#حفيدة_السلطان

البارت الثاني عشر

#حفيدة_السلطان
بقلمي فردوس عبد اللطيف
البارت الثاني عشر
مسحات الحزن العميقة التي يرسمها القدر على بعض الوجوه قد تزيدها بهاء لا أنكساراً.
يارا ... بفترة الوحام تاذيت لا أتقبل الاكل ولا أتحمل ريحة اَي عطر اضافة الى شغل البيت المفروض علي ....
وأم معد عدهه علاقات اجتماعيه ويجوهه ضيوف ع طول ومن واجباتي الإضافية لازم كل يوم أغير شراشف غرفة فنظر الضيوف مرتين لان جلسه بالأرض ودواشك قطن نوعليها شراشف والتكيات مخاديد لازم تتغير كل هذا الصبح/ أغير والعصر أغير وممنوع اغسلهم بالغساله لازم بأيدي غسل وكوي
ومعد يتعمد يغسل السيارة ويدخل عالممرات بعد ما اغسلهم وامسحهم يدخل وشحاطته كولهه طين وترك سيار الكهرباء عالشراشف مع (بوري النفخ ) عالشراشف الي غيرتهن قبل ربع ساعه دخلت للغرفة من شفت المنظر انقهرت وتاذيت بس مكدرت احجي ولا كلمه بس رفعت البوري وسيار الكهرباء بعصبية وجبت شراشف جديدة حتى اغيرهم ومعد يراقبني
معد .. وقزرقط بنت (الكذا ووووكذا ) اشبيج متعصبة خاتون ؟
يارا ..سكتت لان تصرفه كان مقصود ويحاول يستفزني
من شافني سكتت إجه وجرني من شعري ويه دخلت زوجي احمد
احمد ..عوفها عوفها... اني أربيهه هالبنت الكلب ...لزمني احمد وين ما يوجعني يضرب بكل قوته (الله لا يوفقهم ..كلما اتذكر اتاذى ) وكعت عالارض وسحلني من شعري للغرفة ويكولي اريد انظف بيج البيت ورفسني بالغرفة
من دخلت لغرفتي قفلت علي الباب وحظنت ابني حبيبي وبقيت ابجي كم ساعه لحد مانشفت دموعي انقطعت الكهرباء وهما يصعدون ينامون بالسطح أخذت ابني وصعدت بالسطح ..احمد ينام عالسرير الحديدي بس جايب واحد لنفسه واني انام بالأرض وية ابني بيومها ارتفعت حرارتي وعندي حاله من طفولتي من ترتفع درجة حرارتي احلم بكابوس يتكرر علي نفس الحلم
من غفيت بالسطح حاضنه ابني ....حلمت بنفس الكابوس واني اهذي واحجي كلام ممفهوم ...فزيت مرعوبة ...سمعت صوت اذان الفجر عن لسان البطله يارا ( اقسم برب العباد شفت شئ مو تخيل لا والله شفت مجموعة أشخاص حوليني ومحوطيني اني وابني شكلهم ملائكة دزهم رب العالمين الي )
احمد من شافني احجي واكول ملائكه ملائكة محوطيني
احمد ..يمه يمه كعدي شوفي هالبلوه تخبلت
أم معد ..منو يمه ؟
احمد ..المخبله الي جبتيلياها
اني بقيت ساكته ما احجي نزلت سويتلهم ريوك وطلعوا للبستان
أم زهير ..اشلونج بنتي هاي اشبيج ؟
يارا ..ما بي مصخنه
أم زهير .. حبيبتي بنتي حجتلي أم معد عالي سووه ولدهه بيج تعالي اقرى عليج قران نامي بحظني خلي اقرى عليج كلام الله بي الشفا ان شاء الله
دخلو معد واحمد .. يمه لحكينا
أم معد ..اسم الله عليكم اشبيكم تلطمون منو مات
احمد ..يمه الحلال كولهم ماتوا ما اعرف من الحر مدري اشبيهم العجل وبقرتين وعشرين خروف كولهم لكيانهم ميتين
أم معد ..باوعت ع أم زهير ولطمة ع خدهه يمه شموتهم
أم زهير .. يمه لاتنقهرون العوض ع الله البركه بوجودكم وباوعتلي وفهمت من نظرتهه تريد تفهمني هاي حوبتي طلعت بيهم بنفس الْيَوْمَ
بعض الأحيان الانسان تجيله مشكله أو مصيبه ميراجع نفسه ويتذكر هل هو ظلم إنسان هل هو أخذ حق شخص ياريتنه نفكر هيج ...مرات ندفع ثمن اخطاء آباءنا أو امهاتنا
ان الله لايظلم عبد صالح ولو بعض المواقف تكون اختبار ولكن فلنتذكر هل ظلمنا والوقت أمامنا لتصليح ما فعلناه قبل فوات الاوان ...
كالعادة اَي مشكله تواجههم يرجعون علي بعصبيتهم ويحملوني بذنوبهم واني كل الي اكوله (حسبي الله ونعم الوكيل )
معد .. احمد خلي مرتك تروح ع خالتي نوريه تجيب ملابسهه وتغسلهم وتكويهم
أم معد ..وينج يارا روحي لبيت نوريه لملمي ملابس نوريه الوسخات والشراشف جيبيهن غسليهن واكويهن
تدهورت صحتي لا اكل لا فيتامينات حتى مراجعه للطبيبه ماكو اتصلت
يارا ...فدوه احمد اريد اروح طبيبه صحتي تعبانه خلي اروح لاهلي وامي توديني
احمد ..اذا هيج ميخالف خلي أمج توديج
سمحلي أبقى ٣ أيام يوم الروحه ويوم الرجعه ويوم راجعت بي للطبيبه شي أكيد تعرفون ما انطاني فلوس لا مراجعه الدكتوره ولا كروه الرجوع أخذتني امي للطبيبه
للطبيبه .. ماما بنتك صحتهه تعبانه لازم ترتاح وماتمشي ترى يصير عدهه ولاده مبكرة لان الطفل نازل
اهلي من اروح يمهم يشترولي ملابس ولابني وحتى لاحمد اشتريله لازم هدية تكرمون وصاني ع شحاطه
رجعت لبيت عيالي لكيت البيت هوسه والشغل ينتظرني كظيتهه تعب وتنظيف وغسل مواعين لحد ما بالليل إجه احمد رحت تمددت عالسرير من كد التعب
احمد .. كومي سويلي جك لبن دا اشرب
يارا ..كمت واني بطني ثمانيه أشهر واتدعبل علما مشيت وسويتله اللبن
احمد ..بصوت عالي ..بس انت حامل وتتعايريين وتمثلين ..مو هاي النسوان تحبل وتجيب بين الحطب (قصدة على النسوان الفلاحات بمنطقتهم )
يارا .. بس اني مو مثلهن بنيتي ضعيفة تربيت بالمدينه وحياتي تختلف
لزم إلجك وشمر اللبن بوجهي وضرب الجك بالحائط ياكلبه بنت الكلب ياحقيره وكل مرة يضربني بالشحاطه الي اجيبها اله بفلوس اهلي
عفته وأخذت ابني ورحت نمت بعد ما نظفت المكان
قربت ولادتي اتصلت بأمي طلبت منهه تجي يمي لان احتاج وجودهه يمي وقت الولاده لان بوجودهه اشعر بالامان
وقت المغرب وصلت امي عندي واني بالمطبخ حسّيت بأوجاع ولويات الطلوك اجوي بيت أم زهير
دريد ..معوده روحي نامي لا تجي القابله تشوفج تشتغلين وتحسدج
يارا ..دريد فدوه دا اموت من الوجع والهي نفسي بالشغل اذا انام اتاذى اكثر
دريد ..لاتخافين يويو انت قويه ربي يكومج بالسلامه
في سنة ١٩٩٨
يارا ..جتي القابله وره ساعتين عذاب وألم وصريخ ولدت ابني الثاني يوسف ونظر عيني لكن بنيته ظعيفة بشكل ووزنه اقل من المعتاد لان بفترة الحمل ماتغذيت واشتغل اكثر من قابليتي سبحان الخالق يشبهني عيونه كبار ورموشه توصل لحواجبه وخشمه صغير وفم صغير
سمعت الهلاهل وفرحه الناس الي حوليني بس بوقتها كنت تعبانه
دخلوا يتباركولي
دريد ..اللهم صَل ع محمد وال محمد
ابو زهير ..بنتي سمو يوسف اني فتحت القران وطلعتلي سورة يوسف ابني احمد لازم تذبحون ذبيحتين من العيون
اجوي كرايبهم كولهم وامي تركض مابين تداريني وتساعد أم معد بالذبايح بقت يمي أسبوع
معد ماتحمل صحيح هو يحب خلفة الأولاد لكن الحقد الي شايله بكلبه علي ما ينطفئ
ابني حارث فرحان باخو يوسف ومخلي بحظنه إجه معد وظل يصيح بدون سبب هاي منو مخرب التلفزيون اني طلعت كتله منو يخرب التلفزيون
معد ..امج منو غيرهه
يارا هي امي ماتابع تلفزيون وامي مو طفله حتى تلعب بتلفزيونكم
احمد ..منو غيرهه
يارا ..عفية احمد لاتسمعكم عيب تالي تنقهر
امي سمعتهم وفهمت قصدهم يردوها تروح بهالاسلوب
امي سودة علي وعمت عيني طلعت مقهورة مطروده من بيت بنتها واني كنت بعدني صغيره ماعندي جرأة اجاوبهم واكولهم حقيقتهم وارجع كرامة امي
سلمت علي امي وبوستني فائزه ..بنتي لاتضوجين انت بعدج نفسه ربج موجود
طلعت امي المغرب والهوى عالي ودمعتهه بعينهه كلما اتذكر هذا الموقف كلبي ينفطر
يارا ..شوف يا ابن الناس التلفزيون مابي شي بس انتو تردون تطردوهه بهالطريقة
احمد ..دفعني ...دولي لج وطلع
رجعت لحياتي ويه عيالي بس وجود ولدي يهون علي الغربة والمذله وبيت أم زهير كانوا نعم الأهل عوضوني غياب اهلي طيبتهم وحنيتهم ملت فراغي
دريد كان يتردد علينا بالبيت يكول لامه اروح يم يارا سوالفهه حلوه ويجي يحجيلي ع حبيبته من أهل القريه ويراويني صورتهه هي جميله جدا بس معدان يبيعون كيمر بس هو حبها وتعلق بيها
دريد ..تدرين يارا هي صحيح معيديه مو مستوانا بس جميله جدا واني احبها ومتعلق بيها
يارا .. الله كريم اهلك طيبين يجوز يوافقون تزوجها
~~~~~~~~
بعد ولادة ابني الثاني تعرضت لمشاكل كثيره لان اكثر ولادات بناتهم بنات عدهم الولد قليل ويفتخرون بولادته
تمرض ابني يوسف بذات الرئة وتعبت وياه اركض بالأطباء والطفل تأذى
بهالفترة جتي عمة زوجي عدنه وتصير قريبه لأبوي مسكينه كبرت وماتزوجت وعمي يسين ابو معد استولى ع حصتها بالورث وهي فقيره من أهل الله كانت تدافعلي وماتقبل ع تصرفاتهم وياي
مرت الأيام وأم معد تمرضت راجعت الطبيب وبعد التحاليل والأشعة طلع عدهه سرطان بالثدي ولازم تسوي عمليه يرفعون الصدر
بعد العملية البيت انخبص خطاطير أقارب واصدقاء ولازم اني أتحمله ويه تربيه أطفالي وتحمل مسوؤليه طبخ وتنظيف
ابني يوسف يرضع بعده صغير تنحس لان ع طول ملتهيه عنه بقى ما ينام لان ماينام الا ع أيدي ويشتم ريحتي
أم معد لان تخاف من معد تصير وياه ضدي عالباطل مع اني مداريتها وتحجي كدام الناس دكول يارا ماتشتغل والنَّاس الي يجون يشوفون الكليجه والمعجنات والكيك واغسل الزوالي دكولهم اني أسوي المعجنات من اسمعهه اخجل افشلهه امام الضيوف وكانت تفرض علي من اقدم للضيوف لازم كل طبقة نقدملهم حسب مستواهم اني كنت أنفذ اوامرهه لان ما بي حيل أواجه مشاكل وياهم
سنة ٢٠٠٠
كبرو ولدي عمر حروثي اربع سنوات قرر معد يتزوج خطب بنت طالبه تدرس وساكنه بمنطقتنا سال عليها وقرر يتقدملها
بهالفترة سمعت دريد مريض قررت ازورهم رحت لبيتهم
يارا ..اشلونك دريد سلامتك المرض مو ألك ...شفت وجهه مورم وووويتقئ دم
دريد ...ضحك يويو هاي نهايتي يويو راح اموت
يارا ..لا دريد اسم الله عليك عمرك طويل نزلت دموعي
اخذوا للطبيب كان يتقئ دم
الطبيب ..هذا تقئ الكبد وابنكم أيامه معدوده
انقهرت رجعت للبيت ابجي وادعوله هو الي جان وأكفلي ونعم الأخ
للحكاية بقية
~~~~بقلم فردوس عبد اللطيف ~~~~