ساكنة_الجحيم
الجزء 15
الکاتبة chra kirkuki
ملاحظات ( أم مناير زهرة توفيت بعد معاناة ويا مرض محد من الاطباء عرف بي شنو 6 اشهر تطلع من جسمها تقرحات ريحته متنحمل خلال هالشهور محد اهتم بيها غير زوجة ابنها مازن اللي ترتيبه بعد مناير رغم الأذية اللي شافتها منها ومن مازن بعد ماتوفت طلقها زوجها وسمر وفوزية أخذو مهرها منها اللي جانت عبارة عن ساعة ومحبس سعرهم ميتجاوز 150000 ألف )
ترتيب الاولاد بعد مناير (مازن . محمد.سلام )
ملاحظة عن خوخة حجيت بيها بالبارت 6
شفت ام خوخة طالعه من خيمتهم وجاية عليه نزلت التنكه من على راسي حتى اعرف شتريد مني
فدوة مناير روحي يم جهالي نايمين شوية وراجعتلج
على وين رايحه بهالصبح
غير علمود معامله المرحوم بلكي يطلعلي شي واستقر اهنا بصراحه ماريد ارجع للعراق
على كيفج وين تروحين وشنو معرفج بالمعاملات اهنا راحت وعافتني تكررت هالحالة عدها بين يوم يومين تروح وتعوفلي جهالها عدها ولد عمره 4 سنوات وبنية خوخه 6 سنوات زوجها استشهد ويا اخويا وهي
تصير من اقاربنا ماعدها احد وعلاقتها باهل زوجها معدومه واهلها عايشين بغير محافظة بعيدين عليها ماعرف ليش مرجعت يمهم اول مااستشهد زوجها جنت استحي اردها وأمي سألتني عليها اكثر من مرة شعندي وياها بالخيمة ومرة بالليل نظفت وغيرت ملابس ابوية كلت اغسلها مجان يجيني نوم طلعت بهدوء دورت على الصابون ملكيتها تذكرت بقيتها يم ريحان رحت شفت شاكر طالع من خيمة ام خوخه بسرعه وراح انصدمت شيسوي بهالليل يمها
رغم الضرب اللي حصلته كل ليلة من ورا امي جنت اخذلهم خبز وطماطة علمود جهالها بس لو يرجع بيا الزمن جنت احركها هي وجهالها بالخيمه ؟
جهزنا البيت اللي جانت عبارة عن شوية غراض مطبخ وفراش ننام بيها اول مقابلة ويا نجاة كلش جانت صعبة حسيت روحي تطلع مني مكدرت ارفع عيني بوجهه لأن خذلته وخذلت نفسي تمنيت يلزمني ويحجي عليه تمنيت اسمع عتاب الهجر والنكران للسنين اللي مرت تمنيت يهزني ويسألني ليش اهواية امنيات تمنيتها بداخلي مصارت لاهو سأل ولا اني تجرئت اتقرب منه رغم عايشين ببيت واحد ميفصل عنا اي فاصل كل ليلة جانت تمر عليه تقلب المواجع اباوع على جهالي اهونها على نفسي اباوع على قابيل اسأله بيني وبين نفسي ليش دمرتني ولا زلت كل يوم تشوفني الويل يمتى ارتاح وياك كل ليلة افكر اغير من نفسي حتى ارتاح وجهالي يرتاحون محمد الأخ الحنون اللي مفارقني كل يوم يمر عليه يشوف طلباتي رغم مجنت اطلب منه شي ومن يستلم راتب ينطيني شي بسيط يفرحني بيها اهواية جان يواسيني ويتمنى يخلصني من حياتي جنت انتظر رجعته كل يوم على نار الوحيد اللي يحسب اني بني أدمه بشر مو وحش مرات يطلعني نروح للسوك جنت احس بخجل من شكلي هو كلش جان حلو ومبين جماله من بعيد البدلة العسكرية مجانت تلوك بس أله يلزم ايديا يكولي لاتنزلين راسج رفعي اني افتخر بيج تزوج من وحدة من منطقة بعيدة ابوها يعرف شاكر هي هم طيبة مثله رغم ميعرفون بعض من قبل بس كل الناس جانت تحجي بحبهم واحترامهم لبعض جانت تحبني من حب محمد أليه وتحترمني كلش لاحظت قابيل متغير لبسه وشكله يهتم بنفسه اهواية ويوميا يغسل وفرحان ويغني ويجيب انواع اشكال فواكه وأكل مرة طلب مني اخذ فواكه لبيت نجاة خفت لايختبرني سويت نفسي طبيعية ودكيت عليهم باب الغرفة هو فتحه انصدم من شافني مقبل ياخذ مني الماعون بحجة عدهم رجعت هو التهى ويا التلفزيون منتبه عليه من رجعت حضرنا نفسنا نروح لبيت اقاربنا لو خواتي كل ليلة نتعلل يم واحد بيهم لو همه يجون بس بيت فوزية اضوج منه لان تكعد تتعارك وتتجادل ويا جهالي محد لازم يمس جهالها بكلمة كدام قابيل تسكت من يلتهي تكوم تحجي عليه وسمر بالاسبوع مرتين تخابر قابيل نروح يمها حتى تخوف بيت عيالها بقابيل تعودت خوخه تجي يمنا بالليل بعد ماينام نجاة لان يروح للشغل ساعة 5 الصبح يرجع وقت المغرب يغسل وينام من التعب يشتغل عماله بأجور يوميه تكعد تحجي ويا قابيل أخذها بصفحه تكعد ويايه تضوج جنت احسبها بعدها خوخه ام 5 الاعوام الطفلة الصغيرة اللي جنت اعتني بيها من امها تعوفها يمي وتروح قلت زياراتنا للأهل بالليل من وراها انتبهت عليها من تجي تلبس ملابس ضيقة كلش وتتعطر تفتح شعرها نهاية ظهرها نبهتها مرتين ثلاثة غشمت نفسها اليوم اللي تتأخر بي قابيل يرسل البنات عليها مرات نطلع تطلع ويانا انقهرت عليها لان ماعدهم سيارة ونجاة ميكدر يطلعهم غير يوم الجمعه جانت تشتكي من بروده استغربت واني اشوفه شلون يعاملها بحنية مثل بناته ميعتبرها زوجه هلكد مازين وياها اول مايرجع للبيت يخلي الفلوس بيدها نصحتها اهواية معرفت لشنو تريد توصل قابيل صار بالليل مينام بيده التليفون مجنت اعرف شيسوي بي سألته جاوبني يحجي ويا اصدقائه قبل جنت اتوسل بي ننام بغرفة والجهال بغرفة ثانية ميقبل فجأة قرر ينام هو وحده زوجة محمد أخوية صارت حامل اني فرحت اكثر منهم شاركتهم كل لحظاتهم الحلوة من تحضيرات وتجهيزات وصلت للشهر السابع بنى بيت صغير براتبه اهواية تقصد بالمصاريف حتى يعزل لان ساكن ويا فوزية جان يشتكي من تصرفاتها ويازوجته كمل الهيكل بيوم أسود يمكن أسود من ليلة زواجي بقابيل وصلني خبر متصاوب و مجروح بالمستشفى ركضت بلا وعي وركبت سيارة قابيل جسمي كله يرجف ومو مصدكه اليوم الظهر قبل لايروح لبيته مر يمي وسأل عني سمر مسوية عملية لظهرها وجديد جاية من الموصل اتفقنا بالليل نروحلها سويا مجنت اسمع قابيل شنو يحجي ولا صوت التليفونات اللي متسكت وصلنا للمستشفى شفت اقاربنا متكومين يم الطب العدلي رجليه انشلت مو مستوعبة هديت نفسي اكيد جرح بسيط وهو بالطوارئ كل ماامشي خطوة اتخيل أشوفه ويضحك على خوفي عليه ويقلدني لحد ماتلكوني النسوان وهمه يلطمون لمحت زوجته اللي بطنها كدامها وشعرها طين ومخرمشة خدودها وسما ونزيهة واكعات بيد النسوان ويصيحون كل هذا كابوس مو صحيح شاكر واكف متأثر ويسكت خواتي ماتحمل هالفاجعة ياربي ليش اني من بين كل الناس انحرم من الراحه والسعادة حتى الفرح عندي صاير أيام محدودة وينتهي كل الالم اللي شفته بحياتي ميساوي ربع اللي حسيت بي من سمعت صوت النسوان وهمه يواسوني بوفاته لحد الليل مفتهمت شلون مات بعد ما فرشو ننام تذكرت هو مو بالواجب شلون مات شلون انقتل كومت نزيهة بصراخي وسما فزت وياها سألتهم باوعولي مصدومين من سمعت سبب وفاته تمنيت مسألتهم وظليت على حالتي ضربت وجهي بقوة ردت اذاني متسمع شي بعد مازن قتل محمد اخوان يقتلون بعض شلون كدر يغدر بأخوه وين فوزية سبب البلاوي كمت ادور عليها شلون نسيت اني مشفتها اليوم نسيتها من الصدمه عرفت مشاكل فوزية نهايتها مو زينه متصورت توصل لحد تحرض الاخوان يتقاتلون أصرخ وادور عليها مثل المخبلة ردت بس المحها واقطعها بأيدي بعد ماسوت المشكلة هربت هي وجهالها وزوجها سألت على مازن محد عرف وينه يعني شنو هرب واحنا نسكت شاكر لزمني وجرني هددني اسكت لاول مرة خليت عيني بعينه بتحدي وبدون خوف جاوبته متعود على القتلة وشلون تحميهم حتى لو أخوك تعودت شاكر الضعفاء يروحون ضحية مثل ماسويتها بيا راح ترجع تسوي بمحمد المفروض تسلمه للشرطة بيدك مو تهربه ظل يصيح سكتي ومتعرفين شي لا انت تعرف شعور القاتل مجرب مسويها اهواية اسهل شي يمك
ملاحظة الحادثة شلون صارت ( فوزية ومحمد عايشين بنفس البيت مأجرين أثنيناتهم فوزية معروفه بلسانها الطويل والمشاكل زوجة محمد منظفة البيت والحوش وقت الظهر داخلة لغرفتها تستريح فوزية مصيحه عليها وهي ممجاوبتها تعودت عليها رغم الغلط والفشار محمد نايم ومازن جاي يم فوزية هي داخله على مازن محرضته وانه زوجة محمد تأذيها ومحمد ميحجي ساكت عليها ممتحمل سوالف اخته على زوجه اخوه مصيح على محمد بنص الحوش ضاربه وغلط وفشار على زوجته وهو مجاوبه عيب هالحجي وظل يحجي بسوالف فوزية وميصدكها فوزية داخلة بيناتهم لمح مازن سلاح محمد راكض عليه ضرب أخوه 5 طلقات بصدره بنفس اللحظة متوفي حسب كلام زوجته من طلعت روحه عينه جانت عليها وعلى بطنها ).كل هالشي سوته فوزية علمود مرت محمد ممنظفة كدام الباب
مرت الأيام وزوجة محمد جابت ولد كلهم راحو يمها مكدرت اروح وياهم تعبت من مرض الشقيقة اللي صار بيا بعد محمد أكثر شي استغربت منه قابيل مخليني على راحتي وميطلب مني شي ولا يحجي عليه بيوم فزيت من صوت صحاني من النوم كمت ماكو شي طلعت اغسل وجهي الدنيا بعدها ظلمه سمعت صوت همسات يجي من الحمام كلت اكيد اتخيل فتحت باب غرفة قابيل مموجود رجعت لغرفتنا اني والجهال كلت ويا نفسي قابيل رايح وهذا صوت خوخه ونجاة تمددت مرتاحيت باوعت على الساعه 6 وربع نجاة مستحيل يكون بالبيت هالوكت كمت وفتحت الباب لمحت خوخه وهي تطلع من الحمام بسرعه بأتجاه غرفتها ردت اقفل الباب وارجع خفت لايطلع نجاة عيب منه طلع قابيل من شفته حسيت نطقي راح هجمت عليه من دخل لغرفته وبديت ألطم ملكيت غير هاي تلعب بيها متستحي انت شنو
كلمة زايدة اذبح جهالج وانتي لسانج أكصه اني احبها وراح تسكتين اذا مو بكيفج غصبا ماعليج
شفته يطلع سلاحه وسكين ويمشي بأتجاه الجهال وهمه نايمين توسلت بي ميسويها ضربني ودخل للغرفة جر وحدة من البنات هي فتحت عيونها بخوف طلعها برا الغرفة وقفل الباب على الباقين مددها يذبحها وسط صراخها وصراخي طلعت خوخه وهي تسرح شعرها بكل وقاحه بالكوة طلعتها من بين أيده وخليتها بحضني حلفت مااحجي شي واسكت خوفا على جهالي.
