#حفيدة_السلطان

البارت الاول

#حفيدة_السلطان
بقلمي فردوس عبد اللطيف
البارت الاول (القصة حقيقية )
بسم الله الرحمن الرحيم
اليوم قصتنا مختلفة راح نرجع شوية للتاريخ
من وصلتني القصة من صاحبتها وفهمت ان البطله حفيده احد السلاطين العثمانيين الى عحكموا العراق حاولت اركز ع تاريخ العائلة وبنفس الوقت هي تركز ع قصتها والظروف الي عاشتها لذلك بحثت عن اسم هذا السلطان ووجدت تاريخ حكمه وتأكدت من بعض النقص ومع هذا اعذروني اذا اكو ثغره لان هذا تاريخ اجداد وسلطة وحكم وصعبة الحصول ع معلومات دقيقةاسم السلطان ...
أرسلان بن نوغاي باشا ....
هو الوزير والوالي العثماني الذي تولى الحكم في بلاد الشام وفي ولاية بغداد في عهد الدولة العثمانية، وكان رجلا عادلا عاقلا، وله منجزات عظيمة وساهم في بناء الكثير من المساجد ومنها جامع أرسلان باشا في اللاذقية في سوريا.
وكانت فترة حكمه لولاية بغداد ستة أشهر، وأصابهُ مرض في بغداد وتوفي على أثره عام 1060هـ/1650م، وشيع بموكب كبير ودفن في مقبرة الخيزران بجوار مرقد الإمام أبي حنيفة النعمان تحت قبته.[1][2]

ارسلان باشا او اصلان معناها باللغه التركيه الاسد الشجاع
اما بالنسبه لحكمه في بلاد الشام وبغداد كان رجل عادل وعاقل
عن حياته تزوج وصار عنده بنت وحيده وسجل كل املاكه لبنته حتى اخوته ماياخذون ورثه وسجله الى ذريتها اللي هم حاليا مايقرب /200/او اقل وريث
املاكه بالاعظميه نادي الاولمبي
بستان ساحة عنتر الى الجسر
مديرية الرصافه حاليا كلية العلوم شارع المغرب لكن باعو الورثه بساتين بديالى
وباقي الاملاك بقت ملك للورثة منطقة الكراده خارج وعليها بعض الدوائر الحكومية
ترجع ملك للورثة
يارا ....جدي من عائله غنيه بشكل متزوج وحده بس اولاده علي الدر. وعلي الكرار اسماء مركبه وعنده بنيه وحده اسمها ريمه الكرده واسم كرادة مريم اصلا ع اسمها ريمه وع اسم الكنيسه اللي هي بالاصل الهم تزوجت ريمه وخلفت بنات اثنين البنات الاثنين اخذوهن اخوه والاخوه يعتبرون اجدادي واحد جدي تزوج مله زهور اللي هو اسمه احمد بن حسين بالنسبه
كرادة مريم املاك مبنية عليها معامل تابعه للدوله ماتتقدر بثمن مليارات وهذه الاملاك
كانت الدوله تعطينا ايجارات لاستخدامها أملاكنا لكن بمرور الوقت تغير كولشي

++++++++++++++++++++
مرحبا اني يارا مواليد 1980
راح احجيلكم عن عائلتي
والدي الي هو حفيد مله زهور بنت ريمه
عنده 8 اخوان واحد استشهد واثنين توفو ا بسبب الشرب صار عدهم تشمع بالكبد
اما الاثنين الي توفو بعمر عشر سنوات
ذولي توفوا بسبب الحسد لان بالبداية ومن لسان بيبي مامخليتهم يطلعون من هما صغار لان تخاف عليهم من الحسد بسبب جمالهم وشكلهم الملفت للنظر
بس يصير عشر سنوات يحب يطلع يشوف الاطفال وبسبب جمالهم تصيبهم عيون الحاسدين ويرجع للبيت ينام وما يكعد
وخسرت بيبيتي اثنين من ولدهه بسبب الحسد
+++++++++++++++++
محمود احمد بن حسين والدي ....
تخرج من كلية الهندسه درجة ذكاءه فوق المتوسط وتعين ضابط ومشغل رادار بالقوه الجويه ودوامه بالكوت
غادر بغداد متوجه لمحافظه الكوت للمباشره بعمله
حجية نرجس ... خوي محمود مثل ما اتفقنه احنا حجزنالك بنت عمك زمزم وره كم شهر نزوجكم ونفرح بيكم
محمود ..حجية اني مارايدهه ولا احبها وانت تعرفين هذا الشي واني الي اختار الانسانه الي راح اعيش وياها
نرجس ..شنو تريد خيرنا يروح لغيرنه وزمزم تتزوج غريب وانت تاخذ غريبه والفلوس تتبعثر
محمو د اختي هذا عمر راح أعيشه اشلون اعيش ويه وحده اعتبرهه مثل اختي علمود الفلوس ؟
اني حا اداوم والله كريم وهذه حياتي واني حر بيهه محد وصي علي
محمود ..طلعت من بيت والدي واختي واخوتي ماعجبهم كلامي بس عبالهم راح ارضخ لإرادتهم
بعد ما التحقت بدوامي بالكوت تعرفت على اصدقاء وبديت احاول انسلخ من عائلتي الي همهم الوحيد هو الورث والأملاك واسم العائله وجدنه الملك هذا كل الي يهمهم ولازم اتزوج وحده اصلها من الملوك
كنت راجع من دوامي وكنت أسوِّق بس سارح وأفكر ...طبيعتي من اسوق اسرح بتفكيري وأنسى كولشي حتى الطريق الي امشي بي يتخيلي هذه اول مره مشيت بي لحد ما اصفن واسترجع ذاكرتي واتذكر الأماكن وانتبه للعلامات الي بالشارع
لفت انتباهي مدرسه تعبر الطالبات وتاشر للسائق اوكف الطالبات مبين عليهم متوسطه
وهي مبين عليها مدرسه لفت انتباهي شكلهه غريب ما اعتقد من هذه المنطقة
جمال هادئ لَبْس وقور وشخصية قويه
اكو شي جذبني بهذه البنت
وكفت خليتهه تعبر وقررت امشي وراها واشوف وين تروح
فعلا بقيت واكف وانتظرهه تمشي وكان معاها كم طالبه لحد ما كل وحده تروح لبيتهه وبقت تمشي وحدهه واني وراها تركت السياره على جانب الطريق
لحد ما اندليت بيتهم وتراجعت بدون ما اخليهه تنتبهلي لان هذه منطقة بيهه عشاير
ولازم نحترم عاداتهم وتقاليدهم
اليوم الثاني .. الصبح رحت للدوام عندي ولد موظف قريب ع بيت البنت حاولت اسأله بس مكدرت اركز بس الي فهمته منه
ان بيت اهلهه يصيرون اقارب شيخ (...) من ربيعه وهي واختها مدرسات وعايشين مع امهم
بقيت أتردد لو يم المدرسه وانتظرهه تطلع حتى امشي وراها لو انتظرهه يم البيت والحكهه بقيت تقريبا شهر واني على هالحال ..لحد ما فد يوم اخذت اجازه وسافرت لبغداد يم اهلي بقيت تقريبا اسبوع وراها رجعت كبال المدرسه واكف انتظرهه مثل المراهق الي ينتظر حبيبته
الطالبه ...لكن احنا كبار وناضجين بس لازم اعرف عنهه كولشي
من طلعت من المدرسه وشافتني واكف ابتسمت
من شفت ابتسامتهه ضحكتلي الدنيا ويه ابتسامتهه ردت اطير واروح احظنهه بس لازم احافظ ع سمعتهه
مشيت وراها لبيتهم وهي تلتفت وتبتسم
تجرأت واني كلبي يدق سريع وخجلان صحيح بالكليه ويانا بنات واحجي وياهن
لكن هذه غير ....الموضوع مو كلام عادي
محمود .. مرحبا
فائزه ... مرحبا
محمود .. عندي موضوع خاص احب اكلمج بي
فائزه ..تفضل
محمود ..بالشارع صعب
فائزه ..طيب وين تحب ؟.....وهي تتكلم والخجل باين ع وجها
محمود ..ممكن تتفضلين باجر نطلع بالسياره ربع ساعه
فائزه ..وين نروح
محمو د .. لاتخافين بالشارع نفسه
فائزه ..اوك ماكو مانع
محمود .. باجر انتظرج الصبح اجي من وقت قبل الدوام بنص ساعه
فائزه ..هزت راسهه بالموافقة
اليوم الثاني
محمود ..كعدت من وقت وتحضرت حتى التقي بحبيبتي
رحت قبل الموعد بربع ساعه وكفت السياره براس شارعهم واني انتظر حبيبتي
فائزه ...كعدت من وقت لان الشخص الي يلاحقني والظاهر هو معجب بي وخلاني انعجب بي لان شكله وترتيبه مختلف شاب مرتب وأنيق وشكله حلو ووسيم
يحمل جميع مواصفات فارس الاحلام واني اعرف احافظ ع نفسي يعني اذا تجاوز حدوده اكيد اضربه بالشنطه اليدويه وانزل من السياره
طلعت من بيتنا وامشي وأتلفت لا احد يشوفني لحد ما وصلت راس الشارع وشفته واكف وكاعد داخل سيارته والجو برد لزمت يده الباب مثلجه هو مد ايده وفتحلي الباب
فائزه. صباح الخير
محمود ..صباح النور
شغل السياره وانطلق
محمود ..اشلونج ست
فائزه ..الحمد لله اني زينه
محمود .. اكيد انتبهتي علي ملاحقج صار فتره
فائزه اكيد والي زاد فضولي انو انت ماتحجي بس تلاحقني ومبين عليك تختلف عن الاخرين
محمود ..يابنت الناس اسمعيني اني اريد ادخل لبيتكم من الباب مو من الشباك
اني مهندس اشتغل بالقوه الجويه اتقن اللغه الانكليزية والروسيه
اسمي محمود بعد شتردين تعرفين عني
فائزه .. مو اني اكيد اهلي من راح تخطبني حايسالون عنك
محمود .. اليوم العصر اجي اخطبج
فائزه ..واهلك
محمود ..اهلي بعد ماتوافقون أجيبهم
فائزه ..اليوم ابلغ اهلي وننتظرك
+++++++++++
الساعه السادسه عصرا
محمود ..السلام عليكم
ام فائزه ...تفضل ابني
محمود ..خالتي اكيد فائزه انطتج فكره عني وعن سبب جيتي
ام فائزه ..نعم ابني بس انطيني مهله اسال عليك
محمود ..اخذووقتكم ...هذا رقم تلفوني بالبيت ورقم شغلي (قبل تلفونات ارضي )
+++++++++++++
يمكن اني خطيت خطوه سريعه احتمال اهلي ميوافقون يخطبولي بنت غريبة مو من عائلتنه المالكه ويمكن حا يحاربوني لكن القلب وما يختار وانوب بنت عمي زمزم الي بكيفهم حجزوهه ..
++++++++++++++++
ام فائزه ...بنتي فائزه الولد مبين غريب احنا مانريد نستعجل ونبلّغ عمج الشيخ خلي اوصي خالج يسال ع محمود بالدائره هنا ويروح لبغداد هم يسال ع اهله
فائزه ...يمه اشو يكول جده جان ملك مدري وزير بزمن العثمانيين
ام فائزه ..من هاي شكله يشبه الأتراك اكول هالبياض ماعدنه بالعراق انوب هدومه عبالك توه مشتريهن الكسره مال بنطرونه عبالك توه ظاربه اوتي والحذاء يلمع
ولج عبالك ممثل وين لكيتي
فائزه ...ها حجيه اشو يبين عجبج
ام فائزه ..يمه الولد مبين من دخلته علينه بزر دلال وخير ومثقف ربي يجعله من نصيبج
فائزه....امين
+++++++++++++++++++++
بعد مرور اسبوعين ومحمود يمر بالسياره بس ينظر لفائزه بدون ما يكلمهه حتى لا يجيبلهه حجايه
بس القلق الي بداخله لا احد من ولد عمهه يريدهه
وفائزة نفس القلق كانت متوتره لان اعتبرت محمود فرصة ذهبيه وماتتكرر بالعمر
++++++++++++++++
ام فائزه ..يمه بنتي اتصلي بالولد خلي يجيب اهله خالج يكول ذولي عائله راقية وخلق واخلاق وأغنياء وخدم وحشم
الله يوفقج بنتي
+++++++++++++++++
فائزه ..الو ممكن مهندس محمود
محمود ..وياج تفضلي منو ؟
فائزه ..اشو صوتك بالتلفون مختلف اني فائزه ..
محمود ..هلى بهالصوت العندليبي اشلونج ياعمري ترى فتيتو كلبي
فائزه ..غير يسالون عليك
محمود ..آنستي انا معروف
فائزه ..اكيد ...اهلي يكولون تفضلو احنا ماعدنه مانع حتى نبلغ عمامي
محمود ...الف مبروووك مقدما ..باجر اروح لبغداد واشوف اهلي شوكت يكدرون يجوكم
+++++++++++++++++
سافر محمود لبغداد واول شخص فاتحه اخته حجيه نرجس
نرجس .. محمود انت شتحجي تريد تكسر وجهنه تجيبلنه وحده اصلهه عجم
محمود ..حجيه هذا اختياري البنيه اصلهه
بنت شيوخ وعشيرتهم معروفه ومثقفة
نرجس ..ولك تعوف بنت الملوك بنت عمك وتروح ع وحده اصلها مدري شنو انت تعرف شجاي تحجي
لا اني ولا اخوتك نوافق
محمود ..حجيه انت تحجين عن نفسج لو بلسان اخوتج
نرجس ..كلهم اخوتك هذا رأيهم
وخلي في بالك انت حاتحرم نفسك من الميراث اذا تصرفت بدون موافقتنا
محمود ..اني اخوكم واحد الورثه متكدرون تحرموني من حقي
نرجس ..كلشي نكدر نسوي وانت تعرف إمكانيتي
محمود ..اي اعرف انت انسانه متسلطه وماعندج رحمه وأختنا الكبيره وحرمتي نفسج من الزواج لان العرسان الي تقدمولج مو من سلاله الملوك وبقيتي تطلعين عقدة علينا
نرجس ..ولك هاي جزاتي فوك ما ربيتكم هيج تحجي ...يمه تعالي شوفي ابنج يريد يجيبلنه وحده غريبه يتزوجهه من الكوت
ام محمود ...يمه وليدي بس لا مقشمراتك نسوان هناك
محمود ..يمه البنيه مدرسه ومثقفة وبنت عائله واهلهه شيوخ وجميله انتو شعبالكم اني اورط نفسي بوحده هيج بدون ما اسال عليها
صلاح اخو محمود ..اخوي تعرف اخوانك راح يعادونك بس اكولك اني وياك ويمته ماتريد نروح سويه نخطبها
محمود ..واخوتنه الكبار انت اخوي وع راسي بس انت عمرك صغير المفروض اخوتي الكبار هما يجون يرفعون راسي يم عمامهه
نرجس ..محمود الكل راح يعاديك وانت تعرف بهذا الشي ومو بس هاي يمكن يحرموك من الورث
للحكايه بقية
+++++بقلم فردوس عبد اللطيف++++