بين الماضي والحاضر
همس القوارير
بيج قصص همس القوارير
البارت الرابع
من صار عمري ٢١ سنه مسئوليتي كبرت والحمل صار ثگيل عليه جبت عمري متعوب والحمدلله على كل حال فد يوم اخويه مختار اجاني طبعا عمره ١٦ سنه وكرار عمره ١٣ سنه
مختار : عساف اني اريد اكمل دراستي وعشمي بيك انت تدري الحال
عساف : عيوني الك حبيبي انت تأمر والله ياريت تكملون دراستكم وتفرحوني ولا تشوفون الشي الي اني شفته
مختار : اني اريد ادخل محاماة حتى افيدكم وافيد نفسي لشوكت احنا هالشكل
عساف : ماشي اني راح احجي ويه عدنان بلكت يساعدنا بمصاريف الكليه
مختار : ماشي يا خوي ربي ما يحرمنا منك
وفعلا من رحت للمحل لگيته لعدنان جاي من وكت گلت احجي وياه بلكت يلين گلبه
عساف : السلام عليكم
عدنان : وعليكم السلام
عساف : عدنان اريد استشيرك بموضوع وانت اخونا الكبير ومسؤل عنا
عدنان : خير ان شاءالله شعندك
عساف : مختار يريد يكمل كليه يدخل قانون ويريد يصير محامي
عدنان : اي ليش لا شكو بيها
عساف : بس انت تعرف البير وغطاه وتعرف الامكانيه محدوده واني ما اگدر على مصاريف الكليه
عدنان : شوف راح اتفق وياك اتفاق راح ازيد خرجيتك بس شتگول انو انت عندك شغل اضافي ودتشتغل بيه اذا درت امي انو اني ازيد خرجيتك راح تطين عيشتي وعيشتك افتهمت لو لا
عساف : الله يخليك النا يارب ولا تخاف الحجي الي صار بيني وبينك والله الشاهد
عرفت انو عدنان القساوه الي بيه مو منه من امه لان سبحان الله هي الام الي تقرب وهي الي تبعد ومرة ابويه من الاول تكرهنا ما اعرف شنو ذنبنا بس لان تكره امي كرهتنا وفعلا مشينا على اتفاقنا وعدنان زيد الخرجيه وبقيت شاطر بشغلي والناس گامت تحب شغلي اكثر من شغل عدنان وصرت الكل بالكل ومن اخلص شغلي بليل اروح العب طوبه ورياضه ويه جماعتي وجسمي صار مرتب واني اصلا حلو وشخصيه فد يوم من المرات واني كاعد بالمحل اجتي وحده نعرفها جانت جوارينا قبل وشالوا من منطقتنا وياها بنيه شابه ويسمونها ام شهد
ام شهد : شلونك يمه عساف شخبارك
عساف : الحمدلله يمه بخير الله يسلمج أمريني
ام شهد : يمه جنت ماره بالسوك وگلت امرن عليك فد مره اريدك تسويلي كنتور ابو اربع بيبيان وكوله خانات واريده صاج ومرتب من شغلك الحلو
عساف تأمريني أمر خالتي باجر امركم واخذ القياسات واشتغل بيه وان شاءالله يكون مثل ما تردينه
ام شهد : يا بعد خالتك ما تقصر انتضرك باجر الصبح ان شاءالله
عساف : خير ان شاءالله
تردون الصدك اشو البنيه الي وياها اول مره اشوفها هي حلوه بس سمره شويه المهم رحتلهم يوم ثاني وطلعتلي نفس البنيه من فتحتلي الباب تحجي بسرعه وتلفت اسمها شهد
شهد : هاك عساف هذا رقمنا الارضي واليوم بليل اريدك تخابرني يلا فوت
اني استغربت شعدها هذه وياي اني مو من طبعي ادخل بيوت العالم واتفرج على حريمهم كانت عيني مليانه وتربيتي ما تسمحلي
المهم كملت شغلي واخذت القياس الي يردونه واشوفها للبنيه تدخل وتطلع مره جاي ومره ماي ومره حلو اني عرفتها خاله عينها عليه بس اشو ما ارتحت للسالفه من بعد ما كملت شغلي رجعت للبيت واني داغير ملابسي طلعت الرقم من جيبي وتذكرتها لشهد گولت خلي ادك عليها واشوفها شنو تريد
عساف : الوووووو
شهد : عساف مو جنت انتضرك
عساف طبعا اول مره احجي ويه بنيه بالتلفون بحيث تلبكت وما اعرف شنو احجي وايدي مرتبكه
شهد : عساف اني اعرف بيك مستغرب مني بس اني كلما اروح ويه امي للسوك عيني تبقى عليك واتمنى تباوعلي حاولت اكثر من مره اعترفلك بحبي بس انت ما انتبهت
عساف : عذريني اني ملتهي بالشغل وحياتي كولها جديه ما عندي وكت للحب والغرام
احجي وياها وبالي بسمه اتحسر عليها اوووف يا حلم عمري
شهد : انطيني فرصه اعبرلك عن حبي واثبتلك انو اني معجبه باخلاقك وطبعك وبيك كولك
عساف : ما اعرف شهد براحتج الي يعجبج سويه
شهد : ههههه شنو داخذ رايك بثوب اشتريه عساف حاول تبادلني نفس المشاعر لا تحجب عواطفك عني
عساف : ماشي يصير خير ان شاءالله
وضلينا نسولف ساعه تقريبا بصراحه ارتاحيتلها للبنيه بس كلما اتذكر الاسلوب الي اجتني بيه اضوج
بعد هالحادثه ضلينا اني وشهد يوميه نتخابر ونسولف بالساعات بصراحه دمها خفيف وحبابه وعجبتني حيل بس مو مثل بسمه حب عمري لان اول حب بحياتي
المهم ضلت حياتنا طبيعيه وصارت عندي جرئه احجي ويه عدنان انو نخلي الشغل بالنص لان اكثر التعب عليه وفعلا فتحت وياه الموضوع
بالبدايه عصب وگام يعيط عليه بس بعدين هددته اذا مو بالنص افتحلي مشروع لوحدي واسترزق منه لان اني صاحب صنعه وعندي مسئوليه اهلي واخواني وراهم زواج واني هم اريد اشوف حياتي وطبعا راح وسولف لمرة ابويه لان عدنان كول صغيره وكبيره ياخذ رأي امه من بعد ما حجه ويه امه اجتي هدت علينا للبيت
مرة ابويه : ولك عساف صاير رجال براسي من شوكت تكبر على اخوك علمتك ام عطوب على خباثتها
امي : هم دخلتيني بالنص هو واخوه انتي ياهو مالتج تدخلين لو البيج ما يخليج
مرة ابويه : واخوه هذا منو مو ابني اشو انتي وابنج طالعلكم ريش
عساف : يمه ماكو داعي هالحجي اني حجيت ويه عدنان واتفقنا اذا ما عاجبكم جيبيلكم عامل وخلوه بمكاني اني هم اريد اشوف حياتي
مرة ابويه : والله طالت وتشمخت ما بقيت اله انت وهاي امك العوبه تحطون راسكم براسنا
عساف : ماكو داعي هالحجي ترى انتم اهلي واني ما اريد اخسركم وما طلبت غير حقي
خلت دفرته للباب وطلعت زعلانه
امي : يمه ما تعوف هاي السالفه العدنا مكفينا هاي مرة ابوك مراح تسكت
عساف : يمه رحمه لموتاج خليني اخذ قرار مره بحياتي كافي گضينا عمرنا واحنا مضلومين والسبب خوفج منها خليها شنو تريد تسوي خلي تسوي ما يهمني ربج الرزاق والمكتوب لازم نشوفه
امي
والله خايفه يوم خاف يطردونك واحنا شناكل وشنشرب
عساف
ميگدرون يوم هسه تشوفين لا تخافين
ورى تقريبا ساعتين واجاني اخوي من ابوي الي اصغر من عدنان وابلغني بموافقتهم انو يحسبولي نص دخل المحل
لحكايتي بقيه
لا احلل ولا اهب لكل شخص يرفع اسمي او اسم القصه او اسم البيج وهو خصيمي يوم القيامه
