بين الماضي والحاضر
همس القوارير
بيج قصص همس القوارير
البارت الثامن
من عرفنا بوفاة مرة ابويه رحنا ركض اني واخواني وأمي لگيناهم يكسرون الخاطر صراخ وبجي مهما يكون امهم وشمعة بيتهم طفت تلگاني عدنان حضني ويبجي واني همين بجيت وضليت اصبر عليه واحجي وياه وضليت واگف بالعزى مالتهم ٣ ايام حتى لبيتي ما اروح ولا للمعرض لان المصاب مصابنا ورى الفاتحه بأسبوع رجعنا لحياتنا وشغلنا ورجعت علاقتي بيت ابويه مثل الاول ورجعت علاقتي بعدنان والحمدلله والشكر هو همين مطور شغله وحالته الماديه زينه والحمدلله واخواني كل واحد شاف حياته وتزوج واستقر لحد الان حياتي مستقره والحمدلله والشكر لحد ما ذاك اليوم اني گاعد بالمعرض مالتي وكنت داحجي بالموبايل مالتي ما اشوف اله وحده دخلت للمعرض بيني وبين نفسي اني وين شايفها ياربي كمت على حيلي معقوله لا ما اصدك هذه بسمه بسمه الي حبيتها اول شبابي حبي الاولي الي خلاني اتجرع المر والمرار لحد ما نسيته هنوب متغيره حيل وصايره تخبل احلى من الاول قاطات اجتي هي واخوها قحطان هو عرفني وسلم عليه ويسال عني وصار حوار بينا
قحطان : هذا عساف هاا خويه شلونك شخبارك عاش من شافك
عساف : هلا خويه هلا انت شلونك شخبارك وين ذبتكم الدنيا وشلون اوضاعكم
قحطان : والله بخير يا خويه شلون صدفه حلوه وشلون دنيا صغيره التقينا بعد هذا العمر
عساف : اي والله خويه تعال سولفلي عن احوالكم
ودرت على بسمه شلونج خويه بسمه مو
قحطان : اي والله بسمه همزين بعدك تذكرنا وما نسيتنا خطيه تطلگت من زوجها
عساف : لا خويه شلون انساكم انتم اهلنا بس شلون تطلگت خطيه
قحطان : هذه سالفه طويله بعدين اسولفلك عليها المهم احنا جايين هسه على غرفة نوم لاخوي الصغير نريد نزوجه وبالصدفه دخلنا المعرض
عساف : خويه المحل محلكم وانت براحتك شنو الي يعجبك اختاره ولا تفكر بالسعر احنا اخوان وما نختلف
ضليت افتر وياهم واشوفهم الغرف بس بسمه ما شالت عينها من عليه واني كلما اشوف قحطان ملتهي اباوع عليها بشوق وحنين للماضي اووووف رجعتني سنين ضلت تباوعلي وبين فتره وفتره اباوع عليها لحد ما اختاروا غرفه وطيحتلهم بالسعر لعيون بسمه وانطيتهم كارت المحل اذا يحتاجون شي يتصلون وطلعوا
من طلعوا احس روحي راحت وياهم بسمه يا شمعة عمري يا بهجة حياتي اوووف شلون دنيا رجعت سنين وعبالك مراهق وداحب من جديد نسيت نور ونسيت جهالي وضل فكري كوله بيها وتمنيت احجي وياها واوصلها واعرف شنو قصتها ضليت يومي كوله فرحان وحجايه اركز عليها وحجايه لا ومرات اضحك لوحدي مثل الخبل ههههه تالي صحيت على نفسي شنو الي صار وياي ونور الي عمري ما سمعت منها حجايه مو زينه او شكوه وجهالي احجي ويه نفسي واگول اصحى عساف لا تعيد غلطة ابوك وتتزوج على نور ومات وهو ما مرتاح وما اريد اعيش جهالي الضيم الي اني عشته ويصير حقد بين الاخوان مثل ما صار وياي ما اريد واحد منهم ينضلم من اقرب الناس اله لا خلاص لازم اصحى على حالي لا بسمه ولا غيرها خلاص بيتي ومرتي وجهالي واهلي وبس مالي غيرهم هذا كوله احجيه لنفسي او اقنع نفسي بيه بس اشو بقت ابالي ونضراتها متروح من خيالي معقوله الزمن يجمعنا من ثاني معقوله هيج الدنيا صغيره اوووف يالقهر ما اعرف شسوي شنو هالصدفه ضليت ما اعرف شلون افكر رجعت للبيت دايخ
نور : عساف شبيك حبيبي اشو احسك مو طبيعي
عساف : ما بيه شي سلامتج بس ضغط الشغل وتعبان
نور : سوده عليه حبيبي والله دتعب لخاطرنا ربي يخليك ألنا
عساف : شعندي غيركم اهم شي بالدنيا راحتكم ربي يخليكم ألي
نور : هسه اصبلك عشى علمود تنام وترتاح
عساف : ماشي واني ادخل اسبح
ينزل المي على وجهي وجسمي واني بغير عالم فكري مشغول وما فارگت بالي واتعوذ من الشيطان واعوف السالفه وارجع افكر بيها المهم حاولت اتناسى الموضوع وكعدت يم نور واحاول اكون طبيعي عدت ايام على لقائي بسمه وبديت أغض النضر عن الموضوع وعفت السالفه وخليتها على الله الى ان اجه اليوم الي اخذوا بيه الغرفه مالت اخوها لبسمه وطلبوا مني اجي لبيتهم اشدلهم الغرفه واخذت منهم العنوان ورقم قحطان وعزموني عالغدى الاتفاق انو اشد الغرفه واتغدى عدهم وبلغت نور وأمي انو ما اجي عالغدى لان عندي شغل مهم وفعلا اخذت العنوان ورحت لبيت بسمه وكلي لهفه بلكت اشوفها واكحل عيوني بشوفتها ما اعرف شعور مينوصف شي اريده وافرح بيه وبنفس الوقت ما اريده واخاف منه يمكن كان شعور الضمير او ما اعرف افسر الي بداخلي
لحكايتي بقيه
لا احلل ولا اهب لاي شخص يحذف اسمي او اسم القصه ويكون خصيمي يوم القيامه
