#حفيدة_السلطان

البارت الثاني

#حفيدة_السلطان
بقلمي فردوس عبد اللطيف
البارت.   الثاني
محمود ...
كلما يرفضون اهلي يخطبولي فائزه يزيد تعلقي بيها ولازم أحسم الموقف كفه بيها اهلي وكفه بيها الانسانه الي خفق قلبي بشوفتها ...
كلمت اخوتي الأكبر مني سامي وزهير وعدنان موقفهم كان صعب ورفضوازواجي رفض قاطع وهددوني يحرموني من حقي بالميراث
اني من اتخذ قرار مستحيل أتراجع بي اهم شي اقنع الوالده ورضاها علي هو الي يسعدني بزواجي
+++++++++++++++
محمود ..حجيه شكلتي تجين وياي تشوفين عروسه ابنج لو متردين
ام محمود ..يابعد امك اذا اجي وياك راح تصير مشكله ويه اخوتك خليني كاعده بمكاني واخذ شيخ محسن وخالك خليل  اني حجيت وياه يروح وياك يخطبلك البنيه وألف مبروك حبيبي
محمود ..يمه وجودج مهم بهيج يوم
ام محمود ..ابني كلهم امي مريضة مو اعرف اخوتك مراح يعدوهه ع خير
محمود ..خير ان شاء الله بس بالعرس تجين
ام محمود ..ان شاء الله وليدي ما اعوفك ربي يسعدك
+++++++++++++++++
تمت خطوبه محمود وفائزه بحضور خاله ومجموعه من وجهاء بغداد مع أعمام فائزه
والكل استغرب بعدم وجود اخوان محمود لكن محمود تعذر وخبرهم بان اخوانه مسافرين وعدهم خلافات عالورث مع بعض الورثة ...
وحددوا موعد الزواج بالعطله الصيفية بعد ما يكمل محمود بناء بيت الزوجيه
محمود ...الف مبروك حبيبتي فائزه
فائزه ..شكرا حبيبي
محمود ... اشو احسج مو سعيده
فائزه ..تريد الصدك ..اخاف اهلك رافضين زواجنا وحاندخل بمشاكل وياهم
محمود .. بصراحه ما اخفي عليج صحيح اخوتي رافضين زواجنا بس انت حاتعيشين وياي ومعليج بيهم راح ابني قطعتي الي بالكراده اخوتي يمنه نفس المنطقة واحنا نعيش وحدنه معلينه باحد
فائزه ..يعني ميدخلون بحياتنه ؟
محمود .. حبيبتي لاتخافين محد يكدر ياذيج طالما اني موجود
فائزه .. الله لا يحرمني منك
محمود .. حبيبتي شنو ملاحظاتج ع خريطه البيت شيعجبج شتوصيني لان باجر اروح المهندس يسويلي الخريطه حتى ابلش بأسرع وقت
فائزه .. ماعندي اي ملاحظات ابنيهه مثل ما يعجبك
محمود .. ترى المساحه 1000م راح اخلي البناء 700 والحديقة
300 من ضمنهه الممرات
فائزه ... حاتبني طابق واحد ؟
محمود ..لا حبي حضري نفسج اريد هوايه اطفال فد درزن وراح اخلي الطابق الفوك
بي صفحه للولد وصفحه للبنات والخدم ابنيلهم سويت بالحديقة
فائزه ... يمه محمود تريد درزن مابي احبل وأجيب واربي وانت منو يهتم بيك
محمود ..لعد الخدم المن موجودين انت بس عليج تأمرين وهما ينفذون
فائزه ..حبيبي اخاف فلوسك ماتكفي للبناء
محمود ... حبي الخير موجود لاتخافين
              بس راح احاول انقل وظيفتي لبغداد حتى اشرف عالبنات بنفسي
فائزه ..مو تعودت عليك اشلون حا اشوفك
محمود ..كل جمعه اطلع الفجر من بغداد وره 3 ساعات اني يمج وابقى لليل
فائزه ..حا اشتاقلك
محمود ..هو اني اريدج تشتاقيلي
فائزه .. اي محمود هيج تسويهه بي تعلقني  بيك وتالي تروح لبغداد
محمود ..غير حتى ابني عشنا الذهبي
++++++++++++++++++++
محمود ..رجعت لبغداد وبديت صراع مع اخوتي وبدت الحرب والاتفاقات بينهم علي حتى اعوف فائزه وأتزوج زمزم
هاي الدنيا كلمن يدور مصلحته ميفكر بمشاعر الاخرين ولا رضاهم او رفضهم
اخواني كولهم متزوجين من العائله علمود الورث لايطلع بره هذا الهدف الأساسي بكل زواجه تمت وصارو االكل متزوجين من الاقارب الا اني حا اتزوج الغريبه الي حاتدخل معتقل السلطان ...اني اسمي لان حياتنه تحددت بقوانين انفرضت علينا كوننا احفاد السلطان ولازم نبقى طول عمرنا ملتزمين بدستور السلطان والي يخالف الدستور لازم يتعاقب بالحرمان من الارث
الي كان مشجعني  موقف امي واخوي صلاح كانو وياي بكل خطوه اخطوهه
اخترت خريطه لبناء البيت حسب ترتيب البيوت التركيه تصميم مختلف عن بيوت اخوتي ذوقي كان مختلف عنهم
صممت الديكورات بنفسي وفهمت المهندس شنو الي اريده
بعد ما كملت خريطه البيت بديت الخطوه الثانيه وهي وضع حجر الأساس لبيت الزوجيه
بلشت بالبناء وبدوا اخوتي بحربهم ضدي
محمود ...زهير اشو المحاسب مجالبي الوارد الكل استلم حصته
زهير .. نطيك  الفلوس حتى تجيب العجميه على كلوبنه وتصرف عليها
محمود ..خطيبتي مو عجميه جنسيتها عراقيه بنت عراقي
زهير .. بس اصلهم عجم
محمود ..هذا مو موضوعنه محتاج الفلوس اريد اكمل البناء
زهير .. انت مطلوب وسدينه بيهم الدين
محمود ..حجي يادين الله يخليك
زهير .. شوف محمود احنا اتفقنا الاخوان بينا نطلعك من ألميراث ونشتري حصتك بالميراث
محمود ..بس اني ما اريد ابيع صحيح محتاج سيوله للبناء بس مو معنى هذا ابيع حصصي بالورث
زهير ..انت فكر بالموضوع ياما تترك بنت العجم وتتزوج زمزم او تبيع حصتك النه وروح عيش حياتك
محمود ..انتو تردون تتخلون عني علمود الفلوس ؟
        اني اخوكم دمكم ولحمكم تتفقون علي وتحاربوني علمود الورث لو شنو السبب
زهير .. انت تريد تدخل امرأة غريبه للعائله واحنا كولنا قرايب ومشاركين بهذا الخير تالي مرتك وولدهه يوكفونه بالمحاكم لو يبيعون الاملاك بكيفهم
محمود .. هاي انتو لكولشي حاسبين حسابه وبعدين ليش مرتي توكفكم محاكم ع كل الكلام ميفيد يظهر انتو اتفقتو وقررتوا بقى بس التنفيذ حتى بدون متأخذون راي
اني موافق ابيعلكم حصتي بالورث وراح استقل عنكم واعيش حياتي مثل ما اني اريدهه مو مثل ما انتو تقررون بعدين لاتنسى اني موظف وعندي راتب
زهير ..ههههه عنده راتب عمي راتبك ما يكفي مصاريف الخدم انت وين جاي تحجي 
المهم راجع المحامي ناطق هو محضر الاوراق للتوقيع
+++++++++++++++++++++++++
محمود ..مرحبا استاذ ناطق اكيد عندك علم بالموضوع الي جاييك عليه
ناطق ..اهلا وسهلا استاذ محمود نعم هذا العقد جاهز بس لاتستعجل انتو كلكم عزيزين علي وما اريد يصير خلاف بينكم
محمود ... يا استاذ هما حابين يطلعوني من بعض الاملاك واكو املاك مراح أفرط بيهه ومو بكيفهم بس حاجتي السيوله النقديه هي الي تظطرني ابيع حصتي وبكيفي
ناطق ... هذا حقك محمود الملك مينباع الا تخلي بمكانه ملك والا ميصير تفرط بي
محمود ..هاي شنو استاذ هو هذا تقييم حصتي اشو ربع الاسعار مقدريهه اني جيكت أسعار الاراضي والبساتين والبيوت ليش ابيع بربع السعر
ناطق .. انت تعرف اخوتك يا محمود ميدفعون اكثر وكل واحد يتحجج ما يملك سيوله وانت حر ترفض او توافق
محمود .. اني موافق لأنهم اخوتي وما اريد اتحارب وياهم الي يربطنه دم ولحم والفلوس تجي وتروح والناس مواقف
+++++++++++++++++++++++++++
محمود ...بعد ما استلمت المبالغ بديت أخطط لمستقبلي لوحدي وأحاول انسى اخوتي لان هما فضلوا الفلوس والبريستيج على اراده أخوهم
كرست وقتي لبناء البيت وانشغلت عن اخوتي ومشاكلهم وكلامهم بقت علاقتي بالوالده واخوي صلاح فقط
اما خطيبتي وحبيبتي فائزه صاحبه القلب الطيب والحنون
وجودهه بقربي في كل خطوه هو الي يخفف عني همومي
+++++++++++++++++++++++++++++
محمود حبيبتي فائزه بعد مابقى شي بالبناء بس جاي يصبغون اريد أخذكم لبغداد انت والوالدة حتى تختارين الاثاث
فائزه ..انت حدد الموعد واحنا جاهزين بس حبيبي اذا تاثث كل البيت حايكلفك هواي وتالي ميبقى عندك فلوس
محمود ..حبي اشتريت ارض بالمنطقة الصناعيه ورتبته وراح اسويهه اكبر ورشه لتصليح السيارات والصيانة والتبريد وحصلت وكاله لبيع أدوات احتياطيه
مشروع كامل متكامل
فائزه .. اعرف بيك محمود انت مرتب ومينخاف عليك ربي يبارك برزقك
محمود ..امين بس ناقصني وجودج بقربي
فائزه ..وخر ايدك محمود لا تجي امي صاير وكيح
محمود ..مرتي حلالي مو انشلع كلبي
         حبي حضرتي جهازج مو تالي دكولين الخياطه أخرتني وبعدني ما مشتريه حاجياتي
فائزه ... حضرت كولشي لا تخاف مستعجل
محمود .. اهم شي سيتأت النوم أريدهن كل الألوان
فائزه .. يمه منك انت اليوم صاير تتغزل شنو سالفتك
محمود ... معوده تعبت مفاركج وملتهي بالبناء واشتاقلج واتمنى تجين تنورين بيتج تدرين خبصت المقاول خبص وخليته يستعجل بتكمله كل نواقص من تطبيق الكاشي والكهربائيات والصحيات
حتى الحديقة جبت مهندس زراعي رتبلي الحديقة وتنسيق الأشجار وال زهور وسويت نافورة ع جهه حتى تبرد المكان
فائزه .. الله يساعدك حبيبي اعرف تعبت علمود تسعدني وتكعدني بيت مريح بس ترى اني انسانه قنوعه حتى لو مشتري بيت صغير نكعد بي المهم اني وياك سويه
محمود ...حبيبتي ما اريد يكولون مكعد زوجته بمكان اقل مستوى ..صحيح متهمني المستويات لكن طالما اني متمكن واكدر اوفرلج هالعيشه اذن اوفرهه واخليج اسعد انسانه بهالوجود واخلي كل النساء تحسدج ع سعادتج
فائزه ...شكرا حبيبي ان شاء الله اكون الك الزوجه الصالحه الي ترعاك وتربي أطفالك احسن تربيه
محمود ..بالمناسبه قدمتي نقل لو اجيب نقلج من بغداد من الوزاره
فائزه ..انت دبرهه من بغداد وخليني بمدرسه قريبه ع البيت
محمود .. اسبوع القادم أراجع التربيه عندي صديقي يداوم بالتربية اروح عليه ينقلج حتى بعد ماتجين للكوت
فائزه ..يووو واهلي وصديقاتي وطالباتي حا اشتاقلهم
محمود .. من يوم زواجنا تنسين الماضي وحياتج السابقة وحاتدخلين لمملكه محمود وتباوعين للمستقبل
فائزه ...فعلا كل بدايه صعبه اكيد احتاج فتره أتأقلم واتعود ع الجو الجديد
++++++++++++++++++++++++++
محمود ...كملت البيت حتى الصبغ واخذت والدتي واخوي صلاح يشوفون البيت
ام محمود .. بسم الله ماشاء الله الف مبروك وليدي ربي يسعدك ويجعله بيت السعد والهنا
صلاح .. مبرررروك محمود تستاهل كل خير البيت بي ذوق
رفيع والديكورات فد شي روووعه اشلون جتك الفكره تبني شئ مختلف عن الابنيه التقليديه
محمود .. اسكت وخليهه صارلي سنين أخطط لهيج بناء
بس الحمد لله كدرت انفذ الي في بالي
صلاح .. تستاهل كل خير وربي يباركلك بزواجك ويسعدك
محمود ... احنا حددنا موعد الزواج بعد شهر والحفلة حاتكون هنا بالبيت وبطاقات الدعوه لا خوتي ادزهه بايدك لو اني اوديهه ؟
صلاح ..انت تعرف الأصول لازم انت توديهم حتى لا يكولون محمود ما اجه بنفسه لاتخليلهم منفذ يحجون منه عليك
محمود .. صحيح كلامك اني مشايل بكلبي عليهم بس هما بعدوني عنهم ولخاطرك وخاطر الوالده راح اروح بنفسي واودي البطاقات
++++++++++++++++++++++++++++
محمود رحت جبت فائزه وامهه يم الحجيه وبقوا اسبوع يمنه
كل يوم نطلع من الصبح اني وفائزه نشتري الاثاث
محمود ... حبيبتي تدرين النجار من رحتله وحدي كال لعد العروسه شعجب ما جتي تختار بنفسهه غرفتهه
فائزه ..حبيبي كولك ذوق اختيارك للغرفة يجنن مجنت متوقعه هيج فخامه عاشت ايدك
محمود ..هو عنده كتلوكات واني ضفت بعض اللمسات من ذوقي وصارت هيج
فائزه .. بقى المطبخ وألنواعم والفرفوري
محمود .. نروح للشورجه ونأخذ سيتات كامله بس انت سجلي بورقة حسب خبرة امي وعمتي
فائزه .. خوش فكره لان اذا نأخذهم ويانه مابيهن يمشون وكلسع يتعبن
محمود .. معوده هاي فرصة نكون لوحدنه  اني والقمر
فائزه .. مابقى شي
محمود .. طولت مشتاق تنامين بحظني حبيبتي ترى هوايه طولتي
فائزه ... امشي محمود لا نتأخر
محمود ... بسيطه كل هالتعب اطلعه منج بيوم العرس
++++++++++++++++++++++++++
محمود ..بعد ما كملنه تحضيرات البيت وتحضيرات الحفله
وبطاقات الدعوه رجعت فائزه للكوت وبقى اسبوع ونتزوج
اخذت البطاقات ورحت لأخوتي
محمود .. تفضلوا ع زواجي يوم الخميس
زهير .. اي بيهه الخير وليش متعب نفسك
محمود ..تعبكم راحه
محمود ..نرجس انت اختي ومتحتاجين بطاقة دعوه
نرجس ..انت من كل عقلك مسوي عرس وعبالك نحضر لا اني ولا اخوتك
محمود .. اني مسوي العرس والي يحضر اهلا وسهلا والي مايحضر بكيفة
ورحت لأخوتي سامي وعدنان ونفس وضع زهير ونفس الموقف بس اني ما بينت الهم اني متاثر من موقفهم
انتظروني بالبارت القادم ونشوف حفله زواج محمود وفائزه
******بقلم فردوس عبد اللطيف******