#حفيدة_السلطان

البارت الخامس عشر

#حفيدة_السلطان
بقلمي فردوس عبد اللطيف
البارت الخامس عشر
بكت عيوني لآلام الفراق فردّد قلبي الحزين بإحتراق كيف للقلب أن ينساكم يا من في الفؤاد سكناكم.
سأودع أحزآني وأستبدل قلبي بقلب ثاني ،ياولدي وانت غبت عن عيني اسمك مخزون بوجداني
متابعين الأعزاء بطلة القصة جاي تتابع التعليقات وبعض الأخوات تعليقاتهم جارحه بتصرف البطله أو بموقفها وموقف اَهلها وهذا جوابها للي انتقدوا سكوتها عالظلم
(بس اريدج توصلين هذا الرد اني شفت ضيم وقهر بحياتي وما ردت اخسر اولادي لانو عمري خسرته وراحت احلى ايام عمري خوفي عليهم وحبي لاولادي خلاني اتحمل كل هالذل اما عن اخوتي فجانو لساتهم زغار من كبرو اخذو حقي منهم صح بعد فوات الاوان
اما عن ابويه وامي وزواجي قسمه والله كاتبلي هالشي اما عن العذاب اللي شفته وتحملت لانو بنت الاصول تتحمل وتسكت حاولت اغير زوجي بكل طريقه بس للاسف تعبت وماكو نتيجه اني مو مستسلمه وضعيفه لااااا اني قويه اخذت دور الام والاب من اول ما الله سبحانه وتعالى رزقني بابني مارد عليهم مو خوف وانما احترام صح هم مايستحقون هالشي بس اذا اعاملهم بالمثل مرح اختلف عنهم)
توفت اخت أم معد وقررت اروح للعزا ء وهم احاول اقتع ابني حروثي يرجع وياي
اول ماشافتني أم معد ظلت تبجي و
أم معد ..وينج يارا حبيبتي وين ايامج جنتي منوره البيت مافد يوم غثيتيني بكلمه ليش ماترجعين اني تبهذلت بلياج
يارا ..ماعندي مانع ارجع بس خلي يبنيلي مشتمل بناء حقيقي ويخليلج غرفة وتعالي عندي
أم معد ..ياريت بنتي انت ماكو مثلج
~~~~~~~~~~~
يارا  ..حروثي ماماتي ارجع وياي شعندك باقي هنا
حارث ..ماما كتلج أبقى هنا يم أبوي
يارا ...يمه حبيبي اني اموت بلياك مو جنت تنام على أيدي ولَك ابوك لو بي خير مجان عافكم هالفتره ومن كبرت هسه يريدك فدوه اروحلك حبيب كلبي لا تعوفني
حارث ..اهوووو عوفيني اني مو زغير كبرت شنو عبالج بعدني صغير وارضع حليب يمه كبرت واحتاج أبوي وعمي هنا مدللني لاتعبين نفسج أبوي كمل نقلي من بغداد وحا اداوم هنا وبعد لاتعيدين هذا الحجي ما ارجع وياج
يارا ..يمه نسيت تعبي نسيت أسهر وياك للصبح نسيت كل مداراتي الكم وحرمت نفسي من أمور كثيره علمودكم
       كل كلامي وتوسلاتي مافادت ويه حارث طلعت منهم ودمعتي بعيني تلاكيت ويه معد بالباب من شافني سمعته يكول هاي شعدهه جايه لو ما الناس بالبيت جان عرفت شغلي وياها ...باوعت عليه ودموعي على خدي شعرت بالهزيمة وانتصار معد علي ...صعدت بالسيارة  والسائق مشغل أغنيه نور الزين (مايرجع بعد )واشعر تنزل بدل الدموع نار تحرك خدودي آه وألف آه يا ابني سويت فيديو وخليت صورة ابني ويه الاغنيه
يا ضوى عيوني اشلون انام الليل وانت بعيد عني اخ يا معد كل هذه من مخططاتك وصلت للبيت امي وأبوي وياي راحوا بالعزا ركضت لغرفتي ودموعي تجري عالمخده لحد ما غفيت واشعر كان صخره على صدري حتى نفسي ضاق كعدت الفجر صليت وطلبت من اخوي يوديني للأمام الكاظم
كعدت باب المراد
يارا ..ياموسى ابن جعفر ماراح ادخل لا كاعده بباب المراد وابجي واشهك تقبلهه يأخذون روحي مني تقبلهه يأخذون ضنايه وابجي
       (اريدهه بجاهك عند رب العالمين ...أريدك تبهذل الي بهذلني )
رجعت للبيت مكسورة وحالتي حاله وامي وأختي يصبروني بقيت ما اكل حتى الاكل مايهمني بس كاعده وابجي بالليل من نمت حلمت حلم يخوف
(شفت بيت عيالي تنزل عليهم نار من السماء وياهم بنت ما اعرفهه ولا شايفتهه ) باوعت للسما وكلمت ربي (الهي اشلون تقبل نار بسمائك ) ورآها صحيت من النوم
بعد أسبوع من هذا الحلم المفزع الي لحد الان أتذكره بتفاصيله واجاني خبر
محمود ..تعالي بابا يارا سمعت اخبار مو زينه بيت عيالج
يارا ..خير بابا شصاير وحروثي
محمود ..يكولون معد قتل زوجته
يارا ..عزا ياوحده منهن
محمود ..الاخيرة وحاليا كل رياجيل الي بالبيت ماخذيهم تحقيق
~~~~~~~~~~~~
تفاصيل الجريمه
~~~~~~~~~~~
شهد الزوجه الثالثة لمعد أهداها ابوهه هديه طمع بفلوس معد مع فارق العمر الي بينهم ،،،،
البنت كانت نظيفة مرتبه خدومه ،،،بس معد من سمع بزوجته مائده بعد ما خلعته تزوجت شخص أهله اصلهم فلح مو ملاك بهيج تصرف يعتبر هالموضوع كسرة خشم اله تنرفز وصار اعصاب
بالليل معد يتحجج ع شهد وظاربهه بكل مكان بجسمهه بحيث جسمهه بي قطع زرق بكل مكان اثار الضرب
يوم الجريمه ..شهد منظفة البيت من الفجر تكعد ومسبحه بنته وابنه الي هما أطفال مائده لان مائده عافت الأطفال عليهم وتزوجت بالاضافة لشغل البيت شهد تحلب البقره وتساعده بالبستان غير الطبخ وبوقتها كانت حامل ،،،،معد حاجي يم ابنه (الْيَوْمَ الا أقتلها واموتهه )
شهد كانت يم ماطور السقي اجاها  معد يصيح عليها
شهد .. جابت المسدس و اذا تقربت يمي ارميك بالمسدس
معد ..هو الْيَوْمَ موتج على أيدي
ركضت ورمت طلقة ،،،، الطلقة فاتت بين رجلين ابنه والطلقة الثانية بالصاله والطلقة الثالثة قبل ما تضربهه انهزمت بالطرمه
   معد لوى ايدهه وأخذ المسدس وضربهه بخدهه الطلقة استقرت بالجمجمة
أهل المنطقة من سمعوا الرمي اجوي يركضون ومعد يريد ينهزم وأهل المنطقة كلوله وين تروح اخذهه للمشفى
زوجة خال شهد ممرضة بالمستشفى من شافتها بالسديه وغركانه بدمها انصدمت وتشوف معد يبجي ويكولهه شهوده لا تعوفيني وحدي
بس الممرضة انتبهت على أيده شافت اثار من تلاوة ويه شهد فهمت هو الي قاتلهه بلغت الشرطه وكلتلهم قبضوا عليه هو قاتلهه
قبضوا على معد واحمد وحارث ابن يارا وابن معد كولهم دخلوا تحقيق بالجريمه
بعد يومين أفرج عن احمد وحارث وباقي معد وابنه ومعد مصر على كلامه ان شهد هي انتحرت وحتى ابنه علمه يكول نفس الكلام
مايضيع دم المغدور ،، كل جريمه بيها ثغره ولازم ينكشف المجرم
بالبداية كلهم كالوا انتحرت  الضابط كله الي ينتحر مو هيج اول شي تصير عنده هستيريا لو حاله نفسيه وتتحول لكابه ورآها يفكر ينتحر بس يترك خط رجعه للحياة مو انتحار موت والي واضح البنت مجانت  تعاني من حاله نفسيه لان البيت متنظف وغاسله ملابس وناشرتهم بترتيب ...هذه جريمه قتل
بعدهه كالوا عصابه دخلت للبستان ولما الادله الجنائيه طلعوها كشف ع مكان الجريمه شافوا البيت نظيف وماكو دليل على دخول عصابه
ضابط التحقيق. عرف أكو بنت طفله بالبيت راح لبيت معد وطلب يكلمهه كونها طفله زغيره ومتعرف تكذب وجايبلهه وياه حلويات ونساتل وجبس
من سالهه وهي تاكل بالحلويات
الضابط ..احجيلي لولو اشلون انتحرت شهد
الطفلة .. عمو بابا ضربها بالليل والصبح هم ضربها بالمسدس لان كلتله لا تتقرب علي
الضابط .. عمو وين المسدس
الطفلة ..أبوي خلا تحت السرير
الضابط ..انت تكذبين علينا والدم
الطفلة لا عمو والله صدك حتى الوصلة الي مسح الدم بيها بابا حفر حفره بين الأشجار بالحديقة هناك ودفن الوصلة
من دورو عالمسدس فعلا لكو والوصلة هم لكوهه مدفونة بس معد ميعترف
اشتغل التعذيب والضرب اضطر يعترف وانحكم مؤبد
بعدهه صارت كعدة عشائر مابين اهلهه واحمد وعشيرته  ومن يحكي للشيخ
احمد ..هي انتحرت
الشيخ ..اشششششششش لاتسولف هاي السالفة وتضحك علينه بالعشائر نعرف الي ينتحر يضرب نفسه بأيدة اليمنى لو بحلكه لو براسه لو بكلبه
        الشيخ دارس وفاهم ويعرف بجرائم القتل
وهاي الجريمه مخطط إلهه بس ربك بالمرصاد
وطالبوا بمبلغ ٥٠٠ مليون لكن طبعا تصير بالكعده نزل لخاطر فلان وخاطر العم والخال ونزلوا المبلغ الى ١٠٠مليون  ..
بعدهه أهل شهد تنازلوا عن حقهم وخفف الحكم الى ١٥ سنه سجن
~~~~~~~~~
يارا ..اوووف ياكلبي صحيح مشتعل نار على ابني وفراكه بس بردت نص النار لما دخل السجن معد وأخذ جزاءة إنسان مجرم بمعنى الكلمة وعنده استعداد للقتل بكل بساطه
بس ابني بقى معاند وتغير علي حتى اتصال ميتصل بي الحقد الي بكلب ابوه حاول بتغيير مشاعر ابني وخلاه يقاطعني
اهلي اخذوا بيت بمنطقة اليرموك صحيح بوقتها احداث الطائفية انتهت لكن تبقى بعض المناطق مو امينه
اختي روجين تخرجت وأخذت ماجستير وصارت مدرسه معروفة اول مره بدت تدرس ابن جيرانه ومن درسته نجح وأخذ درجه عاليه من يومهه انعرفت  مدرسه ناجحة وصار عدهه طلاب كثير وحجز يحجزوهه صف السادس لان كل طالب يدرس عدهه يأخذ معدل عالي وبدت تجمع فلوس حتى تشتري بيت لاهلي وجندت نفسها تدرس من الصبح لليل ومتقبل تتزوج الا يتخرجون اخوتي
للحكاية بقية
~~~~~~~بقلم فردوس عبد اللطيف ~~~~~~~