#حفيدة_السلطان

الجزء الحادي عشر

#حفيدة_السلطان
بقلمي فردوس عبد اللطيف
البارت الحادي عشر
نعم من أجلك يا أبني سوف أخرس القلم
نعم من أجلك يا أبني سوف أقتل الكلمات
من أجلك يا أبني سوف أنزوي إلى الركن المهجور
من أجلك يا أبني سوف أجعل فكري مشلول
من أجلك يا أبني سوف اقلم أظافري و أجتث أنيابي
من أجلك يا ابني سوف لا أكون
من أجلك يا أبني سوف أغرق في ظلمات البحور
من أجلك يا ابني سوف أبت في سبات
إلى يوم الأجل المعلوم
من أجلك يا ابني سوف أطمس رأسي
في صحراء الربع الخالي
حتى يوم النشور
الجرح ينزف يا أبني و الحرقة تكويني
~~~~~~~
فائزه ..يمه بنيتي جابت ؟ فدوه اروحلهه
احمد ..خالتي تعالي وياي  تريدج لان متعرف شتسوي للطفل حتى متعرف تلزمه
فائزه ..ليش ماتجيبهه عندي
احمد ..وين تجي هو انتو متهجولين ،،،، انتظرج بالسيارة
يارا ...اجتي امي حبيبتي ردتلي روحي خفت ع ابني لا أأذي من أغير ملابسة بقت يمي أسبوع ،، بس مكدرت  تبقى اكثر لان مجان مرحب بيها وإخوتي وحدهم عافتني  بدون متعرف اشلون يعاملوني عيالي وكل الي مريت بي لان هي مناقصة الي بيها مكفيهه بعد العز والدلال والخير تتبهذل هالبهذله
اما   عمامي تضايقوا من وجود اهلي بيت جدي وبدت المؤامرات ضد اهلي اما حماي معد رجع للبيت بعد أسبوع من ولادتي واستمر الحقد الي بداخله لكن يدز  ع ابني بدء يحبه بس ميبين هذا الشي امامي طبيعة عائلتهم يحبون خلفة الولد وميحبون البنات لهذا هما يقدرون الولد لكن اني لا نفس المعامله يعاملني والاهانة والضرب  ،،، خلوني اخبز عالحطب بعد الخير والعز والدلال جبرتني الظروف اخبز حتى عالحطب مو بس بتنور طين رغم ماكنت صغيره لكن تحملت لخاطر ابني ،،،اما بالنسبة لحبي ومشاعري تجاه احمد زوجي ... بوقتها كنت صغيره والزواج انفرض علي ودائما أكول هذا قدري ولازم أحب احمد لانه زوجي لكن يرجع يصدمني لو يضربني لو يهيني بكلامه الجارح لو يصير مع اخوه معد يخليني أكرهه وأكره كل الرجال وارجع أكول لازم أكون قويه خلي أتحمل لخاطر ابني يمكن فد يوم تتغير الظروف
~~~~~~~~
صلاح ..هاني وروجين اريدكم ترحون لبيت عمكم حامد زوجته تريد تفرش الزوالي وتريدكم ترحون تنظفولهه
فائزه ..ماما روحو ساعدوهه هي بيتها ماتنظفة بالشهر مره وديرو  بالكم لاتلعبون وتكسرون اغراضهم
روجين ..اني كنت صغيره بس زوجة عمي حامد مهمله وماتشتغل تطلبني اروح انظف بيتها من الصبح لليل ارجع لبيتنا هلكانه وبنتها بعمري دكولهه روحي درسي واني دكولي شكو مجلبه بالمدرسة تعالي نظفيلي وعوفي الدراسة وتجمعلي ملابس القديمة الممزقة الي متصلح حتى للمسح وامي دكول ميخالف لخاطر ابوج تالي يكلوله ردنه منهه تساعدنه وماجتي ...
بذاك الْيَوْمَ رحت وية اخوي هاني نعزل وننظف ونحمل الأغراض الثقيلة حتى الزوالي خلتنه نغسلها قبل يوم وبدينا نفرشلها البيت بقينا لحد اذان العشا وحتى الغدا ماغدونه وياهم غدونا وكت المغرب وحدنا اني وهاني حتى لو عمال هم أبوي جان يغديهم وياه تعبنا ذاك الْيَوْمَ رجعنا للبيت كبل للفراش نمنا من التعب
الْيَوْمَ الثاني
صحينا على صوت الباب يندك بقوه فزيت من نومي مخروعه وإذا عمي حامد عيونه طالعه لبره وعصبي ميتحاجه
حامد ..ولَك هاني محد غيرك باك ذهب مرتي
هاني ..تفاجئ ليش عمي ابوكك عبالي انقهر ت علي وجاي تكرمني لان البارحه اشتغلت بيتك وطلعت حتى كلمه شكر ماسمعتهه بس انت جاي تتهمني
حامد لزم هاني من قميصة وضربة راشدي ولَك طلع الذهب لا اذبك بالسجن
هاني .. عمي والله مماخذ تعال فتش البيت هما جهالك كانوا يلعبون بغرفة امهم ليش اتهمتني اني مو كافي عمي سامي صدك العامل واتهمني أنوب انت روح دور بيتك كبل ماتتهمني
حامد ..انتو مثل أبوكم شروك ومخربطين اطلعوا بره من بيت جدنا واكولكم شغله اذا بيوم راح يصير براسكم خير اني انضرب تكرمون (بالنعال )
روجين .. بوقتها كنت بعدني صغيره لكن شايله  كلب كبير (اَي راح تنضرب لان مراح اخليهم فاشلين مثلكم وحتشوفون احنه منو وأنتو منو
حامد .. ضرب روجين ...لسان عاهره بس منو أمكم
هاني تهجَّم عليه وارد يضربه لزمته فائزه لا ابني ماربيتكم عالاستهتار
فائزه وانت ياحامد حسبنا الله ونعم الوكيل سلمتك بيد الله وهو يأخذلي حقي منك
طلع عمي حامد من بيت جدو
فائزه لملموا أغراضنا لازم نطلع من هالبيت لان مراح يعرفونه بحالنا ،،،بس اني حاروح لبغداد بيت اختي وارتب الأمور حتى أخذكم لبغداد ذولي مجرمين وانت هاني روح يم ابوك أحسن اكثر من مره كال دزي يمي اشغله
هاني ..ماردت أعوفكم بس يظهر الفقر مذله ومنكدر نوكف بوجهم
فائزه ..النه الله وانت روجين ديري بالج ع اخوتج بس ارتب مكان أجي أخذكم
سافرت فائزه لبغداد وهاني للبصره وبقوا الأطفال وحدهم بين عمام وحوش تريد تنهش لحمهم من اجل الفلوس
روجين بقيت ويه اخوتي والخوف من المجهول ومن العمام الي هما سند وظهر ولكن عمامي عبارة عن ماكنه بدون مشاعر
بالليل إجه عمي زهير وية العامل وجاب سيارة نقل وحمل أغراضه الي كانت بالبيت وراح
الْيَوْمَ الثاني
فائزه .. ها بنتي خو ماخفتوا جئت أخذكم
إجه عمي صلاح يركض
أم هاني انهزموا بسرعه من البيت
فائزه ..اخوية طالعين كبل ماتحجيهه
صلاح ..أم هاني بسرعه زهير جايب الشرطة ومتهم هاني بسرقة الاثاث
فائزه .. يا اثاث
روجين ..ماما البارحه إجه عمي زهير ويه العامل وأخذوا الاثاث الي مخلي بذيج الغرفة
صلاح اطلعوا بسرعه من الباب الخلفي لا يأخذوكم
انهزمنا من بيت جدي مثل الي مرتكب جريمه وجاي يهرب بجريمته ودمعتنا بعيونه
روجين ..بيومهه أقسمت اني مراح اتزوج بحياتي الا بعد ما اخلي اخوتي احسن ناس وياخذون شهادات واتحدى عمي ابو نعال
وصلنا لبغداد امي مستأجرة شقة بسيطه غرفة وحده وصاله ومطبخ وملحقات لكن كانت اجمل من قصر جدي الألف متر
بعد ما وصلنا اجتي خالتي فتون
فتون .. ذولي  شمسوين خابرني صلاح وكال زوجة حامد لكت الذهب جوه سريرهه جهالهه لاعبين بي ومخلي تحت السرير
فائزه .. اني عرفت رادو يطلعونه باي طريقة من بيت الجد هذا اسلوبهم سلمتهم بيد الله هو يأخذ حقي وحق محمود واولادي ذولي كلوبهم حجر
         المهم احجيلي وصيتي صديقاتج منو تريد كبه بورك اسويلها
فتون .. اَي حصلتلج خوش طلبات وأنيطت رقمج لصديقاتي  وجيراني والموظفات هم كلهن يردون
فائزه ... خلي أفكر بشغلي وابتعد عن عائلة محمود أهل الحسب والنسب
      حاولت اخلي اثاث بسيط بالشقة فرش وطباخ بعد ما اشتغلت اكثر وأكثر اشتريت تلفزيون والجهال تونسوا بي ورآها اشتريت صوبه نفطيه نلتم عليها اني وجهالي وادرسهم حبايبي تحملوا القهر والفقر لخاطري حتى من يرحون للدوام احذيتهم ممزقة وكتبهم يخلوهه بعلاكه لان ماعندي اشتري الهم شنط
المبلغ الي يدزه محمود يادوب يكفي ايجار ومصرف عشرة ايّام من الشهر والباقي من شغلي شكد كنت احاول اقتصد بالمصرف لكن مرات تطلعلي شغلات وملزمه اصرف
~~~~~~~~~~
يارا ..احمد محتاجه مصرف انت لازم تحددلي مصرف اسبوعي اني زوجتك ما اعرف شكد راتبك
احمد ..وانت شعليج براتبي  وشنو مصرف وين تودين الفلوس
يارا ..اريد اشتري ملابس هاي الدلالة تجي لبيت خالك تجيب أشكال وألوان وجناينهم يشترون اني هم اريد
احمد ..وليش تشترين هدوم مو عندج
يارا ..احمد تحجج وضربني وأهاني لان معد يكوله انت رجال ولازم تأدب مرتك
بعد مرور سنه من ولادة ابني حارث بينت علي أعراض الحمل الثاني وفترة الوحام متعبه وشغل البيت لازم أكمله بدون استراحة واهتمامي بابني ماخذ اغلب الوقت
بيت أهل احمد من يستلمون وارد المزرعة يجيبون الفلوس بالشوال يسحلوهه سحل ولازم اكعد وياهم نحسب الفلوس ونسويهه شدات ونخلي كل مئة ورقة بلاستيك
لكن مافد يوم أنطوني اَي مبلغ ولو بسيط الفلوس يكنزوهه وياخذهه معد ويخليها بالبنك
بقيت أعاني ويه احمد ومعد ومؤامراته لكن ما اكدر احجي لاهلي لان اعرف وظعهم تعبان
يارا ..احمد إنتوا بدل ماتخلون الفلوس بالبنك أكون مشاريع كثيره ممكن نستثمر حصتك بيها ليش تجمدهه
احمد ..اني ما أتصرف بدون موافقة معد
يارا ..تدري اذا تأخذ قطعه وتبنيها شقق وتاجرهه والأرضي محلات تجيب ايجارات وانت كاعد
احمد .. انت ليش ماتسكتين جاي تتفلسف برأسي هو ابوج لو بي خير مجان ضيع ثروته
يارا .. بقيت على هالحال لحد ما أبوي كدر يجمع مبلغ ويرجع لبغداد وفتح ورشه وبدء العمل من الصفر لكن طيبه كلبه وهو مرزوق بدء وظعهم يتحسن بس مو بمستوى الي كانوا بي
يارا ..اريد اروح اشوف اهلي
احمد .. ماكو روحه
يارا ..ليش تحرمني منهم
احمد ..اني مفارغلج تردين  انت روحي بس ممنوع تنامين عدهم
يارا ميخالف بس اروح أشوفهم بس انت تعرف يوم ميكفي روحه ٣ساعات ورجعه ٣ شبقى
احمد ..هذا الموجود اوصلج الصبح للكراج
يارا ..انطيني كروه
احمد .. ادفعلج بس الروحه والرجعه عليهم انت مو ترديهم وهما يردوج خلي هما يدفعون
بقيت خايفة لا معد يتدخل ويرفض اروح لاهلي بس أمه كالت خلي تروح ذبحتنه باهلهه الفكر
معد .. وشكو تروح بنت الكلب فكر وتدور الفكر
احمد .. هو يوم واحد وترجع
يارا كعدت من الصبح لا يغيرون رأيهم ويمنعوني من الروحه لاهلي وطلعت بسرعه
رحت لاهلي ومن دخلت عليهم بقيت ابجي واشهك لان شفت أبوي وهو صار يبجي أخذني ع صفحه
محمود ..بنتي احجيلي اني قلق عليج انت مرتاحة
يارا شكولك يأبه مامرتاحه
محمود اعرف بنتي بس تحملي لخاطري بلكي احمد يتغير ميضل الحال هيج
يارا ..بابا اني أتحمل لخاطر حارث  ابني وإلا مجان بقيت عدهم
مر الوقت بسرعه أخذني أبوي للكراج وصلت لبيت عيالي لكيت احمد واكف بالباب
احمد ..وين صرتي اشو تاخرتي بعد ماكو روحه حقيره متنطين وجه
للحكاية بقية
~~~~~~بقلم فردوس عبد اللطيف ~~~~~~~