امي تبحث عن عريس

البارت العشرين

مساء الحب 😍

#امي-تبحث-عن-عريس

البارت 20

بقلم ازهار ذابله ..

القصه من وحي الخيال*

ـ هههه هو انتي الج كلمه وياي يا مستفزه نسيتي انتي الي تسميني قزم وانتي الي من تشوفيني بس تهدين بوجهي اني اعلمج منو اني ..
ـ شلون گدرت تاخذ ملفي من الدكتور.. ?
ـ ههههه يعني اتوقعتج اذكه من هيج بهواي ...
ـ بس فهمني ارجوك واني مو ذكيه مجنونه بس گلي شلون گدرت تعرف كل هذا عني ..!
ـ يلا اجاوبج لان اتوسلتي ... تذكرين اخر مره جنتي يم الدكتور واني دخلت وانصدمت بشكلج الـ يله مااغلط المهم هو بعد ماطلعتي اني دخلت من ضربتج تذكرين ههههههه شگد احب ازعجج اي دخلت وشفت محي يظم بالاوراق والتسجيلات وشفته وين ظمهم بس حجيت وياه وشغلته اخذتهم بدون ميحس وشي بسيط كوبي بسيت ورجعت الاصليات وبقوا النسخ عندي ...ترا ترا اني ساحر مااحتاج تصفيق ..
ـ مفتخر بحالك والله اني .....
ـ انتي شنو يروحي انتي مجرد حاجه اني محتاجها بعدين ارجعج لـ حياتج لا تخافين ..
ـ انت مو انسان ومتعرف الله وحرام عليك هيج تظلمني واني جنت الگالك اعذار واگول ميعرفني بس هسه انت تعرفني اكثر مني لازم متتهمني بالانانيه وشوفت الحال وهذه الصفات كلها عندك ..
ـ مو حجيتي اهوايه يلا جاووو ..هههه.

اي يروحي هذا حظج يلا بعد هذا قدري الاسود ..
اسمع الناس راحوا واني حابسه نفسي مااريد اشوف احد اريد اختلي بنفسي وراي ظيم لازم استعد نفسياً الا ولازم اقاوم وماارجع للهروب مااريد اهرب بالحلم هذا الواقع لازم اعيشه اي اني هذا واقعي انين العانس حتتحول الۍ انين زوجة لواء يلا هم اخف من هم ..

فترة الخطوبه كلها اني بس بالبيت وهو يخابر يسم بدني ويضحك ويسد الخط اتعودت ع الوضع وهم لازم نعقد بالمحكمه قبل العرس بيوم رحنا عقدنا واني هم هاي الفتره كلها ماسويت شي كل النيشان اشترته امي وياها شهامه واني ابد ماطلعت وياهم شكد اتوسلن ماقبلت اطلع ع ذوقهن وقياسي يعرفنه وشهامه خطيه تعبت وياي وذوقها حلو كل الي جابتهم نازكين ويناسبوني ...

الحنه لازم اتصير اليوم بس اني گتلهم مااريد حنه وظليت قبل العرس حابسه نفسي بغرفتي وماقبلت اطلع وامي مارادت تجبرني وهي هم المهم عدها باجر الفرج باجر يخلصون من جبل الجليد ويخلصون من وصلة المسح مااعرف فعلا حفتقد رزايل امي اني من هسه افتقدها لعد باجر شلون اوووف يااا ليش ميصير ابطل لو يطلع هذا حلم ..

صار صباح يوم لازم يكون يوم العمر يوم فرح وسعاده يوم اكون بي ويه شريك حياتي الي لازم يكون اقلها يحترمني مااريده يحبني بس اني مو مثل البنات وهذا جزء بسيط من دوري بهاي الحياة وهذا الاختلاف المليار بيني وبين الباقين محد مثلي ماكو وحده هيج انخطبت ولا اكو شخص مستفز مثل لواء اليوم هو اول يوم الي بحياتي الجديده الي ابديها بفستان ابيض وقلب مجروح قلب محطم ومكسور ...
اليوم لازم انسه كل حياتي بهذا البيت انسه حياتي وطفولتي"
طفولتي واني يتيمه وجنت احلم بـ رجل يعوضني هذا اليتم ويكون بعطفه وحنانه الي اب وزوج بس الي صار هو حصلت ع عدو وزوج
احلامي جانت بسيطه جدا حلم كل بنيه هي احقق حلمي ومن اتزوج حته لو مو الامير الي يحمل فردة حذائي ويدگ البيبان ودور عليه ماردت هيج ولا ابسط ولاردت احد يحبني ويعاند العالم وياخذني ردت شخص يحترم مشاعري يحترمني ويقدرني ويكون سندي بالحياة ردت شخص اگدر اثق بي ويكون اب صديق اخ وبعدين زوج ... ردت انسان يشبهني ... ينكسر اذا شاف دمعه بعيني يحزن اذا زعلني ...  يتحملني ويعاملني بالطف
ردت انسان بس مااريد اكثر انعيش بسلام
ونكون متفاهمين بس ... لواء هو الي اخذ مكان فارس احلامي اي هو ميشبه بشي واعرف زواجنا مؤقت بس بنته تمشي وترجع مثل قبل يتركني بحالي ...هم افضل من الماكو اقلها اغير اللقب من عانس الۍ مطلقه .... هاي قسمتي وهذا مجتمعي الي خلاني مجبوره اتزوج شخص اعرف هو متزوجني بس حته ادير بالي من جهاله اعرف محتاجني اساعده بس حته يرجع بنته ويرجع ثقتها بنفسها..
يلا مو مهم اعيش واشوف ..