميتك ـ سارة ونتي ؟ ـ سميتي حسناء لحسناوي ااااح اقلبي فين كانت عينيهم حتى سماوك حسناء لا وزادوها حتى بالكنية لحسناوي أنا كون جات عليا يسميوها قبيحة القبيحاوي ولا خيبة الخيباوي أو كوفرة الكوفراوي تجي معاها حسن و تفكرت بلاتي راه حتى أنا سميتي سارة و سارة كتعني بشي لغة هي الجميلة بلا ماتشفاي راكوم بحال بحال 10:30 وسي يوسف عاد جاي طويل و بيض وباقي صغير شعرو رطيطب و اللحية سمحوليا ختكم زهوانية كتشوف الزين و كدوخ وصل حدانا و مخنزر شافينا : تبعوني للمكتب مشينا معاه دخلنا لواحد القاعة كل واحد جلس فكرسي شاف فيا حبس الضحكة وزاد هذا هو اللي دوز ليا l’entretien عقل عليا صعيب ينساني أصلا علاش فين عمرو دوز شي مرشح بحالي غير ساكت و قال جملة وحدة بسلامة هاذ السي يوسف والو يا ربي السلامة ماكيضحكش ياكمة ماعندوش السنان و السي راه حنا غنخدمو ف l’info ماشي فالعسكر طلق اللعب شوية : مرحبا بيكم فشركة Web هاذ الشركة ماشي بزاف باش تأسست يالاه 8 سنين دابا باش دارت بلاصتها فالسوق كيما تعرفو حنا كيخصني نربحو Des Projets و كنخدمو عليه على شكل équipe طبعا نتوما المسألة ديال Les marchés et les Projets ماعندكم ماديرو بيها نتوما كتخدمو ف Partie de développement de Logiciel أهم حاجة كيعتامد عليها و أهم ميزة خاصها تكون فصحاب l’info هي l’esprit d’équipe كتخدمو على أساس أنكم شخص واحد و نساو عليا مسألة ديال المنافسة ولا خاصني نبان حسن من كلشي داكشي خليتوه فالقرايا أما دابا غتخدمو كفريق نعرفكوم براسي أنا يوسف Ingénieur d’état et votre Encadrant اللي خصاتكم أنا موجود باش نوجهكم غتدوزو بعدا من فترة تدريب مدة ديالها 4 أشهر غتعلمو خلالها أسس العمل و les logiciels w les Plateformes باش كنخدمو وأي تقصير خلال مدة تدريب يعتبر فيها المتدرب نفسو مامرسمش معانا إستعمال الزمن على الشكل الأتي التوقيت المستمر من 9:00 حتى 16:00 مع استراحة ساعة وحدة من 12:00 ل 13:00 تغداو فيها ولا تنعسو ولا ناقشو ولا شاطيو (العز طالقين الويفي )ماشغلناش مهم فأوقات العمل مانبغي نشوف حتى مخالفة مفهوم بصوت واحد جاوبنا مفهوم يتبع