#حفيدة_السلطان

البارت الرابع

#حفيدة_السلطان
بقلمي فردوس عبد اللطيف
البارت الرابع
زينوها وإدفنوها والكفـن ثـوب الزفـاف ^ ^ ^ ^ غصب عنها زوجوها وسلموهـا للغريـب
مجبره ماشاوروها قصدهم شـرع العفـاف ^ ^ ^ ^ مادروا إن البنيـه مغرمـه ولهـا حبيـب
++++++++++++
صلاح .. رجعت لبيتنا حزين وعيني عالتلفون اكول بلكي تشوف فرصة وتتصل بقيت كاعد عالتلفزيون لحد ما نمت وغفيت واني بعز النوم رِن التلفون الارضي
صلاح ..الووووو
وسن ... صلاح وينك انتظرت اهلي ينامون وخابرتك
صلاح .. ليش تبجين حبيبتي خلي افتهم
وسن .. حايزوجوني لابن عمي ابوي وافق وجابو النيشان وجاي يمشي بالمعامله مال السفر .. اشلون بي وين اروح
صلاح .. وسن راح اتخبل لا ليلي ليل ولا نهاري نهار كلما اتخيل تروحين لابن عمج ويزفوج افقد اعصابي وأكره حتى نفسي لو ما العيب وكسرة الوجه جان انهزمنه
وسن .. مو احنا الي نسويها ...تدري صلاح اني رايحه للإعدام من واحنا صغار كنت أتحلم بيك انت فارس أحلامي وانت الي راح البسلك فستان العرس ماجنت ادري الدنيا ظامتلي هيج ضمه
صلاح .. اتمنالج السعاده حبيبتي بس اكولج شغله من بعدج ماتحلى بعيني مريه وراح ابقى طول العمر ما اتزوج
وسن .. لا صلاح تزوج وعيش حياتك انت من حقك
صلاح .. اخذي مني وعد مراح اتزوج لو انت لو ماكو
++++++++++++++++++++++
عدنان ...خوي محمود اني أسف صرت ويه اخوتي ضدك
ترى طول الوكت كنت اتعارك وياهم وما اقبل ع تصرفاتهم
وانت كلبك طيب سامحني ع هالموقف من اليوم وجاي بعد مراح اقبل بالغلط
محمود .. مسامحك خوي احنا دم ولحم ولا تعادي اخوتك
عدنان .. ليش انت عاديتهم لو هما الي عادوك
        المهم احنا ايد وحده اني وياك وصلاح وامي وخواتك
     لمياء وزهراء
محمود ...الله لا يحرمني منكم انتو اخوتي وحزام ظهري
+++++++++++++++
فائزه .. محمود اني حامل
محمود .. هلا بالضيف الجديد شوكت تتزوج اختج حتى امج تجي يمنه
فائزه .. هالاسبوع زواجهه وامي دكول خليني كم يوم واجي
محمود .. معوده اشلون تبقيها وحدهه اني اروح أجيبها وخلي الخدم يرتبولهه الغرفة
فائزه ... صدك وجود امي مهم تساعدني بالجهال
محمود .. تدرين فوفو اشتريت ورشه جديده وراح ابدي اجهزهه بالمكائن اخوتي كطعوا بي بس ربج ما يترك عبده
فائزه .. انت كلبك طيب وفاتح بيتك للكل وهسه اكثر الاقارب  والاصدقاء يجون يمنه اكثر من ما يرحون لبيت اخوتك
محمود .. من فتحت عيني واشوف لمتنه من جان والدي والناس تجي يمنه حبيت هذه العادات ابوي جان يكول البيت الي ما يجيله ضيوف ماتدخله الملائكه
لهذا اني برمضان اعزم عمالي كل خميس ع فطور واوكلهم احسن اكل وبالعيد هم اعزمهم واكرمهم هاي غير العيديات
الي انطيهه الهم
فائزه .. مو بس هاي انت جاي تعلمهم صنعه هوايه تخرجوا على ايدك
مرت الايام وفائزه ولدت ولد سمته مهند
وسن تزوجت وسافرت للخارج ويه زوجها ...
محمود .. خوي صلاح لاتبقى هيج حابس نفسك بالبيت وتشرب تعال شوف وجهك بالمرايه لحيتك طويله ليش هيج تسوي بنفسك وتعرف امك تنقهر من تشوفك هيج
صلاح .. تدري لو ما الانتحار حرام ويودي لجهنم جان انتحرت وخلصت من هالحياة ...حياتي بدون وسن مابيهه طعم الدنيا بلياها جافة حزينه حتى الطيور من جانت تغرد اكولهه تغنيلج واسمع تغريدهم بي لحن بي حب
هسه كولشي تغير ياخوي اني انسان محطم
محمود ... تعال يمي بالبيت انت والحجيه من تلتهي ويانا حاتنسى ..لان بقائك وحدك هو السبب
صلاح .  انت بيتك ع طول ضيوف ميفرغ وتعال جامل وسولف اشو انت فاتح بيتك للكل حتى الغربى هم يجون عندك
محمود .. نسيت ابوك جان فاتح البيت للكل تعلمنه منه
        ....حجيه حضري نفسج تعالو عندي غيرو جو
ام محمود ... مشتاقة للجهال بس اصلي ونروح
+++++++++++
محمود تجارته توسعت  واخذ اجازه استيراد وتوسع بعمله وبنفس الوقت كان يداوم بالقوه الجويه ومعتمد بعمله على احد اصدقاءه اسمه علاء
علاء صديق مقرب لمحمود واعتمد عليه محمود بكل أعماله كان ايده اليمنى لان متابعه( مجموعه )ورش صعبه لوحده اكيد يحتاج لشخص ذكي يعتمد عليه وعلاء كان هو الشخص الوحيد الي يعتمد عليه ويعرف كل عملائه وأسرار عمله حتى الختم الذهبي باسم محمود بيد علاء بالقاصة هو الوحيد الي يختم ع الصكوك
+++++++++++++++++
سنه 1980
فائزه .. اني حامل 3 اشهر ويمكن هالمره بنيه وخايفة اشو بدت الحرب ويه ايران اخاف يصير شي وين ننطي وجهنه وشغلك وتجارتك
محمود .. شكولج فوز الوضع مخربط ودخلنا بالإنذار واخوي عدنان تطوع ضابط ويمكن حايودو للجبهه
فائزه ... شورطه يتطوع مو عايش هنا وحصته من الورث معيشته ملك لو لان الحكومه كبرت راس الضباط وصارو يحكمون وانطتهم سيارات وقطع اراضي وين ميرحون تمشي امورهم
محمود ... هو يريد يخلص من مشاكل اخوتي ينهزم منهم ومن طلايبهم
بعد مرور سته اشهر ولدت فائزه بنت سمتها يارا (معنى اسم يارا ..محبوبه)
ام محمود ...ماشاء الله تبارك الله البنيه تخبل ماخذه جمال الترك والعجم
فائزه .. ماخذه بياض محمود ومواصفاتي
مواصفات يارا .. بيضه عيونهه كبار لونهم اسود شعرهه اسود سرح طويله جمال يبهر سبحان الخالق
ام محمود ..يمه فوز بنتج لا تراويهه لاحد لا يطكوهه عين وتموت مثل خوالهه
فائزه ..استحي خاله اذا يجون يتباركولي شكولهم
ام محمود ..كولي توهه نامت
بعد يارا رزقت فائزه بنت سمتها روحين معناها (شمس الحياة)
مرحبا اني يارا حفيدة السلطان راح احجيلكم عن نفسي 
من ولدت بالدنيا كنت البنت المدلله وبسبب شكلي وجمالي اهلي مجانو يخلون احد يشوفني فتحت عيني عالدنيا والبلد بوضع حرب وناس تروح وناس تجي ومرات توكع صواريخ ع بغداد بنفس الوقت احنا كنا عايشين حياة الملوك
البيت بي خدم وبابا يصرف علينا بدون حساب كتاجر ووظعه المادي ميسور من البس الفستان بعد ما اقبل ارجع البسه مره ثانيه اكول لان شافوني لابسته ومن اسمع ناس فقراء وما عدهم اكل اسأل بيبيتي
يارا ..بيبي ذولي ليش ماعدهم اكل
ام فائزه .. بنتي ذولي فقراء ما عدهم يشترون حتى اكل بس خبز وطماطه
يارا ..واحنا شوكت نصير مثلهم
ام فائزه ... فوز تعالي شوفي بنتج تريد تصير مثل الناس الفقراء ...
فائزه ..ماماتي حبيبتي الناس تتمنى تصير اغنياء والفقر محد يحبه لان الانسان  الفقير ميكدر يشتري كلشي ينحرم من الأشياء الي يحبها
++++++++++++++++
بعد روجين  رزقو بولدين سموهم علي ومهيمن
عدد الاولاد اربعه والبنات اثنين مجموع عائلة محمود
صلاح انتقل بالكوت اشترى بيت واستلم مزرعه تابعه للعائلة وهو يديرهه
ام محمود انتقلت للعيش بيت محمود لان محمود الوحيد الي يهتم بيهه وبشؤنهه
سنة 1986
يارا دخلت المدرسه الصف الاول
يارا .. من اشوف الاطفال يرحون للمدرسه تمنيت يجي اليوم الي اداوم بي والبس زي المدرسه واحمل الشنطه
بعد تحقيق حلمي وبعد مرور اسبوعين عالدوام
مديره المدرسه ... الو بيت استاذ محمود
فائزه ..نعم تفضلي
مديره المدرسه .. اختي بنتج يارا وكعت ومجاي نعرف اشبيها
فائزه .. شنو متعرفون اشبيها بنتي
المديره .. اختي تعالي استلمي بنتج
فائزه ..الو محمود الحكني يكولون يارا واكعه بالمدرسه
محمود .. اني رايح اذا اجيج يضيع الوقت
رحت عالسريع ما اعرف اشلون كنت اسوق عقلي توقف عن التفكير أنشل كل تفكيري كنت خايف لا بنتي بيهه شي
ادعي طول الطريق ياربي لا تفجعني بنتي ياربي برد كلبي
الطريق للمدرسه اختصرته من السرعه بعشر دقايق مع ان ثلث ساعه بالوضع الاعتيادي
دخلت المدرسه وركض ع غرفة المديره
وينهه يارا
المديره .. هذه هنا الحمد لله صحت بس راجعو طبيب شوف ليش وكعت
محمود ..ممكن اعرف الي صار
المديره ..تفضل استريح اشرب ماي وجهك اصفر وايدك ترجف ...رجاءا أمسك أعصابك ولا تخوفهه
محمود .. ياست شامسك اعصابي وبنتي ما اعرف شصاير بيهه
المديره ..الحاله الي صارت بيهه تشبه حاله الصرع وكعت بالارض وصكت أسنانها وجسمهه كوله يختض
محمود .. الله يستر اليوم اوديهه للطبيب
      تعالي باباتي
يارا ..حملني ابوي وكانت ايده ترتجف وحسيت بخوفه علي وصعدني بالسياره ورجعنا للبيت
كنت خايفة من شنو ما اعرف لان اني بوقتها ما عرفت شنو الي صار بي وشسويت بس من فتحت عيوني وشفت الخوف بعيون المديره والمعلمات وبعد ابوي وراها امي تلكتني تبجي وتلطم صدك خفت يمكن اني بي شي مخيف مو مثل باقي الاطفال واسمعهم يحجون بينهم بس ما افتهم كلامهم
العصر راجعنا الطبيب
الدكتور .. اخ محمود عدكم صرع بالعائله
محمود .. اعتقد اي دكتور اليوم الوالده كالت وتذكرت بس شنو بيهه بنتي معقوله بيهه صرع
الدكتور .. بنتك عدهه صرع وراثي وممكن علاجه بس كون تستمرون بالعلاج
فائزه .. دكتور نكدر ناخذهه لغير بلد نعالجهه
الدكتور .. عندي اصدقائي اطباء بلندن راح اراسلهم وأرسل لهم الأشعة واني اتصل بيكم
يارا .. رجعنا للبيت والخوف بوجوه بابا وماما والعائلة كولهم
    من يومهه معامله اهلي تغيرت اهتموا بي وميقبلون احديزعلني  حتى المدرسه صرت اداوم ايام الامتحانات فقط انحرمت من اللعب مع البنات وحياة المدرسه كنت شاطره واحب ادرس بس خوفهم علي من تجيني نوبه الصرع خلاهم
ميخلوني اداوم يوميه
صحتي تدهورت تصرفاتي تغيرت لما طفل يتعامل بهالحرص وينحرم من ابسط متعه وهي الدوام بالمدرسه وممارسة اللعب والدراسه  اثرت ع نفسيتي كم تمنيت اكعد الصبح واروح مع الباقين للدوام والعب وبدرس الرياضه
نمارس تمارين الرياضيه والفرصة الله نطلع نركض ونلعب
انحرمت من كل هذا بسبب هذا المرض من غير العلاج والادوية الي كرهتهم وكرهت اشربهم
يارا ..ماماتي مليت من هالوضع شوكت اروح للمدرسه واداوم مثل اخواني
فائزه ..بنتي ترحين ان شاء الله بس اخذي العلاج وشوفي الطبيب وعدنه تصيرين زينه ويروح منج هالمرض
يارا ..صدك ماما يعني من اطيب اكدر اروح للمدرسه والعب ويه صديقاتي
فائزه ..ان شاء الله حبيبتي
محمود ..  الووووو اهلا صلاح انت ببغداد
صلاح .. البقية بحياتك اختك نرجس توفت
محمود .. انا لله وانا اليه راجعون اشلون توفت
صلاح .. تعال هنا بيت اهلي اخوتك كولهم موجودين
محمود . نرجس توفت وكع بيهه المصعد كانت طالعه ويه ابن اخويه والمصعد وكع بيهم وهي حاولت تنقذ ابن اخوي وهي توفت ..الله يرحمهه اختي الكبيره كانت متسلطه وكلبها قاسي حتى زواج ماتزوجت بسبب التكبر والغرور لان تعتبر نفسها بنت ملوك ولازم تتزوج واحد من مستواها ..كثير تقدموا لخطبتهه وكانت ترفض وترفض لحد ما عنست مثل بنات عمي نفس الشي من يخطبوهن بيت عمامي يرفضون لان يتصورون الخطابه جايين علمود الورث ولهذا السبب رفضوا العرسان لحد ما كبرن وفاتهن القطار
نظريه سخيفة وطمع وغرور هكذا هو حالنا وحال ورثة السلطان
للحكايه بقية
+++++بقلم فردوس عبد اللطيف+++++