#قضيه 45

#قضية 45
ام احمد
الثالث
علي شكو احجي
ابويه بالكهوة واكع وناس مودينه للنعمان وعمي اجاني للكليه وكلي (طبعا يروح عل علي لان اني سديت كل بوب تواصل وياهم)
رحنا عل مستشفى كانوا عمامي احمد وسرمد اهناك سلمت ودخلت عل والدي حالته متخربطه ضغطه صاعد حاطين اله مغذي انفلاونزا ماثرة عليه انقهرت هوايه كان مفروض ابقه وياه ومااعوفه ضلينا لليل يلا طلعوه الوالدي سويت اله شوربه وخليته بغرفته وبقيت وياه للصبح شويه تحسن ذاك اليوم ابد ماعفته داريته حسيت بيه مكسور وبعينه الف اعتذار النه وعل اهماله كل هاي السنين النا لصبح علي استلم مناوبه عليه واني استغرقت بنومه طويله وطبعا طيف امي ابد مفارقني دومها احسها قريبه مني وماان افتح عيوني حتى يختفي طيفها
ماكعدت لليل مكسر جسمي جان علي. جايب اكل من بره مقهورة عليه وممكعدني من نوم ظليت الليل كله ادرس بالقضيه 45 واكتشفت هواي اشياء تثبت برائه ابنيه… ..
طوال اسبوع اني اشتغل عل قضية 45 واتاكدت تماما ان الضحيه قتل بعد هرب ابنيه الي هيه زوجته ب12 ساعه عل اقل يعني هيه هربت وراها هو انقتل وقبل مااطلع للبيت اجاني ابو محمد وجاب الي نتائج التشريح وكانت صدمه الي ان ابنيه كانت حامل بالشهر الثالث تقريبا وهذا دليل اخر وقاطع عل برائتها وبشكل نهائي
خلال ايام حضرت كلشي حته احوله القضيه للقاضي واثبت برائة ابنيه الي اسمها جان سمر بس صار شي بذاك اليوم خلاني اعيش اتعس لحظات حياتي… .
قبل خروجي من مكتب دخل ابومحمد عليه يبلغني ان اكو رجل مهم يريد يشوفني
خليه باجر يجي هسه اتاخرت عل بيت وانت تعرف حالتي
ما ان خلصت جملتي الا رجال مهم دخل بزي رسمي باابتسامه عريضه وامر ابو محمد ميدخل علينا احد
مرحبا ملازم همام
اهلا سيدي (شفت عل جتفافه سيفين وشعار جمهوري يعني لواء ركن)  اخذت اله تحيه العسكريه احتراما اله
ملازم همام راح ناخذ من وقت شويه
تحت خدمتك سيدي
اتفضل همام
العفو سيدي من بعدك
راح اصيحك همام شنو رايك
شتفصل سيدي اني البس
همام انت متعرفني معليك برتب عل جتفي اني اصير اخو (ع.ن)
اتشرفت بيك سيدي (واني مصدوم من معلومه)
اني جان اكدر ادز احد يفهمك بدال عناء جيتي لهنا بس اني اعرف انت ضابط وشريف ولازم اقابلك واشوفك
الي شرف سيدي
همام اريدك تسد القضيه وتتركها مثل مااجتك وكل ادله الي جمعته تتخلص منها
العفو سيدي بس سبب ليش اعوفها انت اخوك انقتل وتريد نلزم الجاني
ههههههه ملازم همام اريد القضيه تنسد
سيدي (رفع ايده دليل عل امر وان اسكت )
قضيه 45 تنسد وهاي اخر حجي عندي
كمت عل حيلي وگتله اسف سيدي هاي تضليل للعداله (وماان خلصت جملتي حته طگها بضحكه عاليه) العفو سيدي كلامي مابيه شي يضحك
اني كالوا الي راسك ناشف بس مصورتك هيجي شوف القضيه 45 تنسد وانتهى
اسف اني راح اوصلها للقياده العليا ومااسكت
نهض عل حيله وبين عليه الغضب بس ضبط روحها وكال لاتفكر بروحك
شتقصد سيدي
فكر بااخوتك وترا انت كلك نجمه عل جتافك وناسي روحك قبل متوصل القضيه للقياده العليا انت وعائلتك راح تختفون فكر (غمز الي بعينه وطبطب عل جتفي وطلع)
حسيت بغضب عارم يجتاحني هددني بعائلتي ويريدني اسكت بكل بساطه بس ليش اذا هو اخوه المقتول ليش ميريد يعرف القاتل الااذا كان هو وره قتله معقوله يقتل اخوه بس ليش يقتله سبب اكيد سبب قوي الي يخليه يقتله…
اخذت جاكيتي وطلعت من القسم واني مخنوك اريد هوا بديت اسمع اخبار بالراديو وكل اخبار تاكد عل وقوع الحرب ويه امريكا وهل مرا حرب اكيده سديت الراديو مااريد اسمع بعد دخلت للبيت واني سالفه توديني وسالفه تجيبني استلمني علي يحجي جنت اشوفه بس مااكدر اسمعه زين عبالك عل اذاني قطن عفته ودخلت الغرفتي واني افكر بالحرب مالتي اذا خضتها يعني اخسر احد من اهلي خفت من هل احتمال مااتحمل افقد بعد من اهلي غمضت عيني واذكر كلام لواء تهديده الي…
دخل علي عليه همام هاي شبيك يمعود شوكت تسوي التمن حته ناكل
انتبهت عل حلك علي والحجي يطلع منه واني ولااسمعه بوضوح
همام همام هاي شبيك جنك سكران يمعود احجي كلمه
علي تعبان ممكن تتركني
همام انت مريض شي اجيب الك دوه من صيدليه
لا مابيه بس اريد انام ممكن
اي نام انا راح اطبخ انت ارتاح
تركني علي خليت راسي عل مخده محسيت اله بحراره تطلع مني يمكن اخذت برد واستسلمت النومه طويله…
همام  همام هاي انت جسمك نار كلي شبيك همام كوم اوديك عل مضمد يضربك ابره تخفف عنك صخونه
علي علي امي امي
اوف همام امي شبيها بعدك تحلم بيها ساعدني شويه همام شويه انهض راح اصيح مروان
امين تعال بحضني مشتاق الك
اوووه انت تهذري خلي اصيح مروان ونجي ننقلك للمستشفى
جنت مصخن واهذري من شدة انفعالي وخوفي عل اهلي اتمرضت ظليت يومين بالفراش وعلي يداري بيه اما والدي رجع مثل قبل هملنا ورجع يقضي وقته بين الگهوة واهله من رجعت للدوام جان لازم اسلم القضيه واسدها ماكو خيار اخر غيره…
بدت امور تطور وصارت الحرب ماطولت شهر ودخلت امريكا واحتلتنا يمكن اني كوني ضابط متحملت الخسارة ودخلت بحزن شديد جان الكل فرحان بسقوط النظام وناس طلعت للشارع تعبر عن فرحه بالسرقه ونهب للدوائر الدوله وتخريب البلد… .
اكو بعض ناس ظلوا بالبيوت وسدوا بابهم… ..
هذا اليوم ذكرني بيوم انتصارنا عل ايران بالحرب ايرانيه اكو فرق جبير بين هذا اليوم وذاك اليوم
ذاك يوم كنا شعب واحد وانتصرنا ومخلينا احد ياخذ شبر من ارضنا
وهذا اليوم صرنا اطياف ومذاهب وكلمن يگول الي
وضاع البلد ودخل المحتل النا مو بس امريكا لا جانت كل دول الجوار تنتظر ان نوگع وتتدخل وتحتلنا… ..
بدت امور تتازم وانحلت دوائر حكوميه وانحل الجيش وصار البلد تمشيه غربان سوداء تقتل وتنهب عل الهويه… ..
بالعسكريين الكبار وبااخص الطياريين الي قصفوا داخل ايران…
بدت حرب نفسيه اليه والدي بدا يخاف عليه ويرغب الي فكره الهجره بس اني جنت ارفض فكرة السفر وترك عائلتي وبااخص مروان الي مااكدر اعوفه اخاف عليه لايضيع ورايه… .
وباليله اجاني صديق اليه مقرب جان طيار ودعني وانطاني عنوانه بسوريا وگلي لازم اسافر قبل مااوكع باايد المليشات
همام لازم تسافر وانت ماعندك عائله برگبتك
مااكدر يوسف اني جنت مجرد ملازم بسيط ماعندي شي حته يستهدفوني
غلطان اول مراح يكملون الكبار بالجيش راح يردون عليك
يوسف مااكدر اعوف اهلي
همام انت سافر وسوي الك شغل وبعدين دز عل اخوتك
مااعتقد اهلي يطلعون بااخص علي بعد زياده راتبه واموره اتحسنت وابويه هم تقاعده صار زين
همام عليه گلت الك وانت فكر ترا هيه مو مرجله حته تگول اواجهم هم راح ياخذوك غفل وراح يغدورن بيك هاي اذا ماعذبوك
ادري وليش هيج كاتل جدهم اني
اوف اني عليه گلت الك وانت حر اني يومين ومسافر
الله وياك اخويه وماقصرت
تحاضنه وطلع حسيت كلام يزن بااذاني زن ظليت افتر بغرفتي احاول استجمع افكاري ولازم تحضرني ذكريات الحزينه
همام همام الحكني يمه راح اجيب
يمه هسه اصيح بيبي واجي
صيح عل ابوك يمه
يمه ابويه ماادري وينه اصيح بيبي وخالو اسامه
رحت ركض عل بيت جدي اهل امي وكلت البيبي عل امي راح تجيب وابويه مموجود جان خالي كاعد يتريك نفض ايديه وكال هو ابوك يايوم جان موجود شو كله اسامه اختك دتجيب اسامه اختك تمرضت اسامه اختك راح طهر ولدها خزرته بيبيتي وسكتته كوم لعد انت اخوة غير تعتمد عليك
اي وزوجها بس يعرف يحبلها واني ابتلي
اووه لاتجي اروح وحدي
لا عل بختج يمه اني غير احجي لمصلحتها هذا زوجها لو باايدي اشرب من دمه
امشينا مو وكت هل حجي
رجعنا للبيت وامي عل درج تتتلوى من الم وعلي كاعد بالزويه يبجي عباله امي راح تموت جان عمري 11سنه وعلي 10 سنه راح خالي عل امي وگومها هو وبيبي واخذوها للمستشفى قبل متطلع امي كمشتني وكالت دير بالك عل اخوك وراحوا 
رغم ان احنه جنا بيت اهل ابوي بس محد مد راسه وسال علينه وسوا النه اكل اني واخوي للظهر اجت بيبي ام ابويه وتسال عل امي الغرفتنا من شافتنا عرفت بينا جوعانين وبلا ريوك ولاغدا ام ابويه مرا جبيره وصحتها عل كدها كدرت تسلك النه بيض وتوكلنا ظلينا اليوم كله وحدنا ننتظر امي للمغرب نزلنا من غرفتنا عل غرفة ام ابويه لان جعنا نريد اكل ..
دخل ابويه من برا جان مترب وهلكان صاحت عليه بيبي
جاسم جاسم
ها يمه رايده شي
تعال يمه وليدي هاي ولدك اهنا
ليش وين امهم
راحت عل مستشفى تجيب
صدك هيه الا هسه حبكت عدها
يمه هاي ولاده شلون يعني قابل بكيفها
والله تعبان من الصبح ليهسه واكف عل راس عمال يبنون لااخويه وباجر من الصبح اروح التحق للجبهه مالي خلك اروح للمستشفى
ابني هاي مرتك من صبح راحت تجيب ومنعرف شي غير تروح تشوفها
اي اي راح اروح اوف
رحت عل ابويه وكمشت ايديه وگتله جوعان يابه
انوب جوعان روح اكل اي شي مناقصك اني…
كلماته جانت قاسيه كلش عليه رحت عل ثلاجه طلعت جبن  ولبن وكعدنا ناكل اني وعلي
لليل رجع والدي وكال جابت ولد وسميته مروان جان ضايج ويفشر عل خالي الي ظاهر متعارك وياه صعد نام ومن غبشه راح التحق للجبهه والصبح اجه خالي اخذنا البيت جدي لان امي اهناك جانت فرحة جبيرة واني اشوف اخويه الجديد صغير وابيض شكله حلو حبيته وامي جانت تعبانه ونايمه بستها من راسها فتحت عينها وسالتني عل علي كتلها زين الحمدلله راح عل بيت خالي يلعب ويه ولدهم… .

همام همام 
ها يابه خير
وليدي تعال احجي وياك
اي يابه
اشر الي اكعد يمه عل كرسي كعدت يمه راح جاب جيس اسود وحطه ابين اديه وكلي هاي جم فلس الك
مال شنو هاي
هاي مال سفرك
مااريد اسافر
لا تسافر سوي النه مكان واحنه نلحك بيك مالك بعد عيشه بهذا البلد
يابه مااكدر اعوفكم
لاتخاف علينا احنه بس تسوي مكان النه نجي وراك
وعد توعدني انكم تجون ورايه
وعد ياابني بس انت سافر ويصير خير… .

من الصبح رحت كملت مسلتزمات مال سفر كالو اسبوع ويطلع جواز خلال هذا اسبوع اني ساعه ابجي وساعه اضحك وساعه افتر بالشوراع اعظميه يعز عليه
اتركها اترك كل ذكريات وابدي بغير مكان مااعرف عنه شي جانت صعبه بطريق شفت امريكان سادين طريق ويفتشون انحصرت سيارتي ابين سيارات مااكدر اتراجع اني جنت شايل مسدس 🔫 مالتي اعرف هل شي ممنوع وبااخص بااعظميه تعتبر منطقه ساخنه وهل شي ممنوع وصلت للسيطرة شفت مترجم سالني شايل سلاح باوعت اله كتله اي وعندي رخصه بيه
شنو رخصه بيه اطلع من السياره
اجه امريكي وبدا يشرح اله مترجم مااعرف شكال اله وراه اجه ضابط مالتهم وجان متنرفز مااعرف ليش عل غفله بطحوني بالكاع وشدوا ايدي بشناطه مااعرف شسويت حاولت اقاوم بس عالجوني بضربه عل راسي دخت وشمروني بالهمر مالتهم ..
وره مااعرف شكد صحيت راسي يوجعني وبعدني مشدوده ايديه وعيوني معصوبه الكاع جانت من اسفلت وغرفه تخنك ولااعرف الوكت ولااعرف ليش اعتقلوني كوني مااعرف لاليل ولانهار بس حسب تقديري ضليت 24 ساعه عل هل حال حاولت بكل الطرق اكوم عل حيلي واوصل للباب مكدرت وره وكت قدرته 36 ساعه انفتحت باب ودخلوا اثنين سحلوني لخارج الغرفه مااعرف وين موديني واحد من جنود جان مرا  ميزتها من صوتها دخلوني الغرفه وكعدوني عل كرسي وضلت عيوني وايديه مشدوده ربع ساعه او يمكن اكثر حسيت دخلوا عليه مره لخ هل مره جان واحد بيهم عراقي وكلي احسن الك تحجي ولاتضل ساكت
ضليت افر براسي اريد افهم شنو مشكله وليش اعتقلوني رجع حجه ضابط امريكي امرهم يشيلون عصابه من عيني فتحوها العيني الغرفه جانت صغيره وكدامي امريكي وكدامه ملف مال اوراق ويمه مترجم العراقي واكو واحد لاخ ورايه مكدرت اشوفه زين
انت ضابط امن بالنظام السابق ومتنمي للحزب البعث
اني ملازم ثاني وضابط تحقيق بالشرطه يعني معليه شغل بالسياسه واذا عل انتمائي للحزب البعث فكل العراقين جانوا بالحزب وحته انت يافهيم !
جوابي نرفز المترجم مااعرف شكال للامريكي
رجع سالني مترجم يعني تعترف انك الى هسه ويه حزب البعث
عمي هاي شبيك اني انسان عادي واريد اعرف شنو تهمتي وليش اعتقلتوني
بدوا ابينهم يتباحثون
شوف انت بلا لف ولادوران انت الى هسه ويه الحزب البعث وهاي تهمتك واعتقلت بحوزتك سلاح انت تساعد المقاومة او تمولهم
لا اني ممساعد لامقاومه ولا اي احد
افضل ان تعترف وتسهل امر علينا
يابه شااعترف اني انسان عادي ولااعرف شي عن مقاومة
صار عصبي امريكي من ترجم اله الحجي ولم اوراقه وطلع واجه ورايه شدوا عيني مرا لخ بديت اتحرك واوخر بيهم التموا عليه كفخ وضرب وسحلوني وذبوني بالغرفه مرا لخ… .
الغريب بالموضوع انهم يجيبون الي اكل بلا مايفتحون عيني او ايدي ويودوني للحمام واني مقيد احير شلون اكل او شلون اقضي حاجتي…
بسبب عصبيتي زايده جنت اتنرفز هوايه وامااطيع اوامرهم هل شي خلاهم ياذوني متحملت امريكي يتحكم بيه وزاد غضبي مترجم الي جان متعاون وياهم والي يوجه اهانات واني ابن بلده كبرت شغلة مالتي وايام توالت عليه لايوم ولايومين كله مقيد ومعصوب العين ..
وهل شي جان اكيد عقوبه الي من رب العباد علمود اني ظلمت هاي ابنيه راد مني اضوك طعم الظلم

ام احمد