#حفيدة_السلطان

البارت الثامن عشر والاخير

#حفيدة_السلطان
بقلمي..فردوس عبد اللطيف
البارت الثامن عشر / والأخير
بك يا زمان أشكو غربتي إن كانت الشكوى تداوي مهجتي قلبي تساوره الهموم توجعاً ويزيد همي إن خلوت بظلمتي يا قلب إني قد أتيتك ناصحاً فاربأ بنفسك أن تقودك محنتي إن الغريب سقته أيام الأسى كأس المرارة في سنين الغربتي قد كان نومي هانئاً فوق الثرى من غير شكوى أو عذول شامتِ من غير هم بالزمان وكربه
~~~~~~~~~~~~
كيان ..من سمعت بقرار يارا واهلهه يسافرون الى غير رجعه كرهت الدنيا ..رجعتلي حاله الوحدة و الغربه الي حسّيت بيها من فاركت امي ..فكرت اعترفلهه بس اخاف لا اخسرهه للأبد .. يمكن تتصور اني استغليت علاقته الصداقة وحولتها الى مشاعر بالحب بقيت مهموم واكبت الي بداخلي حتى اخواتي فهموا الموقف وطلبوا مني أتقدم لخطبة يارا لكن رفضت بسبب حرصي على استمرار علاقتنا
~~~~~~~~~~~~
يارا ..صفينا كل امورنا وقررنا السفر بعد ما أبوي استأجرلنا شقة بتركيا واخواني قرروا السفر عبر البحر لكن بقوا ينتظرون وصولنا
بيوم السفر
يارا ..هلو كيان هذه اخر مسج ارسله حانطلع للمطار
كيان .. اكدر اتصل بيج بالمطار
يارا ..أشبي صوتك مخنوك ؟ اَي اتصل
كيان ..لا مابي شي تعبان شويه
يارا ..سلامتك
وصلنا للمطار بعد إجراءات التفتيش سالوني على ابو أطفالي ..الحمد لله كنت محضره مستمسكات ورقة المحكمة الي تثبت حضانه أطفالي
كيان ..الووووووو
يارا ..هلو كيان اشلونك حانصعد الطياره أدعولي الله يسهل علينا
كيان ..توصلون بالسلامه ...نزلت دموعي واني أكلمهه حسّيت اني ضيعت من أيدي جوهره ثمينة وين جرأتي ليش خفت اكلمهه واعترفلهه بحبي
يارا ... نزلت دموعي واني اصعد الطياره بس من اباوع على أطفالي وأتأمل أخذهم الى مستقبل أفضل اصبر كلبي واغلقة وأفكر بعقلي ..هكذا هي الحياة تعطينا مانتمنى بوقت غير مناسب مما تظطر تختار وتترك قلبك يداويه الزمن .. آه ياقلبي كم جرح تحمل .... ابني بعيد عني والإنسان الي تعلقت بي حا ابتعد عنه آلاف الكيلو مترات ..هل سنلتقي يوما ؟ نتركها للزمن
وصلنا لتركيا استقبلنا والدي وإخوتي اوووف شكد مشتاقتلكم اخواني حبايبي وصلنا للشقة
هاني .. الْيَوْمَ اجمل يوم واحنا لازم نوثق هذه بصوره للذكرى ..احنا حانسافر تهريب
أم هاني .. يا يمه وين ترحون
هاني امي العزيزه حانطلع تهريب نروح لالمانيا
أم هاني ..يمه ماصدكت اجتمع وياكم تالي تعوفوني
هاني ..حسبة الامم المتحدة طويله من بأجر أخذكم اقدملكم انتو ويارا واطفالهه فايل وحدهه لان كمطلقة حايتسرع فايلهه وأنت وأبوي معاليكم شي عدكم تقاعد وارد الورشة حايكفيكم للعيشه بتركيا
أم هاني ..يمه إبقو ويطلعونه سويه
هاني .. بقائنا هنا سنين انتظار صعبه خلي نطلع تهريب أفضل والي كاتبه الله يصير
~~~~~~~~~~~
من الْيَوْمَ الثاني قدمت على الامم المتحدة ورجعت أخذت شريحة سيم كارت ..هنا بتركيا النت عالشريحه وارخص من العراق
اول شخص راسلته كيان
يارا ..هلو هذا رقمي اشلونك
كيان ..الحمد لله عالسلامه اشلونكم الأهل شخبارهم
يارا كولنا زينين بس صوتك معاجبني اشبيك ؟
كيان ..اني تعبان واخاف احجيلج وتقطعين علاقتج بي
يارا ..ليش تفكر هيج انت اول شخص راسلته من هاي اعرف معزتك
كيان .. بدون اَي مقدمات (اني احبج احبج احبج ) ومن عفتي العراق حسّيت مخنوك غربه  ووحده بلياج
يارا .. نزلت دموعي شجاوبه (كيان )
كيان ..خليني اكمل اعرف الي حادكولي جهالج واهلج اني مستعد إجي لتركيا واخطبج من اهلج وجهالج اني أتكفل بيهم
يارا .. كل الكلام الي حجيته وهم ما أريدك تتعلق بوهم أسباب هوايه تمنعنا نكون لبعض
كيان ..يارا عليج بدأعة جهالج تحبيني لو لا كلمه وحده تغني عن اَي كلام
يارا .. سكتت صعب أكول اَي وصعب اكذب وأكول لا
كيان ..ليش تسكتين جاوبيني اَي لو لا
يارا ..اسمعني فدوه لعينك
كيان ..اَي لو لا
يارا ..اَي احبك مثل ما انت تحبني بس ارفض نتزوج والاسباب انت تعرفهه
كيان ..لا تستعجلين بقرارج فكري يابنت الناس لاتضيعين حبنا احنا متوالمين
يارا ..انت تعرف اني مرتبطة بأهلي وأطفالي وصعب اعوفهم بنص الطريق ...اني مو انانيه مصلحه أطفالي اهم من حياتي اني
كيان ..واني الي حبيتج وتعلقت بيج تعوفيني وحيد ؟
يارا ..انت ممكن تتزوج وتاخذ احسن وحده لكن أطفالي صعب يلكون أم تعوضهم حناني خصوصا بعد ما ابوهم تزوج
كيان .. طيب خلينا نتواصل يمكن تغييرين رايج
يارا ..نتواصل ماكو أشكال
~~~~~~~~~~~~
يارا .. ودعنا اخوتي وسافروا هما ونسوانهم وأطفالهم
اخ ياكلبي على فراك الاحبة دنيا غريبة بعد ماتجمعنه عالمحبه والحنان نفترق وكل شخص يختار طريقة
بعد أسبوعين وصلوا اخوتي لالمانيا والحمد لله ..كل بداية تكون صعبه اخوي هاني فتح ورشه والحمد لله شغله زين لان والدي علمه صنعه صح خسر الدراسة لكن عنده مهنه كدر يشتغل ويعيش هو وعائلته عنده طفلين ولد وبنت
اخوي مهند .. أخذ ماجستير وقدم عالدكتوراه وأخذ درجة عالم بالبحوث الي قدمهه نسبة ذكاء الانسان الطبيعي من ٨٠الى ١٠٠ واخوي درجته ١٥٦/
اخوي علي ..طلع لهولندا وحاليا يدرس ماجستير بالليزر والجزيئية والطاقة ومتفوق والذكي يأخذ حقة بالدول المتقدمة
اخوي مهيمن ...بقى يم اهلي يهتم بأمورهم
اختي روجين ..اختي حنينه بشكل ضحت لأجل اخوتي وحرمت نفسها من تعيش حياتها مثل اَي بنت ساندت والدي وتحملت مسؤلية اخوتي لحد ما تخرجوا من كلياتهم وصاروا شوكه بوجه عمامي الي ولدهم فشلوا بالدراسة وبالحياة روجين كانت العمود الفقري للبيت بعد والدي تعبت ودرست اخوتي وأدت الي عليها تقدملها مهندس يشتغل بالامارات ووافقت وتزوجت وعافتنا آه ياروجين مكانج خالي اختي حبيبتي وحاليا هي مدرسه بابو ظبي بأحد المدارس الثانوية ومحبوبة من الكل بس ادعولهه ربي يرزقهه بطفل ينور حياتها
~~~~~~~~~~~~~~~~
كيان ...يوم بعد يوم أتعلق بيارا واحبهه اكثر ..اكتبها خواطر وإشعار نابعه من كلبي ومن شعوري
( يا اول عشك ياسوالف ليل يا اول بسمه انزرعت على شفافي
وَيَا واهس خلك من يمر طاريك ويلي صرت انت كل غايتي
مجنون اني من عرفتك لليوم بس جنون عرشك وانت آفتهم حالتي
حبيتك ألك وعفت كل الناس مافكر بغيرك ولا باليحبون
انت أصبحت كل غايتي وَيَا اجمل عشك يشهدله التاريخ وَيَا اول حضاره  نبني بولايتي )
يارا ..تعرفت على اخوات كيان اخته الكبيرة اميره انسانه خلوقة ومتدينة احترمهه واحبهه هي الي ربتهم وتحملت مسؤلية اخوتها بعد وفاة والدهه ووالدتها ولمتهم وحامله هم الكبير والصغير وماتقبل بالغلط اخته سميره نفس الشي وإخوته الاربعه كولهم متزوجين ومستقلين الا كيان
~~~~~~~~
كيان ... آلو وينج ليش خطج  مشغول
يارا ..كنت احجي ويه بنت خالتي
كيان ..هااااا
يارا أشبي صوتك مخنوك احجي الي بكلبك
كيان .. يارا اني أغار عليج حتى من نفسج من بأجر تتحجبين وماتطلعين لأي مكان الا بأذني
يارا ..اشو تريد تتحكم بي باي صفة
كيان .. احسبيني حبيبج خطيبج ابوج لج باباتي اخاف عليج من كولشي
يارا ..اني اكبر منك شنو باباتي بعدين اذا ما أنفذ
شحجيلكم حبيبي عصبي لدرجه يأذي نفسه جاب جلكان بنزين وفرغة بالغرفة وقفل الباب ورمى المفتاح خارج الغرفة و
كيان .. هسه ارتاحيتي هذه الجداحه حا أشعلها كدامج واحترك وشوفيني كدامج
يارا ..يبووووي فدوه كيان لاتشعله لخاطري فدوه بعد ما استفزك
كيان ..كولي احبك
يارا ..احبك يامجنون
كيان ..اَي مجنون بحبج انت خليتي بي عقل شوكت أجي اخطبج ؟
يارا .... شنو تخطبني  وجهالي ما اكدر أتخلى عنهم
نبقى نسولف طول الوقت وكيان كلما يتعصب علي يسويله سالفة يخليني اتوب
كيان .. شوكت نتزوج اهلي جاي يضغطون علي اتزوج واني انتظرج تنورين بيتي
يارا ..اهلك ما اعتقد يقبلون بوحده  مطلقة واكبر منك وعدهه أطفال فكر كيان فكر بالموضوع احنا كبار وندرك الي جاي نسوي
كيان ..باعي علي  لعد
يارا ..يبوووي لا فدوه اروحللك ليش تخلي إيدك بالفحم مال النركيله ليش تحرك إيدك هذا تعذيب للنفس
كيان .. ولج وأفقي بي واني حنين وحباب وأكون ألج زوج مثالي ولج بنات الكون كلهن ما يملن عيني انت الهوى وانت الماي
يارا ..اشلون اتزوج وابني يوسف شكوله ما اعتقد يتقبل الوضع ولاتنسى حارث بعده ميحجي وياي
كيان .. مستعد انتظر وابقى بدون زواج طول العمر
~~~~~~~~~~
كيان ..حبي ليارا حب نظيف وطاهر حبيتها بجنون كنت أتمنى اكدر اترك شغلي وأروح يمهه بتركيا ومستعد أبقى بس اباوع عليها حتى لو مانتزوج بس المهم أكون بقربهه لكن ما اكدر اخسر وظيفتي ولازم أبقى بالعراق ،، بس خايف من الْيَوْمَ الي بي يطلع لجؤئها وتسافر وتتركني خوفي كل يوم يزيدني قلق وتوتر ،،، تمنيت لو متقدم لخطبتها من كانوا ببغداد كان ممكن اكدر احل الموضوع لكن جاي يتعقد وحبي إلهه يكبر
لحد ما فد يوم فاتحتني يارا بموضوع زواجي من امرأة اخرى وكان طلبها بالاتفاق مع اختي اميره الي كانت اقرب انسانه الي وتعرف وظعي ومعاناتي كشاب عايش لوحدي احتاج لشخص يخدمني  مثل اَي إنسان ،،،،،
اهلي يحبون يارا ومن طلبت منهم يختارولي عروس ارتبط بيهه مع انهم يعرفون بالحب الي بينا ولكن ضحت بمشاعرهه وداست على كلبها وكلمت اختي عالرغم من اني رافض هالموضوع رفض قاطع
يارا .. يا ابن الناس شوف حياتك ما اريد أكون انانيه انت لازم تتزوج وتكون عائله وتنجب أطفال يحملون اسمك وزوجه تهتم بيك
كيان ..منو مشتكيلج
يارا انت إنسان حساس ومتريد احد يمن عليك يخدمك لو يغسل ملابسك اني فاهمه حاجياتك
~~~~~~
بعد مرور مده أقنعتني بالفكرة كان امامي بنات كثير وخيرتني كنت مسلوب الاراده
كيان ..انت اختاري اميره على ذوقج
اميره .. ماكو غير سما بنت عمو جلال خلق واخلاق وبنت عائله وملتزمة خلي نروح الخميس حتى تشوفها
كيان ..ها لا اني ما اروح المهم عجبتج
اميره .. راح تعيش وياك عمر كامل ليش ماتروح تشوفها
كيان .. الي حاتزوجها حتخدمني وبس
رجعت على يارا
كيان ...حبيبي انت مواقفه على زواجي من سما حبي لاتضغطين على نفسج اني مستعد أبقى طول عمري بدون زواج وانتظر ولو بصيص أمل توافقين نتزوج انتظر تتغير الظروف حتى البيت الي اشتريته كنت احلم تجين  تنوري واعيش وياج كنت احلم أعيش مع الانسانه الي احبها وتحبني
سكوتها قتلني أحلامي راحت تعبي وتعب عمري راح هدر بسبب رفض يارا زواجنا ضيعت من عمري وشبابي ١١سنه كظيتها شغل ولاتهنيت بشبابي مثل باقي الشباب ولا حققت حلمي الي كنت مخططله ..هنا ادركت ان المال مو كلشي بهالدنيا ولا هو سر السعادة عكس الي كنت أتصوره ،،،،بصراحه حبي ليارا مايعادل مال الكون كوله
~~~~~~~~~~~
يارا ..آه من الظروف والقدر الي لعب بي لا عشت طفولته ولا شباب ولا مراهقه ولا حب اخ منك يا زمن تعطي وتاخذ وبعض الأحيان يكون الاوان فات كلبي من نبض وحب كان الوقت متاخر اَي لان اني بهالوضع لازم أفني عمري لجهالي ما اريد اخسرهم ممكن أقفل كلبي ..اخخخ معقوله يارا تقبلين كيان يتزوج وحده غيرج ومنو اقترح اني معقوله وحده ثانيه تنام على صدرك كيان بعد ما حلمنا سويه ..بس مجبوره اَي مجبوره أتصرف هيج
اتصلت بأميره وطلبت منهه تخطبله وتقنعه بصراحه اني احجي وياها ومخنوكه وابجي وكيان من يسمع صوتي مخنوكه يتخبل
كيان ..حبي حالغي الخطوبه وابقى انتظرج مستعد أضحي بكولشي وانتظرج ما اريد اعوفج
يارا ..لا يا ابن الناس روح تزوج خلي يصير عندك أطفال يحملون اسمك
اني اقنع بي والنار تاكل بي ..مرات اصبر نفسي 
كيان ..يارا مستعد من بأجر أحجز واجي اخطبج من اهلج
يارا لا لا بأجر عندي مقابله هههه وانت روح أخطب
قابلت بالأمم المتحدة وفايلي تسرع وكيان خطب وارتبط بسما
بيوم الجمعة كيان مو على بعضة حسيته
يارا ..حبيبي ليش متفتح كأم
كيان ..بابا اني طالع بره بالسوك وياي صديقي
يارا ..كلبي نغزني اتصلت بي وعالكامرا ..افتح كأم
ضحك ليش افتح كأم
يارا ..اااااااااخ من فتح الكام لابس قاط ومتحضر للمهر بدون شعور نزلت دموعي ودموعه
       مبرررروك حبيبي شايف كل الخير
كيان ..بابا ماردت اقهرج إنتي عزيزتي وحبيبتي ولا تتصورين أفرط بيج فد يوم ،،،،
شكله ضايع مقهور ،،،، الله وياك حبيبي واني مخليه أيدي على فمي كظيتهه بجي
من رجع من العقد
كيان ..ليش لحيتي علي مو كتلج أبقى انتظرج العمر كوله
يارا ...بقى يصبر بي واني بس ابجي حتى كلبي راد يوكف اَي يوكف مو سهله حياتي تتسرب من بين أيدي الانسان الوحيد الي ارتاحله كلبي راح لوحده ثانيه حتى من يشتريلهه يأخذ رأي اخر شي ماتحملت
ارحمني مو لهالدرجة اني بشر تريدني اكولك اخذلهه كذا وكذا وهي أخذتك مني
كيان ..باباتي ترى والله احبج وسما ماشايفهه وبالعقد ما تنبهت عليهه ولا نطيتهه رقمي
يارا ..انطيهه رقمك
كيان ..لا هذه ارقام خاصة بيج أخذ خط جديد وأراسلها منه
~~~~~~~~~
يارا ..بعد مقابلتين حصلت الموافقه على لجوئي الى كندا وبدء العد التنازلي للسفر وفراق الأهل والأحبة اخ يادنيا الفراق الفراق مفروض علينا لأجل مستقبل بنتي وابني وغادرت تركيا وذكرياتي وأهلي امي وأبوي أخذونه مجموعه عوائل كروب الرحلة كانت صعبه ومتعبه أنطوني شقة صغيره ودخلنا كورس لغة اني ويوسف وسدن كملنا ست أشهر اخذنه عالبلد تعرفت على عوائل عراقية بس كيان ميقبل اختلط بأحد ..خوفه وحرصه علي اكثر حتى من اقرب الناس من انشغلت بالدراسة حاولت أخفف علاقتي بكيان لكن حبنا باقي للأبد يبقى قلبي ينبض بحبك يا أغلى إنسان صحيح اتضاهر بالقوه أمامه وعدم الاهتمام لكن الحقيقة اني اضعف من اَي إنسان بمشاعري وحبي بس ماردت اخسر يوسف وسدن
ادعولي ربي يصبرني واعيش لأطفالي وأكمل رسالتي وأوصلهم لبر الأمان والتقي بابني حارث واجتمع ويه اخوتي صحيح افترقنا لكن نتأمل نرجع نجتمع مثل قبل كعائلة اجتمعت عالمحبه والحنان
معد قضى بالسجن خمس سنوات وطلع بالعفو
عمامي كل واحد أخذ نصيبه ممازرع من حقد وقطيعة رحم وطلعت بابنائهم لاتتوقعون يفلت إنسان من عقوبه رب العالمين
محمود تعرض لازمه قلبيه بعد سفر يارا والحمد لله أنقذه الكادر الطبي المتطور وماخبرو يارا الا بعد ماتحسن وطلع من المشفى صلاح توفى وبيته استولوا عليه اخوته ميقبلون يبيعوا بحجه يسوقونه وقف
فائزه أم يارا ... عدهه مرض السكر واثرعلى عيونهه ونظرهه ظعيف
هذه خاطره من يارا لكيان
الى من اكتب!!?
لا اعلم ربما اكتب لنفسي
او اعاتب نفسي التي لاتعرف ماذا تريد
الى متى ايضآ لا اعلم
كل الذي اعلمه اصبحت جثه هامده
لا استطيع مقاومة شيء
لا اجيد الحديث معك رغم لباقتي
رغم حبي واشتياقي لك  لكني لا اجيد وصف ما اشعر به
هل انتهى بي المطاف لأرضخ للواقع
او اخاف ان اتكلم لاني سأخسرك
هل يجتمع البرود والنيران سويه
كلا لانهما كلمتان متضدتان
اتطلب مني ان لا أؤذي نفسي بالتفكير
هل بأمكاني نسيان مايؤلمني
اتعلم لو جمعت كل الحروف بكل لغات العالم وأصغت لي اجمل الكلام لتواسيني به
لا اشعر بشيء
ليس لاني عنيده
او مثل ماتضن انت بأن حبي لك تغير
لاااااااا....وانما لايوجد شيء بهذا الكون يخفف عني آلمي
ولايعوضني بك
بات كل شيء حولي مؤلم وممل حتى وصلت لمرحله اليأس
نعم كرهت نفسي التي كانت بيوم من الايام لاتعرف القساوه
ولاتعرف الكره والانانيه
اصبت بمرض لا استطيع الشفاء منه
غيره وكره وقساوة قلب
اتريدني ان اشفى من كل هذا
او اتقبل الأمر بسهوله!!!!!!!!!!
الى نفسي اكتب .......!?!?!?
اخر كلام ارسله لي كيان ..
بعد الاتصال الصار ويا خطيبتي جنت مجبر ان اتصل فكان اول اتصال بيني وبينهه كأنما احجي ويا شخص مو جزء مني شخص بعيد عني كل البعد جان كل همي يارا فحتاريت بين امرين بين حبي ل يارا وبين واجب ان احجي ويا خطيبتي حاولت ان اخلق  اي مشكله وافتعل  مشاكل بيني وبينهه لمجرد ان ابتعد عنهه مجرد ان انطي وقتي ل يارا وهاي اوقات الاتصال تحملت مسؤوليتين مسؤليه اني مضطر اتصل بخطيبتي مجبور ومسؤولية وهمي الاكبر ان ما افكر اجرح يارا حاولت بكل طريقه وبكل وثمن ان اهدئ يا را لان جانت كلش متألمه وهالشي دمر حياتي وفكرت بالانتحار لكوني اني سبب بتعاسة يارا والانسانه اللي حبيتهه اما عن خطيبتي فأي احساس مايراودني اتجاهه يعني احس نفسي خسرت كلشي حتى من اتصل بيهه اكون قليل كلام وياهه لان ماكو احساس بيني وبينهه او موضوع كمستقبل احجي بي حسيت نفسي بأن اني ضلمت يارا وضلمت خطيبتي اللي مالهه اي ذنب اللي مجرد فرضهه القدر عليه اللي كانت مو من اختياري ولا الانسانه اللي جنت افكر بيهه ولا جزء بسيط اصلآ كمت احس بنفسي اني انسان ظالم ظلمت الاثنين وصرت انسان بحيره من امري انسان خسر كلشي خسرت الماضي والحاضر والمستقبل اما اذا تسأليني عن خطيبتي فأعتبر وجودهه والعدم نفس الشي ماكو فرق اذا سابقآ اذا جان عندي هم فجنت احجي ليارا اللي هي اقرب الاناس اللي اما حاليآ احس نفسي شايل  كل هموم الدنيا بس ما اكدر ان اشكي همي لاحد اذا شكيت همي لاختي هي اقرب وحده الي اميره  تتأذى واحسسهه بأن هي سبب تعاستي واذا شكيت لحبيبتي  يارا  اجرحهه لان رح يكون همي واحتفظ بي لنفسي وصار كل همي ماجرح يارا وحاولت ان ماتركهه وحده وع طول اني وياهه ورجعت ونطيتهه وعد بأن رح يجي يوم اللي ننجمع بي سوا مثل ما جمعنا القدر واحنه واحد مايعرف الثاني وعدتهه بأن بأي يوم من الايام ترجع لبلدهه رح يكون الهه بيتهه الخاص بيهه ورح اعيشه احسن حياة وكلتلهه اني املك بيت وهذا رح يكون الج فحاليآ كل امنيتي  اشوف يارا سعيده واتمنى من الله ان ياخذ مني السعاده اذا كنت امتلكهه وامنحهه ليارا  وحاليآ ماعرف اعبر عن احساسي وعن ألمي انسان ضايع افكاري متشتته ماعرف شنو اسوي انجمعت كل كلمات الألم وصارت بيه صعب جدآ وصف ما اشعر بي واحسه يمكن اي شخص اذا يقرا اللي احسه يعتبره شي عادي بس اللي مر بظرفي رح يحس بيه وماتصور اكو شخص شاف الشفته الظروف جبرتني ع هواي اشياء والقدر كان  قاسي ولازم اتحمل واحارب كل هاي الظروف الصعبه حتى اسعد حبيبتي والانسانه اللي مالهه ذنب وصارت زوجتي مرات اتمنى لو متعرف ع يارا من زمان  جان هسه مامحتار بأمري بس هاي الدنيا مابيهه انصاف مانصفتني واني طفل حرمتني من والدي ومن شبيت حرمتني من والدتي مرات افكر واصفن اريد حل اريد اوصل لحل ما اقسي بي لا ع خطيبتي ولا ع يارا بس للاسف ماكو حل لهذا السبب فكرت بالانتحار مو ضعف لااا بس تعبت بشكل من التفكير من غيرت يارا عليه صعب اقنعهه وافهمهه رغم ماهي جبرتني ع هذا الزواج بس اعذرهه واتحمل وبنفس الوقت ماريدهه تتأذى احجي وياهه وع طول ماتغير شي بس تغار وتعصب وتتأذى اللي اطلبه من رب العالمين ان يصبر يارا وان يمكني بسعادتهه وان يجي يوم ونعيش سوا
~~~~~~~.  النهاية
حبايبي لهنا وانتهت  رحلتنا مع قصتنا لحفيدة السلطان أتمنى ان استمتعتم بقرائتها ترقبوني بقصة جديده
                    
~~~~~~~~~ الكاتبه فردوس عبد اللطيف ~~~~~~~