ساكنة الجحيم 3
عمري صارت 6 سنوات فرحتي متنوصف لان واخيرا راح ادخل للمدرسة اللي ياما تمنيت ادخلها واتعلم واروح واجى ويصير عندي صديقات وغراض مثل سمر كومة احلام بمخيلتي للمدرسة بدت التسجيل أخذت صورة يم المصور اشكد جنت فرحانة وهو يكولي وجهج كلش حلو مال تصوير وبالأخير امي تعاركت وياه حتى متنطي فلوسه وتصير بلاش جنت امشي وراها واني اشوف الجنط والدفاتر والاقلام من جامة محلات القرطاسية واوكف اتخيل ياوحدة راح تشتريلي لان ابويه منطيها فلوس وصلنا يم الاقمشة واني اتلمس بيها واشمها رغم ريحتها مو طيبة بس عقلي يترجم غير أشياء لفينا السوك لحد ماحصلت اللي تريده أمي شي رخيص والاحذية اللي تلمع لبستني جم وحدة وكل القياسات جانت أكبر من مقاس رجلي جنت مستغربة واكوللها جبيرة تسكتني اختارت وحدة البائع خلاها بعلبته وبكيس حلو اخذته منه وهو يبتسم لي ورديتها بابتسامه اكبر جنت احس كلبي راح يطلع من مكانه واتمنى اوصل للبيت حتى اشوف لخواتي الغراض اللي اشتريته لحد ما سمعت امي تتعارك ويا ابو المحل
اسمعني لا عبالك اني من النسوان اللي يجون يمك ويدفعون اللي تريده ترى اني هذا اللي عندي ترضى اهلا وسهلا مترضى هسة افضحك بالشارع واكوللهم تحارش بيا
حجية الله وكيلج هذ المبلغ متسوى ربع سعرها وعيب هالحجي احنا ناس متربين واذا ماعندج اخذيها بلاش
جان يحجي وياها بقمة الهدوء وهي صايرة نار تريدلها عركة طلعنا بعد مشاحنات طويلة بالمحل واني لازمة الكيس بكل قوتي وهي تجرني جر وراها الطريق يبعد عن بيتنا مسافة ساعتين بالمشي ونص ساعة بالسيارة بس هيهات امي تركب سيارة وتدفع فلوس كل مانمر يم محلات الاكل واشوف الناس اتخيل نفسي كاعدة وياهم باوعت على امي وحجيت وياها بتوسل حتى تشتريلي لفة لحم او لفة كباب بالاخير رضت تشتريلي لفة فلافل من اخذته راسا اكلتها من الجوع رزلتني لحد ماوصلنا للبيت عطشت اخذت صوندة من الشارع وخلتني اشرب منه المي جانت حار عبالها مااكل اللفة وابقيلها النص دخلت للبيت بفرحة راسا سمر اخذت الكيس مني وراحت تجربها واني ابجي واكول لاتلبسيها راح تخرب وتكبريها اكثر سمعت ضحكتها الشيطانية
هاي اليه مشتريته مو الج اشكد ثولة وغبية مبينة مو بقياس رجلج مو صح ماما
اي وانتي مناير اخذي غراض اختج وسكتي ومن يرجع ابوج تكوليله اشتريت وتسكتين اي حجي زايد متكولين سمعتيني والا احركج حرك هسة
لا حرام هاي اليه ملابسي وغراض سمر ماريدها قديمه سكتتني براشدي خلت راسي يفر فر تمرضت من قهري بقيت اسبوع بالفراش حرارتي ارتفعت رغم جنا بموسم الصيف ومن يسألني ابويه اجاوبه مابيه شي بدت الدوامات جنت اشوف البنات انقهر لبس مرتب وحلو وريحه طيبة واني متبهذلة اللبس واسع عليه والحذاء باهت لونه وريحه التايد واضحه من بعيد شعرنا منغسله بغيره بالأسبوع مرة بالصيف وبالشتا مرة أسبوعين لان المي بارد واحنا ماعدنا سخان خواتي الكبار اذا صار عدهم وهس يغسلونا وياهم من يسخنون الحمام المعلمات دايما يشتكون من القمل اللي منتشر براسي لاول مرة عرفت هالشي عيب وميصير كل مرة يدزون ورا امي متجي أضطريت اخذ أختي الجبيرة مكلتلها على شنو يردوها خفت متجي مثل أمي كل فترة ينطوني انذار وأحجيلهم بالبيت محد يسمعني احلى شي بالمدرسة سمر تشاركني اللفات والأكل اللي تسرقه من جنط الطلاب تعودت أكل وياها مجنت اعرف ميصير لو حرام جنت دايما اطلع اخر وحدة من الصف حتى الكي قلم لو بقايا غراض وأخذها اليه صار مودة الاسواق المركزية أمي تاخذ خواتي وتروح توكف بالسرة علمود تحصل غراض وتبيعها أختي اشترت مكينة وكعدت تخيط امي تاخذ منها الفلوس اول شي خيطته صدرية اليه وقميص من فرحتي نمت بيهم خفت لا امي تروح تبيعهم كملت الاول ونجحت ماعرف شلون لان ماكدر اقرا بسبب طلبات أخواني ابويه صحته تعب مو مثل قبل جان بس يرجع ينام لحد مايطلع الفجر يصلي ويروح للشغل حسيت بفقدانه وأسوء شي من جان يتعب بالليل ويصيح على خواتي اني اكوم اركض وياهم اخذله مي حتى روحاته قلت لبيت اخوانه وأقاربه بسبب التعب بيوم من الايام صعدت أنشر ملابسنا بعد ماغسلتها اختي سمعت صوت من جهة اللي صايرة مقابل تنكي المي همسات على ضحكات والحمام تطير على راسي مسويين هوسة شفت شاكر ويا وحدة مركزت منو هي من الخوف نزلت جوا واني ارجف منتظرة بأي لحظة يجي يضربني صارت سمر بوجهي وهي تسألني شبيج اريد احجي اخاف باوعت جهة السلالم كأنه فهمت السالفة
شفتي شاكر ويا ريحان مو
هزيت راسي بأي
وليش خايفة بالعكس هذا سلاح نهدد بي أمنا وشاكر متشوفيهم شلون يحبوني وميرفضولي طلب
مفتهمت حجيها شنو اهدد غير يقطعوني جنت انتظر جيت نجاة ابن عمي ويا ابوه لبيتنا بفارغ الصبر لان يتشاقى ويايه ويلزم ظفيرتي ومرات خدودي جان شعوري حلو من يكولي اشكد حلوة مناير عيونج الملونة عبالك زجاج لو بشرتج الصافية هنياله اللي ياخذج مجنت اعرف هالكلام شنو معناته بس اضحك وانزل راسي
