لاتحكم على شخص وكأنك تعلم عن حياته✋
بعض العيون تبكي دون دموع من ألم الحياة👌
وبعض القلوب مُحطمة دون أن تشكي💔
• إحترم صمت غيرك ❤🌸🌸
...............................
مرت الايام عادية ..... اثير من فترة راحت من عنده حالة القلق
و الذعر اللي جان عايش بيها ....... زينب راحت عند اختها ....ام كمال و ابو كمال سافروا
ظلينا اني ورانيا وهاجر بس
جنت الاحظ القلق على وجه هاجر و تصرفاتها الغريبة و دائما من احاجيها اشوفها تصفن علية و احس اكو عندها كلام تريد تكولة بس متكدر حاولت اجرجرها اكثر من مرة بالكلام بس ماكو فائدة
اجت هاجر حاجتني
هاجر:لمار اختي رنيم اليوم حتجينا
لمار:صدوك
هاجر: ااي
لمار:اسالج سؤال
هاجر:اسالي
لمار:ليش احس رنيم مو طبيعية اكو شي تخاف منه من تجي دائما معتكفة ليش
هاجر:لا ماكو هيج شي يتهيئلج
لمار:لا اني متاكدة .... هاجر معقولة انتي هم راح تصيرين تضمين علية
هاجر:لمار لتحاولين مراح تفهمين حياتنا شنو و اني ما ضامة عليج بس مالج مصلحة تعرفين ااي شي يخص حياتنا مراح تغيرين شي احنا هنا اذا اني او انتي او رانيا مالنا كلمة و بالذات انتي مراح يسمعوج دتشوفينا شلون نختلف عنهم و امي دائما تحجي علينا لان تفكيرنا يختلف عنهم منحب الظلم بس مالنا كلمة خلصوا من رنيم وراح يجي دورنا اني ورانيا...احنا هنا مجرد اصنام مالنا كلمة اذا فهمنا او فهمنا شنو الديصير مو مهم لان بالنسبة الهم احنا مثل الدمى المتحركة هم يحركونا بايديهم وين مايريدون بكولشي يتحكمون بدراستنا وبحياتنا و بلبسنا وبكولشي
......سكتت هاجر و باوعت علية و عافتني و طلعت ...... تركتني بدوامة مع نفسي و مع افكاري اريد اعرف شبيها هاي العائلة ...... كل واحد ورا سر جبير محد يعرفه .....صارلي سنين هنا ومعرفت شبيهم فعلا هم نابذين النساء ..... مافد يوم شفت وحدة عبرت عن رايها غير زينب و ام كمال ..... لا الهن راي ولا الهن كلمة....كل حياتهن يدرسن و ينظفن و يزوجن ويكعدن ويسكتن بس هذا ... ماتذكر بمرة من المرات ....كعدت ويا وحدة من البنات و كالت انه هي عندها احلام و طموحات ..... او كالت اني اريد اصير هيج او اسوي هيج ...... ابد ماعندهن فد طموح...من اسالهن جواب رانيا يكون محير ويزيد من فضولي ....جوابها يكون: ليش لحتى نحلم و نطمح و نتمنى و احنا نعرف حياتنا مو ملكنا اكو اللي يتحكمون بيها
.......واكثر شي محيرني رواسي بنت احمد .....هاي ما الها حس ابد رغم انه هي دائما تساعدني واسمع الكل يهينها و يحجي عليها ليش ماعرف .....دومها حزينة ...... ودومها كاعدة لوحدها ........هاي اكيد بيها شي ....... يعني اللي مثلي كل هالسنين وياهم اكيد تعرف كولشي ....... بس هو شلون اني اعرف وبناتهم اساسا ميعرفن شي .....ليش مدوخة نفسي ..... كلت رائد شلون....شنو مصيره بهاي العائلة .....هم راح يكون مشتت مثلهم ...... اني اختاريت ابقى هنا خادمة في سبيل يبقى امامي ......حتى لو ماربيته بس هو ابني يبقى قطعة من قلبي ...... رائد ابني مايشبه احد بيهم و مايتصرف وياية نفس ماتكولة زينب.....ساعات احس هو حاس بية ويعرف اني امه..... هذا اصعب شعور
......اخذت نفس عمييييق ..... وتذكرت امي ..... الام شئ لا يعوض ابدا الام من اجمل الاشياء بهاي الحياة كل شخص من عندنا يكبر بس مهما كبر بس يبقى هو ذاك الطفل بعين امه و ابوه ..... الام بالذات هي الحضن الامن اللي نختبئ بي من مخاوف هاي الدنيا كولهة .... الام الشخص الوحيد اللي نكدر نكوللها كولشي بدون تردد ..... مهما كان الناس اللي بحياتنا ماكو شخص يكدر يكون بديل للام وحنانها
مهما سولفنا و طلعنا من گلبنا مراح نرتاح الا بالوقت اللي نحجي لامنا بي هنا نحس براحة .....هيج اكون حجيت اللي بداخلي باطمئنان لان الام بكل بساطة هي جزء من اولادها و اولادها جزء منها تكدر تحس بيهم بدون ما يجوها ويكولولها من نظرتهم تعرفون .... الام هي الشخص الوحيد اللي مهما غلطنا بحقه يتغاضى عن غلطنا و يعتبر كانه شئ لم يكن .....الشخص الوحيد اللي من تريده يترك العالم باكمله ويجيك
كل شخص من عندنا محتاج للام ......موت الام هو الشي اللي يخليك فعلا يتيم ..... كولشي مو مثل الام
لو كان عندي ااي شخص يعوضني بحنانها .... العمة الخالة زوجة الاب مهما كانوا كل هؤلاء حنينات مستحيل اكو شي يكدر يخلينا ننسى امنا و مانحن الها ولحضنها حتى لو ما شفناها مالتقينا بيها تبقى هي الام اللي حملتنا 9 شهور و جانت تحس بفرحة مايوسعها العالم بمجرد حركة وحدة من عندنا بداخل بطنها
قاطعني عن افكاري دخولي رانيا للغرفة
رانيا: هلاو لمار
لمار:هلاو حبيبتي
رانيا: عندج شي
لمار: لا
رانيا:اريدج بموضوع
لمار:كولي اسمعج
رانيا: اني اريد اكمل كلية بس اهلي مراح يقبلون شلون اقنعهم
لمار:ومثلا احاجيهم اني واقنعهم
رانيا:لا بس قصدي اريد حل من عندج
لمار:ماعرف تعرفين بية شكد افرح من اشوفكم تدرسون زين كولي لعمج احمد هو متفهم و راح يكدر يساعدج متاكدة
رانيا: لمار .... انتي تفتهمين اني وهاجر شدنكولج احنا بهاي العائلة ماعندنا راي و ماعندنا شي اسمه نطلب اللي نريده ....كل اللي علينا ننفذ اوامر ابوية و عمامي و جدي وبس مانعترض و هم قرروا اني وهاجر ما نكمل كليتنا يعني اعتراض ماكو و مراح يغيرون رايهم
لمار:لعد شراح تسوين
رانيا:مادري بس اريد اكمل دراستي اريد اعيش مثل باقي البنات مو كولشي ينفرض علينا غصب اريد اكون انسانة ناجحة اني مو حيوانة و ماعندي مشاعر عندي طموح وعندي اهداف بس على ااي اساس ابنيها و اني ماكدر اختار حياتي مثل ما اريد ماكدر اعيش مثل ما اريد و من تعترضين ..... الجواب يكون: انتي بنية وااي شي تسوي مايعجب الناس ويحجون بيج راح تكونين جبتيلنا العار .... و احنا عندنا عادات وقيم ثابته منغيرها
لمار:بس هذا جهل
رانيا:هاي افكارهم هم يفكرون كولشي يسووا هم صح و الباقيين غلط
لمار : زين خليني افكر وارجعلج خبر
رانيا:ماشي .... شكرا لمار انتي دتساعديني بالرغم من انه انتي تاذيتي هواي بسبب عائلتي
لمار:العفو حبيبتي وكل اللي صار انتوا مادخلكم بي مو ذنبكم انكم من هاي العائلة
طلعت رانيا وفكرت بكلامها......
((نتعامل مع الناس لشخصهم فقط لا على عاداتهم و لا دياناتهم ومعتقداتهم و لا على اساس العائلة المنحدرين منها ...فمن الممكن ان يكونوا مختلفين كل الاختلاف عن باقي ما حولهم....اذا لم يوافقك الانسان برايك او بمعتقداتك و اختلفتما لا يعني انه جاهل ولا يفهم وانه شخص ليس بجيد و لا انه مجرم لانه لايوافقك برايك او بديانتك بل يعني انه يمارس حريته بكل بساطة دون ايذاء احد تحت مايسمى بالحرية الشخصية و هذا حق من حقوقه لا تستطيع ان تمنعه منها كائن من كنت انت
اما النقطة الثانية في فن التعامل مع الناس ان لا تحمل غيرك ذنب ليس بذنبه و كونه على حال لم يختاره هو ...اذا كنت تكره ديانته او طائفته او عائلته فهذا لا يعني انه مذنب فهو لم يختر حياته و لم يختر قدره و لم يختر ديانته وهويته قدره وحياته هم من اختاروه على هذه الهيئة [عامل الشخص كما يعاملك دون ان تحمله ذنبا لم يرتكبه هو و لم يكن شريكا به عامل بالمثل ]
................
يتبع
