بين الماضي والحاضر
همس القوارير
بيج قصص همس القوارير
البارت الثالث
مرت ٣ سنوات على وفاة ابويه الله يرحمه وكان وضعنا المادي سيئ طبعا يوم ناكل ويوم لا على الخرجيه الي ينطينياها عدنان ومرات من انسى شي او التهي يگطع منها ورى ٣ سنوات قرر عدنان يتزوج ويكونله عائله وبده هوايه يتغيب عن المحل خطبناله بنت عمي لان هو كان معجب بيها من زمان وفعلا صارت القسمه وتزوج هنا بده يخف عليه الضغط وخلال هاي الفتره تعلمت الشغل كولش زين واني اصلا ذكي واستيعابي سريع وحبيت شغلي همين فصرت اسطى بشغلتي وعدنان هواي ضل يعتمد عليه ومرات يجينا شغل صعب هو يستلمه اني اعرفله بس اخاف اجازف لان اذا غلطت عدنان يموتني ضليت ويه عدنان بمحل ابويه الله يرحمه واشتغلنا سوه من بعد زواج عدنان شويه خفت قساوته عليه بالرغم من كان قاسي بس كنت كولش احبه ولو ما قساوته ما سواني رجال وخلاني صاحب صنعه هنا زادت خرجيتي من كمت اطلع للشغل بدل عدنان وبدينا نتنفس شويه والحمدلله صار عمري تقريبا ١٩ سنه جانوا جوارينا بيت ابو قحطان الي يمنا علاقتنا كولش قويه بيهم عدهم ولد اثنين واربع بنات كانوا البنات يجون على خواتي للبيت وكانت وحده بيهم كولش حلوه اسمها بسمه بصراحه كنت حيل معجب بيها كلما تجيلنا اضل اباع عليه وهي همين تبادلني النضرات كنت ما أنام الليل افكر بيها وكنت اتمنى اشوفها يوميه واحب اتقربلها تقربت من اخوها لان بيه ريحتها واحب اسمع اخبارهم منه بقيت سنه كامله احبها وتحبني بدون ما احد يكول للثاني الى فد يوم من الايام اجتي امي
امي : ها يمه شلونك
عساف : هلا بيج يمه بخير
امي : يمه ما ناوي تتزوج وتفرحني
عساف : ان شاءالله يمه عن قريب واكولج روحي خطبيلي
امي : يمه اني مشتهيتلك بنت خالتك نور ادب واخلاق وجمال
عساف : لا يمه ما اريدها اعتبرها مثل اختي
امي : ليش يمه شجابها على خواتك اخاف ابالك وحده وما تكولي من تالي ضليت تضم عليه
عساف : هههه اي يمه ابالي واريدج ترحين تحجين ويه اهلها نسوي خطبه بس ونكمل واكون نفسي ونتزوج ورى السنه
امي : يا يمه غير اعرف منو يجوز مو من ثوبنا
عساف : لا يمه من ثوبنا وبنت صاحبتج ام قحطان
امي: والله عرفتك خال عينك على بسومه ونعم ما اختاريت يوم ان شاءالله العصريه امر عليهم واشوف شنو مايهم بلكت والله وتصير من نصيبك فدواتك اثاريك خوش مختار ملعون ههههه
عساف : ههههه اي والله يمه استعجلي فدوه لعينج
امي : يااا هنوب استعجل هستوك ما تريد يمه منك ابو البلاوي اروحلهم اليوم يمه لا يضل بالك
وفعلا طلعت توكلت على الله للمحل قبل ما يجي عدنان رحت للمحل وما اصدك ارجع للبيت حتى اشوف امي راحت لو لا واعرف شنو الاخبار
وفعلا عزلت المحل من وكت ورحت طاير لبيتنا
عساف : السلام عليكم
امي : وعليكم السلام يمه شو اليوم من وكت شعندك
عساف : يمه تعالي ا ريدج بحجايه
امي : اعرفك شتريد تعال اكعد يمي شوف يمه الحياة قسمه ونصيب ومو كلشي نريده بالدنيا نحصله انت بعدك شاب والعمر گدامك يمه ما اريد شي يأثر عليك وليدي
عساف : تگولي رفضوني وفضيها
أمي : يخسون يرفضونك وانت زينة الشباب وربي كيفو بس البنيه محجوزه لابن عمها ويكولون خلي يختار اي وحده من البنات اله هي لان قارين فاتحتها على ابن عمها وما ترهم يبطلون يمه شتگول انت
عساف : واني ما اريد اتزوج اله هي واذا خليتولي ملكات جمال العالم هم ما اريدهن خلاص سدي الموضوع
امي : اوووف يا يمه حضك مثل حظ امك وين ما تذبها سوده مصخمه ربك كريم يمه والزمن كفيل ينسيك الي تحبها
عساف والدمعه بعيني
ومنو گالج اريد انساها
عفتها لامي وكمت رحت تمددت بفراشي لا تعشيت ولا شي وامي تصيح عليه واني بغير عالم حسيت مثل واحد كان بالسمه ووكع بالگاع انقهرت حيل وتأثرت بس ما بجيت اخر دمعه نزلت مني من طشر عدنان غراض المحل وگالي رتبهن هنا بده گلبي يقسه صارت شخصيتي قويه وگلبي صار قاسي بس ما اعرف شلون ضعفت ويه بسمه المهم صنعت نفسي بنفسي صرت كلما اشوفها لبسمه گلبي يرف عليها واباعلها وكلي حسره وقهر وهي همين من تباوع عليه احس الدمعه بعينها رغم كنا ما نسولف سوه بس شكثر جانت عيونا تحجي وجنت من اسلم عليها واگولها شلونج بسمه احسها مو شلونج احسها مشتاقلج جانت الحجايه كوه تطلع مني وهي همين خجوله كانت حلوه وعيونها ملونه اذوب وانسى نفسي من اشوفها وبعدين ارجع اتذكر هي مو ألي واطلع من مكاني وارجع لحياتي اوووف يالقهر بعد شتريد مني الدنيا حرمتني من ابويه وهسه حبيبتي بعد شضامتلي هالدنيا گلت كافي اغض النضر عن الموضوع وارجع لشغلي ولحياتي مهما يكون صارت لغيري وعيب عليه اشوفها بغير نضره هذا حلال العالم ربي يستر على حلالنا طبعا علاقتنا بيت ابويه الثاني كانت عاديه يعني نطب ونطلع عليهم واحنا الاخوان حنيه وحب بينا وما فرقونا عنهم من الناحيه العاطفيه لان ميكدرون ماخذين كول حقوقنا واحنا ساكتين بس امي ومرة ابويه ولا يتوالمن بعدهن نفس الحقد والغيره من اروح يم مرة ابويه عود تسأل على أمي ههههههه شلونها حليمه ام عطوب ومن اروح يم امي شفتها للنسره مرة ابوك والله مرات اضحك من گلبي على سوالفهن ولا يجوزن وكلما يكبرن يزيدن بالغيره كبروا اخواني وهمهم كبر وياهم واختي تزوجت وبقت وحده ويانا بالبيت واخواني يدرسون واني اصرف عليهم صار بعد اربع اشهر من خطبتي لبسمه ورفضوني تزوجت ابن عمها وهنا كرهت الدنيا وكرهت نفسي تقريبا ضليت شهرين يالله تجاوزت المحنه وبعدها وگفت على حيلي من جديد واستعاديت قوتي وحاولت اتناساها لبسمه لحد ما صار عمري ٢١ سنه
لحكايتي بقيه
لا احلل ولا اهب لكل شخص يرفع اسمي او اسم القصه او اسم البيج وهو خصيمي يوم القيامه
