ساكنه الجحيم 6
أستقرينا تقريبا بأيران جنا قريبين من على الحدود العراقية سكنا بالخيام المعاناة زادت المي لازم نوفره بنفسنا والمساعدات متوصل اهواية بسبب الازدحام وكثرة النازحين نضطر ندخل للقرى القريبة منا ونطلب منهم أكثريتهم متعاونين ويساعدون وأكثريتهم يتذمرون جنت احس نفسي مكدية واخجل بس شسوي لازم نعيش كلبي جان ينزف ويا كل لحظة اشوف بيها نجاة وهو يجي يطمن على سمر واشوف نظرات الخوف والقلق بعيونه وهي تمثل كدامه مابيها شي من تشوفه تدخل بالفراش كأنه هسة راجعه من الموت ومن هو ماموجود مثل القرد تكمز وتروح منا ومناك تمنيت مرة يشوفها على حقيقتها ويعرف هي متحبه ومستغلته ويا أمي اي شي تريده تطلبه منه يجيبه الها حتى يضطر يروح مشاوير علمودهم ولا يسمع منهم كلمة شكر حتى مشاوير وطلبات بيت شاكر هو يجيبه شاكر جان يطلب من امي توفرلهم حليب وهي تكلف نجاة بي ولدت ريحان وجابت بنية وصارو 3 ليلتها امي منامت من القهر كعدت برا الخيمه للصبح تدك على رجليها وتنعي عبالك شاكر ميت مو مخلف صرنا نتبادل ويا خواتي نروح نهتم بريحان وبالطفلة رغم مجنت احجي وياها من قبل بسبب اسلوبها واستفزاها بس هالمرة هي تغيرت عرفت ميفيدها شي بيوم من الايام الدنيا بردت طلعت الفجر حتى اوكف بالسرة اجيب مي حتى نسوي فطور المي يبعد مسافة عنا شفت مجموعه من الشباب واكفين نزلت راسي مهتميت سمعتهم يعلقون على جمالي رغم اني ابد مجنت اشوف نفسي جميلة واصلا منين اشوف الجمال ياحسرة من داخلي فرحت كأي انثى من تحس نفسها مرغوبة من قبل الجنس الأخر بعد مافقدت الأمل بنجاة ومعدت افكر بي ومن اشوفه اهرب لو اغير مكاني بطريقش الرجعة شفت ام خوخة طالعه من خيمتهم وجاية عليه نزلت التنكه من على راسي حتى اعرف شتريد مني
فدوة مناير روحي يم جهالي نايمين شوية وراجعتلج
على وين رايحه بهالصبح
غير علمود معامله المرحوم بلكي يطلعلي شي واستقر اهنا بصراحه ماريد ارجع للعراق
على كيفج وين تروحين وشنو معرفج بالمعاملات اهنا راحت وعافتني تكررت هالحالة عدها بين يوم يومين تروح وتعوفلي جهالها عدها ولد عمره 4 سنوات وبنية خوخه 6 سنوات زوجها استشهد ويا اخويا وهي
تصير من اقاربنا ماعدها احد وعلاقتها باهل زوجها معدومه واهلها عايشين بغير محافظة بعيدين عليها ماعرف ليش مرجعت يمهم اول مااستشهد زوجها جنت استحي اردها وأمي سألتني عليها اكثر من مرة شعندي وياها بالخيمة ومرة بالليل نظفت وغيرت ملابس ابوية كلت اغسلها مجان يجيني نوم طلعت بهدوء دورت على الصابون ملكيتها تذكرت بقيتها يم ريحان رحت شفت شاكر طالع من خيمة ام خوخه بسرعه وراح انصدمت شيسوي بهالليل يمها وريحان كلش حريصة على وجوده يمهم بالليل متقبل تطلع بحجه تخاف وحدها كومه اسئلة جانت ببالي نسيت اللي بيدي ورجعت انام سمر ونزيهة بعدهم يحجون ويعلقون واني عقلي يم المنظر اللي شفته تقربت منهم اسمع يحجون على سوالف البنات يسالوني اجاوب باي او لا اصلا بس جسدي وياهم الصبح شفتها جاية تسلم على ابويه وباست ايده لان تكوله عمي وابوية يحب جهالها اشرتلي اطلع برا الخيمه حضنتني وخرتها شكو شتريدين بعصبية
