ساكنة الجحيم 2
يا صاحب الهم إن الهم منفرج
أبشر بخير فإن الفارج الله
اليأس يقطع أحيانا بصاحبه
لا تيأسن فإن الكافي الله
الله يحدث بعد العسر ميسرة
لا تجزعن فإن القاسم الله
إذا بليت فثق بالله وارضَ به
إن الذي يكشف البلوى هو الله
والله مالك غير الله من أحد
فحسبك الله في كلٍ لك الله.
الأنثى : تداوي وهي محمومة ، وتواسي وهي مهمومة ، وتسهر وهي متعبة ، وتحزن مع من لا تعرف ، وتبكي يوم (زفافها) ، فارفقوا بها
روايتي الثانية مختلفة عن غيرها بمضمونها وأحداثها قد تكون جريئة لبعضكم لكن بالنسبة لي هذا لا شئ مما أرويه لكم من حياة بطلتنا مناير وقد قمت بحذف الكثير من التفاصيل لجرائتها وبشاعتها وكذلك اسماء الابطال وتغيير الاماكن للخصوصيه أما بالنسبه لأحداث الرواية فهي حقيقية 100% بدون أضافات احداث خياليه من عندي وعنوانها واضحه عن أي حياة ستكون روايتي اتمنى انت تكون كمثيلاتها تنال أعجابكم.
مناير بنية ذات شعر اصفر وبشره حنطيه وعيون ملونه ورثتها من أمها وكذلك اخواتها واخوانها عدا اخوها الاكبر ورث الشعر الاسود والعيون من ابوهامواليد 1970 عددهم 15 اخوه واخوات تحتل المرتبة الاخيرة من البنات وبعدها 4 اولاد عايشة في بيت لاتشبه البيوت حيث الدفئ والامان والام تكون ربة بيت تطبخ تنظف تربي تخيط تحمي جهالها من الحر والبرد لا .أمي اسمها زهرة متشبهه النسوان بالافعال تقوم باعمال الرجال والضحية أحنا جهالها امرأة قوية جدا لاتخاف ولاتهاب احد كلمتها مسموعه متمشي اذا عصاها مو بيدها اما ابويه رجال بسيط فقير يخاف الله يشتغل عماله يحبنا ويخاف علينا اهوايه عكس امي اللي تكره البنات تحسبهم عار بالرغم تملك 7 بنات وتفضل ولدها 8 علينا شغل وتربية الجهال على عاتق أختي الجبيرة واللي وراها اما امي شغلتها فك عركات والنزاع وضرب أحد اطرافها لصالح الطرف الثاني مقابل الفلوس الناس تخاف منها اهوايه لان صاحبة مشاكل من جوة الكاع اطلع مشكلة وتكبرها ومتفضها الا بترضية مادية انسانة ماديه جدا وبخيلة محرمتنا من كل شي بالرغم هي يوميه تحصل فلوس من ورا مشاكلها ولسانها بس متصرفها علينا تخبيها بس الله يعلم شلون عيشتنا بيتنا شرقي متكون من غرفة نوم وصاله مفتوحه على الحوش ومطبخ ويم الباب موجود الحمام والمرافق اللي مغطيها بطانيه عدنا مشتمل بيها غرفتين مأجرتها امي مستخسره علينا نومه مثل الناس ماعدنا مكان ننام بي واحد يم لاخ مصفطين والغرفه بدون بياض بس بلوك اهوايه ابوية حاول وياها يسويها النا مقبلت علكت سجادات داير مداير الغرفه اللي بيها لوحات بس رايحه لونها لان جابتهم قديمه جنا فرحانين بيها عبالك مرمر مو حايط بالشتا تكون باردة وبالصيف تكوينا كوي بالرغم من هذا ساكتين وراضين اما بالنسبة للاكل فهاي المعضلة الجبيرة ابيتنا ماكو وجبات طعام رئيسيه تمن ولحم او دجاج لا الريوك عبارة عن خبز وجاي واحنا صغار نشرب بواقي الكبار والظهر ثريد بمي البصل اختي الجبيرة تجيب صينيه تخلي عليها جم خبز تقلي بصل وتخلي فوكاها مي حار وشويه بهارات وملح على الاساس هاي مركه وتخليها على الخبز مرات نحصل ناكل مرات لا متكفينا نبقى ناكل خبز وحده وبالليل لو طماطه لو بيذنجان اذا بالصيف اما الشتا باكله او بتيته جنا نروح ناكل يم كرايبنا لو يم الجوارين اما اخواني يضربون الجهال وياخذون من عدهم المصروف وياكلون بيها لفات وحبشكلات اني جنت انتظر اختي سحر بالمدرسة تجيبلي بواقي الطلاب من لفات ونساتل هي اكبر مني بسنه جنت اتمنى أدخل مدرسة مثلها عبالي اروح للمطعم حتى اشبع يوميه ابجي وراها اكوللها اخذيني وياج جنت ماطلع للشارع عكس خواتي واخواني اخاف اهوايه ابقى يم اختي الجبيرة مرات اخويه الجبير اسمه شاكر يدزني اجيبله جكاير ومينطيني فلوس اروح اتوسل بابوالمحل حتى ينطيني لان اذا مجبتله يموتني من الضرب لايشتغل ولا شي كاعد بالبيت يربي طيور فوك السطح ابويه يجي تعبان هلكان من الشغل اعرف اوقات رجوعه نروح اني وسحر ننتظر على راس فرع حتى ناخذ منه كونيه غراضه ونشيله بالكوه واحنا نضحك فرحانين لان يرجع يغسل ويبدل يحجيلنه حكايات زمان لحد ماننام واحنا بحضنه وامي اصلا بس يرجع تاخذ من عنده الفلوس بعد منشوفها تنام بالمطبخ وتسد الباب تكول حتى متجوعون بالليل تجون تاخذون خبز جان ابويه قبل ميتزوج امي يشتغل مأذن جامع بأحد القرى فجدي ابو امي اهوايه انعجب بتربيته واخلاقه انطاه امي هدية هو خجل يكول ماريدها لأن جانت تشتغل فلاحه مطلعه عين اهل القريه من لسانها ومشاكلها جانت يوميه تتصايح وتضرب جم واحد فالناس جانو من الله رايدين يجي احد ويخلصهم من عدها فأبويه المسكين وقع ضحيتها فتزوجها وجابها للمدينه فبدت مشاكل مع اهل ابويه مبقت أحد من اهل ابويه ممسويه مشكله وياه ابويه عنده أخين ابو قابيل اكبر منه وابو نجاة أصغر منه و9 خوات. أمي جابت 3 جهال ورا بعض ابويه عزلها بنالها بيتنا مجانت كامل بس تحمل حتى يخلص أهله من أذيتها فجانت كل سنة تحمل لحد ماصفطتنا 15 جاهل هي عليها بس تخلف والباقي على الله ابويه بسبب معرفته بأمور الدين والشريعه جانت الناس بالليل يجون يمه يستشيرونه فالصاله تنترس منهم يسوون مجلس وامي تكعد براس جلسة وكل موضوع تتدخل بيه بالرغم هي لاتصلي ولاتصوم وابويه ميكدر عليها من فتحت عيني على الدنيا امي لابسه أسود عمري مشفتها لابسه غير لون وشعرها ميبين دايما لافته ومتطلع من باب البيت اذا عصاها مو بيدها هاي العصا اللي تضرب بيه يوميه 5 او 6 نفرات على الاقل بالرغم من نصايح ابويه ميفيد وياها الحجي فابويه شغلته بالليل يستسمح من الناس اللي تضربهم أمي بالنهار جنت اذا اطلب منها فلس حتى اشتري بيها مصاصه لو بسكت طول ذاك اليوم تلزمني وتضربني بحجه ممتربيه فجنت أتجنب أطلب منها أخويه شاكر بس يفتح أيده هي أوتوماتيكيا اطلع فلوس بدون حجي تروح وتجي تكول كلكم تروحون فدوه اله وهو ميفيدها بشي بس طلبات ومرات يجيب شرب يختل فوك السطح لو ميعجبه الاكل هي تروح تجيبله لفات لو كباب واحنا 14 زوج عيون بس نباوع وهو ياكل كدامنا بدون ميخجل واحنا ناكل خبزه وحده اذا طلبنا اثنين ننكتل بالصوندة او بالعصا جنت افرح اطلع ويا ابويا بالليل نروح نزور كرايبنا لو عمامي نروح اني وسحر مرات نتمنى نوصل وقت مايتعشون حتى ناكل وياهم لو يخلون فواكهه احنا نملي جيوبنا وبعدين ناكل وهمه ميحجون يعرفون طبع أمي لان اذا يجون لبيتنا غير المي متقبل نضيفهم أشوف جهالهم شلون أمهم اداريهم أحسدهم أجر حسرات ليش احنا مو مثلهم بكل بيت أدخله أتمنى امهم هي أمي اتمنى أعيش مثلهم حتى لبسي باهت مباقي بي لون عبارة عن دشداشه تكون مخيطه قبل سنين لخواتي حتى تصغر او يصغروها اليه والشحاطه مخيطه من كل ناحيه مرة رحنا لبيت عمي شفت بيد بناته عرايس رجعت حجيت لاختي الجبيرة كالتلي راح اسويلج من القماش فرحت رحت اخذت فلوس من ابويه حتى اختي تشتري صوف تسوي بيها شعر عروستي كملتها اليه كلش عجبتني وفرحتني جنت ماريد انام ذاك الليله اكوم اروح للصاله اباوعلها واحضنها ارجع لمكاني حتى انام الصبح اخويه صاحني حتى اجيبله جكاير مقبلت لان جنت اريد اشوف عروستي لصديقاتي جتي امي وهي داخله علينا تصيح وتغلط على أهل ابويه فأخويه رأسا أشتكى مني كال هاي الممترباية متسمع كلامي فأمي صارت ثور هائج هي واخويه كتلوني كتل كوه اختي جرتني منهم واني عمري جان 5 سنوات اول مشافت بيدي العروسة جرتها مني هي واخويه سووها وصل بالرغم من صياحي وبجي على لعبتي مسمعو مني جنت اتوسل بيهم يعوفها نسيت ضربي ووجعي ردت بس عروستي وجان لازم اعرف راح تنعاد عليه هالمشهد وهاي بدايتها.
