#ساكنه الجحيم8
مرارة فقدان الوالد متنوصف أسبوع كأنه قرن الليل ماتخلص مكانه وفراشه شلون بلحظة راح واختفى كل يوم نكعد الناس تعزينا اني اضرب نفسي بلكي يطلع حلم لحد ماكملنا الاسبوع شاكر دزلنا خبر نروح لأربيل حتى نكمل الفاتحه يمه ويسويها بين الناس اللي متعرف عليهم اهناك أمي أخذتنا وياها رغم اعتراضنا لان هو السبب بموت أبويه بالكراج سوت هوسة وفضحتنا ويا السايق على اساس احنا أيتام صعدنا بنص الطريق قبل لانوصل لسيطرة اربيل لازم نركب سيارات حمل الكبيرة لان ممنوع سيارات غيرها تروح بأمر من الحكومه البهذلة اللي شفناها متنوصف ناس راكبة على ناس ختلت نفسي بزاوية بعيد عن امي لاتبدي تحجي مواويل احنا ايتام والناس تنقهر وتتصدق علينا أخواني الصغار تاخذهم تكعدهم بصفها علمود تكمل المشهد الدرامي مال المتسولين وفعلا اي واحد يشوف اشكالهم وملابسهم الوسخه والقديمه يصدك وصلنا شاكر عايش بالخيام مثل أكثرية الناس العيشة صعبه عدهم كلش سبحان الله جان عنده بيت وسيارة وفلوس وبناته باحسن المدارس بس خسر كلشي بلمح البصر وهسة وين عايش كل هذا حوبة ودعاء ابويه علي بعمره مجان راضي على سوالفه تلكتنا ريحان وهي تبجي ولابسة اسود تمثل احسن من شاكر اللي مكلف يطيب خاطرنا بكلمه راسا اخذ امي وراحو بعيد عنا بقينا ايام يمهم الفاتحه جانت ببيت عمي احنا البنات مرحنا بقينا بالخيمه ويا بنات شاكر قبل لا نرجع كعدنا كلنا وبلغ امي تبيع بيتنا ونعيش وياهم نشتري بيت بأربيل امي لاول مرة مااقتنعت بكلامه بس هزت راسها وهو يهدد ويتوعد اذا موفرناله فلوس يطلع من هالمكان يحرك الدنيا على راسنا رجعنا مكسورين الخاطر اكثر سمر رجعت للزرع واني قررت اشتغل بالبيت جنت اسوي شراب مصنوع من اصباغ وليمون دوزي وشكر واخليها بأكياس اجمدها واخويا المريض يبيعها لو اسوي محلبي يوم يرجع ايراده زين وايام يتمرض منحصل شي غير صياح وعياط ويا أمي خلتني ارجع للزرع غصب وسكنا عائلة يمنا حتى نستفاد من ايجاره حسب حجي امي بس طلع الايجار كل راس شهر تدزه لشاكر سمر طورت علاقتها ويا المؤجرين اكثر من مرة لمحتها من يجيهم ضيوف تروح يمهم وبدت تتعاجز عن الشغل متجي ومن يجي نجاة من الباب امي تاخذ منه الغراضه وتصرفه رجعت يوم تعبانة من الحر والشمس شفتها من بعيد واكفه ويا سيارة برازيلي حمره جان موديله بذاك الوكت تضحك وتسولف سرعت خطواتي لحد ماوصلت يمهم شفته شاب مرتب مركزت زين عليه ردت ابين الها اني معاجبني بس هي عينها قوية وقحه عرفتني عليه كأنه تعرفه من سنين افتهمت هذا الضيف اللي يكون من اقارب المؤجرين مالتنا تكررت هالحالة متحملت واجهتها جاوبتني بكل عين
طلبني وراح اتزوجه عندج مانع
تخبلتي ونجاة وموت بابا يازواج مر على وفاته 3 اشهر ماعندج شعور واحساس
نجاة خلي الج من زمان انتي عينج عليه تردين ابدل الفلوس والجاه والنسب بواحد مثل نجاة يع ليش ماعندي عقل هذا عنده فلوس يشتري عشيرة نجاة بيها وراح اتزوجه وامي موافقة
